CƐ̃́Ɛ́-ÐƐ̀ 01
Xwɛ̀ Baɓoɔ Ɓɛ́ìn M̀ Gbo Kpáa Kɛ́?
À séín ɓɛ́ìn dyi-diè-ɖɛ̀ ɓè ɓéɖéɛ ɓá fɛ̀ɛ̀ kè gà-dyé-dyé kè gĩɔ ɔ kè ɖé dyúa jè dyí. Wé séìnɛ̀ kpáá-ɖɛ̀, hwɔìn kà, cĩ́-cĩ́ dyi-mɔ́-mɔ́ mɔɔ ɓɛ́ à xwéɖé-dùɔ̀ ké múàùn kpá kɛɛ jè kpɔ̃ à hwòɖò ɖekè. Nyɔ pàɖà dyéɛ kà Baɓoɔ ní kpá wa gbo ɓɛ́ wa ké dyi-diè-ɖɛ̀ kpa ɖɛ ɓè ɓá cĩ́-cĩ́ jè dyíɛɛ gɔ̃̀-jù-wùɖù dyé puɛ, kɛɛ ɔ nyí wa náún-po-wùɖù, ɓɛ́ wa ɓɛ́ìn kũ̀à mú nyùɛ̀n ɖé waà cĩ́-cĩ́ɔ̀ mú wé séín nyɛɛ ɖekè. Nì hwòɖò ɖá Baɓoɔ ɓɛ́ìn nyɔ séín ɖò ɓɛ́ m̀ dyuò dyíɛɛ gbo kpáaà?
1. Ðɛ́ mɔ̀ dyi-diè-ɖɛ̀ ɖíɛ́ ɓè ɓɛ́ Baɓoɔ jù gɔ̃̀ kɛ́?
Baɓoɔ jù dyi-diè-ɖɛ̀ kpa ɖɛ ɓè nìà kɛ gɔ̃̀: Xwɛ̀ fɛ̀ɛ̀ nyu ma gbɔ dèɛ̀ kɛ́? Xwíníínɔ̀ nyɛ́ kɔ̃̀ jè à nìà dà kɛ́? Xwíníínɔ̀ nyɛ́ kɔ̃̀ jè nyɔ ɓè dyéà gà kɛ́? Ɔ jù ké nyɔ ɖò dyi mɛ́ín, ɖɛ́ kpá ɔ gbo kɛ́? Ɔ jù ké nyɔ séín dyi gìɖìì mɔ́ ní, nìí, ɖɛ́ kɔ̃̀ jè to-vɔ̃-vɔ̃ hwɔà dà séín dyiɛ́? Ðɛ́ mu ɓóɖó-kpàà gbo kpáùn ɖé dyúa kɛ́? Baɓoɔ po à kpéí, ɓɛ́ à ké gɔ̃̀-jù-wùɖù ɓè dyi mɔ́ ɓá dyi-diè-ɖɛ̀ ɓèa jè dyí. Ké nyɔ méɔ̀ùn ɓè ɖà Baɓoɔ gɔ̃̀-jù-wùɖù ɓè dè nyɔ hwòɖò dyiɛɛ dyé.
2. Xwɛ̀ Baɓoɔ ɓɛ́ìn à gbo kpáa ɓɛ́ à ké à cĩ́-cĩ́ɔ̀ múàùn dyi kpáìn wé séín nyɛ́?
Baɓoɔ nyí à náún-po-wùɖù nɔ̀mɔ̀ dyíin. Ɔ hwɔìn kà, ɔ tɛ̀mɛ̀ìn xwéɖé-dù ɓè ɖɛ ɓó kà wa ké múàùn kpáa nyu jàà kɛ. Ɔ tò náún-po-wùɖù ɓó kà nyɔ ké hwòɖò-dyií-gbàìn-ɖɛ̀ ɓè kpɔ̃ sɔ̃ nyuɛ, kè kà à ké à kũ̀à ɓè múàùn dyi kpáìn nyuɛ. Nì mu ɖɛ Baɓoɔ tɛ̀mɛ̀ìn ɓá cɛ̃́ɛ́-ɖɛ̀ ɓè nìà kɛ jè dyíɛ kè ɖɛ pàɖà ɓè jè cɛ̃́ìn kà à muà céè-ɖɛ̀ nìà kɛ dɔ́ɔ́ kɔ̃in dèìn nyɛ. Nì muɛ gbo wɔ̃́ìn kà “ɖɛ séín ɓè céè ɖé Geɖepɔɔ-cèè-ɖɛ̀ ɓèɔ̀ múɛɛ, . . . nɔ̀mɔ̀ dyíin” nyɛ.—2 Tímétè 3:16.
