1-2. Mun de ye Yesu ka kalanden fila sɔrɔ ka u to Emayus sira kan?

 SAAN 33 Krista tile la, Nisankalo tile 16, Yezu ka kalandenw dusu tun kasinin lo ani u tun sirannin lo kosɔbɛ. O mɔgɔ fila bɔra Zeruzalɛmu n’u be tagara Emayusi. Dugudennin dɔ lo ani kilomɛtɛrɛ 11 lo b’o ni Zeruzalɛmu cɛ. O cɛɛw dusu tun kasinin lo kosɔbɛ sabu mɔgɔw ye u ɲɛminɛbaga Yezu faga. U jigi tigɛra sabu u tun b’a miiri ko Masiya bena koo minw kɛ, a be komi o tɛna kɛ tugun. Nka kabako dɔ kɛra.

² Lonan dɔ nana ka to ka tagama n’u ye. Min ye Yezu sɔrɔ, kalandenw y’o lakali a ye. O kɔ, o cɛɛ y’a daminɛ ka koo dɔw lakali u ye u tun tɛna ɲinɛ minw kɔ abada. “K’a ta Musa ye kuma min sɛbɛn fɔɔ ka n’a bila kiraw bɛɛ ka sɛbɛnninw ma,” a y’a ɲɛfɔ u ye fɛɛn min kama Masiya tun ka ɲi ka tɔɔrɔ ani ka sa. Tuma min na o cɛɛ saba sera Emayusi, kalandenw y’a faamu k’o cɛɛ ye Yezu lo ye, Ala ye min suu kunu! Miiri k’a filɛ u ninsɔn diyara cogo min na k’a lɔn ko Masiya be niin na!—Luka 24:13-35.

3-4. Yesu y’a yɛrɛ jira a ka kalandenw na o ye nɔ jumɛn bila u la, an bɛ kalan jumɛn sɔrɔ nin kalansen in na? (Kɛwalew 1:3)

³ Yezu tora dugukolo kan tile 40 ka sɔrɔ ka yɛlɛ sankolo la. O tuma na, a y’a yɛrɛ yira siɲɛ caaman a ka kalandenw na (Kɛwaliw 1:3 kalan). A y’a ka kalandenw jija fana sabu u dusu tun kasinin lo ani u tun sirannin lo. O y’u ninsɔn  diya ani k’u jaa gwɛlɛya walisa ka waajuli kɛ ani ka mɔgɔw kalan Masaya kibaro diiman koo la. a

⁴ Yezu ye min kɛ o tile 40 kɔnɔ, n’an ye sɛgɛsɛgɛri kɛ o koo la, o bena an nafa. Barokun nin na, an bena a ye cogo min na Yezu ye baara kɛ n’o wagati ye 1) k’a ka kalandenw jija, 2) k’u dɛmɛ u ka Ala ka Kuma faamu bɛrɛbɛrɛ ani 3) ka fɔrɔmasɔn di u ma walisa u ka se ka kunkanbaarabaw dafa. O koo kelen kelen bɛɛ la, an bena ye an be se ka Yezu ladegi cogo min na.

DUSU DON TƆW KƆNƆ

5. Mun na Yesu ka kalandenw mago tun bɛ a la dusu ka don u kɔnɔ?

⁵ Mun na Yezu ka kalandenw mako tun be jijali la? U dɔw tun y’u ka boon, denbaya ani u ka baara to yen walisa ka tugu Yezu kɔ (Mat. 19:27). U tun be tɔɔrɔ lara dɔw kan sabu u kɛra Yezu ka kalandenw ye (Zan 9:22). Yezu ka kalandenw sɔnna k’o yɛlɛmaniw kɛ ani ka tɔɔrɔ, sabu u tun lanin b’a la ko Yezu lo ye Masiya ye, kiraw tun ye min kofɔ (Mat. 16:16). Nka tuma min na u ye Yezu faga, a ka kalandenw dusu kasira ani u jigi tigɛra sabu u tun t’a lɔn min bena kɛ.

