CƐ̃́Ɛ́-ÐƐ̀ 09

Xwɛ̃́ìn Geɖepɔɔ Bũ̀in Dyììn Ðé Ɓaà-Ɓaà Mú

POƐ KŨ̀À GBO

M̀ ɖàa hwìɖìi poìn ɖòò kà m̀ mɔ́ hwìè-da-zàìn-zàìn ɖé nì cĩ́-cĩ́ɔ̀ múɛɛ̀? M̀ ɓéɖé dyi-diè-ɖɛ̀ ɓè ɓɛ́ m̀ mɔ́ gɔ̃̀-jù-wùɖù ɓó wa jèɛɛ̀? M̀ mɔ́ hwòɖò-dyi-dè-dè mɔɔ kpéí-po-poò? Nì muɛ mɔ́ùn ɓɛ́ m̀ ké Jɛhova bũ̀in xwɛ̃́ìnǹ? Ɓaà-ɓaà ɓɛ́ìn m̀ gbo kpáa, ɓɛ́ ɖɛ ɓè nìà wɛ séín ké kpá. Kɛɛ, xwɛ̀ à mɛ nyu ɓaà kɛ́? Geɖepɔɔ tò ɓaà-wùɖù séín ɖùù gboò? Ðɛ́ m̀ ɓɛ́ìn nyuɛ, ɓɛ́ m̀ kéɛ jè gbo dyé, ɓɛ́ Geɖepɔɔ ké nì ɓaà-wùɖùɔ̀ ɖùù gbo tò kɛ́? Ɓèà dyéɛ.

1. Nyɛ́ à mɛ ɓaà kɛ́, ké ɖɛ́ à ɓɛ́ìn jè ɓaà kɛ́?

Jízɛ̀ tɛ̀mɛ̀ìn ma kà à mɛ ɓaà à dyɔún Ɓàɔ̀ ɖòùn wɛ̃. Jízɛ̀ mìɔùn kpo ɓaà ma Jɛhova. Ɔ cɛ̃ɛ ma, ké ɔ ɖá: “Ɓè dyi ɓaà ní, kàà ɓè mɛ nyu kà ɓaà. Ɓè mɛ ɖá, ‘À Ɓà, mɔ̀ nìà ɖé dyɔún wɛ̃ɛ . . . ’” (Máfíò 6:9) À dyi Jɛhova ɓaà ní, à kùìn gbo-kpɔ̃ìn-kpɔ̃ìn nìà à kè ɔ kè pṹa kɛɛ dyi.

À ɓɛ́ìn ɖɛ séín ɖò jè ɓaà. Kɛɛ, ɓɛ́ Geɖepɔɔ ké à ɓaà-wùɖù ɓèɔ̀ gɔ̃̀ jù ní, wa kè ɔ mɔ́ɔ́-ɖɛ̀ ɓéɖé wa ké gbo mùìn. “À dyi ɔ ɖɛ ɖò zɔ̀ìn, ké ɔ dyi ɔ mɔ́ɔ́-ɖɛ̀ jùìn, nìí, ɔ mu à wuɖu wɔ̃́ùn.” (1 Jɔ̃́ɔ́ 5:14) Jízɛ̀ cɛ̃ ma ɖɛ kpa ɖɛ ɓè kɔ̃̀ jè à ké ɓaà kɛ. (Zà Máfíò 6:9-13 wuɖuún.) Ɓó à hwòɖòɛ̀-kpɔ̃-ɖɛ̀ ɓè jè ɓaà-ɓaà kɔ̃in nyɛɛ, ɔ mɛ ɓɔ́ à hwìɖìi sɔ̀ɔ̀ ɓɛ́ à ké Geɖepɔɔ zùo po ɓó ɖɛ ɓè ɓɛ́ ɔ ɖà à bìì nyuɛɛ jè, kè ɓɛ́ à ké ɔ dyi diè ɓɛ́ ɔ ké nyɔ tɔ̀ɔ̀ ɓè gbo kpá.

