KALANSEN 28NAN
DƆNKILI 123 Fidèlement soumis à l’ordre théocratique (An ka kolo Ala ka kuntigiya ye)
Yala i bɛ tiɲɛ ni nkalon dɔn ka bɔ ɲɔgɔn na wa?
“A’ ye aw jɔ, aw cɛsirilen ni tiɲɛ ye.”—EFESEKAW 6:14.
BAROKUN KƆNƆNAKOW
An k’a ɲini k’a lɔn faranfasi min be Jehova ka tiɲɛnkalanw ani Sutana n’an kɛlɛbagaw ka ngalonw cɛ.
1. I bɛ mun de miiri tiɲɛ ko la?
TIƝƐNKALAN minw be Bibulu kɔnɔ, u ka di an ye ani an lanin b’u la (Ɔrɔm. 10:17). An lanin b’a la fana ko Jehova ye kerecɛn kafo sigi k’a kɛ “tiɲɛ juu sigiyɔrɔ n’a tintinyɔrɔ ye.” (1 Tim. 3:15). An be sɔn ka kolo an “ɲamɔgɔw” ye, olu minw be Bibulu ka tiɲɛnkalanw ɲɛfɔ an ye ani u be cikanw di an ma ka kɛɲɛ ni Ala sago ye.—Eburuw 13:17.
2. Ka kɛɲɛ ni Yakuba 5:19 ye, an kɛlen kɔ ka tiɲɛ dɔn, mun de bɛ se ka an sɔrɔ?
2 Nka hali n’an sɔnna tiɲɛnkalanw ma ani an lanin b’a la ko Ala ka ɔriganisasiyɔn be cikan ɲumanw di an ma, an bele be se ka sira bila (Zaki 5:19 kalan). Tiɲɛnkalan minw be Bibulu kɔnɔ ani Ala ka ɔriganisasiyɔn be cikan minw di an ma, Sutana b’a fɛ an kana la u la tugun.—Efɛz. 4:14.
3. Mun na an banbannen ka kan ka to tiɲɛ kan? (Efesekaw 6:13, 14)
3 Efɛzikaw 6:13, 14 kalan. Yanni dɔɔni, Sutana bena a seko bɛɛ kɛ k’a ɲini ka mɔgɔw bɛɛ lafili ni ngalon kumaw ye walisa u kana sɔn Jehova ta ma (Yir. 16:13, 14). An b’a lɔn fana ko Sutana bena a jija kosɔbɛ k’a ɲini ka Jehova sagokɛlaw yɛrɛ lafili (Yir. 12:9). O la, a kɔrɔtanin lo an k’a ɲini k’a lɔn faranfasi min be tiɲɛn ni ngalon cɛ ani ka sɔn tiɲɛn ma (Ɔrɔm. 6:17; 1 Piyɛri 1:22). O lo bena a to an be kisi tɔɔrɔba wagati la.
4. An bɛna mun de ye barokun in na?
4 Barokun nin na, an bena kuma jogo fila koo la an ka ɲi ka kɛ ni minw ye walisa ka Bibulu ka tiɲɛnkalanw faranfasi ka bɔ ngalon na ani ka sɔn Ala ka ɔriganisasiyɔn ka cikanw ma. O kɔ, an bena ladili saba lajɛ, an ka ɲi ka tugu minw kɔ walisa an nɔrɔnin ka to tiɲɛnkalanw na.
JOGO DƆW AN MAGO BƐ MINNU NA WALASA KA TIƝƐ NI NKALON DƆN KA BƆ ƝƆGƆN NA
5. Jehova ɲɛsiran bɛ an dɛmɛ cogo di ka tiɲɛ ni nkalon dɔn ka bɔ ɲɔgɔn na?
5 Jehova ɲɛsiran. N’an be siran Jehova ɲɛ cogo bɛnnin na, a koo bena diya an ye kosɔbɛ. An tɛna a ɲini abada ka koo dɔ kɛ min man di a ye. An b’a fɛ kosɔbɛ ka ɲuman lɔn ka bɔ juguman na ani ka tiɲɛn lɔn ka bɔ ngalon na sabu an b’a fɛ k’an koo diya Jehova ye (Talenw 2:3-6; Eburuw 5:14). An t’a fɛ abada adamaden ɲɛsiran barika ka bonya ka tɛmɛ Jehova kanuya kan. Mun na do? Sabu tuma caaman na, adamadenw diyanyekow tɛ bɛn Jehova sago ma.
