Ðɛ gbà ɓě nìà ɓóɖó-kpàà kɔ̃ kpáuń kàǔn wɛ̃ɛ tɛ̀mɛ̀ìn kà ɓɛ́ Páɖédǎ ɖǎ dyi xwɛ̃́ìn nyɛ. Báɓòɔ̀ cɛ̃ɛ ma kà ɓɛ́ à mu ti kàmàǔn-kàmàǔn dyéìn hwɛ̀ ɓɛ́ Páɖédǎ ké dyiɛ. À nì tia mú cĩ́ɛń kàǔn! Ðɛ ɓě ɓɛ́ Báɓòɔ̀ ɖá wa mu kpáùn wɛ̃ɛ ɖíɛ́ ɓě kɛà kɛ̀.

To vɛ̀nɛ̀ ɓě. “Ɓóɖó-dù ɓě mu gbo vɔ̃ǐn nììn, ké kã́á-ɓòɖò ɓě mu gbo vɔ̃ǐn nììn.” (Máfíò 24:7) Kpáá-ɖɛ̀ nìà kɛ ɖǎ jǎà kpá. Sɔ̀ìn ɓó zɔ̃ mɔ̀à 1914 kɛ gboɛɛ, to vɛ̀nɛ̀ sɔ̃́ ɓě ɖǎ ɓóɖó-kpàà kɔ̃ kpá, ké to mɛ́nɛ́ɛ́ pàɖǎ ɓě ɖǎ kpá ɖekè. To ɓě nìà kɛ ɖǎ nyɔ méɔ̀ùn ɓě ɖáɓá.

Wɛ́-dù kò-kò ɓě. “Wɛ́-dù kò-kò ɓě mu nyɔǔn-dyù kpɔ̃ùn ɖé dà pàɖǎ ɓě.” (Ðúù 21:11) Ðɛ nìà kɛ ɖǎ jǎà kpáà? Ǹdye. Wɛ́-dù kò-kò ɓě ɖǎ nyɔ méɔ̀ùn ɓě ɖáɓá.

Ðii-ɖɛ̀ gǎ kpá-kpá. Nyɔ ɓě se ɖii-ɖɛ̀ pàɖǎ ɓéɖé ɓɛ́ wa kéɛ ɖi ɖé ɓóɖó-kpàà dà séín. Mɔ́ ɖáɓá nyɔ méɔ̀ùn ɓě ɓó zɔ̃ séín xwíníín. Ðɛ nìà kɛ mɔ̀ dyí-tɛ̀mɛ̀ìn-ɖɛ̀ ɓěɔ̀ ɖò kà ɓɛ́ Páɖédǎ mu dyiìn kàǔn wɛ̃. Báɓòɔ̀ ɖá, “Mɔ́ mu kpáùn.”—Máà 13:8.

 Ɓóɖó-kpàà dyi-túò-túò. “Ɓóɖó-kpàà dà kò-kò ɓě mu dyi túòùn.” (Máfíò 24:7) Ðé à nììn ti nìà kɛ múɛɛ, ɖɛ nìà kɛ ɖǎ jǎà kpá. Sɔ̀ìn ɖé zɔ̃ mɔ̀à 1914 kɛ gboɛɛ, ɓóɖó-kpàà dyi-túò-túò ɖǎ nyɔ méɔ̀ùn zi kɔ̃ ɓě ɖáɓá.

Hwòɖǒ-kɔ̃in-nyìnììn-nyɔ̀ ɓě. Nyɔ ɓě “dyɔɔ̀ mu tɛɖɛìn ɓó wíɖí jè,” ké “wa mu wa mìɔùn jè kàmàùn. Wa mu waà hwòɖǒɛ̀-mɔ́ɔ́-ɖɛ̀ ɓě mú ɖɛ̀ɓɛ̀ìn, ké wa se Gèɖèpɔ́ɔ̀ mú ɖɛ̀ɓɛ̀ɛ̌ mu.” Dyú ɓě “se waà nyɔ ɓěɔ̀ wuɖu nyuɛ́ mu.” (2 Tímétè 3:1-5) M̀ seɛ gbo wɔ̃́ìn kà ɓɛ́ nyɔ pàɖǎ nì ná zɛ̃̌ɛ̀ kɛɛ̀? Wa se Gèɖèpɔ́ɔ̀ kpéín dyé, ké wa nyùìn nyɔ ɓě vɔ̃à ɓɛ́ wa kéà Gèɖèpɔ́ɔ̀ jè cɛ̃́ kɛɛ fũ̀à-fṹá.

Ðɛ gbà. “Ðɛ-gbà-nyu-nyu mu dyí vòùn mìɔ.” (Máfíò 24:12) Nì muɛ gbo wɔ̃́ìn dyɛ̀ kà ɓɛ́ ɖɛ-gbà-nyu-nyu ɖǎ dyí vòɛ̌n zi kàǔn, ké ɔ zi kà ɔ nyu ma nìɛ̀ ɖé zɔ̃ ɓě ɖǎà ziɛɛ xwíníín nyɛ. Ðé ɓóɖó-kpàà dà séín nyɛɛ, nyɔ ɓě nì fã̀àǔn, ɓɛ́ nyɔ ɖò ní kɔ̃̀ ɖà wa gbo dyíɖí mɔɔ wa gbá-gbá-ɖɛ̀ bũ̌ nyu mɔɔ wa bũ̌in puà.

Ðɛ séín ɓě nìà kɛ tɛ̀mɛ̀ìn kà ɓɛ́ Gèɖèpɔ́ɔ̀ Kã́á-ɓòɖòɔ̀ ɖǎ dyi xwɛ̃́ìn nyɛ. Báɓòɔ̀ ɖá, “Kà dyúáɖòɔ̀ kǎà ɓě dyi ɖɛ ɓě nìà kɛ dyéɛń nìǐn, ɓě mɛ dyuòɛ̀ dyí kà Gèɖèpɔ́ɔ̀ kã́á-ɓòɖòɔ̀ ɖǎ dyi xwɛ̃́ìn nyɛ.” (Ðúù 21:31) Ðɛ́ mɔ̀à Gèɖèpɔ́ɔ̀ Kã́á-ɓòɖòɔ̀ kɛ́? Ɔ mɔ̀ Gèɖèpɔ́ɔ̀ dyɔún-gɔ̌mànà ɓɛ́ ɔ muà Páɖédǎ nɔ̄ ɓóɖó-kpàà kɔ̃ dyàùn wɛ̃. Gèɖèpɔ́ɔ̀ Kã́á-ɓòɖòɔ̀ mu nyɔǔn-gɔ̌mànà ɓě bɛ̃̌ǐn kpáùn.—Dànyá 2:44.