6. Yesu ye mun de kɛ a su kununnen kɔ?

⁶ Yezu ka kalandenw dusu tun kasinin lo a saya koo la minkɛ, Yezu tun t’o jati koo jugu ye. A tun b’a lɔn k’u ka dusukasi kɔrɔ tun tɛ k’u limaniyanin tɛ. O la, a suu kununa loon min na, a y’a daminɛ k’a teriw jija o loon bɛɛ la. Misali la, a y’a yɛrɛ yira Magadala Mariyamu na tuma min na a tun be kaburu daa la n’a be kasira (Zan 20:11, 16). A y’a yɛrɛ yira kalanden fila la fana i ko a fɔra cogo min na barokun nin daminɛ na. Ani a y’a yɛrɛ yira ciden Piyɛri la (Luka 24:34). An be kalan juman lo sɔrɔ Yezu fɛ? A y’a yɛrɛ yira siɲɛ fɔlɔ min na, an k’a filɛ min kɛra.

7. Ka kɛɲɛ ni Yuhana 20:11-​16 la, Nisan tile 16 sɔgɔmada joona, Yesu ye Magadala Mariyama ye ka mun de kɛ ani o ye Yesu bila ka mun kɛ? (Ja fana lajɛ.)

⁷ Zan 20:11-16 kalan. Nisankalo tile 16nan loon sɔgɔma joona, muso kantigi dɔw tagara Yezu ka kaburu daa  la (Luka 24:1, 10). U dɔ ye Magadala Mariyamu ye. An k’a filɛ min y’a sɔrɔ. Mariyamu tagara kaburu lakolon le sɔrɔ. A tagara o fɔ Piyɛri ni Zan ye. O cɛɛw bolila ka taga kaburu filɛ ani Mariyamu tugura u kɔ. Tuma min na u y’a ye ko Yezu suu tɛ yen, u kɔsegira soo. Nka Mariyamu ma kɔsegi. A tora yen n’a be kasira. A tun t’a kala ma, nka Yezu tun b’a filɛra. A y’a kɔrɔsi k’o muso kantigi tun be kasira ale koo la ani a tun b’a fɛ k’a dusu saalo. O kama a y’a yɛrɛ yira a la ani o kɔ, a ye koo dennin dɔ kɛ min ye Mariyamu jija kosɔbɛ. A kumana n’a ye ani a ye kunkanbaaraba dɔ kalifa a ma. A tun ka ɲi ka taga a fɔ Yezu balimaw ye ko a suu kununa.—Zan 20:17, 18.

8. An bɛ se ka Yesu ladege cogo di?

⁸ An be se ka Yezu ladegi cogo di? An be Yezu ladegi, n’an be an balimaw jija u ka to ka Jehova sago kɛ. I ko Yezu, an ka ɲi k’a ɲini k’a lɔn gwɛlɛya minw be tɔɔw kan, k’an jija k’u dusukunnakow faamu, ani k’u dusu saalo. An ka balimamuso Jocelyn ka koo lajɛ. A dɔgɔmuso sara aksidan jugu dɔ la. A ko: “Kalo caaman kɔnɔ, n’ dusu tun kasinin lo kosɔbɛ tuma bɛɛ.” Nka, balimacɛ dɔ n’a muso y’a weele ka na u ka soo ani u y’a lamɛn koɲuman tuma min a tun b’a dusukunnakow fɔra. U y’a minɛ ni ɲumanya ye ani u y’a fɔ a ye ko a koo ka gwɛlɛ Jehova ma kosɔbɛ. Jocelyn ko: “N’ jigi tun tigɛnin lo. A tun be komi n’ be jigira jii jukɔrɔ ani Jehova tɛmɛna o balimaw fɛ ka n’ kisi. U ye Jehova batoli nɛgɛ don n’ na tugun.” An fana be se ka tɔɔw jija n’an b’a to u k’u dusukunnakow fɔ ani n’an b’u lamɛn koɲuman. O la, an bena u dusu saalo ani k’u dɛmɛ u ka to ka Jehova sago kɛ.—Ɔrɔm. 12:15.

MƆGƆW DƐMƐ KA HAKILIJAGABƆ KƐ ALA KA KUMA KAN

9. A tun ka gɛlɛn Yesu ka kalandenw ma ka mun de faamu, ani Yesu ye u dɛmɛ cogo di?

⁹ Yezu ka kalandenw sɔnna Ala ka Kuma ma ani u banbara k’a sira tagama (Zan 17:6). Nka Yezu sara gwengwe lɔgɔ kan i ko kojugukɛla minkɛ, o y’u hakili ɲagami. Yezu tun b’a lɔn ko a ka kalandenw limaniyanin lo ani k’u be Jehova kanu. Nka, a tun b’a kala ma k’u ka ɲi ka Ala ka Kuma faamu ka ɲɛ le (Luka 9:44, 45; Zan 20:9). O kama, a y’u kalan walisa u ka se ka hakilijagabɔ kɛ Ala ka Kuma kan. An k’a filɛ a y’o kɛ cogo min na tuma min na a y’a yɛrɛ yira a ka kalanden fila la Emayusi sira kan.

