An bɛ diɲɛ kɔnɔ min b’a ɲini an k’a miiri ko, ko ɲuman ye ko jugu ye ani ko, ko jugu ye ko ɲuman ye. (Esayi 5:20) Dusukasi ko don k’a ye ko mɔgɔ dɔw bɛ kow kɛ Jehova bɛ minnu koniya, cɛɲɔgɔn ɲini walima musoɲɔgɔn ɲini sen bɛ o fɛnw na. Denmisɛn minnu bɛ lakɔliso la walima mɔgɔ wɛrɛw bɛ se k’a ɲini ka an den kanulenw kunnatiɲɛ u ka tugu olu ka ko kɛtaw kɔ. Aw bɛ se ka aw denw labɛn cogo di u ka se sɔrɔ o kɔrɔbɔliw n’a ɲɔgɔnnaw kan?

A’ye aw denw kalan u ka Jehova ka sariyakolow dɔn. (Levitike 18:3) Bibulu bɛ min fɔ cɛnimusoya ko la, a’ye u kalan o la dɔɔnin dɔɔnin. Aw bɛ min fɔ u ye, o ka kan ka kɛɲɛ ni u si hakɛ ye ani u bɛ se ka min faamu. (Dutɛrɔnɔmɛ 6:7) I yɛrɛ ɲininka: ‘Kanuya jiracogo ɲuman, nafa min b’a la ka fini bɛnnenw don ani u farikolo yɔrɔ minnu ka kan ka sutara, nafa min b’a la mɔgɔ wɛrɛw ka bonya da o yɔrɔw kan, yala ne ye n’denw kalan o la wa? Yala ne denw b’a dɔn u ka kan ka min kɛ, ni mɔgɔ dɔ y’a ɲini ka pornografi jira u la walima ni mɔgɔ dɔ y’a ɲini u fɛ u ka fɛn kɛ Jehova ko min ma ɲi?’ Ni u kɔnna ka dɔnniya sɔrɔ, o bɛ se k’u dɛmɛ u k’u yɛrɛ tanga gɛlɛya caman ma. (Ntalenw 27:12; Waajulikɛla 7:12) Ni aw bɛ aw denw kalan, aw b’a jira ko aw bɛ aw ka ciyɛn nafamaw kanu Jehova ye olu minnu di aw ma.—Zaburu 127:3.

WIDEYO LAJƐ MIN TƆGƆ YE KO AW YE SO JƆ MIN BƐNA TO YEN—AW YE AW DENW LAKANA “KO JUGU” MA, O KƆ AW KA NIN ƝININKALI NINNU JAABI:

• Mun na mɔgɔ dɔw bɛ sigasiga ka u denw kalan cɛnimusoya kow la?

• Mun na bangebagaw ka kan ka u denw kalan Jehova “ka kololi ni a ka laadili” la?—Efesekaw 6:4

• Jehova ka jɛkuluba ye fɛn jumɛnw de di walasa ka bangebagaw dɛmɛ u k’u denw kalan cɛnimusoya kow la?—w19.05-F 12, encadré

• Mun na aw ka kan ka kumaɲɔgɔnya don aw ni aw denw cɛ tuma bɛɛ sani u ka gɛlɛyabaw sɔrɔ?