CƐ̃́Ɛ́-ÐƐ̀ 03

M̀ Ɓɛ́ìn Baɓoɔ Jè Jàà Poɛ Cáà?

POƐ KŨ̀À GBO

Baɓoɔ ɓéɖé nyɛ́nɛ́ín-ɖáìn-ɖɛ̀ kè náún-po-wùɖù pàɖà ɓè. M̀ mɔ́ ɓɛ́ m̀ ké dyɛ̀ ɖɛ ɔ tɛ̀mɛ̀ìn nyɛɛ dyí dyuò, kɛɛ m̀ mɔ́ ɓɛ́ m̀ ké mú ma dyɛ̀. Nyɔ mɛ po nyɛ́nɛ́ín-ɖáìn-ɖɛ̀ ɓè kè náún-po-wùɖù ɓè sɔ̀ìn céè-ɖɛ̀ sùà nì kà wɛ múɛɛ jè jàà? M̀ ɓɛ́ìn ɖɛ Baɓoɔ cɛ̃ ɓá fɛ̀ɛ̀ múàùn dyi kpáìn jè dyí kàùn kè ɖé dyúa kɛɛ jè jàà poɛ cáà? Nyɔ méɔ̀ùn ɓè poɛ jè jàà. Ɓèà dyéɛ kɛbì mɔ̀ùn ɓɛ́ìn ɔ jè jàà poɛ ɖekè ní.

1. Baɓoɔ mɔ̀ jàà-cèè-ɖɛ̀ ɖòò mɔɔ se nɔ̀ɔ̀ɔ̀?

Baɓoɔ ɖá ɖɛ ɓè céèà ɖé ɔ múɛɛ “sɛ́ɖɛ́ìn dyí, ké ɔ mɔ̀ jàà.” (Ìkíɖísìásì 12:10) Ɔ cɛ̃ jàà-ɖɛ̀ ɓè ɓɛ́ wa ɓá nyɔ jɛ́ɛ́ ɓè jè dyíɛɛ jè. (Zà Ðúù 1:3; 3:1, 2 wuɖuún.) Ðɛ sùà jè céè-nyɔ̀ ɓè kè ɓóɖó-sùàùn-ɖɛ̀-dyi-mɔ́-nyɔ̀ pàɖà ɓè ɖàa dyé kà ti ɓè kè nyɔ ɓè ɔ kè dà ɓè ɓɛ́ Baɓoɔ cɛ̃ jèɛɛ mɔ̀ jàà kɛ.

2. Xwíníínɔ̀ nyɛ́ kɔ̃̀ jè à ɓɛ́àìn cɛ̃ɛ kà ɓɛ́ Baɓoɔ nììn ti séèà ɓó dyi zi keɛ́?

Ðé hwìè pàɖà ɓè múɛɛ, Baɓoɔ ɖàa tɛ̀mɛ̀ìn kà ɓɛ́ ɔ kpa ɖɛ ti séín nyɛ. Ɔ hwɔìn kà, ɔ cɛ̃ dyuò-ɖɛ̀ ɓè jè. Ðɛ ɓè ɓɛ́ ɔ cɛ̃ ɓá ɖɛ ɓèa jè dyíɛɛ pàɖà mɔ̀ ma dòìn-zà-ɖɛ̀ ti ɔ ɖà ma céèɛ. Kɛɛ kàùn-dyuò-ɖɛ̀ ɓè ɖàa gbo wɔ̃́ìn kà ɓɛ́ ɖɛ ɓɛ́ Baɓoɔ cɛ̃ɛ mɔ̀ jàà kɛ. Ɔ ‘sɛ́ɖɛ́ìn dyí kàùn kè kánáá pu’ ti séín.—Wɛ́ɖɛ́ 111:8.

3. Xwíníínɔ̀ nyɛ́ kɔ̃̀ jè à ɓɛ́àìn ɖɛ Baɓoɔ cɛ̃ ɓá ɖé dyúa jè dyíɛɛ jè jàà poɛ kɛ́?

Baɓoɔ ɓéɖé kpáá-ɖɛ̀ ɓè * ɓɛ́ wa “cɛ̃ zɔ̃̀ɔ̀ ɖɛ ɓè séè kpá keɛ.” (Àzédyà 46:10) Ɔ cɛ̃ ma ɖɛ ɓè ɖà kpá kɛɛ jè vɛ̃in hwɛ̀ wa kpá ma. Ké ɖeɛɛ, ɔ dè ɖɛ ɓè nì zɛ̃̀ɛ̀ kpáuń wɛ̃ɛ mɛ nìɛ̀-nìɛ̀. Ðé cɛ̃́ɛ́-ɖɛ̀ nìà kɛ múɛɛ, à mu Baɓoɔ kpáá-ɖɛ̀ ɖíɛ́ ɓè jè cɛ̃ìn. Wa dyí-sɛ́ɖɛ́ìn-sɛ́ɖɛ́ìnɔ̀ mɔ̀ wɔ̃-fɔ̀nɔ̀ìn-ɖɛ̀ ɖò cá!

