Ɔ jǔ ké m̀ dyi mɔ́ ɓɛ́ m̀ ké Gèɖèpɔ́ɔ̀ ɓǎto jǔ ní, nìí, m̀ ɓéɖé ɓɛ́ m̀ ké ɓiè-kpò ɓɛ́ ɔ hwòɖǒ dèìn múin nyɛɛ mú nì. Jízɛ̀ ɖá “nyɔ ɓě ɓɛ́ wa ɓiè Ɓǎ jɛ́ɛ́ɔ̀” kɛɛ mu ɔ ɓièìn ɖé “jǎà” mú. (Jɔ̃́ɔ́ 4:23, 24) Kà à ké Gèɖèpɔ́ɔ̀ ɓiè dyí-sɛ́ɖɛ́ìn-kà kɛɛ nì dyúáɖò kpeé-kpeé. (Ìfísĩ̀ɔ̀ 4:4-6) Jǎà ɓiè-kpò nì kà hwìè muà ɖé dɛ̀ ɓɛ́ nyɔǔn ɓéɖéà fɛ̀ɛ̀ kɛɛ nìà kɛ, ké ɓiè-kpò seà jǎà kɛɛ nì kà hwìè muà ɖé mú-gbɔɔ̀-naín nyɛɛ nìà kɛ.—Máfíò 7:13, 14.

M̀ ɓɛ́ìn jǎà ɓiè-kpò dyí dyuòɛ̀ dyììn ɖé nyɔ ɓě nìà ɖé ɔ múɛɛ dyéɖé-gbo-dè-dè mú. Kà Jɛ̀hóvà nɔ̀mɔ̀à kpeɖeín nyɛɛ, nìí, ɔ jǎà ɓiè-nyɔ̀ ɓě ɓéɖé ɓɛ́ wa ké kpeɖeín nɔ̀mɔ̀ ɖekè. Kà sèe-cù nɔ̀mɔ̀ dyíin tòɖòà ɓó nɔ̀mɔ̀ kɔ̃in ɓěɛɛ, kà dyúáɖòɔ̀ kǎà jǎà ɓiè-kpòɔ̀ nyuɛ ké nyɔ ɓě nìà ɔ múɛɛ nɔ̀mɔ̀ kpeɖeín.—Máfíò 7:15-20.

Jɛ̀hóvàà ɓǎto ɓě dyé Báɓòɔ̀ kpéín mìɔ. Wa dyuòɛ̀ dyí kà ɓɛ́ Báɓòɔ̀ sɔ̀ìn ɖé Gèɖèpɔ́ɔ̀ gboɛ. Ɔ jèɛɛ, wa wɔ̃́ìn gbo ɓɛ́ ɖɛ Báɓòɔ̀ cɛ̃ kɛɛ ké wa hwìè da zàìn ɖé wa cĩ́-cĩ́ kè waà fũ̀à-fṹá-ɖɛ̀ ɓě dyi-zĩ̀ìn-zĩ̀ìn mú, ɔ kè ɓɛ́ ɔ ké wa gbo kpá ɓɛ́ wa ké Gèɖèpɔ́ɔ̀ jè cɛ̃́. (2 Tímétè 3:16) Wa vɔ̃ ɓɛ́ wa mìɔùn ké ɖɛ ɓě ɓɛ́ wa cɛ̃ nyɔ tɔ̀ɔ̀ ɓě gboɛɛ nyu ɖekè.

 Jɛ̀hóvàà ɓǎto ɓě ɖɛɓɛìn ɖɛ̀ɓɛ̀ìn mú. Jízɛ̀ tɛ̀mɛ̀ìn ma ɖɛ̀ɓɛ̀ǐn-ɖɛ̀ɓɛ̀ǐn nyɔ ɓě dyí, dyììn ɖé wa Gèɖèpɔ́ɔ̀ jè tɛ̀mɛ̀ìn-tɛ̀mɛ̀ìn, kè wɛ́-nyɔ̀ ɓě dyi kánáìn-kánáìn mú. Nyɔ ɓě nìà ɖé jǎà ɓiè-kpòɔ̀ múɛɛ tɛ̀mɛ̀ìn nyɔ tɔ̀ɔ̀ ɓě ɖɛ̀ɓɛ̀ǐn-ɖɛ̀ɓɛ̀ǐn dyí ɖekè. Kà Jízɛ̀ nyuɛ ma kà kɛɛ, kǎà wa ní zàìn gǎ-dyé-nyɔ̀ ɓě, mɔɔ nyɔ ɓě poà wuɖu-dù kà kò ɖò ɓěɛɛ zùǔn. Jízɛ̀ ɖá nyɔ ɓě mu ɔ ɖeín-nà-nyɔ̀ ɓěɔ̀ dyí dyuòùn dyììn ɖé ɖɛ̀ɓɛ̀ǐn-ɖɛ̀ɓɛ̀ǐn ɓɛ́ wa tɛ̀mɛ̀ìn wa mǔè ɓě dyíɛɛ mú.—Jɔ̃́ɔ́ 13:35.

