Ðɛ Jízɛ̀ Nyu Ma Kɛ

Ðɛ́ À Cɛ̃́ Jízɛ̀ Xwaún Wɛ̃́?

2. Ɔ jù ké kà à nyu ɖɛ tɛ̀mɛ̀ìn nyɛɛ se múin wɔ̃́uń kàmà ní, nìí, ɖɛ à mu nyɔ ɓè tɛ̀mɛ̀ìn nyɛɛ mu wa hwìɖìi sèìn, ké ɔ mu waà hwòɖò-dyùàɔ̀ dyi tóùn.

 Sí Jízɛ̀ Ɓo-Bɛ̃̀ìn

3. Ɓɔ́ wùɖùɛ̀ mìɔ. Ɓɔ́ ɖɛ ɓè m̀ dyuò dyí ɓá cɛ̃́ɛ́-ɖɛ̀ ɖò jè dyíɛɛ séín jè cɛ̃ɛ. Kɛɛ, m̀ mɛ nɛ́ ɖɛ nìà ɖé ɖɛ-cɛ̃́ìn-cèè-ɖɛ̀ɔ̀ múɛɛ kíɖíí. M̀ dyi ɖɛ ɖò dyi diè ní, fòìn ɖɛ-cɛ̃́-nyɔ̀ɔ̀ ɓɛ́ ɔ kéɛ gɔ̃̀ jù. Ɔ jù ké ɔ se gɔ̃̀-jù-wùɖùɔ̀ dyí dyuò, mɔɔ ɔ dyi ɖɛ ɖò ɓɛ́ ɔ kè Baɓoɔ se gbo muìn nyɛɛ cɛ̃ ní, nyùìn dyi-diè-ɖɛ̀ kà kò ɖò ɓè kũ̀à mú, ɓɛ́ ɔ ké ɖɛɔ̀ jè hwìɖìi poìn. Ɔ jù ké nì ɖɛ-cɛ̃́-nyɔ̀ɔ̀ dyi fɔ̀nɔ̀-hwòɖò jɛ́ɛ́ɔ̀ múin wɔ̃́ ní, mu dyua.

4. Nyùìn ɖɛ ɓè nì ɖɛ-cɛ̃́-nyɔ̀ɔ̀ dyuò dyíɛɛ kũ̀à mú, ɓɛ́ m̀ ké ɔ gbo kpá, ɓɛ́ ɔ ké tɛ̀mɛ̀ìn-ɖɛ̀ ɖìè ɓè múin wɔ̃́. Ɔ hwɔìn-kà, hwɛ̀ ɓɛ́ m̀ ké cɛ̃́ɛ́-ɖɛ̀ ɓáà gĩɔ-wóɖó-wóɖóɔ̀ jè dyíɛɛ gbɔ dè ní, m̀ ɓɛ́ìn ɖɛ ɓè ɓɛ́ ɖɛ-cɛ̃́-nyɔ̀ɔ̀ ɖà cɛ̃́ ɓá nyɔ ɓè ɖàà mɛ́ɛ jè dyíɛɛ kɔ̃in kpaa ɖɛ wè.

5. Nyùìn ɖɛ-dyí-poìn-ɖɛ̀ ɓè kũ̀à mú dyí-sɛ́ɖɛ́ìn-kà. Hwɛ̀ ɓɛ́ m̀ ké ɖɛ-dyí-poìn-ɖɛ̀ ɖò kũ̀à mú nyùìn ní, diè m̀ mìɔùn dyi:

1.    ‘Ðɛ-dyí-poìn-ɖɛ̀ɔ̀ se múin wɔ̃́uń kàmàà?’

2.   ‘Ɔ mu xwa fɛ̃́ìn ɓɛ́ ní ɖɛ-cɛ̃́-nyɔ̀ɔ̀ kéɛ múin wɔ̃́ɔ̀?’

3.   ‘Ɔ mu ní ɖɛ-cɛ̃́-nyɔ̀ɔ̀ gbo kpáùn ɓɛ́ fɔ̀nɔ̀-hwòɖò jɛ́ɛ́ɔ̀ ké ɔ hwìɖìi sèè—ké ɔ se ɖɛ-dyí-poìn-ɖɛ̀ɔ̀ ɖòùn puù?’