Ɓè hwèɖeìn Ðíí-gàà kè Ðíí-màà ɓè:

Ðɛ̀ɓɛ̀ìn-ɖɛ̀ɓɛ̀ìn ɓó Geɖepɔɔ kè nyɔ ɓè bììɛɛ nyuɛ ké à “mu ɖé ɓóɖó-dù séín gbo . . . ɓɛ́ [à] kéɛ nyu ɓɛ́ wa ké ɖeín-nà-nyɔ̀ ɓè jù.” Ké à “po wa níɔ.” (Máf 28:19, 20; Máà 12:28-31) Jàà ɖɛ̀ɓɛ̀ìn-ɖɛ̀ɓɛ̀ìn ɓéɖé kpé. Ɔ ɓɛ́ìn nyɔ ɓè ɓɛ́ “wa hwòɖò wɔ̃́ ɓó sè-ná-sèɛ̀ fɛ̀ɛ̀ ɓéɖé jèɛɛ” hwòɖò dyi tóɛ.—Àpɔ́ 13:48.

Ðɛ à vòìn ma gbo kĩ́ín nyɛɛ mɔ̀ ma dɔ́ɔ́-dè-kà ɓè cɛ̃́-cɛ̃́ kè nyɔ ɓè céè-ɖɛ̀ gbo-sè-sè. Kɛɛ kàùn wɛ̃ɛ, à kɔ̃̀ à ké à dɔ́ɔ́-dè-sɛ̀ɖɛ̀ ɓèɔ̀ dyíin nɔ̀mɔ̀ìn. À mɔ́ ɓɛ́ à ké nyɔ ɓè ɖɛ̀ɓɛ̀ìn-ɖɛ̀ɓɛ̀ìn dyí tɛ̀mɛ̀ìn dyììn ɖé ɖɛ ɓè kpɔ̃ wa hwòɖòɛɛ jè cɛ̃-cɛ̃ mú. Ɔ xwíníín mɔ̀, à kɔ̃̀ à ké mú ma, ɓɛ́ à ké ɖɛ ɓè ɓɛ́ wa kpɔ̃ nyɔ ɖò-ɖò séín hwòɖòɛɛ jè hwìɖìi poìn. Xwɛ̀ bòɖòsóò nìà kɛɛ mu à gbo kpáùn ɓɛ́ à keɛ náa nyu kɛ́?

Bòɖòsóò nìà kɛ ɓéɖé cɛ̃́ɛ́-ɖɛ̀ 12 ɓɛ́ wa tɛ̀mɛ̀ìn kpeɖe ɓè à kɔ̃̀ à ké ɓéɖé ɓɛ́ à ké ɖɛ̀ɓɛ̀ìn-ɖɛ̀ɓɛ̀ìn tɛ̀mɛ̀ìn, kè ɓɛ́ à ké nyɔ ɓè ɖeín-nà-nyɔ̀ ɓè mú nyuɛ. Cɛ̃́ɛ́-ɖɛ̀ ɖò-ɖò séín ɓá Baɓo-nɔ̀ɔ̀ ɖò kɔ̃̀ mú ɓɛ́ Jízɛ̀ mɔɔ Kɛ́ɖɛ́ì ɖeín-sí-nyɔ̀ kĩ́ín-kĩ́ín ɓèɔ̀ ɖò tɛ̀mɛ̀ìn kpeɖe jɛ́ɛ́ ɖò ɖé Geɖepɔɔ-wùɖù-wáɖá-kũ̀àɔ̀ múɛɛ dyí. Hwòɖò-kpàìn-ɖɛ̀ɔ̀ mɔ̀, ɓɛ́ à ké se dɔ́ɔ́-dè-kà ɓè hwìɖìi pɛ̃́ìn pu, kɛɛ ɓɛ́ à ké hwìè ɓè kɔ̃̀ mú ɓɛ́ à ké nyɔ ɓè ɖɛ̀ɓɛ̀ìn-ɖɛ̀ɓɛ̀ìn dyí tɛ̀mɛ̀ìn nyɛɛ dyi mɔ́. À mɔ́ kpeɖe ɖò-ɖò séín ɓèa ɖé wuɖu-wáɖá-kũ̀àɔ̀ wáká kò-kò séín mú dyɛo, kɛɛ à mu kpeɖe jɛ́ɛ́ ɓè à mɔ́ ɓɛ́ à ké dɔ́ɔ́ gbɔ dè mɔɔ kɔ́ìn-ɖe-kpà ɓè kɔ̃ mu mɔɔ Baɓoɔ tɛ̀mɛ̀ìn nyɛɛ jè cɛ̃́ìn.

Kà nì muà cɛ̃́ɛ́-ɖɛ̀ ɓèɔ̀ cɛ̃́ìn ɖò-ɖò kɛɛ, poìn kà m̀ ɓɛ́ìn kpeɖeɔ̀ tɛ̀mɛ̀ìn ɔ jù ké m̀ dyi nyɔ ɓè nì ɖé nì gbɛ̀ɔ̀ múɛɛ gbo wùɖùɛ̀n nììn nyɛɛ jè hwìɖìi kóɖó-kóɖó. Vɔ̃ ɓɛ́ m̀ ké nì ɖɛ̀ɓɛ̀ìn-ɖɛ̀ɓɛ̀ìn ɓó Jɛhova kè nyɔ ɓè bììɛɛ dyi kùìn. Ðɛ̀ɓɛ̀ìn-ɖɛ̀ɓɛ̀ìn nìà wɛɛ mu m̀ gbo kpáùn, ɓɛ́ m̀ ké nyɔ ɓè ɖeín-nà-nyɔ̀ ɓè mú nyu ké ɔ zi sɛ́ɖɛ́ jɛ́ɛ́ séín ɖò dyí.

À kpá múàùn mìɔ ɓɛ́ à kè ɓè ké sɔ̃ ní gbo poìn ɖé kũ̀à-nyu-nyu múɛ. (Zɛ́f 3:9) Jɛhova mɛ po ɓè séín mana kɔ̃ mìɔ kà ɓè muà nyɔ ɓè mú ɖɛ̀ɓɛ̀ìn tee, ɓɛ́ ɓè kéà wa ɖeín-nà-nyɔ̀ ɓè mú nyuɛ!