KALANSEN 38NAN
DƆNKILI 25 Les oints, ton bien particulier (Ala ka mɔgɔ wolomaninw)
Yala i bɛ laadilikanw lamɛn wa?
“kelen na minɛ ka kelen to.”—MATIYU 24:40.
BAROKUN KƆNƆNAKOW
An bena Yezu ka ntalen kuma saba lajɛ. Kiti min bena kɛ duniɲa nin laban wagati la, an bena a ye o ntalen kumaw ɲɛsinna o ma cogo min na.
1. Kiri ko jumɛn de bɛna kɛ yanni sɔɔni?
YANNI dɔɔni, yɛlɛmaniba dɔw bena kɛ! Yezu bena adamadenw bɛɛ kiti. A y’a yira koo minw bena kɛ duniɲa kɔnɔ, dɔɔni ka kɔn o kiti tuma ɲɛ. A ye “taamasiɲɛ” dɔ kofɔ a ka kalandenw ye min bena u dɛmɛ k’a lɔn ko a be yen Masaya la ani ko “diɲɛ laban” tuma surunyana (Mat. 24:3). O tagamasiɲɛ kofɔra Matiyo sapitiri 24 ni 25, Mariki sapitiri 13 ani Luka sapitiri 21 kɔnɔ.
2. An bɛna mun de ye ni barokun nin na, ani o bɛna an nafa cogo di?
2 Walisa k’an lasɔmi ani k’an dɛmɛ an k’an yɛrɛ labɛn, Yezu ye ntalen saba la. O ntalenw ye nunu ye: sagaw ni baaw, npogotigi hakilitigiw ni hakilintanw ani wari talanw. O ntalenw kelen kelen bɛɛ b’an dɛmɛ k’a faamu ko Yezu bena bɛɛ kelen kelen kiti ka kɛɲɛ n’a ka kɛwalew ye. O ntalenw lajɛtɔ, an k’a filɛ an be kalan minw sɔrɔ u la ani an be se k’u sira tagama cogo min na. Yezu ye ntalen min la sagaw ni baaw koo la, an k’a daminɛ n’o ye.
SAGAW NI BAW KO
3. Tuma jumɛn na Yesu bɛna kiri tigɛ mɔgɔw kan?
3 Yezu ka ntalen na sagaw ni baaw koo la, a y’a yira ko mɔgɔw be kibaro diiman ta cogo min na ani u b’a balima mɔlenw dɛmɛ cogo min na, ale bena u kiti ka kɛɲɛ n’o lo ye (Mat. 25:31-46). “Tɔɔrɔba” wagati la, a bena kiti tigɛ u kan. O bena kɛ dɔɔni ka kɔn Arimagedɔn kɛlɛ ka daminɛ (Mat. 24:21). Minw be kerecɛn mɔlenw dɛmɛ kantigiya la ani minw t’o kɛ, Yezu bena u faran ka bɔ ɲɔgɔn na i ko sagadɛndɛla be sagaw faran ka bɔ baaw la cogo min na.
4. Ka kɛɲɛ ni Esayi 11:3, 4 ye, mun na an ka kan ka da a la ko Yesu bɛna kiri tigɛ ni tilennenya ye? (Ja fana lajɛ ɲɛ fɔlɔ kan.)
4 Bibulu b’a fɔ ko Jehova ye kitiko kalifa Yezu lo ma ani ko a bena kiti tigɛ tilenninya la (Ezayi 11:3, 4 kalan). A bena mɔgɔw ka kɛwalew, u ka miiriyaw n’u ka kumaw kɔrɔsi ani k’a filɛ u be a balima mɔlenw minɛ cogo min na (Mat. 12:36, 37; 25:40). Yezu bena a lɔn mɔgɔ minw y’a balima mɔlenw dɛmɛ u ka baara la. a An be se ka Krista balimaw dɛmɛ cogo kɔrɔtaninba minw na, u la dɔ ye ka waajuli kɛ. Minw b’u dɛmɛ o baara la, Krista bena olu jati “mɔgɔtilenninw” ye ani a bena sababu di u ma u ka “hɛrɛ banbali” sɔrɔ dugukolo kan (Mat. 25:46; Yir. 7:16, 17). O ye dugaba yɛrɛ lo ye! N’u tora kantigiya la tɔɔrɔba wagati la ani o kɔ, u tɔgɔw sɛbɛnin bena to “ɲɛnamaya kitabu” kɔnɔ.—Yir. 20:15, Bible senuma.
Yanni dɔɔni, Yezu bena a latigɛ ni mɔgɔ dɔ ye saga wala baa ye (dakun 4nan lajɛ).
