Sétɔ̃̀ mɔ́ ɓɛ́ m̀ ké hwĩɔ̀-ɖɛ̀ ɓě xwai nyu. Nyɔ pàɖǎ zà sáa ɖé waà ɓǎ nììn ɓǎ ɓě ɖǎà mɛ́ɛ mɔɔ zùù ɓě gbo, ɓɛ́ wa ké wa dyí gmɔ̀, ɓɛ́ ɖɛ gbà ní kɔ̃̀ ɖà wa gbo kpá. Wa nyuɛ náa, sepóɛɖé wa fɛ̃̀ìn kpé sɔ̀ìn ɖé dɛ̀ ɓɛ́ zùù ɓě nìà kɛɛ dyi jè. Wa po sɔ̃-po-ɖɛ̀ ɓě sɔ̃, ké wa po jìǐn-po-ɖɛ̀ ɓě ɓɛ́ wa zà hwĩɔ̀ gboɛɛ jìǐn. Wa jǔ mɔɔ wa ná “kũùn” ɓě ɓɛ́ wa ɖá wa ɓéɖé hwĩɔ̀-kpèɛ̀. Ðé nyɔ ɖíɛ́ ɓě ɓíɖí-taún wɛ̃ɛ, wa vǐè ɖɛ ɓě ɓɛ́ wa hwòɖǒ ɖá wa ɓéɖé kpé ɓó wa dyí gmɔ̀ jè kɛɛ ɖé ɓóɖóún. Nyɔ tɔ̀ɔ̀ ɓě nyu “kũùn” jè xwai, sepóɛɖé wa hwòɖǒ ɖá ɔ muɛ nyuùn ɓɛ́ waà peɖee-ɖɛ̀ kè ɖɛ-cɛ̃́-cɛ̃́ ké mú wóɖó mɔɔ ɓɛ́ nyɔ wa mu mɔ́ùn wɛ̃ɛ ké wa mɔ́ ɖekè.

Ðɛ ɓɛ́ìn m̀ Sétɔ̃̀ xwaún póɛ̌n jɛ́ɛ́ kɛɛ mɔ̀ ɓɛ́ m̀ ké Jɛ̀hóvà ɓǎto jǔ. Jɛ̀hóvà kè ɔ ínjà ɓěɔ̀ ɓéɖé kpé mìɔ ké ɔ zi Sétɔ̃̀ kè ɔ zùù gbà ɓěɔ̀ dyí. (Jĩ́ìn 2:19; Wɛ̀ɖɛ̀ɓèɖésĩ̀ɔ̀ 12:9) Jɛ̀hóvà nìɛ̀ mɔ́uń mìɔ ɓɛ́ ɔ ké ɔ kpéɔ̀ kũ̀à mú nyùìn ɓó ɔ ɓǎto ɓě síà ɔ kíɖíí hwòɖǒɛ̀-ɖé-hwɛ̀-kà kɛɛ jè.—2 Kánáníkɔ̀ 16:9.

Báɓòɔ̀ ɖá, “Nyɔ ɖò ní ɖá ɓɛ́ ɔ ké hwĩɔ̀-ɖɛ̀ ɖò xwai nyu.” Jɛ̀hóvà nyɛ́ nyɔ ɓě nyuà hwĩɔ̀-ɖɛ̀ kè hwe-kpèɖè xwaiɛɛ mú, sepóɛɖé ɖɛ ɓě nìà kɛ nyu-nyu nyuɛ ké Sétɔ̃̀ mɔ̀à Nɔɔ́-nàmàǔn wɛ̃ɛ kɔ̃̀ nyɔ ɖò kpé kɔ̃ún.—Ðìvéɖékɔ̀ 19:26.