2. Xwɛ̀ à mɛ nyu ɓaà kɛ́?

Ɓaɓoɔ ɖá à mɛ “kpa [à] fũ̀à-fṹá-ɖɛ̀ séínɔ̀ [Geɖepɔɔ] gbo.” (Wɛ́ɖɛ́ 62:8) Ɔ jèɛɛ, à ɓaà-wùɖù ɓèɔ̀ mɛ sɔ̀ìn ɖé hwòɖò wáɖáá mú. À ɓɛ́ìn wuɖu dyíi kpaa à ké ɓaà mɔɔ sɛ́nɛ́-kà kè ɖé kpóɖó-dyùàɔ̀ nì-kà séín ɓɛ́ ɔ tɛ̀mɛ̀ìn kpéín-dyé-dyé kɛɛ mú. À ɓɛ́ìn ɓaà ti séín kè dà séín ɖò.

3. Xwɛ̀ Geɖepɔɔ nyu à ɓaà-wùɖù ɓèɔ̀ gɔ̃̀ jùɛ kɛ́?

Ɔ nyuɛ dyììn ɖé hwìè kò-kò ɓè mú. Jɛhova ɖà ɔ Wuɖu mɔ̀à Baɓoɔ kɛɛ à nyí. Ðéɛ̀ à dyé gɔ̃̀-jù-wùɖù ɓè ɓó dyi-diè-ɖɛ̀ ɓè bìì kpɛ́-kpɛ́. Geɖepɔɔ Wuɖuɔ̀ wuɖuún-zà-zà “nyuɛ ké nyɔ ɓè ɓɛ́ wa se hwòɖò fɔ̀nɔ̀ɛɛ fɔ̀nɔ̀ hwòɖò.” (Wɛ́ɖɛ́ 19:7; zà Jĩ́ìn 1:5 wuɖuún.) Geɖepɔɔ ɓɛ́ìn à gìɖìì nyíɛ ɔ jù ké à dyi fũ̀à-fṹá-ɖɛ̀ ɖò dyí dyéɛń níìn. Ké ɔ ɓɛ́ìn nyuɛ, ɓɛ́ ɔ ɓiè-nyɔ̀ ɓè ké à gbo kpá ɔ jù ké à dyiɛ mɔ́ jàà ní.

ÐE ÐƐ MÚIN CÁ

Cɛ̃́ kà m̀ ɓɛ́ìn ɓaà-wùɖù ɓè ɓɛ́ wa sɔ̀ìn ɖé hwòɖò wáɖáá mú, ké wa dè Geɖepɔɔ hwìɖìiɛɛ nyuɛ kɛɛ jè, ké dyé kà ɓaà-ɓaà ɓɛ́ìn m̀ kpáná dyí nyuɛ kɛ.

4. Kà Geɖepɔɔ mɔ́ à ké ɓaà kɛ

Ðɛ́ muɛ nyuùn ɓɛ́ Geɖepɔɔ ké à ɓaà-wùɖù ɓèɔ̀ dyi kpɔ̃ mɔɔ ɔ ké se wa dyi kpɔ̃ kɛ́? Po VÍÐÒƆ̀ kũ̀à gbo.

VÍÐÒ: Geɖepɔɔ Tò Ɓaà-Wùɖù Séín Ðùù Gboò?—Wáká Ðò (2:42)

Jɛhova mɔ́ ɓɛ́ à ké ɔ ɓaà. Zà Wɛ́ɖɛ́ 65:2 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Nì hwòɖò ɖá “Nyɔ mɔ̀à ɓaà-wùɖù gɔ̃̀-jù-nyɔ̀ɛɛ” mɔ́ ɓɛ́ m̀ ké ɔ ɓaàà? Xwíníínɔ̀ nyɛ́ kɔ̃̀ jè ɔ nìà ná mɔɔ ɔ seà ná nì kɛ́?

À mɛ vɔ̃ ɓɛ́ à cĩ́-cĩ́ɔ̀ kè Geɖepɔɔ mɔ́ɔ́-ɖɛ̀ ké gbo muìn ɔ jù ké à dyi mɔ́ ɓɛ́ ɔ ké à ɓaà-wùɖù ɓèɔ̀ wɔ̃́ ní. Zà Mákà 3:4 kè 1 Píɖɛ̀ 3:12 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Ðɛ́ à ɓɛ́ìn nyuɛ ɓɛ́ Jɛhova ké à ɓaà-wùɖù ɓèɔ̀ ɖùù gbo tò kɛ́?

Wa dyi to vɔ̃uń níìn, sójà ɓè sɔ̀ìn wáká sɔ̃́ɔ̀ kɔ̃ɛɛ ɓaà ɓó to du jè. Ɔ nyu fɔ̀nɔ̀-hwòɖò ɓɛ́ Geɖepɔɔ ké ɓaà-wùɖù ɓè nìà kɛ gɔ̃̀ jùù?