Gèɖèpɔ́ɔ̀ ɓǎto ɓě dè ɔ nyɛ́nɛ́ mɔ̀à Jɛ̀hóvà kɛɛ dya. Ɔ jǔ ké nyɔ ɖò seɛ gbo wɔ̃́ìn ɓɛ́ ɔ ké nì nyɛ́nɛ́ɔ̀ ɖá ní, nyɔ nìà wɛ ɓɛ́ìn nì ɓǎto xwɛ̃́ìn bũ̌in jǔɛɛ̀? Gbào! À dyi ɓǎto ɖò ɓéɖéín, à ɖá ɔ nyɛ́nɛ́, ké à cɛ̃ ɖɛ nɔ̀mɔ̀ dyíin ɓě ɓá ɔ jè dyíɛɛ ɖé nyɔ tɔ̀ɔ̀ ɓě gbo. Ɔ jèɛɛ, nyɔ ɓě ɓɛ́ wa mɔ́ ɓɛ́ wa ké Gèɖèpɔ́ɔ̀ ɓǎto ɓě jǔ kɛɛ ɓéɖé ɓɛ́ wa ké ɔ nyɛ́nɛ́ɔ̀ ɖá, ɔ kè ɓɛ́ wa ké ɔ jè cɛ̃ ɖé nyɔ tɔ̀ɔ̀ ɓě gbo. Jɛ̀hóvà mɔ́ ɓɛ́ à kéɛ náa nyu.—Máfíò 6:9; Wóɖómà 10:13, 14.

Gèɖèpɔ́ɔ̀ ɓǎto ɓě tɛ̀mɛ̀ìn nyɔ ɓě Gèɖèpɔ́ɔ̀ Kã́á-ɓòɖòɔ̀ jè, kà Jízɛ̀ nyuɛ ma kà kɛ. Gèɖèpɔ́ɔ̀ Kã́á-ɓòɖòɔ̀ mɔ̀ dyɔún-gɔ̌mànà ɓɛ́ ɔ muà ɓóɖó-kpàà páɖédǎ mú nyuùn wɛ̃. Gèɖèpɔ́ɔ̀ ɓǎto ɓě cɛ̃ bɔ̃̌ nɔ̀mɔ̀ dyíin nìà kɛ nyɔ tɔ̀ɔ̀ ɓě gbo ɓá Gèɖèpɔ́ɔ̀ Kã́á-ɓòɖòɔ̀ jè dyí.—Máfíò 24:14.

Jɛ̀hóvà Zàse ɓěɔ̀ vɔ̃ ɓɛ́ wa ké Gèɖèpɔ́ɔ̀ ɓǎto ɓě jǔ. Wa dyé Báɓòɔ̀ kpéín, ké wa ɖɛɓɛìn ɖɛ̀ɓɛ̀ìn mú. Ké ɖeɛɛ, wa ɖá Gèɖèpɔ́ɔ̀ nyɛ́nɛ́, ké wa dè ɔ nyɛ́nɛ́ɔ̀ dya, ɔ kè wa tɛ̀mɛ̀ìn nyɔ tɔ̀ɔ̀ ɓě ɖɛ ɓá Gèɖèpɔ́ɔ̀ Kã́á-ɓòɖòɔ̀ jè dyíɛ. Jɛ̀hóvà Zàse ɓěɔ̀ nì jǎà ɓiè-kpòɔ̀ mú nɔ̄ ɓóɖó-kpàà kɔ̃ zɛ̃̌ɛ̀.