1-2. (a) Siga-siga jumɛn de bɛ se ka Jehova batobagaw sɔrɔ? (b) An bɛna mun de ye nin barokun in na?

 DENMISƐNW wo, mɔgɔkɔrɔbaw wo, an bɛɛ be sigasiga tuma dɔw la. a Misali la, weleweledala kanbele dɔ be se k’a yɛrɛ ɲininga ni Jehova b’a janto ale la tiɲɛn na. N’a sɔrɔ a be sigasigara ka batize. Wala miiri balimacɛ dɔ koo la min y’a latigɛ a kanbele tuma ka Jehova ka baara kɛ a ɲɛnako fɔlɔ ye sanni ka wari caaman ɲini. Nka sisan, komi wariko gwɛlɛya b’a ka denbaya kan, a be se k’a daminɛ ka nimisa a ka desizɔn na. Miiri balima musokɔrɔba dɔ koo la fana, fanga bɛrɛ tɛ min na. A fari be se ka faga sabu a tɛ sera ka baara kɛ Jehova ye tugun i ko fɔlɔ la. Yala i delila k’i yɛrɛ ɲininga ko: “Jehova b’a janto n’ na tiɲɛn na wa? N’ ye fɛɛn minw bɛɛ saraka Jehova kosɔn, yala kuun b’o la wa? Nafa bele be n’ na Jehova ɲɛɛ kɔrɔ wa?”

² N’an m’a ɲini k’o ɲiningaliw jaabili sɔrɔ, o be se k’an ka limaniya barika dɔgɔya ani k’a to an be Jehova batoli dabila yɛrɛ. Barokun nin na, an bena a ye Bibulu ka sariyakolow be se k’an dɛmɛ cogo min na n’an be sigasigara 1) ko Jehova b’a janto an na, 2) an ka desizɔn dɔw koo la 3) ni nafa bele b’an na Jehova ɲɛɛ kɔrɔ.

 I BƐ SE KA MIN KƐ N’A Y’A SƆRƆ SIGA-SIGA BƐ I LA

3. An bɛ se ka min kɛ n’a y’a sɔrɔ siga-siga bɛ an na, olu dɔ la kelen ye jumɛn ye?

³ An be se k’an ka sigasigali miiriyaw kɛlɛ cogo minw na, u la dɔ ye k’an ka ɲiningaliw jaabili ɲini Ala ka Kuma kɔnɔ. O la, an ka limaniya bena sabati, an be jɛnɲɔgɔnya min kɛra ni Jehova ye o barika bena bonya ani an bena “to lanaya ra.”—1 Kor. 16:13, Biblu Ala ta Kuma.

4. An bɛ se ka ‘ko bɛɛ sɛgɛsɛgɛ’ cogo di? (1 Tesalonikekaw 5:21)

⁴ Vɛrise nin kalan: 1 Tesalonikaw 5:21. A kɔrɔsi ko Bibulu b’an jija an ka “koo bɛɛ sɛgɛsɛgɛ.” Nka an be se k’o kɛ cogo di? N’an lanin tɛ koo dɔ la, an be se ka sɛgɛsɛgɛri kɛ k’a filɛ Bibulu be min fɔ o koo la. Balima kanbele min tun b’a yɛrɛ ɲiningara ni nafa b’ale la Jehova ɲɛɛ kɔrɔ, an ka segi k’ale ka koo lajɛ. Yala a ka ɲi k’a miiri ko komi a b’a yɛrɛ ɲiningara o la, o kɔrɔ ko nafa t’ale la Jehova ɲɛɛ kɔrɔ wa? Ayi. A ka ɲi ka “koo bɛɛ sɛgɛsɛgɛ” walisa ka Jehova ka miiriya lɔn o koo la.

5. Jehova bɛ an ka ɲininkaliw jaabi cogo di?

⁵ N’an be Bibulu kalanna, a be komi Jehova be kumana n’an ye. Walisa k’a ka miiriya lɔn koo tigitigi dɔ la, an ka ɲi ka jijalibaw kɛ. An ka ɲi k’a ɲini k’a lɔn vɛrise minw ɲɛsinna an ka koo ma ani ka sɛgɛsɛgɛri kɛ o kan. O la, Jehova ka ɔriganisasiyɔn ye sɛgɛsɛgɛrikɛ minan minw labɛn an ye, an ka ɲi ka baara kɛ n’u ye (Talenw 2:3-6). An be se ka Jehova deli a k’an ɲɛminɛ an ka sɛgɛsɛgɛri tuma na ani a k’an dɛmɛ an k’a ka miiriya lɔn o koo la. O kɔ, an be se ka Bibulu ka sariyakolow ni kunnafoni nafamanw ɲini minw be se k’an dɛmɛ. Mɔgɔ minw tun be n’an ka miiriya ɲɔgɔn ye ani Bibulu be kuma u koo la, an ka olu ka maana lajɛ fana.