5. An bɛ kalan jumɛn de sɔrɔ ka bɔ sagaw ni baw ka ntalen la ani jɔni de bɛ se ka nafa bɔ o la?
5 A yira ko i ye kantigi ye. Yezu ye ntalen min la sagaw ni baaw koo la, mɔgɔ minw ka jigiya ye ka ɲɛnamaya kɛ fɔɔ abada dugukolo kan, a ɲɛsinna olu lo ma fɔlɔ. U b’a yira ko u limaniyanin lo u kɛtɔ ka Krista balimaw dɛmɛ waajuli la ani Yezu ye jɔncɛ kantigiman hakiliman min sigi, u be ale ka cikanw labato kantigiya la (Mat. 24:45). Nka minw ka jigiya ye ka taga ɲɛnamaya kɛ sankolo la, olu fana ka ɲi k’u janto o ntalen ka lasɔmini kumaw na. Mun na do? Sabu Yezu b’u ka kɛwalew, u ka miiriya ani u ka kumaw kɔrɔsi. Olu fana ka ɲi ka to kantigiya la. Yezu ye ntalen fila wɛrɛw la, o minw na a be kerecɛn mɔlenw yɛrɛ lo lasɔmi. O ntalenw be sɔrɔ fana Matiyo sapitiri 25nan kɔnɔ. Yezu ye ntalen min la npogotigi hakilitigiw ni hakilintanw koo la, an k’o lajɛ sisan.
NPOGOTIGI HAKILITIGIW ANI NPOGOTIGI HAKILINTANW
6. Npogotigi duuru y’a yira cogo di ko olu ye hakilitigiw ye? (Matiyu 25:6-10)
6 Yezu ye npogotigi tan minw kofɔ a ka ntalen na, a ko u tagara kɔɲɔcɛ kunbɛn yɔrɔ (Mat. 25:1-4). U bɛɛ tun b’a fɛ ka kɔɲɔcɛ bila sira a ka kɔɲɔya la. Yezu ko npogotigi duuru ye “hakilitigiw” ye ani duuru tɔɔw ye ‘hakilitanw’ ye. Npogotigi hakilitigiw y’u yɛrɛ labɛn ani u tora ɲɛɛ na. Kɔɲɔcɛ tun mana mɛɛn cogo cogo, u tun labɛnnin lo k’a makɔnɔ, hali n’a tun ka ɲi ka na dugutilama le. O la, u y’u ka fitinɛw ta walisa u ka kɛ yeelen na sufɛ. U yɛrɛ ye tulu dɔ ta minan wɛrɛw kɔnɔ walisa ka kɔɲɔcɛ kɔnɔ, hali n’a mɛɛnna. O la, u ye u yɛrɛ labɛn walisa u ka fitinɛw mananin ka to (Matiyo 25:6-10 kalan). Kɔɲɔcɛ sera tuma min na, hakilitigi nunu tagara a kunbɛn ani u donna n’a ye kɔɲɔbon na. O cogo kelen na, kerecɛn mɔlen dɔw y’a yira k’u labɛnnin lo. N’u tora ɲɛɛ na ani kantigiya la fɔɔ Krista natuma na, u bena fara kɔɲɔcɛ Yezu kan ka masaya kɛ sankolo la b (Yir. 7:1-3). Nka mun lo ye npogotigi hakilintan nunu sɔrɔ do?
7. Mun de ye npogotigi duuru hakilintanw sɔrɔ, ani mun na?
7 Tuma min na kɔɲɔcɛ nana, npogotigi hakilintan nunu tun labɛnnin tɛ i ko npogotigi hakilitigiw. U ka fitinɛw tun be ɲini ka faga ani u tun ma tulu dɔ ta minan wɛrɛw kɔnɔ. Tuma min na u y’a mɛn ko kɔɲɔcɛ natuma surunyana, u tagara tulu sanyɔrɔ. Kɔɲɔcɛ sera k’a sɔrɔ u ma kɔsegi fɔlɔ. O la, “hakilitigiw donna ni kɔɲɔcɛ ye kɔɲɔbon na. U ye daa tugu.” (Mat. 25:10). Npogotigi hakilintanw kɔsegira tuma min na, u tun b’a fɛ ka don kɔɲɔbon kɔnɔ, nka kɔɲɔcɛ y’a fɔ u ye ko: “Ne te aw lɔn.” (Mat. 25:11, 12). O npogotigiw tun labɛnnin tɛ ka kɔɲɔcɛ makɔnɔ wagatijan kɔnɔ. Kerecɛn mɔlenw be kalan juman lo sɔrɔ o la?
