N’an y’a jateminɛ, an b’a ye ko wari ye fɛn ye min ban ka di, n’i magara a la dɔrɔn, a bɛ ban yɔrɔnin kelen. Aw ka furu kɛra a ma mɛn nka aw ka wari duntaw bɛ ka caya kojugu. Yala i furuɲɔgɔn de nɔ don wa? Kana teliya ka a jalaki. Aw y’a jateminɛ ɲɔgɔn fɛ ko min ye nin gɛlɛya lase aw fila bɛɛ ma. a

Yɛlɛmaw kɛli. N’a y’a sɔrɔ i tun bɛ i somɔgɔw ka so sani i ka furu ka kɛ, musakaw bɔli bɛ se ka kɛ fɛn kura ye i bolo sisan. A bɛ se ka kɛ fana ko i n’i furuɲɔgɔn ka kow yecogo tɛ kelen ye ka ɲɛsin wari ma. Misali la, a bɛ se ka kɛ ko wari dunni ka di dɔ ye nka wari marali de ka di tɔ kelen dɔ in ye. Walasa aw ka se ka ɲɔgɔn faamu aw ka furu kɔnɔ ani ka bɛn wari dun cogo ni a mara cogo la, o tɛ taa waati kɔ.

Ka to ka kow kɛli bila waati wɛrɛ la. Jim, o min ye mɔgɔ yiriwalenba ye a ka baara la sisan, o sɔnna a ma ka fɔ ko, ka to ka kow kɛli bila waati wɛrɛ la, o ye gɛlɛyabaw lase a ma a ka furu daminɛ na. A ko: “Ikomi ne tun bɛ to ka facturiw sarali bila waati wɛrɛ la tuma bɛɛ, ne ni n’muso ka wari caman tiɲɛna bawo an tun ka kan ka retari wari fana sara. O la, wariko dɛsɛ ye an minɛ!”

Wari min bɛ dun “karti bancaire sababu fɛ”, o bɛ i n’a fɔ jan. Wari dunni ka nɔgɔn kosɛbɛ ni a bilalen bɛ banki la, karti dɔ kɔnɔ. Ni i bɛ i ka sanniw bɛɛ kɛ ni o karti ye, wari bɛ se ka ban i ɲinɛma. Bankiw bɛ juru dili min kɛ nɔgɔnya la, o bɛ se ka kɛ sababu ye ka furuɲɔgɔnma kura dɔw bila ka juru ta ani k’a dun k’a sɔrɔ u ma jateminɛ kɛ.

Wariko gɛlɛya ju mana kɛ fɛn o fɛn ye, o bɛ se ka na ni gɛlɛyaw ye aw ka furu kɔnɔ. “Furuɲɔgɔnma fanba y’a fɔ ko, u bolola wari ka ca o, u bolola wari man ca o, wari de ka telin kosɛbɛ ka na ni gɛlɛyaw ye furu kɔnɔ” o sɛbɛnnen bɛ gafe dɔ kɔnɔ min tɔgɔ ye ko Fighting for Your Marriage. “Bɛnbaliya caman ju bɛ bɔ wari de la.”

Aw y’a latigɛ ka baara kɛ ɲɔgɔn fɛ. Sani aw ka ɲɔgɔn jalaki, a’ y’a ɲini ka baara kɛ ɲɔgɔn fɛ walasa ka aw ka wari duntaw bɛrɛbɛn. Sani wariko kumaw ka gɛlɛya don aw ni ɲɔgɔn cɛ, a’ ye kuma o kan kabini aw ka furu daminɛ na.—Bibulu sariyakolo: Efesekaw 4:32.

A’ ye aw ka wari duntaw jateminɛ. Aw mana wari fɛn o fɛn dun kalo kelen kɔnɔna na, a’ ye o sɛbɛn, hali ni a kɛra dɔrɔmɛ kelen ye. O b’a to aw k’a dɔn aw ka wari bɛ taa min na ani k’a ye nafa t’a la ka aw ka wari don fɛn minnu na. Misali la, ni dɔ joginna, dɔgɔtɔrɔw bɛ fɔlɔ ka joli lajɔ cogo min na, ‘aw fana ka kan ka aw ka wari dunta nafatanw lajɔ o cogo kelen de la, ka fu siri u la,’ o hakilina bɔra Jim na, o min kofɔra ka tɛmɛn.

Aw bɛ wari don fɛn minnu na, minnu ye waajibi ye i n’a fɔ dumuni, fini, so sara ani fɛn wɛrɛw, a’ ye olu bɛɛ fara ɲɔgɔn kan, ka u sɛbɛn. Aw bɛ wari don fɛn minnu na, a’ ye olu bɛɛ kelen kelen sɔngɔ jateminɛ waati dɔ kɔnɔ, misali la kalo kelen kɔnɔ ani ka u sɔngɔ sɛbɛn.—Bibulu sariyakolo: Luka 14:28.

Wari ka kan ka don fɛn o fɛn na, a’ ye olu bɛɛ kelen kelen sɔngɔ bila kɛrɛfɛ (dumuni, so sara, fini ani fɛn wɛrɛw). Dɔw bɛ o musaka wariw bila envelɔpu caman kɔnɔ, ka o envelɔpu kelen bɛn musaka bɛɛ kelen kelen ma. b Ni envelɔpu dɔ wari bana, o envelɔpu tun bɛnnen don musaka min ma, u tɛ wari bɔ ka ɲɛsin o ma bilen walima u bɛ se ka wari ta envelɔpu wɛrɛ kɔnɔ walasa ka o musaka wari dafa.

Aw hakilina ye min ye ka ɲɛsin bololafɛnw ma, a’ ye o jateminɛ. Ka fɛn kuraw sɔrɔ tuma bɛɛ, an ka hɛrɛ tɛ bɔ o la. Yesu ko: “Katuguni mɔgɔ ka nafolo caya o caya, a ka ɲɛnamaya tɛ bɔ o la dɛ.” (Luka 12:15) Waati dɔw la, aw bɛ aw ka wari don fɛn minnu na, o b’a jira ni aw dalen bɛ Yesu ka o kumaw la walima ni aw dalen tɛ o la.—Bibulu sariyakolo: 1 Timote 6:8.

A’ ye yɛlɛmaw kɛ. “Ka teleso sarataw ta walima ka bɔ ka taa dumuni kɛ rɛstoran na, a bɛ se ka kɛ ko olu tɛ kojugu ye, nka ni aw b’o kɛ tuma bɛɛ, o bɛ se ka gɛlɛyaw lase aw ma wariko ta fan fɛ,” Aaron y’o fɔ, o min furula nin ye a san fila ye. “An jɛra fɛn caman kɔ walasa ka ɲɛnamaya kɛ ka kɛɲɛ ni an ka sɔrɔw ye.”