Jehova bɛ ka muɲu nin diɲɛ kɔrɔ, nka yanni sɔɔni a bɛna dan bila o muɲuli la. Diinɛ nkalonmaw bɛna halaki, siyaw faralen ɲɔgɔn kan ka kɛ kulu kelen ye bɛna Ala ka jamakulu kɛlɛ, ani Jehova bɛna mɔgɔ juguw halaki Harmagedɔn na. Krecɛnw bɛ ka o kobaw kɛli makɔnɔ.

Tiɲɛ don ko, an tɛ tɔɔrɔba kow bɛɛ dɔn tigitigi. Misali la, an t’a dɔn a bɛna daminɛ waati min na tigitigi. An t’a dɔn politiki fangaw bɛna u sinsin fɛn minnu kan walasa ka diinɛw kɛlɛ. Siyaw bɛna Ala ka jamakulu kɛlɛli min kɛ, an t’a dɔn o kɛlɛ bɛna mɛn fo ka se waati min ma, ani an t’a dɔn u bɛna o kɛlɛ kɛ cogo min na. An t’a dɔn fana Jehova bɛna baara kɛ ni fɛn minnu ye tigitigi walasa ka mɔgɔ juguw halaki Harmagedɔn na.

O bɛɛ n’a ta, an mago bɛ kunnafoni minnu na walasa ka dannaya ni jagɛlɛya sɔrɔ kow kama minnu bɛna kɛ don nataw la, Bibulu ye o kunnafoniw bɛɛ di an ma. Misali la, an b’a dɔn ko an bɛ “laban donw” laban waati de la. (2 Timote 3:1) An b’a dɔn ko ‘dɔ bɛna bɔ’ diinɛw kɛlɛli “donw dama la” walisa diinɛ lakika kana halaki. (Matiyu 24:22) An b’a dɔn ko Jehova bɛna a ka mɔgɔw tila, fɔcogo wɛrɛ la, a bɛna u kisi. (2 Piɛrɛ 2:9) An b’a dɔn ko Jehova ye mɔgɔ min sugandi o ka mɔgɔ juguw halaki ani ka jamaba lakana Harmagedɔn na, o tigi tilennen don wa fanga b’a la. (Jirali 19:11, 15, 16)

Siga t’a la ko, ko nataw bɛna a to mɔgɔw bɛ “kirin siranba” bolo. Nka Jehova ye a ka mɔgɔw kisi cogoya minnu na don tɛmɛnnenw na, ani a ye ko minnu fɔ don nataw ko la, ni an bɛ o kow kalan ani ka an hakili jagabɔ u kan, an bɛ se ka an “kɔ lawuli ka [an] “kun kɔrɔta,” an dalen a la ko an kunmabɔli surunyara.—Luka 21:26, 28.