Tuma caman na, Bibulu bɛ Yesu wele ko “Ala Denkɛ”. (Yuhana 1:49) Fɔcogo min ye ko “Ala Denkɛ” o b’a jira ko Ala de ye Dabaga ye, walima ko a ye ɲɛnamaya bɛɛ sun ye, Yesu yɛrɛ ka ɲɛnamaya sen b’o la. (Zaburu 36:9; Jirali 4:11) Hadamadenw bɛ denw sɔrɔ cogo min na, Bibulu t’a fɔ ko Ala ye fa ye min bɛ den sɔrɔ o cogo la.

Bibulu bɛ mɛlɛkɛw fana wele ko “Ala denkɛw”. (Job 1:6) Wa ikomi Bibulu b’a fɔ ko mɔgɔ fɔlɔ Hadama bɔra Ala la, o b’a jira ko Ala Denkɛ don. (Luka 3:38) O la, ikomi Yesu de ye Ala ka fɛn dalen fɔlɔ ye ani ko ale kelenpe de dara Ala fɛ k’a sɔrɔ a ma tɛmɛn fɛn si sababu fɛ, Bibulu bɛ Yesu jira iko Ala Denkɛ.

• Yala Yesu ye ɲɛnamaya kɛ sankolo la sani a ka bange dugukolo kan wa?

• Yesu tun bɛ mun de kɛ sankolo la sani a ka na dugukolo kan?

Ɔwɔ. Yesu tun ye dafɛn hakilimaa ye sankolo la sani a ka na bange dugukolo kan iko mɔgɔ. Yesu yɛrɛ y’a fɔ ko: ‘Ne jiginna ka bɔ sankolo la.’—Yuhana 6:38; 8:23.

Ala ye Yesu de da fɔlɔ sani a ka fɛn tɔw da. Ni Bibulu bɛ kuma Yesu ko la, a b’a fɔ ko:

• “Dafɛn bɛɛ la fɔlɔ bangelen don”—Kolosekaw 1:15.

• “Ala ka dafɛn bɛɛ jubɔbaa” don.—Jirali 3:14.

Kiraya kuma min ye ko “o tun bɛ yen kabini waatiw daminɛ, a tun bɛ yen kabini fɔlɔfɔlɔ”, o kumaw tun bɛ tiimɛ Yesu de kan.—Mise 5:2; Matiyu 2:4-6.

Jɔyɔrɔba tun b’a bolo sankolo la. Yesu kumana a jɔyɔrɔ kan tuma min na a ye delili kɛ ko: “Ne Fa, nɔɔrɔ min tun bɛ ne kan . . . sani diɲɛ ka da, o nɔɔrɔ da ne kan i yɛrɛ da fɛ”—Yuhana 17:5.

A ye a Fa dɛmɛ ka fɛn tɔw bɛɛ da. Yesu tun bɛ Ala “kɛrɛ fɛ a ka baara la” (Ntalenw 8:30) Bibulu b’a fɔ Yesu ko la ko: “Ale de la fɛn bɛɛ dara, sankolo la fɛnw ani dugukolo kan fɛnw”—Kolosekaw 1:16.

Ala tɛmɛnna Yesu de fɛ walasa ka fɛn tɔw bɛɛ da. Dafɛn hakilimaa tɔw bɛɛ ka fara diɲɛ ni a kɔnɔ fɛnw kan, olu sen bɛ o fɛn danenw na. (Jirali 5:11) Fɔcogo dɔ la, jɛɲɔgɔnya min tun bɛ Yesu ni Ala cɛ, o tun bɛ iko jɛɲɔgɔnya min bɛ so plan dilanbaga ni sojɔla cɛ ni u bɛ baara la. So plan dilanbaga ale bɛ so plan dilan; sojɔla ale b’a to o plan in ka kɛ so ye.

A tun bɛ wele ko Kuma. Ni Bibulu bɛ kuma Yesu ka ɲɛnamaya kan sani a ka na dugukolo kan, a bɛ Yesu wele ko “Kuma”. (Yuhana 1:1) O b’a jira ko Ala ye baara kɛ ni a Denkɛ ye walasa ka kunnafoni ni ciw lase Dafɛn hakilimaa tɔw ma.

A bɛ iko Yesu de tun ye Ala ka kumalasebaga fana ye hadamadenw ma. A bɛ se ka kɛ ko Ala tɛmɛnna Yesu de fɛ iko Kuma, tuma min na a ye cikanw di Hadama ni Hawa ma Edɛn nakɔ kɔnɔ. (Jenɛse 2:16, 17) Mɛlɛkɛ min tun ye Israɛlkaw ɲɛminɛ kungokolon kɔnɔ ni Israɛlkaw tun ka kan ka o kanminɛ kosɛbɛ, o tun bɛ sɔrɔ Yesu de ye.—Ekisode 23:20-23. *