ÐE ÐƐ MÚIN CÁ

Cɛ̃́ kà kàùn-dyuò-ɖɛ̀ ɓè wɔ̃́ìn ɖɛ ɓè ɓɛ́ Baɓoɔ cɛ̃ kɛɛ gboɛ, ké gmɔìn Baɓoɔ kpáá-ɖɛ̀ gbɛ̀ì-gbɛ̀ì ɓè ɓɛ́ wa tó nyɔ hwòɖò dyíɛɛ múin.

4. Dyuò-ɖɛ̀ ɓè wɔ̃́ìn ɖɛ Baɓoɔ cɛ̃ kɛɛ gbo

Ðé ti sùà múɛɛ, nyɔ pàɖà poɛ ma jàà kà ɓɛ́ ɓóɖó-kpàà dè ma ɖɛ ɖò kɔ̃ɛ. Po VÍÐÒƆ̀ kũ̀à gbo.

VÍÐÒ: Ɓóɖó-Kpàà Se Ðɛ Ðò Dyí Beè (1:13)

Dyé ɖɛ céè ma Jóɓò-cèè-ɖɛ̀ɔ̀ mú ké ɔ ɖà zɔ̃ 3,500 zĩ̀ìn nyɛ. Zà Jóɓò 26:7 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Xwíníínɔ̀ nyɛ́ kɔ̃̀ jè wuɖu ɓè mɔ̀à “ɔ se ɓóɖó-kpàà ɖɛ ɖò dyí beè” kɛɛ mɔ̀à dyi-gìnììn-ɖɛ̀ kɛ́?

Hwɛ̀ ɓɛ́ zɔ̃ ɓè mɔ̀à 1800 kɛɛ ké ma nyiniɛɛ, nyɔ ɓè se ma kà níɔ nyu mú ziɛ̀ìn dyɔɔ̀ kè ɓóɖó-kpàà pṹa kɛɛ jè múin wɔ̃́. Dyé ɖɛ ɓɛ́ Baɓoɔ cɛ̃ ma ké ɔ ɖà zɔ̃ táázĩ̀ìn pàɖà ɓè zĩ̀ìn nyɛ. Zà Jóɓò 36:27, 28 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Xwíníínɔ̀ nyɛ́ kɔ̃̀ jè níɔ mú-ziìn-ziìn mɛ-dè-dè fɛ̃́ìn xwa nìà kɛɛ mɔ̀à ɖɛ kpa ɖɛ ɖò kɛ́?
Baɓo vɔ̀sì ɓè m̀ zàà wuɖuún kàùn wɛ̃ɛ nyuɛ ɓɛ́ m̀ ké Baɓoɔ jè jàà po cáà?

5. Baɓoɔ cɛ̃ zɔ̃̀ɔ̀ ɖɛ kpa ɖɛ ɓè kpá jè

Zà Àzédyà 44:27–45:2 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Ðɛ́ ɓè Baɓoɔ cɛ̃ zɔ̃̀ɔ̀ ɓɛ́ ɔ zĩ̀ìn ma zɔ̃ 200 hwɛ̀ Báɓèɖɔ́ùn dyi ma wáɖá kɛ́?

Po VÍÐÒƆ̀ kũ̀à gbo.

VÍÐÒ: Baɓoɔ Cɛ̃ Ma Báɓèɖɔ́ùn Wáɖá Jè (0:58)

Ɓóɖó-sùàùn-cèè-ɖɛ̀ ɓè cɛ̃ɛ kà ɓɛ́ Sáwàɖà mɔ̀ ma kà Pɔ́sìà-Kã̀àɔ̀ kɛɛ kè ɔ sójà ɓèɔ̀ ɖu ma Báɓèɖɔ́ùn-hwɔ̀ɖɔ̀ɔ̀ toún ɖé zɔ̃ mɔ̀à 539 B.C.E. * kɛɛ xwíníín nyɛ. Wa màìn ma ní ɓɛ́ ɔ gmɔ̀ ma kà hwɔɖɔɔ̀ dyíɛ. Ti wa dyáìn ma hwɔɖɔɔ̀ gmɔ-wɔ̃̀ ɓè fɔ̀nɔ̀ ma wɔ̃ɛ múɛɛ, wa kpɔ̃ ma hwɔɖɔɔ̀, ké wa se ma to ɖò vɔ̃. Zɛ̃̀ɛ̀ kɛɛ, ɔ ɖà zɔ̃ 2,500 zĩ̀ìn ké Báɓèɖɔ́ùn-hwɔ̀ɖɔ̀ɔ̀ mɔ̀ hwùɖùà. Dyé ɖɛ Baɓoɔ cɛ̃ zɔ̃̀ɔ̀ kɛ.

