M̀ DYI bɔ̃̌-cèè-ɖɛ̀ wuɖuún zà, mɔɔ m̀ dyi kpa-dyéɖé-ɖíà dyi dyé, mɔɔ m̀ dyi vò-wuɖuún-gbɔ̀ɖɔ̀ɔ̀ ɖùǔ gbo tò ní, m̀ dyé ɖɛ pàɖǎ ké m̀ wɔ̃́ bɔ̃̌ pàɖǎ ɓá ɖɛ gbà kè to ɔ kè kànàǎ-ɖɛ̀ ɓě jè dyí. Ti ɖòɛ̀ ɓaɖaín, m̀ ɓɛ́ìn gǎ dyéɛń nìɛ̀ dyɛ̀, sepóɛɖé m̀ nì wɛ́iń, mɔɔ nì ɖɛ̀ɓɛ̀-nyɔ̀ ɖò ɖǎ mɛ́ jè.

Diè m̀ mìɔùn dyi, ɓɛ́ m̀ ké níiń:

• Ðɛ nìà kɛ ɖé Gèɖèpɔ́ɔ̀ mɔ́ ɓó ḿ kè ní xwéɖé-dùɔ̀ bìì?

• Dɛ̌ ḿ ɓɛ́ìn gbo-kpá-kpá dyéɛ, ɓɛ́ ḿ ké ní fũ̀à-fṹá-ɖɛ̀ ɓěɔ̀ hwòɖǒ kùìn nyɛ́?

• Gìɖìǐ jɛ́ɛ́ mu náá nììnǹ?

Báɓòɔ̀ tò gɔ̃̌-jǔ-wùɖù ɓě ɓɛ́ nyɔ ɓɛ́ìn jǎà poɛ kɛ ɓó dyi-diè-ɖɛ̀ ɓě nìà wɛ jè.

• Nyɔ ɓě se nyɔ-ɖɛ-puà-puà kè súá-kpá-kpá mɔɔ gĩɔ dyí dyéɛ mu ɖe.—Wɛ̀ɖɛ̀ɓèɖésĩ̀ɔ̀ 21:4

• “Nyɔ ɓɛ́ ɔ kɔ́ɖɔ́ɛɛ ɓo ɓěɔ̀ mu dyí pɛ́ɛ̀ìn, ké ɔ mu dyií dyi wãìn kà déɖé nyuà kɛ.”—Àzédyà 35:6

• “Nyɔ ɓɛ́ ɔ kpè dyéɖéín dyiɛɛ dyéɖé mu kaàùn.”—Àzédyà 35:5

• Nyɔ ɓě ɖǎà mɛ́ɛ mu fɛ̀ɛ̀ ɓéɖéìn ɖe.—Jɔ̃́ɔ́ 5:28, 29

• Nyɔ ɖò se wɛ́ɛ mu ɖe.—Àzédyà 33:24

• Nyɔǔn séín nì ɓóɖó-kpàà kɔ̃ɛɛ mu ɖii-ɖɛ̀ pàɖǎ ɓéɖéìn.—Wɛ́ɖɛ́ 72:16

M̀ ɓɛ́ìn hwìɖǐi poɛ̀n wàɖà kà ɓɛ́ ɖɛ ɓě m̀ ɖǎà wuɖuún zà ɖé céè-ɖɛ̀ nìà kɛ mí kĩ́ín-kĩ́ín ɓěɔ̀ kɔ̃ɛɛ mɔ̀ dya-dya pūɛ. Kɛɛ Gèɖèpɔ́ɔ̀ ɖǎa cɛ̃ kà ɓɛ́ ɔ mu ɖɛ ɓěa nyuùn nɔ̄ ɓóɖó-kpàà kɔ̃ kàǔn wɛ̃, ké Báɓòɔ̀ zaìn kà ɔ muɛ nyuùn wɛ̃ɛ jè kɔ̃in.

