AN KA ƝƐNAMAYA KƐ IKO KRECƐNW
Mɔgɔw bɛ dɛmɛ cogo min na ni kasaara kɛra
Kasaaraw bɛ ka kɛ ka caya ka ta’a fɛ an ka bi donw na dɛ. Ni kasaara kɛra, baara minnu ka kan ka kɛ walasa ka mɔgɔw dɛmɛ, olu ka kan ka labɛn koɲuman ani ka u boloda koɲuman. O de kama, Ɲɛmɔgɔ kulu ye kow sigi sen kan walasa kasaaratɔw dɛmɛni baarada ka kɛ tɔn bolofaraw kelen-kelen bɛɛ la.
Ni o baarada balimaw y’a mɛn ko kasaara kɛra yɔrɔ dɔ la, u bɛ sin ka o yɔrɔ diinɛ makɔrɔw wele teliya la, walasa k’a ɲini k’a dɔn weleweledalaw mago bɛ dɛmɛ minnu na. Ni o kasaara barika bonyana kosɛbɛ, fo o yɔrɔ weleweledalaw tɛ se ka o ko ɲɛnabɔ u yɛrɛw ye, o la, balima minnu bɛ se ka o ko ɲɛnabɔ ka ɲɛ, tɔn bolofara bɛ olu bila ka taa o dɛmɛni baara ɲɛminɛ. O balimaw bɛ se ka dɛmɛ ɲini mɔgɔ ko ta fan fɛ walima bolomafara ko ta fan fɛ ko kɛrɛnkɛrɛnnen dɔw kosɔn. Walima fana, balo minnu ka kan ka di mɔgɔw ma, o balimaw bɛ se ka o balo san ani ka o tilatila o yɔrɔ mɔgɔw ni ɲɔgɔn cɛ.
Nafaba b’a la ka kow kɛ o cogo la. O bolodacogo bɛ mɔgɔw tanga baara fu kɛli, baara ɲagamini, wari ani baarakɛminɛnw tiɲɛni ma. O tiɲɛni suguw bɛ kɛ ni balimaw bɛ baara kɛ ka kɛɲɛ ni u yɛrɛw hakilinaw ye.
Tɔn bolofara ye balima minnu sugandi, olu bɛ se k’a jateminɛ u mago bɛna jɔ wari hakɛ ani mɔgɔ hakɛ minnu na o dɛmɛni baara kama. U bɛ se fana k’a ɲini ka o yɔrɔ faamaw dɔn, olu minnu bɛ se ka an dɛmɛ tuma caman na walasa an ka mɔgɔw dɛmɛni baara ka kɛ teliya la. O la, mɔgɔw man kan k’a bɔ u yɛrɛ la k’a ɲini mɔgɔw fɛ u ka wariw farafara ɲɔgɔn kan, ka fɛnw ci dɛmɛni kama walima ka taa kasaara kɛyɔrɔ la k’a sɔrɔ o ma ɲini u fɛ.
Nka o bɛɛ n’a ta, ni kasaara kɛra an bɛ dɛmɛ fɛ. (Heburuw 13:16) An bɛ an balimaw kanu! O la, an bɛ se ka mun kɛ? Min nafa ka bon n’a bɛɛ ye o ye ko, kasaara ye nɔ bila minnu na ani minnu bɛ ka u dɛmɛ an bɛ se ka delili kɛ olu bɛɛ ye. An bɛ se fana ka bolomafaraw di walasa ka baara kɔkɔrɔdon min bɛ kɛ diɲɛ bɛɛ kɔnɔ. Ɲɛmɔgɔ kulu ka ɲɛminɛli kɔrɔ, tɔn bolofaraw de bɛ se k’a dɔn ka ɲɛ, baara bɛ se ka kɛ koɲuman ni wari ninnu ye yɔrɔ minnu na. Ni an b’a fɛ ka an sen don o baaraw kɛli la, an bɛ se k’o jira an kɛtɔ ka Demande d’admission comme volontaire local développement/construction (DC-50) lafa.
NIN WIDEYO LAJƐ: SANJIBA YE TIƝƐNIBA MIN KƐ BEREZIL, O KƆ AW KA NIN ƝININKALI JAABI:
Mun ye i dabaliban Jehova Seerew ka dɛmɛni baaraw la u ye minnu kɛ sanjiba nali kɔ Berezil san 2020?