8-9. Ntalen min dala npogotigiw ko la, krecɛn munnenw bɛ kalan jumɛn de sɔrɔ ka bɔ o la? (Ja fana lajɛ.)
8 A yira ko i labɛnnin lo ani to ɲɛɛ na. Yezu tun t’a fɔra le ko sanni duniɲa laban ka se, kerecɛn mɔlen dɔw labɛnnin bena to ani dɔ wɛrɛw labɛnnin tɛna to. Nka, a tun b’a ɲɛfɔra u ye le min bena u sɔrɔ n’u labɛnnin ma to walisa ka muɲuli kɛ kantigiya la fɔɔ laban na. N’u labɛnnin ma to, u tɛna u ka sara sɔrɔ (Zan 14:3, 4). U ka ɲi k’o koo ta sɔbɛ la yɛrɛ le! An ka jigiya ye ka taga sankolo la wo, wala ka to dugukolo kan wo, an bɛɛ ka ɲi k’an janto Yezu ka lasɔmini kuma na, min be sɔrɔ a ka ntalen na, npogotigiw koo la. An kelen kelen bɛɛ ka ɲi ka to ɲɛɛ na ani an labɛnnin ka to ka muɲuli kɛ fɔɔ laban na.—Mat. 24:13.
9 Yezu ye ntalen min la npogotigiw koo la, o b’a yira ko a kɔrɔtanin lo an ka to ɲɛɛ na ani an labɛnnin ka to. O kɔ, a ye ntalen dɔ la wari talanw koo la. O ntalen b’a yira ko a kɔrɔtanin lo an k’an timinandiya Jehova ka baara la.
Yezu ye lasɔmini kuma min fɔ a ka ntalen na npogotigiw koo la, an kelen kelen bɛɛ ka ɲi k’an janto o la, an kɛtɔ k’an yɛrɛ labɛn, ka to ɲɛɛ na ani ka sɔn ka muɲuli kɛ fɔɔ laban na (dakun 8-9nan lajɛ).
WARI TALANW KO
10. Baaraden fila y’a yira cogo di ko u ye kantigiw ye? (Matiyu 25:19-23)
10 Yezu ye ntalen min la wari talanw koo la, a kumana baaraden fila koo la minw ye kantigiya kɛ u matigi ye ani a ye baaraden dɔ kofɔ min ma kantigiya kɛ (Mat. 25:14-18). O baaraden fila ye baara gwɛlɛ kɛ k’u matigi ka nafolo yiriwa. O cogo la, u y’a yira k’u ye kantigiw ye. Sanni u matigi ka taga dugu la, a ye wari talanw kalifa u ma. O tun ye wariba lo ye. Baaraden kantigi fila nunu ye u timinandiya baara la ani u ye baara ɲuman kɛ n’u ka wari ye. Mun lo sɔrɔla o la? U matigi kɔsegira tuma min na, a tun ye wari talan minw kalifa u ma, u ye o ɲɔgɔn sigiyɔrɔma fila sɔrɔ. U matigi y’u tando ani u ‘nisɔndiyara ɲɔgɔn fɛ.’ (Matiyo 25:19-23 kalan). c Nka baaraden sabanan ye mun lo kɛ n’a matigi ka wari ye?
11. Mun de ye baaraden “salabaatɔ” sɔrɔ, ani mun na?
11 Wari talan kelen lo tun kalifara baaraden sabanan ma, nka “salabagatɔ” tun lo. A matigi tun b’a fɛ a ka baara ɲuman kɛ n’o wari talan ye. Nka, a tagara dingɛ sogi k’a don a kɔnɔ. A matigi kɔsegira ka na a sɔrɔ a ma wari talan wɛrɛ sɔrɔ ka fara a kan. O baaraden tun tɛ ni miiriya ɲuman ye. Sanni a ka yafa deli a matigi fɛ sabu a m’a ka nafolo yiriwa, a y’a jalaki ko a “ka koo ka gwɛlɛ.” A matigi dusu ma diya a kɔrɔ. A yɛrɛ y’o wari talan bɔsi a la ani k’a gwɛn ka bɔ a ka soo.—Mat. 25:24, 26-30.
12. Baaraden kantigi fila ninnu bɛ jɔni de jira bi?
12 Baaraden kantigi fila nunu ɲɛsinna kerecɛn mɔlen kantigiw lo ma. U Matigi Yezu b’a fɔ u ye ko u ka ‘na, u ka nisɔndiya ɲɔgɔn fɛ.’ N’u sara, u be u ka sara sɔrɔ sankolo la, o min ye sukununi fɔlɔ ye (Mat. 25:21, 23; Yir. 20:5b). Faan wɛrɛ fɛ, baaraden salabagatɔ ka koo ye lasɔmini ye kerecɛn mɔlenw fɛ. Cogo di do?
