Kiraya kuma 5nan. Dugukolo bɛ ka tiɲɛ

“Dugukolo tiɲɛnbaaw halaki tuma fana sera [Ala fɛ].”—JIRALI 11:18.

● Pirri ye cɛ dɔ ye min tun bɛ nbanji feere Kpor dugu la Nigeria. Ba min bɛ wele ko Delta du Niger, mɔgɔw kɛlen ka petɔrɔli bɔn o kɔnɔ, o kɔlɔlɔw y’a to Pirri ka baarayɔrɔ binna. A ko: “An ka jɛgɛw bɛ ka sa, an farikolow tiɲɛna wa an ka kɔw fana ji tiɲɛna. Dahirimɛ sɔrɔ cogo fosi tɛ ne bolo bilen.”

KO KƐLENW BƐ MUN JIRA? Ɲinini kɛlaw ŋanaw y’a jira ko ɲaman tɔnni 6 500 000 de bɛ bɔn kɔgɔji kɔnɔ san o san. O ɲaman ninnu tilancɛ bɛɛ ka telin ka kɛ manaw de ye wa u bɛ san kɛmɛ caman kɛ sani u ka tunun. Ka fara dugukolo tiɲɛni kan, dugukolo bɛ fɛn nafama minnu di, hadamadenw bɛ ka baara kɛ ni olu ye cogo jugu la. Ɲininiw y’a jira ko hadamadenw bɛ baara kɛ ni o fɛn minnu ye san kelen kɔnɔ, walasa dugukolo ka se ka o fɛnw lasegin u cogo kɔrɔ la, o baara bɛ san kelen ni kalo duuru de ta. “Mɔgɔw bɛ ka caya dugukolo kan cogo min na ani u bɛ ka baara kɛ ni dugukolo fɛnw ye cogo min na, ni kow tora o cogo la, an mago bɛna kɛ dugukolo fila de la sani san 2035 cɛ,” kunnafoni sɛbɛn australien dɔ y’o fɔ min tɔgɔ ye ko Sydney Morning Herald.

SƆSƆLI KUMA JUMƐN BƐ FƆ O KO LA? Ikomi hadamadenw kunkolo bɛ baara kɛ, an bɛna se ka fɛɛrɛ sɔrɔ nin gɛlɛyaw la ani ka dugukolo kisi.

YALA O SƆSƆLI KUMA IN BƐNNEN DON WA? Mɔgɔ caman ni jɛkulu caman ye cɛsiriw kɛ walasa ka mɔgɔw dɛmɛ ka a faamu dugukolo tiɲɛni bɛ na ni kɔlɔlɔ minnu ye. O bɛɛ la, diɲɛ fan bɛɛ, mɔgɔw bɛ ka ta’a fɛ ka dugukolo tiɲɛ.

I HAKILINA YE MUN YE? Yala an mago tɛ Ala ka dɛmɛ na walasa an ka dugukolo kana tiɲɛ pewu—i n’a fɔ Ala yɛrɛ y’o layidu ta cogo min na?

An ye kiraya kuma duuru ye minnu bɛ ka waleya nka Bibulu tun y’a fɔ fana ko ko dɔw bɛna kɛ laban donw na minnu bɛ an nisɔndiya. An ka o misali dɔ lajɛ o min ye kiraya kuma 6 nan ye.

[Sɛbɛnni min bɛ ntiiri fila kɔnɔ]

“Ne ka yɔrɔ tun ye yɔrɔ ɲumanba de ye nka sisan a kɛlen bɛ ne ɲɛkɔrɔ iko yɔrɔ nɔgɔlen dɔ min bɛ se ka mɔgɔ bana.”—ERIN TAMBER Y’O FƆ O MIN BƐ BƆ MEKISIKI GOLFE LA, ÉTATS-UNIS DUGU LA. A KA KUMA BƐ PETƆRƆLI BƆNNI KO DE KAN JI KƆNƆ MIN KƐRA SAN 2010.

[Yɔrɔ kɔrilen]

Yala Ala de nɔ don wa?

An ɲɛ bɛ ko jugu minnu na bi, ikomi Bibulu tun ye olu kiraya kuma fɔ ka tɛmɛn, yala o b’a jira ko Ala de nɔ ye o ko juguw ye wa? Yala ale de bɛ tɔɔrɔ lase an ma wa? I bɛ se ka jaabi jɔnjɔnw sɔrɔ o ɲininkaliw la Bibulu bɛ mun de fɔ tigitigi? gafe kɔnɔ, a tilayɔrɔba 11 nan na, o min dilanna Jehova Seerew fɛ

[Foto tigiw ]

U.S. Coast Guard photo