6. Lajɛw bɛ se ka an dɛmɛ cogo di an k’an ka siga-sigali miirinaw kɛlɛ?

⁶ N’an be lajɛnw na fana, a kɛra komi Jehova be kumana n’an ye. N’an be to ka taga lajɛnw na, n’a sɔrɔ an bena hakilinata dɔ sɔrɔ kalan wala lakalita dɔ la min bena an nafa. N’a sɔrɔ an mako b’o lo la tigitigi ka see sɔrɔ an ka sigasigali miiriyaw kan (Talenw 27:17). Sisan, an ka sigasigali miiriya dɔw lajɛ ani k’a filɛ an be se ka see sɔrɔ u kan cogo min na.

NI I BƐ KA SIGA-SIGA KO JEHOVA TƐ A JANTO I LA

7. Dɔw bɛ u yɛrɛ ɲininka mun de la?

⁷ I delila k’i yɛrɛ ɲininga ni nafa b’i la Jehova ɲɛɛ kɔrɔ tiɲɛn na wa? N’i b’a jati ko nafa t’i la, n’a sɔrɔ i b’a miiri ko i tɛ se ka kɛ duniɲa kuru bɛɛ Danbaga teri ye. N’a sɔrɔ masacɛ Dawuda delila ka kɛ n’o miiriya ɲɔgɔn ye. A kabakoyara k’a ye ko Jehova b’a janto adamaden dafabaliw yɛrɛ la. O kama a ye ɲiningali kɛ ko: “Masaba, adamaden ye mun ye, n’i b’i janto a la? Mɔgɔ ye mun ye, n’i be miiri a la?” (Zab. 144:3). I be se k’o ɲiningaliw jaabili sɔrɔ min?

8. Ka kɛɲɛ ni 1 Samuɛl 16:​6, 7, 10-​12 kɔnɔkumaw ye, Jehova bɛ mun de jateminɛ mɔgɔw la?

⁸ Nafa tɛ mɔgɔ minw na adamadenw ɲɛɛ na, Bibulu b’a fɔ ko nafa b’u la Jehova ɲɛɛ kɔrɔ. Misali la, Jehova ye Samuyɛli ci Zese ka soo ko a ka taga a dencɛ dɔ mɔ ni tulu ye walisa a ka kɛ Israɛl masacɛ ye. Zese y’a dencɛ wolonfila weele a dencɛ seegi cɛma k’u ka taga Samuyɛli kunbɛn. Nka, a ma  Dawuda weele sabu ale lo tun ye lagare ye. b K’a sɔrɔ Jehova ye Dawuda lo sugandi (1 Samuyɛli 16:6, 7, 10-12 kalan). Jehova y’a ye kanbele Dawuda tun ye mɔgɔ sifa min ye tigitigi. Alakow tun ka di a ye kosɔbɛ.

9. Mun na i bɛ se ka da a la ko Jehova bɛ a janto i la? (Ja fana lajɛ.)

⁹ Miiri k’a filɛ Jehova y’a yira ka ban cogo min na ko a b’a janto i la. A be ladiliw di i ma ka kɛɲɛ n’i makoyaw ye (Zab. 32:8). O b’a yira ko a b’i lɔn koɲuman (Zab. 139:1). N’i be Jehova ka ladiliw sira tagama ani i b’a ye o b’i nafa cogo min na, i bena la a la ko a b’a mako don i la (1 Til. Kib. 28:9; Kɛw. 17:26, 27). I be jijali minw bɛɛ kɛra, Jehova b’o kɔrɔsi. A ɲɛɛ b’i ka jogo ɲumanw na fana ani a b’a fɛ ka kɛ i teri ye (Zer. 17:10). N’i sɔnna ka kɛ a teri ye, o bena diya a ye kosɔbɛ.—1 Zan 4:19.