Zà Àzédyà 13:19, 20 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Xwɛ̀ ɖɛ kpá ma Báɓèɖɔ́ùn gboɛɛ nyu kpáá-ɖɛ̀ nìà kɛ jàà-kpá-kpá tɛ̀mɛ̀ìn nyɛ́?

Báɓèɖɔ́ùn hwùɖùàɔ̀ ɖé Ìwáɖáà-ɓòɖò nìà kàùn wɛ̃ɛ kɔ̃

6. Baɓoɔ cɛ̃ zɔ̃̀ɔ̀ ɖɛ ɓè à dyéà zɛ̃̀ɛ̀ kɛ

Baɓoɔ ɖáìn à nììn tiɔ̀ “wé hwɛ̀ìn-gbɔ” ɓèɔ̀. (2 Tímétè 3:1) Dyé ɖɛ Baɓoɔ cɛ̃ zɔ̃̀ɔ̀ ɓá ti nìà kɛ jè dyíɛ.

Zà Máfíò 24:6, 7 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Ðɛ́ mɔ̀ ɖɛ kpa ɖɛ ɓè ɓɛ́ Baɓoɔ ɖá wa mu nììn ɖé wé hwɛ̀ìn-gbɔ ɓèɔ̀ xwíníín nyɛ́?

Zà 2 Tímétè 3:1-5 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Ðɛ́ mɔ̀ kpeɖe ɓè ɓɛ́ nyɔ ɓè mu ɓéɖéìn ɖé wé hwèìn-gbɔ ɓèɔ̀ xwíníín ɓɛ́ Baɓoɔ cɛ̃à jè kɛ́?
Kpeɖe ɓè nìà kɛ nyɛ́ m̀ ɖà dyéɖé gbo dè kɛ́?

NYƆ ÐÍƐ́ ƁÈ ÐÁ: “Se nɔ̀ɔ̀ ɓè dyíìn Baɓoɔ múin.”

Ðé mɔ̀ùn gboɛɛ, ɖɛ́ tɛ̀mɛ̀ìn jɛ́ɛ́ cá kà ɓɛ́ nyɔ ɓɛ́ìn Baɓoɔ hwòɖò kɔ̃ dèɛ̀ kɛ́?

SṸÌN-XWÍNÍÍN

Ɓóɖó-sùàùn-ɖɛ̀ kè dyuò-ɖɛ̀ ɔ kè kpáá-ɖɛ̀ ɓè tɛ̀mɛ̀ìn kà nyɔ ɓɛ́ìn Baɓoɔ jè jàà poɛ kɛ.

Ðɛ-kɔ̃in-kpa-kpa

Baɓoɔ mɔ̀ jàà-cèè-ɖɛ̀ɛ̀ mɔɔ se nɔ̀ɔ̀ɔ̀?
Ðɛ́ mɔ̀ ɖɛ ɖíɛ́ ɓè kɔ̃̀ mú dyuò-ɖɛ̀ wɔ̃́ìn Baɓoɔ gbo kɛ́?
Nì hwòɖò ɖá Baɓoɔ cɛ̃ ɖɛ mu kpáùn ɖé dyúa kɛ jèè? Ðɛ́ kɔ̃̀ jè ɔ nìà ná mɔɔ ɔ seà ná nì kɛ́?

Cɛ̃́ɛ́-ɖɛ̀ɔ̀ hwɛ̀ gbɔ ɓó:

Dyí-sɔ́-ɖɛ̀

Ɓɛ́ m̀ ké Baɓoɔ jè jàà po cá ní, zà ɖɛ ɓè nìà Cɛ̃́ Ðɛ̀ Pàɖà gbɔ̀ɖɔ̀ɔ̀ múɛɛ ɖò wuɖuún mɔɔ dyé ɖò dyi.

Ðɛ tɔ̀ɔ̀ ɓè:

Ðɛ tɔ̀ɔ̀ ɓè