6. Hadamaden ɲɛsiran ye Israɛlkaw ka ɲɛmɔgɔ tan bila u kana tiɲɛ fɔ cogo di?
6 N’an be siran adamadenw ɲɛ ka tɛmɛ Ala kan, o be se k’a to an be tiɲɛn sira bila. An ka Israɛldenw ka kuntigi tan ni fila ka koo lajɛ. Jehova tun ye layidu ta ko a bena jamana min di Israɛldenw ma, u y’u ci ka taga o lajɛ. U la mɔgɔ tan tun be ni kanuya min ye Jehova koo la, Kanankaw ɲɛsiran bonyana ka tɛmɛ o kan. U y’a fɔ Israɛlden tɔɔw ye ko: “An te se ka taga mɔgɔ nunu kɛlɛ, u barika ka bon n’an ta ye.” (Nɔnb. 13:27-31). Tiɲɛn lo ko adamadenw ɲɛɛ kɔrɔ, Kanankaw barika tun ka bon ni Israɛldenw ta ye. Nka k’a fɔ ko Israɛldenw tɛna se ka jamana bɔsi u juguw la, o kɔrɔ ko u ɲinɛna Jehova kɔ le. Jehova tun b’a fɛ Israɛldenw ka min kɛ, o kolajɛbaga tan tun ka ɲi ka sinsin o lo kan. A tun ye min kɛ u ye dɔɔni ka kɔn o ɲɛ, u tun ka ɲi ka miiri o la fana. O la, u tun bena a faamu ko Sebagayabɛɛtigi Jehova barika ka bon ni Kanankaw ta ye fɔɔ ka taga ka na. O kolajɛbagaw y’a yira ko u limaniyanin tɛ fewu! Nka, Zozuwe ni Kalɛbu kɔni tun b’a fɛ k’u koo diya Jehova ye. U y’a fɔ jama ye ko: “N’an koo diyara Masaba ye, a bena bila an ɲa ka don n’an ye [o jamana] kɔnɔ k’a d’an ma.”—Nɔnb. 14:6-9.
7. An bɛ se ka an ka Jehova ɲɛsiranya fanga bonya cogo di? (Ja fana lajɛ.)
7 An be se k’an ka Ala ɲɛsiran barika bonya, n’an b’a ɲini k’an koo diya Jehova ye an ka desizɔnw bɛɛ la (Zab. 16:8). N’i be Bibulu ka maanaw kalanna, i yɛrɛ ɲininga ko: “Ni ne tun lo, n’ tun bena mun lo kɛ do?” Misali la, miiri k’a filɛ ko i tun be yen tuma min na Israɛldenw ka kuntigi tan tun b’a fɔra ko Israɛldenw tɛna se ka Kanankaw ka jamana minɛ. Yala siranya tun bena a to i be la u la wa? Wala i tun tɛna la u la sabu i be Jehova kanu ani i b’a fɛ k’i koo diya a ye? Israɛldenw fanba ma mɛnni kɛ Zozuwe ni Kalɛbu fɛ, k’a sɔrɔ u tun be tiɲɛn lo fɔra u ye. O kama, Jehova ma sɔn u ka don layidu jamana kɔnɔ.—Nɔnb. 14:10, 22, 23.
Ele tun bena la jɔn lo la do? (dakun 7nan lajɛ).
8. An ka kan ka an cɛsiri ka jogo jumɛn sɛnɛ an yɛrɛ la ani mun na an ka kan ka o kɛ?
8 Majigilenya. Jehova be mɔgɔ majigininw lo dɛmɛ ka tiɲɛnkalanw lɔn (Mat. 11:25). An y’an majigi ka sɔn u k’an kalan u la (Kɛw. 8:30, 31). Nka, an ka ɲi k’an janto walisa an kana kɛ kuncɛbaw ye. N’o tɛ, an be se k’a daminɛ k’a jati ko an ka miiriyaw nafa ka bon i ko Bibulu ka sariyakolow wala Jehova ka ɔriganisasiyɔn ka cikanw.
