Ka dɔlɔ min k’a bɛrɛbɛn Bibulu tɛ o kɔn n’a y’a sɔrɔ jamana sariya bɛ sɔn o ma. Nka ka dɔlɔ min k’a damatɛmɛn Bibulu bɛ o de kɔn.—Zaburu 104:15; 1 kɔrɛntekaw 6:10.

Nka i bɛ se ka mun de kɛ ni dɔw bɛ ka i su ka dɔlɔ min k’a sɔrɔ jamana sariyaw walima i bangebagaw ma o yamaruya?

•  Miiri o kɔlɔlɔw la

•  Ko dɔ latigɛ i bɛna min kɛ

•  I tɔɲɔgɔnw hakilina ye min ye

I tɔɲɔgɔnw bɛ se k’a miiri ko dɔlɔ minni ka kan walasa ka waati dumanw diyabɔ. Nka o kɔlɔlɔw bɛ se ka kɛ mun ye?

• Gɛlɛyaw ka bɔ faamaw yɔrɔ. I bɛ jamana min na, ni dɔlɔmin yamaruyalen tɛ yen, ni ya min, u bɛ se ka i bila ka wari dɔ sara, ka i jate kojugukɛla ye, ka i ka pɛrmi minɛ i la, ka i bila jagoya baara la, walima yɛrɛ ka i bila kaso la.—Romɛkaw 13:3.

• Tɔgɔ tiɲɛ. Dɔlɔ bɛ mɔgɔ bɔ a hakili kan. A bɛ se ka mɔgɔ bila ka fɛn fɔ walima ka fɛn kɛ i bɛ se ka nimisa min na kɔfɛ. (Ntalenw 23:​31-33) Nin intɛrnɛti tile in na, i bɛ fɛn o fɛn kɛ, o bɛ se ka nɔjuguba bila i tɔgɔ kan.

• I bɛ dɛsɛ ka i janto i yɛrɛ la. Dɔlɔ minni bɛ se k’a to a ka nɔgɔya binkannikɛlaw bolo ka bin i kan. A bɛ se k’i bila fana ka tugu tɔw kɔ, u k’i bila ka ko faratilenw kɛ walima ka kow kɛ minnu dagalen tɛ.

• I bɛ se ka kɛ dɔlɔ ka jɔn ye. Ɲininikɛlaw y’a jira ko ni i ye dɔlɔ minni daminɛ joona, a ka ca a la i bɛ teliya ka kɛ dɔlɔ ka jɔn ye. Ka dɔlɔ min walasa ka boli gɛlɛyaw, kelennasigi walima farifaga ɲɛ, o bɛ se ka kɛ jan juguba ye i ma.

• Saya. Kɔ sa in na, Etats-unis, miniti 52 tun mana dafa tuma o tuma, mɔgɔ kelen tun bɛ sa dɔlɔ sababu la k’a tigi to bolimafɛn dɔ bolili la. Nin san duuru tɛmɛnnenw na, san o san, mɔgɔ 1500 ni kɔ de sara minnu tun tɛ san 21 bɔ sirabakan kasara la dɔlɔ sababu la. Hali ni e ma dɔlɔ min, ka don dɔlɔminna ka bolimafɛn kɔnɔ, o ye faratiba ye.

Ni y’a latigɛ joona i bɛna min kɛ, i bɛ se k’i yɛrɛ tanga dɔlɔ damatɛmɛn minni kɔlɔlɔw ma.

Bibulu sariyakolo: “Mɔgɔ kegun bɛ kojugu natɔ ye ka i yɛrɛ dogo o la.” (Ntalenw 22:3) N’i b’a fɛ ka bolimafɛn dɔ boli walima ka baara dɔ kɛ i hakili sigilen ka kan ka min kɛ, o la dɔlɔ minni tɛ hakilitigiya ye o waati la.

Latigɛli: ‘Ni jamana sariya tɛ dɔlɔ minni kɔn ani ni fɛn foyi tɛ ne bali k’o kɛ, o la ne bɛ se k’a latigɛ ka dɔlɔ min.’

Bibulu sariyakolo: “Aw bɛ min kan minɛ, aw m’a dɔn ko aw ye o tigi ka jɔn ye wa.” (Romɛkaw 6:16) Ni ye dɔlɔ min dɔrɔn bawo ko i tɔɲɔgɔnw bɛ o kɛ, o la i b’a to u k’i maara. N’i ye dɔlɔ min walasa ka boli farifaga walima gɛlɛyaw ɲɛ, i tɛna se ka jogow sɛnɛ minnu bɛ se k’i dɛmɛ ka se sɔrɔ i ka gɛlɛyaw kan.

Latigɛli: ‘Ne tɛna a to ne tɔɲɔgɔnw ka ne su ka dɔlɔ min’

Bibulu sariyakolo: “I ni dɔlɔtɔw kana jɛ.” (Ntalenw 23:20) N’i ye jɛɲɔgɔn juguw kɛ i jɛɲɔgɔnw ye, i tɛna se ka i ka latigɛli bɔ a sira fɛ. N’i taamana ni mɔgɔw ye, dɔlɔmin ka di minnu ye, i bɛ i yɛrɛ bila farati la.

Latigɛli: ‘Ne tɛna n’jɛɲɔgɔn kɛ mɔgɔw ye dɔlɔmin ka di minnu ye.’