Sétɔ̃̀ kè ɔ zùù gbà ɓěɔ̀ se mɔ́ ɓɛ́ m̀ ké Gèɖèpɔ́ɔ̀ ɓiè. Wa mɔ́ wa kéɛ nyu ɓɛ́ nyɔǔn séín ké Gèɖèpɔ́ɔ̀ kɔ̃ín pòìn, ɔ jǔ ké wa dyiɔ́ ɔ náa nyuɛ ɓɛ́ìn ní. Xwɛ̌ wa vɔ̃ ɓɛ́ wa kéɛ náa nyu kɛ́? Ðɛ ɓě ɓɛ́ wa nyùìn kũ̀à múɛɛ dyúáɖò mɔ̀ ɓiè-kpò seà jǎà kɛ. (2 Kɔ̀ɖéíntĩ̀ɔ̀ 11:13-15) Ɔ jǔ ké ɓiè-kpò ɖò se jǎà nìà ɖé Báɓòɔ̀ múɛɛ tɛ̀mɛ̀ìn ní, nìí, ɔ se jǎà ɓiè-kpò. Ɓiè-kpò seà jǎà kɛɛ nì kà gbá-gbá-wìɖì nìà kɛ. Ɔ ɓɛ́ìn nìɛ̀ kà wíɖí jɛ́ɛ́ nìà kɛ, kɛɛ ɔ mɔ̀ ɖɛ fóɖóún. Ɔ ɓɛ́ìn m̀ fũ̀à-fṹá pàɖǎ nyíɛ.

Ɓiè-kpò ɓěɛ̀ tɛ̀mɛ̀ìn-ɖɛ̀ ɓě seà jǎà kɛɛ se Jɛ̀hóvà mɔ̀à jǎà Gèɖèpɔ́ɔ̀ kɛɛ hwìɖǐi dèɛ̀ ɓɛ́ìn. Ti Jízɛ̀ nì ma ɓóɖó-kpàà kɔ̃ɛɛ, ɓiè-kpò ɖò nì ma ɓó, ké ɔ nyɔ ɓě mɔ́ ɓɛ́ wa ké ma Jízɛ̀ ɖáɓá. Wa hwòɖǒ ɖá kà wa ɓiè ma kɛɛ mɔ̀ ma jǎà ɓiè-ɓièɔ̀. Wa ɖá, “À ɓéɖé Ɓǎ dyúáɖò, ké ɔ mɔ̀ Gèɖèpɔ́ɔ̀ ɖòùn.” Jízɛ̀ wɔ̃́ìn ma gboò? Gbào! Ɔ cɛ̃ɛ ma wa gbo, ké ɔ ɖá, “Ɓě mɔ̀ ɓě ɓǎ mɔ̀à Nɔɔ́-nàmàǔn wɛ̃ɛ dyú ɓě.” (Jɔ̃́ɔ́ 8:41, 44) Zɛ̃̌ɛ̀ kɛɛ, nyɔ pàɖǎ hwòɖǒ ɖá wa nì Gèɖèpɔ́ɔ̀ ɓièɛ̌n, kɛɛ nyɔ wa nì ɓièɛ̌n jɛ́ɛ́ kɛɛ mɔ̀ Sétɔ̃̀ kè ɔ zùù gbà ɓěɔ̀!—1 Kɔ̀ɖéíntĩ̀ɔ̀ 10:20.

 Kà cu-gɔ̃̀ nyìnììn dyíin tòɖòà ɓo nyìnììn kɔ̃in nyɛɛ, kà dyúáɖòɔ̀ kǎà ɓiè-kpò seà jǎà kɛɛ nyuɛ ké nyɔ ɓě nìà ɔ múɛɛ nyu ɖɛ gbà ɓě. Fũ̀à-fṹá dyíìn ɓóɖó-kpàà kɔ̃in, sepóɛɖé nyɔ ɓě nì ɖɛ gbà ɓě nyuɛń jè. Ɔ hwɔìn kà, gbàɖàùn-po-po kè vɔ̃-vɔ̃ kè dyíɖí-dyíɖí kè nyɔ-dyi-pĩ́à-pĩ́à kè kú-ɖáɓá-ɖáɓá ɔ kè màa gbo-pa-pa. Nyɔ ɓě nyuà ɖɛ gbà ɓě nìà kɛɛ ɓáún-ɓáún nì ɓiè-kpò kò-kò ɓě mú. Wa se Gèɖèpɔ́ɔ̀ ɓǎto ɓě jǔɛ ɓɛ́ìn ɔ sèìn wa táà dyɛ̀ ɖɛ-gbà-nyu-nyu dyi hwɛ̀.—Máfíò 7:17, 18.