10. Yesu ye a ka kalandenw dɛmɛ u ka faamu cogo di ko ale de ye Masiya yɛrɛ-yɛrɛ ye? (Luka 24:18-​27)

¹⁰ Luka 24:18-27 kalan. A kɔrɔsi ko Yezu ma sin k’a fɔ o cɛɛw ye ale ye mɔgɔ min ye. Nka, a ye ɲiningaliw le kɛ u ye. Mun na do? N’a sɔrɔ a tun b’a fɛ u k’u dusukunnakow n’u ka miiriyaw fɔ. Ani u y’o le kɛ. U y’a fɔ a ye ko u jigi tun b’a la ko Yezu tun bena Israɛldenw hɔɔrɔnya ka bɔ Ɔrɔmukaw bolo. Tuma min na u y’u jɔrɔnankow fɔ ka gwɛ, Yezu tɛmɛna Ala ka Kuma fɛ k’u dɛmɛ k’a faamu kiraya kuma minw tun ka ɲi ka dafa. b Dɔɔni o kɔ, o loon sufɛ, Yezu y’a yɛrɛ yira a ka kalanden tɔɔw la ani a ye o kiraya kumaw ɲɛfɔ u ye (Luka 24:33-48). An be kalan juman sɔrɔ o maana la?

11-12. (a) Yesu tun bɛ mɔgɔw kalan cogo min na an bɛ kalansira jumɛn de sɔrɔ o la? (Ja fana lajɛ.) (b) Nortey ka Bibulu kalanbaga y’a dɛmɛ cogo di?

¹¹ An be se ka Yezu ladegi cogo di? A fɔlɔ,  n’i be bibulukalan kɛra ni dɔ ye, ɲiningali bɛnninw kɛ a tigi ye walisa a k’a ka miiriya n’a dusukunnakow fɔ (Talenw 20:5). N’i y’a kɔnɔnakow faamu, a dɛmɛ ka vɛrise dɔw sɔrɔ minw bɛnnin lo a ka koow cogoya ma tigitigi. Kana a fɔ a ye a ka ɲi ka min kɛ. Nka, a dɛmɛ ka hakilijagabɔ kɛ o vɛrisew kan walisa k’a faamu a yɛrɛ ma a be se ka Bibulu ka sariyakolow sira tagama cogo min na. Balimacɛ dɔ tɔgɔ ko Nortey ani a be bɔ Gana. An k’a ka koo lajɛ.

¹² Nortey ye bibulukalan daminɛ tuma min na a tun be ni saan 16 ye. Nka dɔɔni o kɔ, a somɔgɔw y’a daminɛ k’a kɛlɛ. Mun lo y’a dɛmɛ ka lɔ kelen kan? A ka Bibulu kalanfa tun kɔnna ka baro kɛ n’a ye Matiyo sapitiri 10nan kan. A tun y’a ɲɛfɔ a ye ko mɔgɔw bena kerecɛn sɔbɛw kɛlɛ. Nortey ko: “O la, tuma min na u y’a daminɛ ka n’ kɛlɛ, n’ y’a faamu ko n’ ye tiɲɛn diinan lo sɔrɔ.” Balimacɛ ye Matiyo 10:16 yira a la, o min na a fɔra ko an ka ɲi ka kɛ yɛrɛkɔlɔsibagaw ye. O kɔ, a ye baro kɛ ni Nortey ye k’a filɛ a be se k’a ka lannakow ɲɛfɔ a somɔgɔw ye cogo min na ni bonya ye. Nortey ka batɛmu kɔ, a tun b’a fɛ ka kɛ piyɔniye ye, nka a facɛ tun b’a fɛ a ka taga inivɛrisite la. Balimacɛ m’a fɔ Nortey ye a ka ɲi ka min kɛ. A ye ɲiningali dɔw kɛ a ye ani ka hakilijagabɔ kɛ n’a ye vɛrise dɔw kan. Mun lo sɔrɔla o la? Nortey y’a latigɛ ka kudayi cidenya baara daminɛ. A facɛ y’a gwɛn ka bɔ luu kɔnɔ. Min bɛɛ y’a sɔrɔ, Nortey tun be mun lo miiri o la? A ko: “N’ lanin b’a la ko n’ ye desizɔn ɲuman le ta.” Ni an fana be wagati ta ka tɔɔw dɛmɛ u ka hakilijagabɔ kɛ Bibulu kan, an bena u dɛmɛ ka kɛ kerecɛn kolɔnbagaw ye.—Efɛz. 3:16-19.

