Gèɖèpɔ́ɔ̀ mɔ́ ɓɛ́ m̀ ké ɔ ɓǎto jǔ. M̀ ɖǎa hwìɖǐi poìn ɖò kà ɓɛ́ m̀ ɓɛ́ìn nyɔ mɔ̀à Nyɔ vɛ̀nɛ̀ ɖé dyɔɔ̀ kè ɓóɖó-kpàà kɔ̃in nyɛɛ ɓǎto jǔɛ kɛɛ̀? Wa ɖáìn ma Ééɓòɖòhɛ̃́ɛ̀ ɓɛ́ ɔ cĩ́ó zɔ̃̌ɔ̀ kɛɛ Gèɖèpɔ́ɔ̀ ɓǎto. (Jĩ́ìn 2:23) Báɓòɔ̀ cɛ̃ nyɔ tɔ̀ɔ̀ ɓě ɓɛ́ wa jǔ ma Gèɖèpɔ́ɔ̀ ɓǎto ɓě, ké mana nì ma wa kɔ̃ mìɔ kɛɛ jè ɖekè. Ɓó zɛ̃̌ɛ̀ kɛɛ, nyɔ ɓě sɔ̀ìn ɖé ɓóɖó-kpàà dà séín nyɛɛ ɖǎ Gèɖèpɔ́ɔ̀ ɓǎto ɓě jǔ. M̀ ɓɛ́ìn Gèɖèpɔ́ɔ̀ ɓǎto jǔɛ ɖekè.

Ɔ nɔ̀mɔ̀ dyíin ɓɛ́ m̀ ké Gèɖèpɔ́ɔ̀ ɓǎto jǔ ké ɔ zi ɓɛ́ m̀ ké nyɔǔn-dyù ɓǎto jǔɛɛ dyí. Gèɖèpɔ́ɔ̀ ní po ɔ jǎà-ɓǎto ɓě hwòɖǒ ɖé ɖei fɔɔ. (Wɛ́ɖɛ́ 18:25) Ɔ nɔ̀mɔ̀ dyíin ɓɛ́ m̀ ké Gèɖèpɔ́ɔ̀ ɓǎto jǔ ké ɔ zi ɓɛ́ m̀ ké bã kɛɛ dyí. Sepóɛɖé bã-nyɔ̀ dyi mɛ́ín, ɔ wíɖíɔ̀ mu nyɔ tɔ̀ɔ̀ ɓě gbo. Kɛɛ nyɔ ɓě mɔ̀à Gèɖèpɔ́ɔ̀ ɓǎto ɓěɛɛ ɓéɖé bã-ɖɛ̀ ɖò ɓɛ́ nyɔ ɖò se wa xwa zàà ɓɛ́ìn nyɛ.—Máfíò 6:19.

Nyɔ ɖíɛ́ ɓě ɓɛ́ìn vɔ̃ɔ dyɛ̀ ɓɛ́ wa ké m̀ ɓɔ́í po ɓɛ́ m̀ ké se Gèɖèpɔ́ɔ̀ jè cɛ̃́. Nì ɓǎto ɖíɛ́ ɓě kè nì gbǒ-xwíníín-nyɔ̀ ɓěɔ̀ ɖò ɓɛ́ìn náa nyuɛ. (Máfíò 10:36, 37) Ɔ jǔ ké nyɔ tɔ̀ɔ̀ ɓě dyi m̀ dyɔ́ ɓaɖa mɔɔ m̀ fã̀àǔn poín, nìí, diè m̀ mìɔùn dyi, ‘Nyɛ́ kɔ̃̀ hwòɖǒ ḿ mɔ́ ɓɛ́ ḿ ké dyi dè kɛ́? Nyɔǔn-dyùù mɔɔ Gèɖèpɔ́ɔ̀?’ Poìn ɖɛ nìà kɛ jè hwìɖǐi. Nyɔ ɖò dyiɔ́ɔ m̀ gbo cɛ̃ kà ɓɛ́ m̀ mɛ ɓɔ́ ɖɛ ɖiɛ ní, nì muɔ́ ɔ wuɖu nyuùnǹ? Gbào! Sepóɛɖé m̀ kɔ̃̀ ɓɛ́ m̀ ké ɖɛ ɖi ɓɛ́ m̀ ké cĩ́. Kɛɛ Gèɖèpɔ́ɔ̀ ɓɛ́ìn nyuɛ ɓɛ́ m̀ ké cĩ́ kánáá pū! Ɔ jèɛɛ, m̀ mɛ ɓɔ́ wɔ̃́ɔ ɓɛ́ nyɔ ɖò ké m̀ ɓɔ́í po ɓó kà m̀ ɓɛ́ìn Gèɖèpɔ́ɔ̀ ɓǎto jǔɛ kɛɛ cɛ̃́ jè.—Jɔ̃́ɔ́ 17:3.