Ɓiè-kpò seà jǎà kɛɛ tɛ̀mɛ̀ìn nyɔ ɓě kũùn-kpò ɓiè-ɓiè. Gèɖèpɔ́ɔ̀ ɖá à mɛ ɓɔ́ kũùn-kpò ɓièɛ̀. Ðɛ ɔ cɛ̃à kɛɛ ɓéɖé fɔ̀nɔ̀-hwòɖǒ. Nì muɛ mú ɖɛ̀ɓɛ̀ìn ɔ jǔ ké nyɔ ɖò ní wùɖù m̀ gbo fɔɔ, kɛɛ ɔ wùɖù nì fótò gbo ɖòùnǹ? Nyɔ nì kà wɛ ɓɛ́ìn nì jǎà-ɓǎto jǔɛɛ̀? Gbào, ɔ se ná nìɛ̀ ɓɛ́ìn. Jɛ̀hóvà mɔ́ ɓɛ́ nyɔ ɓě ké ɔ gbo wùɖù. Ɔ se mɔ́ ɓɛ́ nyɔ ɓě ké hwɔìn-ɖɛ̀ sɛ-sɛ mɔɔ fótò ɓɛ́ ɔ seà fɛ̀ɛ̀ ɖò ɓéɖéɛɛ gbo wùɖù.—Ɛ́séɖɔ̀ 20:4, 5.

Ɓiè-kpò seà jǎà kɛɛ tɛ̀mɛ̀ìn kà ɓɛ́ ɔ se ɖɛ gbà ɓɛ́ nyɔǔn ké wa mǔè-nyɔ̀ ɓě ɖáɓá ɖé to múɛ. Jízɛ̀ ɖá Gèɖèpɔ́ɔ̀ ɓǎto ɓě mu mú ɖɛɓɛìn ɖɛ̀ɓɛ̀ìn. À ní ɖáɓá nyɔ ɓě ɓɛ́ à ɖɛ̀ɓɛ̀ múɛ. (Jɔ̃́ɔ́ 13:35) Ɔ se dyíin nɔ̀mɔ̀ ɓɛ́ à ké ɖɛ-gbà-nyu-nyɔ̀ ɓě ɖáɓá dyɛ mɔ̀ùn. Ti Jízɛ̀ mú-nyɛ́-nyɔ̀ ɓě dyi ma ɔ kpɔ̃ùn wɛ̃ɛ, ɔ se ma wɔ̃́ ɓɛ́ ɔ ɖeín-nà-nyɔ̀ ɓěɔ̀ ké ma vɔ̃ ɓó ɔ dyí gmɔ̀ jè.—Máfíò 26:51, 52.

Ɓiè-kpò seà jǎà kɛɛ tɛ̀mɛ̀ìn kà ɓɛ́ ɖɛ-gbà-nyu-nyɔ̀ ɓěɔ̀ mu gǎ dyéìn ɖé hɛ́ɛ̀-nyɛ̀ múɛ. Kɛɛ Báɓòɔ̀ tɛ̀mɛ̀ìn kà ɓɛ́ nàmàǔn pɛ́ɛ̀-ɖɛ̀ mɔ̀ gĩɔ kɛ. (Wóɖómà 6:23) Jɛ̀hóvà mɔ̀ ɖɛ̀ɓɛ̀ǐn-ɖɛ̀ɓɛ̀ǐn Gèɖèpɔ́ɔ̀. Gèɖèpɔ́ɔ̀ ɓɛ́ ɔ ɓéɖéà ɖɛ̀ɓɛ̀ǐn-ɖɛ̀ɓɛ̀ǐn nyɛɛ ɓɛ́ìn nyɔ ɓě gǎ dyéǐn ɓó sè-ná-sèɛ̀ tiínǹ? Ɔ seɛ náa nyuɛ ɓɛ́ìn fɔɔ! Ɓiè-kpò dyúáɖò kpeé-kpeé ɓɛ́ Jɛ̀hóvà hwòɖǒ dèìn múin nyɛɛ ɖòùn mɔ̀ nyɔ mu ɖé Páɖédǎ mú nììn. (Wɛ̀ɖɛ̀ɓèɖésĩ̀ɔ̀ 15:4) Ɓiè-kpò séín ɓě ɓɛ́ wa tɛ̀mɛ̀àìn Sétɔ̃̀ɛ̀ se ɓěɛɛ se nìɛ̌ mu ɖe.