9. An bɛ se ka mun de kɛ walisa an majiginnen ka to?
9 Walisa an majiginin ka to, an ka ɲi k’a to an hakili la ko Jehova lɔyɔrɔ ka bon n’an ta ye fɔɔ ka taga ka na (Zab. 8:4, 5). An be se k’a deli fana a k’an dɛmɛ an ka kɛ mɔgɔ majigininw ye ani ka sɔn kalan ma. Jehova bena an dɛmɛ k’a jati ko nafa be ale ka miiriyaw la ka tɛmɛ an taw kan. A be tɛmɛ a ka Kuma ani a ka ɔriganisasiyɔn fɛ k’an dɛmɛ k’a ka miiriyaw lɔn. Bibulu kalangwɛ kɛtɔ, daliluw ɲini minw b’a yira ko Jehova be mɔgɔ majigininw kanu ani ko a be kuncɛbaw ni yɛrɛbonyalaw kɔniya. N’u ye kunkanbaara dɔ kalifa i ma min b’a to i be kuntigiya kɛ dɔw kun na, o wagati yɛrɛ lo la i ka ɲi k’i jija kosɔbɛ walisa i majiginin ka to.
AN NƆƆRƆLEN BƐ SE KA TO TIƝƐ NA COGO MIN NA
10. Jehova ye baara kɛ ni cɛ jumɛnw ye walasa k’a ka mɔgɔw kalan ani ka u bilasira?
10 La ɔriganisasiyɔn ka cikanw na tuma bɛɛ. Galen, Jehova tɛmɛna Musa fɛ ka cikanw di a ka jama ma. Kɔfɛ, a tɛmɛna Zozuwe lo fɛ k’o kɛ (Zozuwe 1:16, 17). Koow tun be ɲɛ Israɛldenw bolo n’u tun b’a jati k’o cɛɛw ye Jehova Ala ka lasigidenw lo ye. Saan kɛmɛkulu caaman o kɔ, kerecɛn kafo sigira ani Yezu ka ciden 12 lo tun be Jehova ka cikanw lase o kafodenw ma (Kɛw. 8:14, 15). Kɔfɛ, Zeruzalɛmu ka diinan mɔgɔkɔrɔw fana farala o cidenw kan. Kafodenw kɛtɔ ka sɔn o cɛɛ kantigiw ka ɲɛminɛli ma, “Krista ka jama jigi tun be sabatira ka taga ɲa. Loon o loon, dɔ tun be fara u kan.” (Kɛw. 16:4, 5). Bi fana, Jehova b’an duga n’an b’a ka ɔriganisasiyɔn ka cikanw labato. Nka n’an tɛ sɔn an ɲɛminɛbagaw ta ma, Jehova b’o koo jati cogo di? Walisa k’o ɲiningali jaabi, an k’a filɛ min kɛra tuma min na Israɛldenw tun be tagara layidu jamana kɔnɔ.
11. Jehova ye cɛ min sugandi ni o ye Musa ye walasa ka Israɛlkaw ɲɛminɛ, mun ye Israɛlkaw sɔrɔ u kɛlen ka ban o ka ɲɛminɛli la? (Ja fana lajɛ.)
11 Tuma min na Israɛldenw tun be tagara layidu jamana na, cɛɛ minw tun be ni lɔyɔrɔba ye, u dɔw murutira Musa ma. U ma sɔn a ma fana ko Jehova ye ale lo sugandi k’a kɛ u ɲɛminɛbaga ye. U ko: “Jama bɛɛ lajɛnnin ye Masaba ta ye [Musa dɔrɔn tɛ], Masaba be olu fana fɛ.” (Nɔnb. 16:1-3). Tiɲɛn lo ko “jama bɛɛ” tun ye Jehova ta ye. Nka, a tun ye Musa lo sugandi k’a kɛ u ɲɛminɛbaga ye (Nɔnb. 16:28). O mɔgɔ murutininw kɛtɔ ka Musa kɔrɔfɔ, tiɲɛn na, u tun be Jehova yɛrɛ lo kɔrɔfɔra. U tun be lɔyɔrɔba ni tɔgɔba min fɛ, u sinsinna o lo kan sanni ka sinsin Jehova sago kan. Minw tun y’o murutiliko lawuli, Jehova ye olu halaki ani mɔgɔ waa caaman wɛrɛ minw tugura u kɔ (Nɔnb. 16:30-35, 41, 49). Bi fana, an be se ka la a la ko minw tɛ tugu Jehova la ɔriganisasiyɔn ka labɛnw kɔ, olu koo man di a ye.
