PO-KƆ̃ C
Kà Nyɔ Ké Baɓoɔ Tɛ̀mɛ̀ìn Ðé Kpáìn Fɛ̀ɛ̀ Múàùn Dyi Ɓó Sè-Ná-Sèɛ̀ Tiín! Céè-Ðɛ̀ɔ̀ Múɛ
Wa ɓaà ma kóɖó-kóɖó, ké wa ɖe ma ɖɛ múin cá ɖé Kpáìn Fɛ̀ɛ̀ Múàùn Dyi Ɓó Sè-Ná-Sèɛ̀ Tiín! céè-ɖɛ̀ɔ̀ nyu-nyu mú. Ɓɛ́ céè-ɖɛ̀ nìà kɛ ké m̀ gbo kpá mìɔ ní, nyu ɖɛ ɓè nìà kɛ ɔ jù ké m̀ dyi nyɔ ɓè Baɓoɔ tɛ̀mɛ̀ìn nììn.
Hwɛ̀ ɖɛ-cɛ̃́-cɛ̃́ɔ̀ ké gbɔ dèɛ
-
1. Dyéìn m̀ mìɔùn ti nɔ̀mɔ̀ dyíin. Kà nì muà náa nyuùn wɛ̃ɛ, poìn ɖɛ-cɛ̃́-nyɔ̀ɔ̀ mɔ́ɔ́-ɖɛ̀ ɓè kè ɔ cĩ́-cĩ́ɔ̀ ɔ kè kà ɔ nyu ɖɛ dya gmɔ̀ɔ̀ kɛɛ jè hwìɖìi. Vɔ̃ ɓɛ́ m̀ ké ɖɛ jɛ́ɛ́ ɓè ɓɛ́ ɔ kɔ̃̀ ɔ ké múin wɔ̃́ mɔɔ ɔ ké kũ̀à mú nyùìn nyɛɛ jè hwìɖìi poìn. Poìn kà ɖɛ ɓè nìà “Cɛ̃́ Ðɛ Pàɖà” wákáɔ̀ xwíɖíiɛɛ ɓɛ́ìn nì ɖɛ-cɛ̃́-nyɔ̀ɔ̀ gbo kpáa kɛɛ jè hwìɖìi, ké m̀ mɛ dyé ti ɓɛ́ m̀ kéɛ kũ̀à mú nyùìn ti séín ɔ mu dyíin nɔ̀mɔ̀ùn ɓó ɖɛ-cɛ̃́-cɛ̃́ɔ̀ tiín nyɛ.
Ðɛ-cɛ̃́-cɛ̃́ɔ̀ tiín
-
2. Ɓaà ɖé ɔ gbɔ-dè-dè kè ɔ mánáín-hwɛ̀-hwɛ̀ mú, ɔ sèìn ɖɛ-cɛ̃́-nyɔ̀ɔ̀ seɛ dyɛ̀ gbo wɔ̃́ìn hwɛ̀.
-
3. Ma mú ɓɛ́ mɔ̀ ní kɔ̃̀ ɖà wùɖù mìɔ. Nɛ́ céè-ɖɛ̀ɔ̀ kíɖíí, ké nyí ɖɛ-cɛ̃́-nyɔ̀ɔ̀ ti ɓɛ́ ɔ ké wùɖù.
-
4. M̀ dyi ge-mú jɛ́ɛ́ ɖò gbɔ dèɛ̀n nììn, zà cɛ̃́ɛ́-ɖɛ̀ jɛ́ɛ́ɔ̀ ɓó ge-mú nìà wɛ bììɛɛ wuɖuún, ɓɛ́ m̀ ké cɛ̃́ɛ́-ɖɛ̀ ɓèɔ̀ hìɖì-kpà ɓèɔ̀ gbɛ̀i-gbɛ̀i jè cɛ̃.
