Ɔ ɖú dúún-ku-ku dyí ɓɛ́ m̀ ké ɓǎto nyu, ké ɔ ɖú dúún-ku-ku dyí ɓɛ́ m̀ ké ɓǎtoɔ̀ ɓéɖé kánáá pū. Mana ɓáún-ɓáún mu kũ̀à ɓɛ́ m̀ nìà nyuɛń, ɓɛ́ m̀ kéà Gèɖèpɔ́ɔ̀ ɓǎto jǔ kàǔn ɔ kè kánáá pū kɛɛ kɔ̃ nììn. Jízɛ̀ cɛ̃ɛ ma nyɔ ɓě po ma ɔ jè jǎà kɛɛ gbo, ké ɔ ɖá, “Ɓě mu jǎà dyí dyuòùn, ké jǎàɔ̀ mu ɓě buɛ̀ìn.” (Jɔ̃́ɔ́ 8:32) Ðɛ́ mɔ̀ ɔ xwíníín nyɛ́?

M̀ ɓɛ́ìn buɛ̀-buɛ̀ múàǔn dyi kpáìn kàǔn. M̀ ɓɛ́ìn tɛ̀mɛ̀ìn-ɖɛ̀ ɓě seà jǎà kɛɛ kè se ɓě ɓɛ́ Sétɔ̃̀ ɖǎ dyi ɓeìn nyɛɛ xwaún buɛ̀ɛ̀. M̀ ɓɛ́ìn cĩ́-cĩ́ se hwòɖǒ-kɔ̃-dè-ɖɛ̀ ɖò ɓéɖé, ɓɛ́ nyɔ méɔ̀ùn ɓě seà Jɛ̀hóvà dyí dyuò wɛɛ nìà cĩ́ɛń nyɛɛ xwaún buɛ̀ɛ̀. (Wóɖómà 8:22) Gèɖèpɔ́ɔ̀ ɖǎ ɔ ɓǎto ɓě ɓɛ́ wa “fɛ̃̀ìn ma mɛ́-mɛ́” kɛɛ buɛ̀.—Híìbúɖúù 2:14, 15.

M̀ ɓɛ́ìn buɛ̀-buɛ̀ múàǔn dyi kpáìn ɖé Gèɖèpɔ́ɔ̀ ɓóɖó ɖièɔ̀ mú. Buɛ̀-buɛ̀ ɓɛ́ m̀ ɓɛ́àìn múàǔn dyi kpáìn ɖé dyúa kɛɛ kpa ɖɛ mìɔ! Ðé Páɖédǎ múɛɛ, to kè wɛ́ ɔ kè ɖɛ-gbà-nyu-nyu ɖò se nìɛ̌ mu. Gǎ-dyé-dyé kè mɔ́ ɖò se nìɛ̌ mu. Súá-kpá-kpá kè gĩɔ ɖò se nìɛ̌ mu. Fã̀à-peɖe-peɖe kè nyɔ-dyi-pĩ́à-pĩ́à ɔ kè se-dyí-sɛ́ɖɛ́ìn-ɖɛ̀ ɖò se nìɛ̌ mu. Báɓòɔ̀ cɛ̃ɛ ɓá Gèɖèpɔ́ɔ̀ jè dyí, ké ɔ ɖá, “M̀ ɓáà nì xwaɔ̀ dyí ɖé wa gbo, ké m̀ dè fɔ̀ɔ̀-ɖɛ̀ séín hwòɖǒ dyi dyììn ɖé ɖɛ ɓě ɓɛ́ wa mɔ́ɛɛ tò-tò mú.”—Wɛ́ɖɛ́ 145:16.

 Gèɖèpɔ́ɔ̀ ɓǎto ɓě mu cĩ́ìn kánáá pū. Sè-ná-sèɛ̀ fɛ̀ɛ̀ mɔ̀ nyíí-ɖɛ̀ kpa ɖɛ mìɔ ɓɛ́ Gèɖèpɔ́ɔ̀ mu nyɔ séín ɓě ɓɛ́ wa jǔ ɔ ɓǎto ɓěɛɛ nyíìn nyɛ. (Wóɖómà 6:23) Poìn ɖɛ mu sè-ná-sèɛ̀ fɛ̀ɛ̀ɔ̀ xwíníín jǔùn ɓó m̀ bììɛɛ jè hwìɖǐi!

Nì mu ti ɓéɖéìn ɓɛ́ m̀ ké ɖɛ pàɖǎ nyu. Nì muɛ mɔ́ùn dyɛ̀, ɓɛ́ m̀ ké ɓaɖaa-ɖɛ̀ ɖò ɓaɖa-ɓaɖa cɛ̃́. Mɔɔ nì muɛ mɔ́ùn ɓɛ́ m̀ ké mɛɛ-ɖɛ̀-mɛ-nyɔ̀ mɔɔ ɖɛ-kɔ-nyɔ̀ ɖò jǔ. Nì mu nimii ɓě kè ɓáá-ɖɛ̀ ɓě jè cɛ̃́ɛ mɔ́ùn dyɛ̀. Mɔɔ nì muɛ mɔ́ùn ɓɛ́ m̀ ké ɓóɖó-dù kò-kò ɓě kè nyɔ ɓě cĩ́à wa kɔ̃ɛɛ dyé. Nì mu ɖɛ séín ɓě nìà kɛ nyuɛ ɓɛ́ìn ɔ jǔ ké m̀ dyi sè-ná-sèɛ̀ fɛ̀ɛ̀ ɓéɖéín!

Nì mu ti ɓéɖéìn ɓɛ́ m̀ ké nyɔ ɓáún-ɓáún ɓǎto mú nyu. Sè-ná-sèɛ̀ fɛ̀ɛ̀ ɓéɖé-ɓéɖé muɛ nyuùn ɓɛ́ m̀ ké nyɔ ɓáún-ɓáún tɔ̀ɔ̀ ɓě ɓɛ́ wa ɖǎ Gèɖèpɔ́ɔ̀ ɓǎto ɓě jǔɛɛ dyí dyuò. Nì mu ɖɛ ɓě wa ɓɛ́ìn nyuɛ kɛɛ ɔ kè waà kpeɖe nɔ̀mɔ̀ dyíin ɓě dyí dyuòùn, ké wa mu nì ɓǎto ɓě jǔùn ɖekè. Nì mu wa mú ɖɛ̀ɓɛ̀ìn, ké wa mu mɔ̀ùn mú ɖɛ̀ɓɛ̀ìn. (1 Kɔ̀ɖéíntĩ̀ɔ̀ 13:8) Sè-ná-sèɛ̀ fɛ̀ɛ̀ ɓéɖé-ɓéɖé mu m̀ ti nyíìn ɓɛ́ m̀ kè nyɔ séín ɓě nìà ɓóɖó-kpàà kɔ̃ɛɛ ké ɓǎto jǔ. Kɛɛ ɖɛ kpa ɖɛ mìɔ kɛɛ mɔ̀, m̀ kè Jɛ̀hóvà mú-naìn-naìn mu dyi kuùn. M̀ mɛ jǔ Gèɖèpɔ́ɔ̀ ɓǎto kánáá pū!