NI I BƐ KA SIGA-SIGA KO I MA LATIGƐLI ƝUMANW KƐ

10. Ni an miirila an ka latigɛli tɛmɛnnenw na, ko jumɛnw de bɛna an hakili la?

¹⁰ Dɔw ye desizɔn minw ta, tuma dɔw la n’u miirila o la, u b’u yɛrɛ ɲininga n’u ye desizɔn ɲumanw lo ta. N’a sɔrɔ u tun be baara dɔ la min sara ka ca ani u y’o dabila wala u banna baara dɔ la sabu u tun b’a fɛ ka baara kɛ Jehova ye bɛrɛbɛrɛ. Nka saan caaman tɛmɛna sisan. N’a sɔrɔ u ɲɛɛ be u lɔnbaga dɔw la minw ye desizɔn wɛrɛw ta ani u be ɲɛnamaya kɛra faamanya la. O kama, u be se k’u yɛrɛ ɲininga ko: “N’ sɔnna ka kari fɛɛn minw kɔ walisa ka baara kɛ Jehova ye, yala kuun tun b’o la  wa? Yala n’ fɔnna sababu ɲuman dɔw kɔ wa?”

11. Mun na Zaburu 73 nan sɛbɛnbaga fari tun fagara?

¹¹ N’o ɲiningaliw ɲɔgɔn b’i hakili ɲagamina, a kɔrɔsi Zaburuw 73nan sɛbɛbaga dusukunnakow tun ye min ye. A y’a ye ko minw tɛ Jehova sago kɛra, olu fɛntigiyara ani a be komi gwɛlɛya foyi t’u kan (Zab. 73:3-5, 12). Tuma min na a y’a ye ko a be komi koo bɛɛ be ɲɛna u bolo, a y’a yɛrɛ ɲininga n’a be jijali minw bɛɛ kɛra Jehova ka baara la, ni kuun b’o la. A ko ale “be sigɛn na loon bɛɛ” a ka miiriya juguw kosɔn (Zab. 73:13, 14). A y’o miiriya juguw kɛlɛ cogo di?

12. Ka kɛɲɛ ni Zaburu 73:16-​18 kɔnɔkumaw ye, zaburu sɛbɛnbaga ye a ka fari faga kɛlɛ cogo di?

¹² Zaburuw 73:16-18 kalan. Zaburu sɛbɛbaga tagara Jehova batoso kɔnɔ. O yɔrɔ la, a tun be se ka miiri koɲuman. A y’a faamu ko hali ni dɔw be ɲɛnamaya kɛra faamanya la, u tɛ ni jigiya ye siniɲasigi koo la. A miirila o la minkɛ, o y’a jija. A lara a la ko a kɛtɔ ka Jehova ka baara kɛ a ɲɛnako fɔlɔ ye, o y’a ka desizɔnw bɛɛ la fisaman lo ye. O y’a to a tun cɛsirinin lo kokura ka to ka Jehova sago kɛ.—Zab. 73:23-28.

13. Ni an nimisara an ka latigɛli tɛmɛnnen dɔw la, an bɛ se ka mun de kɛ walasa an ka hakili sigi sɔrɔ? (Ja fana lajɛ.)

¹³ Ala ka Kuma be se ka ele fana dɛmɛ i hakili be sigi kokura. Cogo di do? Fɛɛn ɲuman minw bɛɛ b’i fɛ, miiri olu ni Jehova ka duga tɔɔw la. A to i hakili la fana ko minw tɛ Jehova sago kɛ, u t’a ka dugaw sɔrɔ. Ka ɲɛnamaya kɛ faamanya la, o lo kɔrɔtanin lo kosɔbɛ u fanba fɛ sabu jigiya t’u fɛ siniɲasigi koo la. Jehova b’i dugara cogo min na sisan, a ye layidu  ta ko a bena i duga sini ma ka tɛmɛ o kan fɔɔ ka taga ka na (Zab. 145:16). Miiri k’a filɛ: Yala i be se k’a lɔn tiɲɛn na i ka ɲɛnamaya tun bena kɛ cogo min na n’i tun ye desizɔn wɛrɛw ta wa? La a la ko minw ye koow latigɛ sabu u be Jehova n’u mɔgɔɲɔgɔn kanu, u tɛna fɔn fɛɛn ɲuman si la.

NI I BƐ KA SIGA-SIGA KO NAFA TƐ I LA JEHOVA ƝƐ KƆRƆ

14. Mun na mɔgɔ dɔw dalen tɛ u yɛrɛ la, ani ɲininkali jumɛn bɛ se ka u tɔɔrɔ?

¹⁴ Jehova sagokɛla dɔw b’a fɛ ka koo minw kɛ a ye, u tɛ sera k’o bɛɛ kɛ kɔrɔya, bana wala koo wɛrɛw kosɔn. O be se k’a to u b’a miiri ko nafa t’u la Jehova ɲɛɛ kɔrɔ. U be se k’u yɛrɛ ɲininga ko: “Yala nafa bele be n’ na Jehova ɲɛɛ kɔrɔ wa?”