-
5. M̀ dyi ge-mú jɛ́ɛ́ ɖò gbɔ hwɔɔ nììn, nyùìn ge-mú kɔ̃in-kpa-kpaɔ̀ kũ̀à mú, ɓɛ́ m̀ ké nì ɖɛ-cɛ̃́-nyɔ̀ɔ̀ gbo kpá, ɓɛ́ ɔ ké jàà ɓè ɔ ɖàà cɛ̃́ɛ hwìɖìi pɛ̃́ìn.
-
6. Kà m̀ kè nì ɖɛ-cɛ̃́-nyɔ̀ɔ̀ muà cɛ̃́ɛ́-ɖɛ̀ ɖò-ɖò cɛ̃́ìn nyɛɛ:
-
Zà wuɖu-kpà ɓèɔ̀ wuɖuún.
-
Zà vɔ̀sì ɓè wa ɖá “zà wuɖuún” wɛ̃ɛ séín wuɖuún.
-
Zà vɔ̀sì tɔ̀ɔ̀ ɓè mu wuɖuún-zà-zà mɔ́ùn wɛ̃ɛ wuɖuún.
-
Po víɖò séín wa ɖá “Po kũ̀à gbo” kɛɛ kũ̀à gbo (ɔ jù ké m̀ dyi wa ɓéɖéín).
-
Diè ɖɛ-cɛ̃́-nyɔ̀ɔ̀ dyi-diè-ɖɛ̀ ɖò-ɖò ɓèɔ̀ dyi.
-
Taɓa dyi-dyé-ɖɛ̀ nìà “Ðe Ðɛ Múin Cá” wákáɔ̀ xwíɖíiɛɛ jìì, ɓɛ́ m̀ ké ɖɛ-cɛ̃́-nyɔ̀ɔ̀ dyi diè ɓɛ́ ɔ kéɛ jè kɔ̃in zaìn.
-
Nyùìn “Dyí-Sɔ́-Ðɛ̀” gbɔ̀ɖɔ̀ɔ̀ kũ̀à mú, ɓɛ́ m̀ ké nì ɖɛ-cɛ̃́-nyɔ̀ɔ̀ gbo kpá, ɓɛ́ ɔ ké kà ɔ nì dyúa múɛń nyɛɛ dyí dyuò. M̀ ɓɛ́ìn ɔ kpéí poɛ ɓɛ́ ɔ ké dyí-sɔ́-ɖɛ̀ hwɔìn-ɖɛ̀ɔ̀ kũ̀à mú nyùìn, ɓɛ́ ɔ ké ɖɛ tɔ̀ɔ̀ ɓè dyí sɔ́, mɔɔ wa sɔ̃́ɔ̀ dyí sɔ́.
-
Diè nì ɖɛ-cɛ̃́-nyɔ̀ɔ̀ dyi kɛbì ɔ kpáìn céè-ɖɛ̀ ɓè mɔɔ víɖò ɓè nìà “Cɛ̃́ Ðɛ Pàɖà” wákáɔ̀ xwíɖíiɛɛ jɛ́ɛ́ ɖò múàùn dyi ti ɔ nì ma cɛ̃́ɛ́-ɖɛ̀ɔ̀ ti dyéɛ̀n nyɛɛ ní.
-
Vɔ̃ ɓɛ́ m̀ ké cɛ̃́ɛ́-ɖɛ̀ dyúáɖò gbɔ hwɔ ɖé ge-mú ɖò xwíɖíi.
-
Ðɛ-cɛ̃́-cɛ̃́ɔ̀ ɖà gbɔ hwɛ̀ ní
-
7. Poìn nì ɖɛ-cɛ̃́-nyɔ̀ɔ̀ jè hwìɖìi tee. Ɓaà ɓɛ́ Jɛhova ké nì ɖɛ-cɛ̃́-nyɔ̀ɔ̀ dyúa-mu-muɔ̀ mana kɔ̃ po, kè ɓɛ́ ɔ ké m̀ fɔ̀nɔ̀-hwòɖò nyí, ɓɛ́ m̀ ké kà m̀ ké nì ɖɛ-cɛ̃́-nyɔ̀ɔ̀ gbo kpáa nyuɛɛ dyí dyuò.
