Kɔrɔbɔliw bɛ se ka an fari faga, kɛrɛnkɛrɛnnenya la ni u kɛra kɔrɔbɔli kuntagalajanw ye. Dawuda tun b’a dɔn ko kɔrɔbɔli minnu tun b’a kan masakɛ Saul kosɔn, ko olu tun bɛna ban don dɔ la ani ko ale tun bɛna kɛ masakɛ ye iko Jehova y’o layidu ta cogo min na. (1 Samuɛl 16:13) Dawuda ka dannaya y’a dɛmɛ ka muɲuli kɛ ani ka Jehova makɔnɔ.

Ni kɔrɔbɔli bɛ an kan, an bɛ se ka baara kɛ ni keguya, dɔnniya ani ko sɛnsɛni hakili ye walasa ka an ka kow cogoya yɛlɛma. (1 Samuɛl 21:12-14; Ntalenw 1:4) O bɛɛ n’a ta, gɛlɛya dɔw bɛna ta’a fɛ ka kɛ yen hali ni an ye an seko bɛɛ kɛ ka kɛɲɛ ni Bibulu sariyakolow ye. O la sa, an ka kan ka muɲuli kɛ ani ka Jehova makɔnɔ. Sɔɔni a bɛna an ka tɔɔrɔw bɛɛ ban ani ka “ɲɛji bɛɛ cɛ ka bɔ” an ɲɛ la. (Jirali 21:4) Ni an ka gɛlɛyaw nɔgɔyali bɔra Jehova yɔrɔ wo walima ni o bɔra fɛn wɛrɛw la wo, fɛn kelen bɛ yen siga tɛ min na, ni o ye ko: Kɔrɔbɔliw bɛɛ bɛ ban don dɔ la. O bɛ se ka dususaalo di an ma.

NIN WIDEYO LAJƐ: KELENYA BƐ JAMAKULU MIN MƆGƆW NI ƝƆGƆN CƐ NIN DIƝƐ FARAFARALEN KƆNƆ, O KƆ AW KA NIN ƝININKALI NINNU JAABI:

• Krecɛn minnu bɛ États-Unis worodugu yanfan fɛ, olu dɔw ye gɛlɛya jumɛnw de sɔrɔ?

• U ye muɲuli ni kanuya jira cogo di?

• U taara a fɛ ka u sinsin ‘ko ɲumanw faranfasili’ kan cogo di?—Filipekaw 1:10