Jɛ̀hóvà se wɔ̃́ɔ mu ɓɛ́ ɖɛ-gbà-nyu-nyɔ̀ ɓě ké Páɖédǎ mú gbɔɔ̀. Ɔ ɓǎto ɓě ɖòùn mɔ̀ nyɔ mu ɖé cĩ́ìn. Ðɛ́ mu ɖɛ-gbà-nyu-nyɔ̀ ɓě gbo kpáùn wɛ̃́? Ɓɛ́ m̀ ké dyi-diè-ɖɛ̀ nìà kɛ gɔ̃̌-jǔ-wùɖù cɛ̃́ ní, poìn jǎà-nɔ̀ɔ̌ ɓáà Nóà jè dyíɛɛ jè hwìɖǐi. Ti Nóà cĩ́ó zɔ̃̌ɔ̀ kɛɛ ɖǎ zɔ̃ táázĩ̀ìn pàɖǎ zĩ̀ìn. Ɔ mɔ̀ ma gàa nɔ̀mɔ̀ kpeɖeín, ké ɔ vɔ̃ ma kóɖó-kóɖó ɓɛ́ ɔ ké ma Jɛ̀hóvà mɔ́ɔ́-ɖɛ̀ nyu ti séín. Kɛɛ nyɔ tɔ̀ɔ̀ ɓě nì ma ɓóɖó-kpàà kɔ̃ɛɛ nyu ma ɖɛ gbà ɓě. Ɔ jèɛɛ, Jɛ̀hóvà cɛ̃ɛ ma Nóà gbo kà ɓɛ́ ɔ mu ma ní-tò ɖò dyàùn ɓɛ́ ɔ ké ma hwòɖǒ-kɔ̃in-nyìnììn-nyɔ̀ séín ɓěa mú gbɔɔ̀ kɛ. Ɔ cɛ̃ɛ ma Nóà gbo ɓɛ́ ɔ ké ma méè ɖò kɔ, ɓɛ́ ɔ kè ɔ xwéɖé-dùɔ̀ ké se ma mɛ́, ti ɓɛ́ ní-tòɔ̀ mu ma dyiìn nyɛ.—Jɛ́nɛ́sì 6:9-18.

Nóà kè ɔ xwéɖé-dùɔ̀ kɔ ma méèɔ̀. Nóà po ma nyɔ ɓěɔ̀ náún kà ɓɛ́ ní-tòɔ̀ nì ma dyiɛń nyɛ, kɛɛ wa se ma ɔ ɖùǔ gbo tò. Wa gã̀ ma ɖɛ gbà nyuɛń dyi. Ti ɓɛ́ méèɔ̀ ɖǎ ma kɔɔ hwɛ̀ kɛɛ, Nóà dyáìn ma nimii ɓě ɖé ɔ mú, ké ɔ kè ɔ xwéɖé-dùɔ̀ dyá ma ɖé méèɔ̀ mú ɖekè. Púɛɛ, Jɛ̀hóvà nyuɛ ké dìì vɛ̀nɛ̀ ɖò dyi ma. Níɔ̀ ɖaɓa ma ɓó dyóɖóaún-wè kpáɖá-nyɔ sɔ̃́ kè máaún-hwùɖù kpáɖá-nyɔ sɔ̃́ xwíníín. Níɔ̀ dyíìn ma ɓóɖó-kpàɔ̀ kɔ̃in.—Jɛ́nɛ́sì 7:7-12.

 Hwòɖǒ-kɔ̃in-nyìnììn-nyɔ̀ ɓěɔ̀ mɛ́ ma, kɛɛ Nóà kè ɔ xwéɖé-dùɔ̀ pó ma. Jɛ̀hóvà póìn ma wa, ké ɔ dyà ma wa ɓóɖó-kpà ɓɛ́ ɔ sámá ma kà hwòɖǒ-kɔ̃in-nyìnììn-nyìnììn séín kɔ̃in nyɛɛ kɔ̃. (Jɛ́nɛ́sì 7:22, 23) Báɓòɔ̀ ɖá tiɔ̀ nì dyiɛń ɖe ɓɛ́ Jɛ̀hóvà ké nyɔ séín ɓě seà wɔ̃́ ɓɛ́ wa kéà dyí-sɛ́ɖɛ́ìn-ɖɛ̀ nyuɛɛ mú gbɔɔ̀. Nyɔ ɓě nyuà ɖɛ nɔ̀mɔ̀ dyíin nyɛɛ se mú gbɔɔ̌ mu. Wa mu cĩ́ìn kánáá pū ɖé Páɖédǎ muà ɓóɖó-kpàà kɔ̃ nììn nyɛɛ mú.—2 Píɖɛ̀ 2:5, 6, 9.

Zɛ̃̌ɛ̀ kɛɛ, nyɔ pàɖǎ nyu ɖɛ gbà ɓě. Fũ̀à-fṹá dyíìn ɓóɖó-kpàà kɔ̃in. Jɛ̀hóvà ɖoɓo ɔ Zàse ɓěɔ̀ tee ɓɛ́ wa ké nyɔ ɓě náún po, kɛɛ nyɔ pàɖǎ se mɔ́ ɓɛ́ wa ké Jɛ̀hóvàà wuɖuɔ̀ ɖùǔ gbo tò. Wa se mɔ́ ɓɛ́ wa ké waà kpeɖe ɓěɔ̀ gbo zĩàìn. Wa se mɔ́ ɓɛ́ wa ké ɖɛ Gèɖèpɔ́ɔ̀ cɛ̃à ɓá dyí-sɛ́ɖɛ́ìn-ɖɛ̀ kè ɖɛ gbà jè dyíɛɛ gbo wɔ̃́ìn. Ðɛ́ mu nyɔ ɓě nìà kɛ gbo kpáùn wɛ̃́? Wa mu gbo zĩàìn wé ɖòɛ̀ ɓaɖaà? Wa pàɖǎ se gbo zĩàǐn mu fɔɔ. Tiɔ̀ nì dyiɛń ɓɛ́ hwòɖǒ-kɔ̃in-nyìnììn-nyɔ̀ ɓě ké mú gbɔɔ̀, ɓɛ́ wa ké se cĩ́ ɖe fɔɔ.—Wɛ́ɖɛ́ 92:7.

Ɓóɖó-kpàà se mú gbɔɔ̌ mu, kɛɛ ɔ mu Páɖédǎ jǔùn. Nyɔ ɓě mɔ̀à Gèɖèpɔ́ɔ̀ ɓǎto ɓěɛɛ mu cĩ́ìn kánáá pū ɖé Páɖédǎ mú nɔ̄ ɓóɖó-kpàà kɔ̃.—Wɛ́ɖɛ́ 37:29.