Ele tun bena tugu jɔn lo kɔ do? (dakun 11nan lajɛ).
12. Mun na an bɛ se ka ta’a fɛ ka da Jehova ka jɛkuluba la?
12 An ka la Jehova ka ɔriganisasiyɔn na tuma bɛɛ. An ka baara labɛnnin lo cogo min na, n’a gwɛnin lo ko yɛlɛmani ka ɲi ka don o la wala Bibulu ka tiɲɛnkalan dɔ faamuyali koo la, an ɲɛminɛbagaw tɛ sigasiga k’o kɛ (Talenw 4:18). U b’o kɛ sabu min kɔrɔtanin lo u fɛ ka tɛmɛ fɛɛn bɛɛ kan, o ye k’u koo diya Jehova ye. U b’u seko bɛɛ kɛ fana k’u ka desizɔnw basigi Ala ka Kuma kan, Jehova sagokɛlaw bɛɛ ka ɲi ka tugu min kɔ.
13. “Kuma kɛnɛ” min kofɔlen don, o ye mun ye ani an ka kan ka o jate cogo jumɛn na?
13 “Ne ka i karan kuma saninman minw na, o mara i kɔnɔ.” (2 Tim. 1:13, Biblu Ala ta Kuma). O ‘kuma saninmanw’ ɲɛsinna kerecɛnw ka kalanw lo ma, o minw be sɔrɔ Bibulu kɔnɔ (Zan 17:17). O kalanw y’an ka lannakow bɛɛ jujɔn lo ye. Jehova ka ɔriganisasiyɔn ko an k’an janto walisa an ka lannakow ka basigi o kalanw kan. N’an be to k’o kɛ, Jehova bena an duga.
14. Cogo jumɛn na Krecɛn dɔw y’a dabila ka tugu “Kuma kɛnɛ” kɔfɔlenw kɔ?
14 Mun lo bena kɛ n’an t’an ka lannakow basigi o ‘kuma saninmanw’ kan tugun? An ka misali dɔ lajɛ. Saan kɛmɛkulu fɔlɔ la, kerecɛn dɔw tun be ngalon kuma dɔ jɛnsɛnna ko Jehova ka loon sera. U yɛrɛ tun b’a fɔra ko ciden Pol y’o koo fɔ a ka lɛtɛrɛ dɔ kɔnɔ. Sanni Tesaloniki kerecɛnw ka sɛgɛsɛgɛri kɛ k’a filɛ ni tiɲɛn lo, u dɔw lara o ngalon kumaw na ani u yɛrɛ y’a daminɛ k’o jɛnsɛn. Pol y’u kalan min na tuma min na a tun be n’u ye, n’u tun y’u hakili to o la, u tun tɛna a to o ngalon kumaw k’u lafili (2 Tes. 2:1-5). Pol tun y’u ladi ko u be kuma minw mɛn, u kana la u bɛɛ la. Walisa u kana o fili ɲɔgɔn kɛ, Pol ye bataki filanan min ci u ma, a y’o kuncɛ ko: “Ne Pɔli le be foli kuma nin sɛbɛnna n yɛrɛ ma. N be to ka n bulonɔ bila ten n ka batakiw bɛɛ la. N be to k’o sɛbɛn ten.”—2 Tes. 3:17.
15. Ni kunnafoni dɔw bɛ ka jɛnsɛn minnu ni tiɲɛ bɔlen don, an bɛ se ka an yɛrɛ lakana olu ma cogo di? Misali dɔ fɔ. (Jaw fana lajɛ.)
