Ɓɛ́ nyɔ ɖò ké nì ɓǎto jǔ tee ní, m̀ ɓéɖé ɓɛ́ m̀ ké ɔ gbo wùɖù. M̀ tò ɔ ɖùǔ gbo, ké ɔ tò m̀ ɖùǔ gbo. Ké ɖeɛɛ, m̀ cɛ̃ ɖɛ nɔ̀mɔ̀ dyíin ɓě ɓá nì ɓǎtoɔ̀ jè dyíɛɛ nyɔ tɔ̀ɔ̀ ɓě gbo. Kà dyúáɖòɔ̀ kǎà Gèɖèpɔ́ɔ̀ ɓǎto jǔ-jǔ nì. Dyé ɖɛ Báɓòɔ̀ cɛ̃ ɓá ɖɛ nìà kɛ jè dyíɛ.

Wùɖù Jɛ̀hóvà gbo ɖé ɓaà-ɓaà mú ti séín. “Ɓě mɛ ku dúún, ɓɛ́ ɓě ké ɓaà tee.”—Wóɖómà 12:12.

Zà Gèɖèpɔ́ɔ̀ Wuɖu mɔ̀à Báɓòɔ̀ kɛɛ wuɖuún. “Ðɛ séín ɓě céè ɖé Gèɖèpɔ́ɔ̀-cèè-ɖɛ̀ ɓěɔ̀ múɛɛ, Gèɖèpɔ́ɔ̀ mɔ̀ nyɔ cɛ̃ wa. Ké wa nɔ̀mɔ̀ dyíin ɓó nyɔǔn jǎà-ɖɛ̀ ɓěɔ̀ tɛ̀mɛ̀ìn jè kè ɖɛ ɓě wa bĩ xwaa ɓɔ́í po jè kè ɖɛ ɓě se jǎà kɛɛ dyí sɛ́ɖɛ́ìn jè ɔ kè ɓó nyɔǔn náún-po-po ɓó dyí-sɛ́ɖɛ́ìn-kà cĩ́ jè.”—2 Tímétè 3:16.

Tɛ̀mɛ̀ìn nyɔ tɔ̀ɔ̀ ɓě ɖɛ ɓá Gèɖèpɔ́ɔ̀ jè dyíɛ. “Ɓě mɛ mu ɖé ɓóɖó-dù séín ɓěɔ̀ gbo, ɓɛ́ ɓě kéɛ nyu, ɓɛ́ wa ké ní ɖeín-nà-nyɔ̀ ɓě jǔ . . . Ɓě mɛ tɛ̀mɛ̀ìn wa ɖɛ séín ɓě ɓɛ́ ḿ ɖǎ ma ɓě gbo cɛ̃ɛ, ɓɛ́ wa kéɛ dyi kpɔ̃.”—Máfíò 28:19, 20.

 Xwɛ̃́ìn Gèɖèpɔ́ɔ̀ ɓǎto ɓě bũ̌in. “Nyɔ ɓɛ́ ɔ kè hwòɖǒ-fɔ̀nɔ̀-nyɔ̀ naìn múɛɛ fɔ̀nɔ̀ hwòɖǒ.”—Nɔ́ɔ́ 13:20.

Mu ɖé dyí-poìn-poìn ɓě nìà Kĩ́dɔ̃̀ Hɔ́ɔ̀ zɔ̃̀ kɛɛ mú. “À mɛ kɔ̃̀ à mǔè tɔ̀ɔ̀ ɓě jè gbo, ɓɛ́ à ké gbo kpáìn kpàìn, ɓɛ́ à ké nyɔǔn mú ɖɛ̀ɓɛ̀, ɓɛ́ à ké nɔ̀mɔ̀ dyíin nyu . . . À mɛ poìn pòìn kpéí.”—Híìbúɖúù 10:24, 25.

Tò gbo-kpá-kpá ɓó Kã́á-ɓòɖò-kũ̀àɔ̀ nyu jè. “Kà ɓɛ́ nyɔ séín nyuà gbɔ poɛ kɛɛ, kǎà ɔ mɛ nyuɛ tòɛ̀. Ɔ dyiɛ nyuín, ɔ ní ɖá ɓɛ́ ɔ kéɛ hwòɖǒ-se-dyi-dè-kà nyu, ké ɔ ní ɖá ɔ kéɛ nyu kà wa kpɔ̃̀ìn kà nyɔ ganaún wɛ̃. Sepóɛɖé Gèɖèpɔ́ɔ̀ ɖɛ̀ɓɛ̀ nyɔ kɔ̃̀ hwòɖǒ dè dyi, ké ɔ nyí ɔ ɖɛ kɛɛ mú.”—2 Kɔ̀ɖéíntĩ̀ɔ̀ 9:7.