Gèɖèpɔ́ɔ̀ ɓǎto jǔ-jǔ mɔ̀ ɖɛ zi dyíin nɔ̀mɔ̀ǔn ɓɛ́ m̀ ké nyuɛ. Gèɖèpɔ́ɔ̀ muɛ m̀ tɛ̀mɛ̀ìn kà m̀ ké múà kè gìɖìǐ mú nìɛ̀. Ɔ mu m̀ ɖɛ ɓě ɓɛ́ nyɔ ɓě po jǎà ké wa seà jǎà kɛɛ kè kpeɖe gbà ɓě xwaún póìn. Ɔ mu nì ɓaà-wùɖù ɓěɔ̀ ɖùǔ gbo tòùn. Ɔ mu m̀ gbo kpáùn ɓɛ́ m̀ ké gìɖìǐ kè hwòɖǒ-dyi-dè-dè ɓéɖé. (Wɛ́ɖɛ́ 71:5; 73:28) Gèɖèpɔ́ɔ̀ mu m̀ gbo kpáùn ɖé fũ̀à-fṹá-tì mú. (Wɛ́ɖɛ́ 18:18) Ké ɖeɛɛ, Gèɖèpɔ́ɔ̀ tò m̀ nyíí-ɖɛ̀ mɔ̀à sè-ná-sèɛ̀ fɛ̀ɛ̀ kɛɛ dyí.—Wóɖómà 6:23.

Kà nì muà Gèɖèpɔ́ɔ̀ bũ̌in xwɛ̃́ìn nyɛɛ, kǎà nì mu ɔ ɓǎto ɓě bũ̌in xwɛ̃́ìn ɖekè. Ké wa mu nì ɓǎto ɓě jǔùn ɖekè. Jǎà jɛ́ɛ́ kɛɛ, wa mu nììn kà nì ɖíí-gàà kè ɖíí-màà ɓě nìà kɛ. Wa mu múàǔn kpáùn ɓɛ́ wa ké m̀ Gèɖèpɔ́ɔ̀ jè tɛ̀mɛ̀ìn, ké wa mu m̀ gbo kpáùn, ɔ kè wa mu m̀ kpéí poùn.

À kè Gèɖèpɔ́ɔ̀ se ɓɛ́ìn. Kà nì muà vɔ̃ùn ɓɛ́ m̀ kéà Gèɖèpɔ́ɔ̀ ɓǎto jǔɛɛ, m̀ ɓéɖé ɓɛ́ m̀ ké jǎà kpa ɖɛ ɖò múin wɔ̃́. Ɔ mɔ̀, à kè Gèɖèpɔ́ɔ̀ ɓǎto jǔ-jǔ se nì kà ɓǎto ɓɛ́ìn wɔ̃ ɓě nìà kɛ. Gèɖèpɔ́ɔ̀ po à ɖe vɛ̃in, ké ɔ ɓéɖé fɔ̀nɔ̀-hwòɖǒ kè kpé mìɔ ké ɔ zi à séín dyí. Ɔ mɔ̀ nyɔ ɓéɖé ɓɛ́ ɔ ké à Nàìn-nyɔ̀ jǔ. Ɔ jèɛɛ, à dyi mɔ́ ɓɛ́ à ké ɔ ɓǎto jǔ ní, nìí, à ɓéɖé ɓɛ́ à ké ɔ ɖùǔ gbo tò, ɔ kè ɓɛ́ à ké ɖɛ ɔ cɛ̃ à gboɛɛ nyu. À dyiɛ náa nyu ní, nìí, ɔ mu dyíin nɔ̀mɔ̀ǔn ɓó à bìì kánáá pū.—Àzédyà 48:18.