Kiraya kuma 4nan. Kanuya tɛ denbayaw kɔnɔ

‘Mɔgɔw na kɛ . . . mɔgɔ gɛlɛnw ye ka ɲɛsin u ka denbaya ma.’—2 TIMOTE 3:1-3

● Minnu ka denbaya kɔnɔmɔgɔ dɔ ka farin u ma, Chris bɛ baara kɛ jɛkulu dɔ fɛ min bɛ o mɔgɔw dɛmɛ Galles jamana sahɛli yan fan fɛ. A ko: “Muso dɔ nana an ka yɔrɔ la don dɔ la min ye ne dɔnbaga ye nka ne filila a ma o don bawo a tun bugɔra kosɛbɛ. Muso caman wɛrɛw bɛ yen minnu tɔɔrɔlenba don, u tɛ se hali ka u ɲɛ kɔrɔta ka mɔgɔ filɛ.”

KO KƐLENW BƐ MUN JIRA? Farafinna dugu dɔ la, ni i ye muso 3 jate, i bɛ ta’a sɔrɔ muso kelen bɛ u cɛla min tɔɔrɔla cɛnimusoya ta fan fɛ ka a to denmisɛnninya la. O dugu kelen na, ɲinini dɔ y’a jira ko ni i ye cɛ 3 ta, i bɛ ta’a sɔrɔ kelen bɛ yen min bolo muso bugɔ tɛ ko jugu ye. Nka o farinya sugu tɛ da musow dɔrɔn kan du kɔnɔ. Misali la, Kanada ni i ye cɛ 10 ta, i bɛ ta’a sɔrɔ cɛ 3 ɲɔgɔn bɛ yen minnu muso bɛ u bugɔ walima ka u minɛko juguya.

SƆSƆLI KUMA JUMƐN BƐ FƆ O KO LA? Farinya min bɛ kɛ denbaya dɔw kɔnɔ, o tɛ ko ye min daminɛ na bi. Nka mɔgɔw bɛ kuma a ko kan bi de kosɛbɛ ka tɛmɛn fɔlɔ kan.

YALA O SƆSƆLI KUMA IN BƐNNEN DON WA? San tan tɛmɛnnen in kɔnɔ, tiɲɛ don ko farinya min bɛ kɛ denbaya dɔw kɔnɔ, kuma kɛra o kan kosɛbɛ ka tɛmɛn fɔlɔ kan. Nka yala a kuma fɔli y’a to dɔ ka bɔ a ko la wa? Ayi, fɛn ma bɔ a la fewu. Kanuya min ka kan ka kɛ denbayaw kɔnɔ, dɔ bɛ ka bɔ o la ka ta’a fɛ de.

I HAKILINA YE MUN YE? Kuma min bɛ 2 Timote 3:1-3 kɔnɔ, yala o tɛ ka waleya wa? Kanuya min ka kan ka kɛ denbayaw kɔnɔ, yala o barika tɛ ka dɔgɔya denbaya caman kɔnɔ wa?

Kiraya kuma duurunan i ɲɛ bɛ min waleyatɔ la, o bɛ an sigiyɔrɔ de kan ni o ye dugukolo ye. A lajɛ Bibulu bɛ min fɔ o ko la.

[Sɛbɛnni min bɛ ntiiri fila kɔnɔ]

“Kojugu minnu bɛ kɛ diɲɛ kɔnɔ, mɔgɔw ka telin ka dɛmɛ ɲini ka ɲɛsin o kow ma ka tɛmɛn farinyakow kan minnu bɛ kɛ denbaya dɔw kɔnɔ. Jateminɛw y’a jira ko, muso dɔ bɛ se k’a to a cɛ ka a bugɔ fo siɲɛ 35 ɲɔgɔn sani a ka se ka ta’a dɛmɛ ɲini polisi la.”—KUMALASEBAGA DƆ, MIN BƐ MƆGƆW DƐMƐ TELEFƆNI FƐ, FARINYA BƐ MINNU KAN U KA DENBAYA KƆNƆ GALLES JAMANA LA.