Gèɖèpɔ́ɔ̀ mú-nyɛ́-nyɔ̀ jɛ́ɛ́ɔ̀ mɔ̀ Sétɔ̃̀ mɔ̀à Nɔɔ́-nàmàǔn nyɛ. Ɔ mɔ̀ ínjà ɓɛ́ ɔ vɔ̃ ma Jɛ̀hóvà gboɛ. Sétɔ̃̀ nì Gèɖèpɔ́ɔ̀ gbo vɔ̃uń ke, ké ɔ nyuɛ ké fũ̀à-fṹá-ɖɛ̀ vɛ̀nɛ̀ ɓě kpá nyɔǔn gbo. Sétɔ̃̀ mɔ̀ nàmàǔn-nyɔ̀. Ɔ mɔ̀ se-tɔ́mɔ́-nyɔ̀ kè kú-ɖáɓá-nyɔ̀.—Jɔ̃́ɔ́ 8:44.

Ínjà ɖíɛ́ ɓě zi ma Sétɔ̃̀ gbo ɖé Gèɖèpɔ́ɔ̀ gbo-vɔ̃-vɔ̃ mú. Báɓòɔ̀ ɖáìn wa zùù gbà ɓě. Zùù gbà ɓěɔ̀ mɔ̀ nyɔǔn mú-nyɛ́-nyɔ̀ ɓě kà Sétɔ̃̀ nìà kɛ. Wa ɖɛ̀ɓɛ̀ ɓɛ́ wa ké nyɔ ɓě puà-ɖɛ̀ bũ̌ nyu. (Máfíò 9:32, 33; 12:22) Jɛ̀hóvà mu Sétɔ̃̀ kè zùù gbà ɓěɔ̀ mú gbɔɔ̀ùn fɔɔ. Ti wa ɓéɖé ɓɛ́ wa ké nyɔǔn fũ̀à-fṹá nyíɛɛ ɖǎ ɓoún xwã́.—Wɛ̀ɖɛ̀ɓèɖésĩ̀ɔ̀ 12:12.

Ɔ jǔ ké m̀ dyi mɔ́ ɓɛ́ m̀ ké Gèɖèpɔ́ɔ̀ ɓǎto jǔ ní, nìí, m̀ mɛ ɓɔ́ ɖɛ Sétɔ̃̀ mɔ́ ɓɛ́ m̀ ké nyu kɛɛ nyuɛ. Sétɔ̃̀ kè zùù gbà ɓěɔ̀ nyɛ́ Jɛ̀hóvà mú. Wa mɔ̀ Gèɖèpɔ́ɔ̀ mú-nyɛ́-nyɔ̀ ɓě, ké wa mɔ́ ɓɛ́ wa ké m̀ Gèɖèpɔ́ɔ̀ mú-nyɛ́-nyɔ̀ mú nyu. M̀ ɓéɖé ɓɛ́ m̀ ké nyɔ kɔ̃̀ hwòɖǒ ɓɛ́ m̀ mɔ́ dyi dèɛ̀ dyiɛɛ gã, kɛbì ɔ mɔ̀ Sétɔ̃̀ mɔɔ Jɛ̀hóvà ní. Ɔ jǔ ké m̀ dyi sè-ná-sèɛ̀ fɛ̀ɛ̀ mɔ́ ní, nìí, m̀ ɓéɖé ɓɛ́ m̀ ké Gèɖèpɔ́ɔ̀ mɔ́ɔ́-ɖɛ̀ nyu. Sétɔ̃̀ ɓéɖé sɛ́ɖɛ́ kè nyɔ-cá-kà kò-kò ɓě. Ɔ nì nyɔ pàɖǎ cáuń.—Wɛ̀ɖɛ̀ɓèɖésĩ̀ɔ̀ 12:9.