DIINƐ MAAKƆRƆW, AW YE BALIMAKƐW LABƐN U KA KƐ “NILIFƐNW” YE

13. Yesu seginnen kɔ sankolo la a ye mun de kɛ walasa waajuli baara ka taa a fɛ ka kɛ? (Efesekaw 4:8)

¹³ Ka Yezu to dugukolo kan, a Faa tun ye baara min kalifa a ma, a y’o lo kɛ tigitigi (Zan 17:4). Nka Yezu tun t’a miiri ko n’i b’a fɛ baara dɔ ka kɛ ka ɲɛ, fɔɔ i k’a kɛ i yɛrɛ ma le. A ye saan 3 ni tilan minw kɛ a ka cidenya baara la, a y’o baara degi mɔgɔ wɛrɛw la. Yezu tun lanin b’a ka kalandenw na. A ye cii di u ma ko u ka waajuli kɛ, ka mɔgɔw kalan kibaro  diiman na ani k’u janto Jehova sagokɛla kanulenw na. A ka kalanden minw tun be o baara ɲɛminɛna, n’a sɔrɔ u dɔw tun ma saan 30 sɔrɔ (Efɛzikaw 4:8 kalan). O cɛɛw tun ye baaraba kɛ ni Yezu ye ani u tun be kantigiya kɛra a ye. Nka sanni a ka kɔsegi sankolo la, a ye fɔrɔmasɔn caaman di u ma walisa u ka kɛ i n’a fɔ “boɲafɛnw.” A y’o kɛ cogo di do?

14. Yesu ye don laban minnu kɛ dugukolo kan, a ye a ka kalandenw dɛmɛ cogo di u ka taa ɲɛ Alako ta fan fɛ? (Ja fana lajɛ.)

¹⁴ Yezu ka kalandenw mako tun be ladili minw na, a y’o lo di u ma. Nka a y’o kɛ ni ɲumanya ye. Misali la, a y’a kɔrɔsi k’u dɔw tun ka teli ka sigasiga ani a y’u ladi o kosɔn (Luka 24:25-27; Zan 20:27). Yezu y’u ladi fana k’u ka ɲi k’u janto Jehova sagokɛlaw la ka tɛmɛ u ka baloɲini baara kan (Zan 21:15). A y’u hakili jigi k’u be min kɛra Jehova ka baara la, u man ɲi k’o suma ni tɔɔw ta ye (Zan 21:20-22). U tun be ni miiriya bɛnbali minw ye Ala ka Masaya koo la, a y’u dɛmɛ k’o latilen. A y’u dɛmɛ fana ka sinsin kibaro diiman waajuli baara kan (Kɛwaliw 1:6-8). Diinan mɔgɔkɔrɔw be kalan juman lo sɔrɔ Yezu fɛ?

15-16. (a) Diinɛ maakɔrɔw bɛ se ka Yesu ladege cogo di? A ɲɛfɔ. (b) Laadilikan minnu dira Patrick ma, a ye nafa jumɛn de sɔrɔ o la?

¹⁵ Diinan mɔgɔkɔrɔw be se ka Yezu ladegi cogo di? U ka ɲi ka fɔrɔmasɔn di balimacɛw ma, hali kanbelew fana ma walisa u ka se ka kunkanbaara caaman dafa kafo kɔnɔ. c Diinan mɔgɔkɔrɔw b’a faamu k’o balimacɛw dafanin tɛ. U ka ɲi k’o balimacɛw ladi ni kanuya ye walisa u ka kɛ mɔgɔ majigininw ni lannamɔgɔw ye ani u ka sɔn ka tɔɔw dɛmɛ.—1 Tim. 3:1; 2 Tim. 2:2; 1 Piyɛri 5:5.

