M̀ dyi ɓǎto ɖò ɓɛ́ m̀ ɖɛ̀ɓɛ̀ mú ké m̀ dyé kpéín nyɛɛ ɓéɖéín, m̀ vɔ̃ ɓɛ́ m̀ ké nì kà ɔ nìà kɛ. Báɓòɔ̀ ɖá, “[Jɛ̀hóvà] mɔ̀ dyí-sɛ́ɖɛ́ìn-nyɔ̀ kè kpeɖeɛ̀-dyíin-nɔ̀mɔ̀-nyɔ̀.” (Wɛ́ɖɛ́ 25:8) Ɓɛ́ à ké Gèɖèpɔ́ɔ̀ ɓǎto jǔ ní, à ɓéɖé ɓɛ́ à ké dyí-sɛ́ɖɛ́ìn-nyɔ̀ kè kpeɖeɛ̀-dyíin-nɔ̀mɔ̀-nyɔ̀ ɓě jǔ. Báɓòɔ̀ ɖá, “Kà ɓɛ́ ɓě mɔ̀à Gèɖèpɔ́ɔ̀ ɖɛ̀ɓɛ̀-dyù ɓěɛɛ, ɓě mɛ dyéìn ɔ nyuu-ɖɛ̀ ɓěɔ̀, ɓɛ́ ɓě ké ɖò nyu. Ɓě mɛ cĩ́ ɖé ɖɛ̀ɓɛ̀ǐn-ɖɛ̀ɓɛ̀ǐn mú.” (Ìfísĩ̀ɔ̀ 5:1, 2) Ðɛ ɓě à ɓɛ́ìn nyuɛ kɛɛ ɖíɛ́ ɓě kɛà kɛ̀.

Kpá nyɔ tɔ̀ɔ̀ ɓě gbo. “À mɛ nyu nyɔǔn séín bìì nɔ̀mɔ̀ dyíin.”—Gàɖézìà 6:10.

Nyu kũ̀à kóɖó-kóɖó. “Nyɔ ɓɛ́ ɔ dyíɖí ma kĩ́ín nyɛɛ, ɔ ní ɖá ɔ ké dyíɖí ɖe. Ɔ mɛ ɖú kũ̀à nɔ̀mɔ̀ dyíin nyu kpàǐ.”—Ìfísĩ̀ɔ̀ 4:28.

M̀ mɛ hwɛ̀ mú ɖé nì kpóɖó-dyùàɔ̀ kè nì kpeɖe ɓě mú. “Ɓěà mɛ hwɔ ɓěà mìɔùn mú ɓá ɖɛ séín ɓě mɔ̀à kpóɖó-dyùàɔ̀ kè hwòɖǒ-dyùàɔ̀ dyíin-nyìnììn-ɖɛ̀ kɛɛ dyí. Ɓěà mɛ nyuɛ ɓɛ́ ɓěà cĩ́-cĩ́ɔ̀ ké se kɛɛ ɖò ɓéɖé fɔɔ ɖé Gèɖèpɔ́ɔ̀ dyi-fɛ̃̀ìn-fɛ̃̀ìn mú.”—2 Kɔ̀ɖéíntĩ̀ɔ̀ 7:1.

 Ðɛ̀ɓɛ̀ nì gbǒ-xwíníín-nyɔ̀ ɓě mú, ké m̀ mɛ dyé wa kpéín. “Gàa ɖò-ɖò séín mɛ ɖɛ̀ɓɛ̀ waà gmàà mú kà wa ɖɛ̀ɓɛ̀à wa mìɔùn múɛ, ké màa ɖò-ɖò séín mɛ dyé waà dyú-ɓǎ kpéín. Dyú ɓě, . . . ɓě mɛ nyu ɓěɛ̀ wóɖóìn-nyɔ̀ ɓěɔ̀ wuɖu.”—Ìfísĩ̀ɔ̀ 5:33–6:1.

Ðɛ̀ɓɛ̀ nyɔ tɔ̀ɔ̀ ɓě mú. “Ɓěà mɛ ɖɛɓɛìn ɖɛ̀ɓɛ̀ìn mú, sepóɛɖé ɖɛ̀ɓɛ̀ǐn-ɖɛ̀ɓɛ̀ǐn sɔ̀ìn ɖé Gèɖèpɔ́ɔ̀ gbo.”—1 Jɔ̃́ɔ́ 4:7.

Kpɔ̃ ɓóɖóɔ̀ gma ɓě dyi. “Nyɔ séín mɛ nyu waà gɔ̌mànà ɓěɔ̀ wuɖu. Ɓě mɛ pɛ́ɛ̀ wa séín ɖɛ ɓɛ́ wa ɓéɖé wa ké dyéɛ. Ɔ mɔ̀ gɔ̌mànà-wìɖì kè tácì-wìɖì.”—Wóɖómà 13:1, 7.