15. Zaburu 71 nan sɛbɛnbaga tun dalen bɛ mun de la?

¹⁵ Zaburuw 71nan sɛbɛbaga tun be n’o jɔrɔnanko ɲɔgɔn ye. A ye Jehova deli ko: “Hali ni ne barika banna, kana ne fili.” (Zab. 71:9, 18). O bɛɛ n’a ta, Zaburu sɛbɛbaga tun lanin b’a la ko n’a tora ka Jehova sago kɛ kantigiya la, a bena a ɲɛminɛ ani k’a dɛmɛ. A tun b’a lɔn ko minw b’u seko bɛɛ kɛ ka baara kɛ Jehova ye u ka barikantanya bɛɛ n’a ta, olu koo ka di a ye.—Zab. 37:23-25.

16. An balima minnu kɔrɔla, olu bɛ se ka mun ni mun de kɛ minnu nafa ka bon Jehova ɲɛ kɔrɔ? (Zaburu 92:12-​15)

¹⁶ An balima mɔgɔkɔrɔbaw, aw ye banba k’aw ka koow filɛ i n’a fɔ Jehova b’a filɛ cogo min na. A be se k’aw dɛmɛ ka to kantigiya la hali k’a sɔrɔ aw fanga dɔgɔyara (Zaburuw 92:13-15 kalan). Aw tɛ se ka min kɛ tugun, sanni aw ka miiri o la, aw be se ka min kɛ, aw ye sinsin o lo kan. Misali la, n’aw be to  kantigiya la ani n’aw b’aw mako don tɔɔw la, o be se k’u jija. Jehova y’aw dɛmɛ cogo min na saanw tɛmɛtɔ, aw be se k’o lakali tɔɔw ye. Aw kɔrɔtɔnin lo Jehova ka layidu minw ka dafa, aw y’o lakali u ye fana. Aw kana ɲinɛ abada ko aw be delili minw kɛra tɔɔw ye, u nafa ka bon kosɔbɛ (1 Piyɛri 3:12). An ka koow mana kɛ cogo o cogo, an bɛɛ be se ka fɛɛn dɔ di Jehova ani tɔɔw ma.

17. Mun na an man kan ka an yɛrɛ sanga ni tɔw ye?

¹⁷ N’i dusu tiɲɛni lo sabu i tɛ sera ka caaman kɛ tugun Jehova ka baara la, la a la ko i be sera ka min o min kɛ a ye, o ka di a ye kosɔbɛ. N’i ka teli k’i yɛrɛ suma ni tɔɔw ye, o dabila. Mun na do? Sabu Jehova t’i suma ni tɔɔw ye (Gal. 6:4). Misali la, Mariyamu ye tulu kasa diiman sɔngɔ gwɛlɛ dɔ mɔ Yezu seenw na (Zan 12:3-5). Firiyamuso dɛsɛbagatɔ dɔ ye warimisɛn fila don Alabatosoba kɛsu kɔnɔ (Luka 21:1-4). Nka, Yezu m’o muso fila suma ni ɲɔgɔn ye. A y’a jati k’u fila bɛɛ y’a yira k’u limaniyanin lo. Yezu b’a Faa ladegi cogo dafanin na. O la, i be koo o koo kɛ sabu i limaniyanin lo Jehova la ani i b’a kanu, a ɲɛɛ b’o la ani o ka di a ye kosɔbɛ hali n’i t’o jati bɛrɛ ye.

18. Ni siga-siga bɛ an na, an bɛ se ka o kɛlɛ cogo di? (koorilen nin fana lajɛ: “ Jehova ka Kuma be se k’i dɛmɛ ka see sɔrɔ sigasigali miiriyaw kan”).

¹⁸ An bɛɛ be sigasiga tuma dɔw la. Nka i ko an y’a ye cogo min na, Bibulu be se k’an dɛmɛ ka see sɔrɔ sigasigali miiriyaw kan. I seko bɛɛ kɛ k’i ka ɲiningaliw jaabiliw sɔrɔ. O la, sanni i ka hami, i hakili bena sigi. Siga t’a la, Jehova b’i lɔn ka ɲɛ. I ye koo minw bɛɛ latigɛ sabu i b’a fɛ ka Jehova sago kɛ i ɲɛnako fɔlɔ ye, o ka di a ye kosɔbɛ. Ani la a la ko i ko a y’a fɔ cogo min na, a bena i duga o kosɔn. La a la fana ko Jehova b’a sagokɛla kantigi kelen kelen bɛɛ kanu ani a b’a janto u bɛɛ la.