Céè-ɖɛ̀ nìà kɛɛ se Baɓoɔ bɛ̃̀ìn kpá, kɛɛ ɔ po m̀ kpéí, ɓɛ́ m̀ ké Baɓoɔ múin gmɔìn ɓó m̀ mìɔùn bìì. Ɔ jèɛɛ, à nì m̀ kpéí poɛń, ɓɛ́ m̀ ké vɔ̀sì ɓè nì cɛ̃́ɛ́-ɖɛ̀ ɓè nìà kɛ múɛɛ wuɖuún zà, ɓɛ́ m̀ ké wa kè ɖɛ ɓè m̀ nìà cɛ̃́ɛń nyɛɛ dyí poìn.
ÐE ÐƐ MÚIN CÁ
Dyé kà Baɓoɔ ɖà nyɔ ɓè gbo kpá kè kà m̀ ɓɛ́ìn ɔ wuɖuún-zà-zà múàùn dyi kpáìn ɔ kè xwíníín kɔ̃̀ jè ɔ nɔ̀mɔ̀à dyíin ɓɛ́ m̀ kéà gbo-kpá-kpá dyé ɓɛ́ m̀ kéà ɔ múin wɔ̃́ kɛ.
3. Baɓoɔ ɓɛ́ìn à hwìè da zàìn
Baɓoɔ nì kà ce fã-fã ɖò nìà kɛ. Baɓoɔ ɓɛ́ìn à gbo kpáa ɓɛ́ à ké ɖɛ nɔ̀mɔ̀ dyíin ɓè gbɔ po, ké ɔ ɓɛ́ìn ɖɛ mu kpáùn ɖé dyúa kɛɛ à gbo cɛ̃ɛ.
Zà Wɛ́ɖɛ́ 119:105 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
-
Xwɛ̀ Wɛ́ɖɛ́ nìà kɛ céè-nyɔ̀ nyu Baɓoɔ dya gmɔ̀ɔ̀ kɛ́?
-
Xwɛ̀ mɔ̀ùn nyu Baɓoɔ dya gmɔ̀ɔ̀ kɛ́?
4. Baɓoɔ ɓɛ́ìn à dyi-diè-ɖɛ̀ ɓèɔ̀ gɔ̃̀ jùɛ
Màa ɖò dyéɛ ma ké Baɓoɔ jù ma ɔ dyi-diè-ɖɛ̀ ɓè ɓɛ́ wa kpɔ̃ ma ɔ hwòɖò ɓó zɔ̃ pàɖà xwíníín nyɛɛ gɔ̃̀. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.
-
Ðé víɖòɔ̀ múɛɛ, dyi-diè-ɖɛ̀ ɓèɔ̀ nyɛ́ màaɔ̀ ɓéɖé ma kɛ́?
-
Xwɛ̀ Baɓoɔ cɛ̃́-cɛ̃́ nyu ma ɔ gbo kpáa kɛ́?
Baɓoɔ po à kpéí, ɓɛ́ à ké ɖɛi diè. Zà Máfíò 7:7 wuɖuún, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn:
-
Ðɛ́ mɔ̀ dyi-diè-ɖɛ̀ ɓè ɓɛ́ m̀ ɓéɖé ɓɛ́ Baɓoɔ ɓɛ́ìn gɔ̃̀ jùɛ kɛ́?
5. M̀ ɓɛ́ìn Baɓoɔ wuɖuún-zà-zà múàùn dyi kpáìn
Nyɔ pàɖà nì Baɓoɔ wuɖuún-zà-zà múàùn dyi kpáìn, ké wa nìɛ̀ kpáná kɔ̃ún dyéɛń. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.
-
Ðé víɖòɔ̀ múɛɛ, xwɛ̀ nyɔ gmɔ̀ ɓèɔ̀ hwòɖò nyu nìɛ̀ ɓá céè-ɖɛ̀ wuɖuún zà jè dyíɛ́?
-
Xwíníínɔ̀ nyɛ́ kɔ̃̀ jè wa hwòɖò zĩàìn gbo kàùn ɓá Baɓoɔ wuɖuún zà jè dyíɛ́?