13-14. Krecɛn munnenw bɛ kalan jumɛn de sɔrɔ ka bɔ wari talan ntalen la? (Ja fana lajɛ.)
13 I timinandiya Jehova ka baara la. Yezu ye ntalen min la wari talanw koo la ani a ye min la npogotigiw koo la, o ntalenw na, a tun t’a fɔra le ko kerecɛn mɔlenw bena kɛ salabagatɔw ye. Nka, a tun b’a ɲɛfɔra le min bena kɛ n’u kisɛyanin ma to Jehova ka baara la. N’u kisɛyanin ma to, ‘Ala y’u woloma k’u wele min kama,’ u tɛna o sɔrɔ. O kɔrɔ, Ala tɛna sɔn u ka don sankolo Masaya la.—2 Piyɛri 1:10.
14 Yezu ye ntalen minw la npogotigiw ani wari talanw koo la, o b’a yira ka gwɛ ko kerecɛn mɔlenw bɛɛ labɛnnin ka ɲi ka to, k’u timinandiya Jehova ka baara la ani ka to ɲɛɛ na. Yala Yezu ye koo wɛrɛ fɔ min ye lasɔmini ye kerecɛn mɔlenw fɛ wa? Ɔnhɔn! A ye min fɔ, o be sɔrɔ Matiyo 24:40, 41 kɔnɔ ani o ɲɛsinna kerecɛn mɔlenw ka kiti laban lo ma.
Yezu b’a fɛ kerecɛn mɔlenw k’a yira ko u timinandiyanin lo u ka baara la (dakun 13-14nan lajɛ). e
JƆN DE “KELEN NA MINƐ”?
15-16. Matiyu 24:40, 41 b’a jira cogo di ko a nafa ka bon krecɛn munnenw ka to u ɲɛ na?
15 Sanni Yezu ka o ntalen saba la, a kɔnna ka kuma kerecɛn mɔlenw ka kiti laban koo la. O kiti lo bena a yira Ala sɔnnin be kerecɛn mɔlen minw na. A kumana cɛɛ fila koo la minw be baara kɛra foro kɔnɔ ani muso fila koo la minw be sinni kɛra. O cɛɛ fila tun be baara kelen na ani o muso fila tun be baara kelen lo kɛra fana. Nka Yezu ko “u bena kelen ta ka kelen to yen.” (Matiyo 24:40, 41 kalan). O kɔ, a y’a ka kalandenw jija ko: “Aw labɛnnin ka to, bari aw t’aw ka Matigi nalon lɔn.” (Mat. 24:42). Yezu y’o kuma ɲɔgɔn fɔ, a tilanin kɔ npogotigiw ka ntalen na (Mat. 25:13). Yala jɛɛn dɔ b’o kumaw cɛ wa? Ɔnhɔn, a be komi jɛɛn b’u cɛ. Minw ye kerecɛn mɔlenw ye sɔbɛ la ani u ye kantigiw ye, Yezu bena olu dɔrɔn lo ‘ta ka taga n’u ye’ sankolo Masaya la.—Zan 14:3.
16 To ɲɛɛ na. Kerecɛn mɔlen minw tɛna to ɲɛɛ na Alako ta fan fɛ, Ala “ye mɔgɔ minw woloma,” u tɛna jɛn n’olu ye (Mat. 24:31). Minw bɛɛ ka jigiya ye ka ɲɛnamaya banbali kɛ dugukolo kan, olu fana ka ɲi ka to ɲɛɛ na Alako ta fan fɛ ani ka to kantigiya la.
17. Ni Jehova y’a latigɛ ka mɔgɔ dɔ mun ni hakili senu ye, mun na an man ka kan jɔrɔ o la ?
17 An be Jehova lɔn koɲuman minkɛ, an lanin b’a la ko a be koo tilennin kɛ tuma bɛɛ. O la, n’a y’a latigɛ ka mɔgɔ kantigi dɔw mɔ ni hakili senu ye an ka wagati la, an tɛ jɔrɔ o la. d Yezu ye ntalen min la ɛrɛzɛnforo koo la, baarakɛla minw nana tileben tuma na, an kana ɲinɛ a ye min fɔ olu koo la (Mat. 20:1-16). Minw ye baara daminɛ sɔgɔma joona ani minw nana tileben tuma na, u bɛɛ ye sara kelen lo sɔrɔ. O cogo kelen na, kerecɛn mɔlenw mana sugandi tuma o tuma, u bɛɛ bena taga sankolo la n’u tora kantigiya la.
