Sétɔ̃̀ dɔ̃̌ nyɔ ɓě mú ɓɛ́ wa ké ɖɛ gbà ɓě nyu. Nyɔ ɓɛ́ ɔ mɔ́ ɓɛ́ ɔ ké Gèɖèpɔ́ɔ̀ ɓǎto jǔɛɛ ɓéɖé ɓɛ́ ɔ ké ɖɛ ɓɛ́ Jɛ̀hóvà nyɛ́ múɛɛ mú nyɛ́ ɖekè. (Wɛ́ɖɛ́ 97:10) Ðɛ ɓě ɓɛ́ Gèɖèpɔ́ɔ̀ ɓǎto ɓě poìn kɔ̃ín nyɛɛ ɖíɛ́ ɓě kɛà kɛ̀.

Gbàɖàùn-po-po. “Ɓě ɖò ní ɖá ɓɛ́ ɓě ké gmaɖe po.” (Ɛ́séɖɔ̀ 20:14) Ɔ mɔ̀ ɖɛ gbà ɓɛ́ màa kè gàa séèà dyi kpɔ̃ìn keɛɛ ké da nì.—1 Kɔ̀ɖéíntĩ̀ɔ̀ 6:18.

Nɔmɔɔ pàɖǎ ná-ná. “Nɔmɔɔ [pàɖǎ] ná-nyɔ̀ . . . ɓěɔ̀ se pá ɖò ɖé Gèɖèpɔ́ɔ̀ kã́á-ɓòɖòɔ̀ kɔ̃ ɓéɖéɛ mu fɔɔ.”—1 Kɔ̀ɖéíntĩ̀ɔ̀ 6:10.

Kú-ɖáɓá-ɖáɓá kè xwíɖí-wɔ̃-zà-zà. “Ɓě ɖò ní ɖá ɓɛ́ ɓě ké kú ɖáɓá.”—Ɛ́séɖɔ̀ 20:13.

Dyíɖí-dyíɖí. “Ɓě ɖò ní ɖá ɓɛ́ ɓě ké dyíɖí.”—Ɛ́séɖɔ̀ 20:15.

Se-tɔ́mɔ́-tɔ́mɔ́. Jɛ̀hóvà nyɛ́ “se-tɔ́mɔ́-mìɔ̀” mú.—Nɔ́ɔ́ 6:17.

 Nyɔ-ɖɛ-gana-xwa-zàìn-zàìn kè dyoɖo. “[Jɛ̀hóvà] nyɛ́ . . . nyɔ-ɖɛ-gana-xwa-zàìn-nyɔ̀ ɓěɔ̀ mú.” (Wɛ́ɖɛ́ 11:5) ‘Ðɛ ɓě ɓɛ́ nyɔǔn-dyù nyu, sepóɛɖé wa mɔ̀ wa mìɔùn nììn mɔ́ɔ́-ɖɛ̀ ɓěɛɛ ɖò mɔ̀ . . . dyoɖo.’—Gàɖézìà 5:19, 20.

Vɔ̃-ɖɛ̀ vɔ̃-vɔ̃. Báɓòɔ̀ ɖá à mɛ ɓɔ́ nyɔ mɔ̀à ‘ɖɛ-séín-mɔ́-nyɔ̀’ kɛɛ dyí nɛ́ɛ.—1 Kɔ̀ɖéíntĩ̀ɔ̀ 5:11.

Ɓóɖó-dù kà kò ɖòɛ̀ nyɔ kè wuɖu-dù kà kò ɖò po-nyɔ̀ ɓě mú-nyɛ́-nyɛ́. “Ɓě mɛ ɖɛ̀ɓɛ̀ ɓěɛ̀ mú-nyɛ́-nyɔ̀ ɓěɔ̀ mú, ké ɓě mɛ ɓaà ɓó nyɔ ɓě ɓɛ́ wa dyéìn ɓě gǎ kɛɛ bìì.”—Máfíò 5:43, 44.

Ðɛ ɓě ɓɛ́ Gèɖèpɔ́ɔ̀ cɛ̃ à gboɛɛ mɔ̀ ɓó à kpáná dyí nyu jè. Ɔ se xwa fɛ̃́ìn ti séín ɓɛ́ à ké ɖɛ gbà nyuɛ ɓɔ́. Dyììn ɖé Jɛ̀hóvà kè ɔ Zàse ɓěɔ̀ gbo-kpá-sɔ̃̀ múɛɛ, m̀ ɓɛ́ìn ɖɛ ɓě ɓɛ́ Gèɖèpɔ́ɔ̀ se mú ɖɛ̀ɓɛ̀ kɛɛ kɔ̃ín pòɛ̀n.—Àzédyà 48:17; Fèɖópĩ̀ɔ̀ 4:13; Híìbúɖúù 10:24, 25.