Baɓoɔ ɖá ɔ ɓɛ́ìn à náún-po-wùɖù ɓɛ́ ɔ dè à hwòɖò dyi, ké ɔ nyí à hwòɖò-kɔ̃-dè-ɖɛ̀ kɛɛ nyíɛ. Zà Wóɖómà 15:4 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
-
Ðɛ Baɓoɔ cɛ̃à ɓá hwòɖò-dyi-dè-dè kè hwòɖò-kɔ̃-dè-ɖɛ̀ jè dyíɛɛ kpɔ̃ m̀ hwòɖòò?
6. Nyɔ tɔ̀ɔ̀ ɓè ɓɛ́ìn m̀ gbo kpáa ɓɛ́ m̀ ké Baɓoɔ múin wɔ̃́
Ɓó Baɓoɔ wuɖuún-zà-zà ɓó nyɔ mìɔùn sɔ̃ kɔ̃ kɛ kɔ̃in nyɛɛ, nyɔ pàɖà ɖàa dyé kà wa kè nyɔ tɔ̀ɔ̀ ɓè Baɓoɔ dɔ́ɔ́-kɔ̃in-dèìn-dèìn tò gbo-kpá-kpá kɛ. Zà Àpɔ́sò 8:26-31 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
-
Xwɛ̀ à ɓɛ́ìn Baɓoɔ múin wɔ̃́ɔ kɛ́?—Dyé vɔ̀sì 30 kè 31.
Ítìópìà-gààɔ̀ mɔ́ ma gbo-kpá-kpá ɓó Baɓoɔ múin wɔ̃́ jè. Nyɔ pàɖà kpáìn wa kè nyɔ tɔ̀ɔ̀ ɓè Baɓoɔ dɔ́ɔ́ kɔ̃in-dèìn-dèìn múàùn dyi
NYƆ ÐÍƐ́ ƁÈ ÐÁ: “Baɓoɔ cɛ̃́-cɛ̃́ mɔ̀ ɖɛ fóɖóún.”
-
Ðɛ́ nì mu cɛ̃ìn nyɛ́? Xwíníínɔ̀ nyɛ́ kɔ̃̀ jè kɛ́?
SṸÌN-XWÍNÍÍN
Baɓoɔ tò náún-po-wùɖù ɓá wé séìnɛ̀ cĩ́-cĩ́ jè dyí, ké ɔ jù dyi-diè-ɖɛ̀ kpa ɖɛ ɓè gɔ̃̀, ké ɔ nyí nyɔ ɓè hwòɖò-dyi-dè-dè kè hwòɖò-kɔ̃-dè-ɖɛ̀.
Ðɛ-kɔ̃in-kpa-kpa
-
Ðɛ́ mɔ̀ náún-po-wùɖù ɓè ɓɛ́ à ɓɛ́ìn ɖé Baɓoɔ mú dyéɛ kɛ́?
-
Ðɛ́ mɔ̀ dyi-diè-ɖɛ̀ ɖíɛ́ ɓè ɓɛ́ Baɓoɔ jù gɔ̃̀ kɛ́?
-
Ðɛ́ nì mu cɛ̃́ɛ mɔ́ùn sɔ̀ìn ɖé Baɓoɔ múɛ́?
CƐ̃́ ÐƐ PÀÐÀ
Dyé kà Baɓoɔ ɓéɖé náún-po-wùɖù ɓè ɓó à bìì zɛ̃̀ɛ̀ kɛ.
“Baɓoɔ Tɛ̀mɛ̀ìn-Ðɛ̀ Ɓè—Wa Fɔ̀nɔ̀ Hwòɖò Kpa Ðɛ Ti Séín” (Dyí-Gmɔ̀ìn-Gbò-Cèè-Ðɛ̀ɔ̀ Nɔ̀. 1 2018)
Dyé kà Baɓoɔ nyu ma gàa ɖò kɔ̃̀ hwòɖò kpá ma ɖé ɖei sɔ̀ìn ɔ dyú-gbɔ́ɔ́-tììn nyɛɛ gbo kpáa kɛ.
Dyé Baɓoɔ náún-po-wùɖù ɓá xwéɖé-dù jè dyíɛ.
“Viè-Ðɛ̀ 12 Ɓè Ɓɛ́ Wa Po Xwéɖé-Ðù Ɓè Múàùn Wɛ̃” (Wóɖó Nyíɔún! Nɔ̀. 2 2018)
Cɛ̃́ kà Baɓoɔ nyu se ɓè ɓá nyɔ kɔ̃̀ ɓóɖó-kpàà kpé kɔ̃ún wɛ̃ jè dyíɛɛ jè kɔ̃in zaìn nyɛ.