5. À ɓaà-wùɖù ɓèɔ̀ mɛ sɔ̀ ɖé à hwòɖòɔ̀ bũ̀

Wa tɛ̀mɛ̀ìn nyɔ ɖíɛ́ ɓè ɖɛ, ɓɛ́ wa ké ɓaà-wùɖù ɓè kɔ̃in kpa. Kɛɛ, kàà ɖé Geɖepɔɔ mɔ́ ɓɛ́ à ké ɔ ɓaà? Zà Máfíò 6:7 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Xwɛ̀ m̀ ɓɛ́ìn wuɖu fóɖóún kɔ̃in-kpa-kpa dyí ɓàɖàìn ɖé nì ɓaà-wùɖù ɓèɔ̀ múɛ́?

Ɓó wé ɖò-ɖò séín nyɛɛ, m̀ ɓɛ́ìn mana jɛ́ɛ́ ɖò ɓɛ́ m̀ dyé ɖé nì cĩ́-cĩ́ɔ̀ múɛɛ jè hwìɖìi poɛ̀n, ɓɛ́ m̀ ké Jɛhova zùo po ɓó mana nìà wɛ jè. M̀ dyi ɖɛ nìà kɛ nyu wé séín ɓó wíkì dyúáɖò xwíníín ní, nì mu ɖɛ kò-kò mɛ̀nɛ̀ìn-sɔ̃́ ɓè jè ɓaàùn ɓɛ́ m̀ ké se wuɖu kɔ̃in kpa.

Ɓà ɖò muɛ mɔ́ùn ɓɛ́ ɔ dyú ɖò ké ɔ gbo wùɖù sɔ̀ìn ɖé ɔ hwòɖòɔ̀ bũ̀. Kà dyúáɖòɔ̀ kàà, Jɛhova mɔ́ ɓɛ́ à ké ɔ ɓaà sɔ̀ìn ɖé à hwòɖòɔ̀ bũ̀

6. Ɓaà-ɓaà mɔ̀ nyíí-ɖɛ̀ sɔ̀ìn ɖé Geɖepɔɔ gbo

Xwɛ̀ ɓaà-ɓaà ɓɛ́ìn à dyi kùɛ̀n ɖé ti nɔ̀mɔ̀ dyíin kè fũ̀à-fṹá-tì ɓè múɛ́? Po VÍÐÒƆ̀ Kũ̀à gbo.

VÍÐÒ: Ɓaà-Ɓaà Kpá À Gbo Ɓɛ́ À Ké Hwòɖò Ku (1:32)

Baɓoɔ cɛ̃ɛ kà ɓɛ́ ɓaà-ɓaà ɓɛ́ìn à gbo kpáa ɓɛ́ à ké gìɖìì ɓéɖéɛ. Zà Fèɖópĩ̀ɔ̀ 4:6, 7 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Ɓaà-ɓaà ní nyuɛ ɓɛ́ à fũ̀à-fṹá ɓèɔ̀ ké dyi zi dyɛo, kɛɛ xwɛ̀ ɔ nyu à gbo kpáa kɛ́?
Ðɛ́ mɔ̀ ɖɛ ɖíɛ́ ɓè ɓɛ́ nì mu mɔ́ùn ɓɛ́ m̀ ké jè ɓaà kɛ́?

M̀ dyuòɛ̀ ma dyíì,

kà wuɖu mɔ̀à “eémɛ̀” kɛɛ xwíníín mɔ̀, “kaà ɔ mɛ nì” kɛɛ̀? Sɔ̀ìn ɖé ti sùà múɛɛ, wa ɖá “eémɛ̀” ɖé ɓaà-wùɖù ɓè mánáín tee. —1 Kánáníkɔ̀ 16:36.

7. Mɔ́ ti dyi ɓó ɓaà jè

Tiɔ̀ ɖíɛ́ ɓè ní, à mɛ̀ìn ɖɛ ɓè nyu-nyu dyí ké ɔ sɔ̀ à hwìɖìi ɓɛ́ à ké ɓaà. Xwɛ̀ ɓaà jè nyu ma ɖɛ kpaa ɖé Jízɛ̀ gbo kɛ́? Zà Máfíò 14:23 kè Máà 1:35 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn: