Mun na an bɛ an ka san o san tile saba lajɛbaw diyabɔ kosɛbɛ? Iko fɔlɔfɔlɔ Israɛl kɔnɔ, tuma caman, an ka sisan tile saba lajɛbaw bɛ cogoyaw di an ma ka Jehova bato ni an krecɛn ɲɔgɔn kɛmɛ caman walima ba caman yɛrɛ ye. An bɛ dumuni tulumaba diyabɔ alako ta fan fɛ. An bɛ waati min kɛ ni an teriw ani an ka denbaya ye, an bɛ nafa don o waati la fana. An ka waleɲumandɔnba de bɛ an bila ka taa tile saba lajɛba donw bɛɛ la.

Ni an ye cogoya sɔrɔ ka an lajɛ, an yɛrɛbakun bɛna nafa min sɔrɔ, an mankan ka miiri o dɔrɔn na nka an bɛ se ka kanuya jira tɔw la cogo min na, an ka kan ka miiri o fana la. (Galasikaw 6:10; Heburuw 10:24, 25) Ni an bɛ da yɛlɛn an balimakɛ walima an balimamuso ye walima ka sigilanw ta an mago bɛ minnu na dɔrɔn, an b’a jira ko an bɛ miiri an mɔgɔɲɔgɔnw ko fana la. (Filipekaw 2:3, 4) Tile saba lajɛbaw bɛ cogoya ɲumanbaw di an ma ka teri kuraw sɔrɔ. An bɛ se ka an kuntilenna kɛ ka kuma mɔgɔw fɛ an tun tɛ minnu dɔn, ka o kɛ sani porogaramu ka daminɛ, a bannen kɔ ani lafiyɛn waatiw la. (2 Kɔrɛntekaw 6:13) An bɛ teri minnu sɔrɔ o waatiw la, teriya bɛ se ka to an ni olu cɛ fo badaa! Wa mɔgɔ wɛrɛ minnu ɲɛ bɛ an na, ni olu y’a ye ko kanuya sɛbɛ bɛ an cɛ, o bɛ se ka olu bila u k’a latigɛ ka fara an kan Jehova batoli la.—Yuhana 13:35.

WIDEYO LAJƐ MIN TƆGƆ YE KO “KANUYA TƐ BAN ABADA”! JAMANAW NI ƝƆGƆN CƐ JAMALAJƐBAW, O KƆ AW KA NIN ƝININKALI NINNU JAABI:

• Mɔgɔ minnu taara jamanaw ni ɲɔgɔn cɛ jamalajɛba la san 2019, kanuya jira la olu la cogo di?

• Kelenya ni kanuya min bɛ Jehova ka mɔgɔw cɛ, mun na o ye dakabanakow ye?

• Ɲɛmɔgɔ kulu mɔgɔw kumana krecɛn kanuya fan jumɛnw de kan?

• Krecɛn kanuya ye kelenya don cogo di an balimaw cɛ Alimaɲe ani Corée du sud?

• An ka kan ka an jija ka mun de kɛ?