Krecɛnw ka furu minnu bɛ ka ɲɛsɔrɔ, olu bɛ nɔɔrɔ da Jehova kan ani ka nisɔndiya lase furucɛ n’a muso ma. (Marka 10:9) Walasa ka furu sɔrɔ min bɛ mɛn si la ani nisɔndiya bɛ kɛ min kɔnɔ, krecɛnw ka kan ka u sinsin Bibulu sariyakolow de kan walasa ka u furuɲɔgɔnw sugandi.

Aw ka jɔ fɔlɔ fo aw ka funankɛninya waati ka tɛmɛn ka sɔrɔ ka mɔgɔ siralabɔ furu kama. O ye waati ye min na cɛnimusoya nege barika bonya kojugu bɛ se ka latigɛli ɲuman kɛli gɛlɛya aw bolo. (1 Kɔrɛntekaw 7:36, NWT) Aw bɛ waati min kɛ cɛganaya walima musoganaya la, a bɛ kɛ hakilitigiyako ye aw ka baara kɛ ni o waati ye ka aw ni Ala ka jɛɲɔgɔnya kologɛlɛya ani ka krecɛn jogow barika bonya aw la. O kɛli bɛna kɛ sababu ye ni aw nana furu, aw ka se ka fɛn caman kɛ walasa aw ka furu ka ɲɛsɔrɔ.

Sani i ka sɔn ka furu mɔgɔ ma, waati min ka kan, i ka o ta walasa k’a ɲini k’a dɔn tigitigi a tigi ye mɔgɔ sugu min ye a “kɔnɔna” na. (1 Piɛrɛ 3:4) Ni i y’a daminɛ ka siga-siga kojugu, kuma o kan ni a tigi ye. I n’a fɔ an ka Hadamadenya ko tɔw la, furu kɔnɔ, i ka kan ka i sinsin kosɛbɛ fɛnw kan i bɛ se ka minnu di i furuɲɔgɔn ma, nka i kana i sinsin kosɛbɛ fɛnw kan i bɛna minnu sɔrɔ. (Filipekaw 2:3, 4) Ni aw ye Bibulu sariyakolow waleya sani aw ka furu, o bɛ kɛ sababu ye aw ka furu hɛrɛma jusigilan ɲuman sɔrɔ.

NIN WIDEYO LAJƐ: I LABƐN FURU KAMA—YƆRƆ 3NAN: “A SƆNGƆ JATE”, O KƆ AW KA NIN ƝININKALI NINNU JAABI:

• Balimamuso ni Shane ka jɛɲɔgɔnya tun bɛ ka taa cogo di?

• Balimamuso ye mun de kɔlɔsi a kɛtɔ k’a ɲini ka Shane dɔn koɲuman?

• A bangebagaw y’a dɛmɛ cogo di, ani a ye latigɛli ɲuman jumɛn de kɛ?