¹⁶ An k’a filɛ balimacɛ Patrick ye nafa min sɔrɔ a kɛtɔ ka sɔn diinan mɔgɔkɔrɔ dɔ ka ladili ma. A kanbele tuma, a tun be kuma gwɛlɛw fɔ balimamusow ni mɔgɔ tɔɔw ma ani a tun t’u minɛ ni ɲumanya ye. Diinan mɔgɔkɔrɔ kolɔnbaga dɔ y’a kɔrɔsi  ko Patrick tun ka ɲi ka yɛlɛmani dɔw kɛ. O kama, a y’a ladi ni ɲumanya ye. Patrick ko: “N’ninsɔn ka di sabu a ye n’ ladi. A tun bena diya n’ ye ka nɛɛma baara minw sɔrɔ, n’ tun mana a ye ko u y’o kalifa balimacɛ wɛrɛw ma, n’ fari tun be faga. O diinan mɔgɔkɔrɔ ye n’ dɛmɛ k’a faamu ko n’ ka ɲi ka kɛ ni majigilenya ye ani k’a yira n’ balimaw na ko n’ b’u kanu, sanni k’a ɲini ka kunkanbaaraw sɔrɔ.” O diinan mɔgɔkɔrɔ ka ladili sababu la, Patrick sera ka kɛ diinan mɔgɔkɔrɔ ye a saan 23.—Talenw 27:9.

17. Yesu y’a jira cogo di ko a tun dalen bɛ a ka kalandenw na?

¹⁷ Yezu ye waajuli baara kalifa a ka kalandenw ma. Nka o dɔrɔn tɛ, a ye cii di u ma fana k’u ka mɔgɔw kalan (yɔrɔ nin lajɛ Matiyo 28:20 ka kunnafoni wɛrɛw yɔrɔ la Traduction du monde nouveau kɔnɔ: “Leur enseignant”). N’a sɔrɔ u tun b’a miiri ko u tɛ se k’o kunkanbaara dafa. Nka Yezu tun tɛ sigasiga k’u be se k’o baara kɛ ani a y’o fɔ u ye. Walisa k’a yira ko a lanin b’u la kosɔbɛ, a y’a fɔ u ye ko: “N Faa ye ne ci cogo min na, ne fana be aw ci o cogo kelen le la.”—Zan 20:21.

18. Diinɛ maakɔrɔw bɛ se ka Yesu ladege cogo di?

¹⁸ Diinan mɔgɔkɔrɔw be se ka Yezu ladegi cogo di? Diinan mɔgɔkɔrɔ kolɔnbagaw be fɔrɔmasɔn di tɔɔw ma walisa u ka se ka kunkanbaaraw dafa (Filip. 2:19-22). Misali la, u be se k’a ɲini kanbelew ni sunguruw fɛ u ka dɛmɛ don ka Masaya Boon saniya ani k’a ladon. Diinan mɔgɔkɔrɔw be se ka baara dɔw kalifa balimaw ma, ka fɔrɔmasɔn di u ma o koo la ani ka la a la k’u bena o baara kɛ ka ɲɛ. Matthew kɛra diinan mɔgɔkɔrɔ ye a ma mɛɛn. A be diinan mɔgɔkɔrɔ kolɔnbagaw waleɲuman lɔn sabu u ye fɔrɔmasɔn di a ma walisa a ka se ka baara caaman kɛ kafo kɔnɔ. U y’a yira fana ko u lanin b’a la ko a bena o baaraw kɛ ka ɲɛ. A ko: “Ni n’ tun ye filiw kɛ, u tun be n’ dɛmɛ ka hakili sɔrɔ o filiw la ani ka koow kɛ ka ɲɛ siɲɛ wɛrɛ.” d

19. An ka kan ka taa a fɛ ka mun de kɛ?

¹⁹ Yezu ye tile 40 minw kɛ dugukolo kan a suu kununin kɔ, a ye tɔɔw jija, k’u kalan ani ka fɔrɔmasɔn di u ma. An k’an cɛsiri ka tugu a ka ɲɛyirali kɔ koɲuman (1 Piyɛri 2:21). A bena an dɛmɛ k’o kɛ. Tiɲɛn na, a ye layidu ta ko: “Ne kɔni bena to n’aw ye loon o loon fɔɔ ka taga diɲɛ wili.”—Mat. 28:20.