Kɛɛ ɔ seɛ séín. Báɓòɔ̀ cɛ̃ ɖɛ ɓě à ɓéɖé ɓɛ́ à ké dyí dyuò ɓɛ́ à ké múàǔn nì, kè ɓɛ́ à ké fɛ̀ɛ̀ múàǔn dyi kpáìn kàǔn wɛ̃ɛ jè à gbo. Poìn ɖɛ ɓě ɓɛ́ wa nyuɛ ké nì hwòɖǒ gbǎìn dyiíɛɛ jè hwìɖǐi ɖɛ wè. Ðɛ ɓěa ɓɛ́ìn wíɖí mɔɔ ɖɛ ɓě ɓá xwéɖé-dù jè dyíɛ, mɔɔ wɛ́ mɔɔ nì ɖɛ̀ɓɛ̀-nyɔ̀ ɖòɛ̀ mɛ́ jè jǔɛ. Báɓòɔ̀ ɓɛ́ìn m̀ gbo kpáa, ɓɛ́ m̀ ké fũ̀à-fṹá-ɖɛ̀ ɓě nìà kɛ hwòɖǒ kùìn, ké ɔ ɓɛ́ìn nì hwòɖǒɔ̀ dyi dèɛ̀ dyììn ɖé dyi-diè-ɖɛ̀ ɓě nì kà ɓěɛ̀ gɔ̃̌-jǔ-jǔ mú. Wa mɔ̀:

• Ðɛ́ kɔ̃̀ jè à dyéà gǎ kɛ́?

• Xwɛ̌ à ɓɛ́ìn à fũ̀à-fṹá-ɖɛ̀ ɓěɔ̀ hwòɖǒ kùɛ̀n nyɛ́?

• Xwɛ̌ à xwéɖé-dùɔ̀ ɓɛ́ìn múàǔn nìɛ̀ kɛ́?

• À dyi mɛ́ín, ɖɛ́ kpá à gbo kɛ́?

• À mu náá à ɖɛ̀ɓɛ̀-nyɔ̀ ɓě ɖǎà mɛ́ɛ dyéìn ɖeè?

• Ðɛ́ kɔ̃̀ jè à ɓɛ́àìn hwòɖǒ kɔ̃ dèɛ̀ kà ɓɛ́ Gèɖèpɔ́ɔ̀ mu ɖɛ séín ɓě ɓɛ́ ɔ ɖáà nyɛ́nɛ́ kɛɛ nyuùn wɛ̃́?

 Kà m̀ nìà céè-ɖɛ̀ nìà kɛ wuɖuún zàǔn wɛ̃ɛ tɛ̀mɛ̀ìn kà ɓɛ́ m̀ mɔ́ ɓɛ́ m̀ ké ɖɛ Báɓòɔ̀ tɛ̀mɛ̀ìn nyɛɛ dyí dyuòɛ. Céè-ɖɛ̀ nìà kɛ mu m̀ gbo kpáùn. Wuɖu-kpà ɓěɔ̀ ɓéɖé dyi-diè-ɖɛ̀ ɓě ɓɛ́ wa mu m̀ gbo kpáùn, ɓɛ́ m̀ ké Báɓòɔ̀ múin wɔ̃́ nɔ̀mɔ̀ dyíin nyɛ. Nyɔ méɔ̀ùn ɓě ɖǎ wa kè Jɛ̀hóvà Zàse ɓěɔ̀ Báɓòɔ̀ dɔ́ɔ́ kɔ̃in-dèìn-dèìn múàǔn dyi kpáìn. À dèɛ̀ hwòɖǒ kɔ̃ kà ɓɛ́ mɔ̀ùn muɛ múàǔn dyi kpáìn ɖekèɛ. Gèɖèpɔ́ɔ̀ mɛ po m̀ mana kɔ̃ kà nì muà ɖɛ Báɓòɔ̀ ɓɛ́ìn m̀ tɛ̀mɛ̀ìn nyɛɛ dyéìn nyɛ!