I JANTO LASƆMINI KUMAW NA
18-19. An ye Yesu ka ntalen min kalan nin kalansen in na, an bɛ kalan jumɛn de sɔrɔ ka bɔ o la?
18 An ye mun lo ye barokun nin na? Minw ka jigiya ye ka ɲɛnamaya banbali kɛ dugukolo kan, Yezu ye ntalen min la sagaw ni baaw koo la, o b’a yira ko a kɔrɔtanin lo u ka to kantigiya la Jehova ye kabi sisan ani tɔɔrɔba wagati la. O wagati la, Yezu bena a latigɛ ko mɔgɔ kantigiw ka kan ni “hɛrɛ banbali” ye.—Mat. 25:46.
19 An ye Yezu ka ntalen kuma fila wɛrɛw lajɛ minw ye lasɔmini ye kerecɛn mɔlenw fɛ. Yezu ye ntalen min la npogotigiw koo la, u la duuru y’a yira k’u ye hakilitigiw ye. U tun labɛnnin lo ani u tora ɲɛɛ na ka kɔɲɔcɛ makɔnɔ, hali n’a tun ka kan ka mɛɛn. Nka npogotigi hakilintanw tun labɛnnin tɛ. O kama, kɔɲɔcɛ banna ko u tɛ don kɔɲɔbon na. An fana labɛnnin ka ɲi ka to ka kɔnɔni kɛ fɔɔ tuma min na Yezu bena daan sigi duniɲa juguman nin na. Yezu ye ntalen min la wari talanw koo la, o lajɛtɔ, an kumana baaraden kantigi fila koo la minw tun timinandiyanin lo u ka baara la. U ye baaraba kɛ u matigi ye ani a dusu diyara u kɔrɔ. Nka, a banna baaraden salabagatɔ la. An be kalan juman lo sɔrɔ o la? An bolo degunnin ka ɲi ka to Jehova ka baara la fɔɔ ka taga se duniɲa laban na. A laban, an y’a ye ko kerecɛn mɔlenw ka ɲi ka to ɲɛɛ na walisa Yezu k’u ‘ta ka taga n’u ye’ sankolo la. U kɔrɔtɔnin lo ka taga fara Yezu kan yen. Arimagedɔn kɛlɛ kɔ, sagaden ka kɔɲɔya bena kɛ ani kerecɛn mɔlenw bena nɛɛma sɔrɔ ka kɛ a ka kɔɲɔmuso ye.—2 Tes. 2:1; Yir. 19:9.
20. Minnu bɛ Jehova ka laadilikanw lamɛn a bɛna mun kɛ olu ye?
20 Tiɲɛn lo ko kiti wagati surunyana kosɔbɛ, nka an man ɲi ka siran. N’an tora kantigiya la, an sankolola Faa kanutigi bena “sebagaya kabakoman” di an ma walisa an “ka se ka lɔ Mɔgɔ Dencɛ ɲakɔrɔ.” (2 Kor. 4:7; Luka 21:36). An ka jigiya ye ka taga sankolo la wo wala ka to dugukolo kan wo, an k’an janto Yezu ka lasɔmini kumaw na minw be sɔrɔ a ka ntalenw na. O la, an koo bena diya an Faa Jehova ye. A ka nɛɛmaba kosɔn, an tɔgɔw bena sɔrɔ “nii banbali sɛbɛ kɔnɔ.”—Dan. 12:1; Yir. 3:5.
DƆNKILI 26 “C’est à moi que vous l’avez fait” (“Aw y’o kɛ ne le ye”)
a Barokun nin lajɛ saan 2024, mɛkalo ka Kɔrɔsili Sangaso kɔnɔ: “Jehova bena mɔgɔw kiti cogo min na sini ma, an be mun lo lɔn o koo la?”
b N’i be kunnafoni wɛrɛw fɛ, barokun nin lajɛ saan 2015, marisikalo tile 15nan ka Kɔrɔsili Sangaso kɔnɔ: “Veilleras-tu”?
c Tiɲɛn lo ko julakan Bibulu kɔnɔ, a fɔra ko sanukuru kɛmɛ duuru, kɛmɛ fila ani kɛmɛ. Nka, gɛrɛkikan kumaden min bayɛlɛmana ten, o ɲɛsinna talan duuru, talan fila ani talan kelen lo ma.
e JAA ƝƐFƆLI : Balimamuso mɔlen dɔ be bibulukalan kɛra ni muso dɔ ye, a ye min kunbɛn waajuli la.