15 Pol ye kuma minw fɔ Tesalonikaw ye, an be kalan juman lo sɔrɔ o la? An ye min kalan Bibulu kɔnɔ, n’an ye koo dɔ mɛn min bɛnnin tɛ o ma wala n’an ye maana kabakoman dɔ mɛn, an ka ɲi ka koow kɛ hakilitigiya la. Soviyetiki mara la, an juguw tun ye lɛtɛrɛ dɔ ci balimaw ma ani k’a kɛ i n’a fɔ an ka sigiyɔrɔsoba balimaw lo y’a sɛbɛ. O lɛtɛrɛ kɔnɔ, u tun be balima dɔw jijara ko u ka ɔriganisasiyɔn wɛrɛ sigi sen kan. A tun be komi o lɛtɛrɛ bɔra an ka sigiyɔrɔsoba balimaw lo fɛ tiɲɛn na. Nka balima kantigiw m’a to a k’u lafili. U y’a faamu ko u kalanna min na, o lɛtɛrɛ kɔnɔkow bɛnnin tɛ n’o ye. Bi fana, an juguw be tɛmɛ ɛntɛrɛnɛti, rezo sosiyow n’a ɲɔgɔnnaw fɛ tuma dɔw k’a ɲini k’an lafili ani k’an faranfaran. An kana a to u k’an “hakili ɲagami.” (2 Tes. 2:2). Nka, an be min mɛn wala an be min kalan, an ka ɲi ka miiri koɲuman k’a filɛ n’o bɛnnin lo ni tiɲɛnkalanw ye, an be minw lɔn.—1 Zan 4:1.
Ngalon minw bɔnin be tiɲɛn ma, kana a to u k’i lafili (dakun 15nan lajɛ). a
16. Ka kɛɲɛ ni Romɛkaw 16:17, 18 ye, ni mɔgɔ dɔ ye tiɲɛ bila, an ka kan ka mun de kɛ?
16 I nɔrɔnin ka to Jehova sagokɛla kantigiw la. Jehova b’a fɛ an k’ale bato kelenya la n’an balimaw ye ani an kaan bɛnnin ka to. O la, an bena to tiɲɛn sira kan. Nka mɔgɔ min nɔrɔnin tɛ tiɲɛnkalanw na, o tigi be na ni farali ye kafo kɔnɔ. O kama, Ala b’an jija ko an “kana jɛn” n’o tigi ye. N’o tɛ a laban, an yɛrɛ nɔrɔnin tɛna kɛ tiɲɛnkalanw na.—Ɔrɔmukaw 16:17, 18 kalan.
17. Ka tiɲɛ ni nkalon dɔn ka bɔ ɲɔgɔn na ani ka nɔɔrɔ tiɲɛ na, an bɛ nafa jumɛn sɔrɔ o la?
17 N’an be tiɲɛn lɔn ka bɔ ngalon na ani n’an nɔrɔnin tora tiɲɛnkalanw na, an magwɛrɛnin bena to Jehova la ani an ka limaniya sabatinin bena to (Efɛz. 4:15, 16). Sutana be ngalonkalanw ni miiriya jugu minw jɛnsɛn, u tɛna an lafili ani Jehova bena an latanga tɔɔrɔba wagati la. N’an nɔrɔnin tora tiɲɛnkalanw na, ‘Hɛrɛtigi Ala bena to n’an ye.’—Filip. 4:8, 9.
DƆNKILI 122 Soyons fermes, inébranlables ! (An k’an jija, an kana siran)
a JAA ƝƐFƆLI : Wale dɔ kɛcogo ɲɛyirali: A saan caaman ye nin ye Soviyetiki mara la, an juguw tun ye lɛtɛrɛ dɔ ci balimaw ma ani k’a kɛ i n’a fɔ an ka sigiyɔrɔsoba balimaw lo y’a sɛbɛ. Bi, tuma dɔw la an juguw be tɛmɛ ɛntɛrɛnɛti fɛ ka kunnafoni dɔw jɛnsɛn minw be se k’an lafili Jehova ka ɔriganisasiyɔn koo la.
