Wa ɖà m̀ ɖá ɖò ɖé Jɛhova Zàse ɓèɛ̀ dyí-poìn-poìn ɓèɔ̀ ɖò múù? Ɔ jù ké m̀ séè ɖé mu ɖò ní, m̀ ɓɛ́ìn fã̀à peɖeɛ ɖɛ-wè, ɓɛ́ m̀ ké ɖé mu ɓó nì ti kĩ́ín. M̀ ɓɛ́ìn hwìɖìi poɛ̀n dyɛ̀, ɓɛ́ m̀ ké níín: ‘Ðɛ́ wa nyu ɖé dyí-poìn-poìn ɓèa múɛ́? Xwíníínɔ̀ nyɛ́ kɔ̃̀ jè wa kpaà ɖɛ kɛ́? Ðɛ́ kɔ̃̀ jè ḿ mɛ muà ɖéɛ́?’ Ðé cɛ̃́ɛ́-ɖɛ̀ nìà kɛ múɛɛ, nì mu xwíníín kɔ̃̀ jè m̀ kè nyɔ tɔ̀ɔ̀ ɓè dyí-poìn-poìn ɓɛ́àìn nyuɛ, ɓɛ́ m̀ kéà Geɖepɔɔ bũ̀in xwɛ̃́ìn nyɛ ɔ kè kà ɔ ɓɛ́ìn m̀ gbo kpáa kɛɛ jè cɛ̃́ìn.

1. Xwíníín kpa ɖɛɔ̀ nyɛ́ kɔ̃̀ jè Jɛhova Zàse ɓè poàìn dyí kɛ́?

Dyé kà Baɓo-céè-nyɔ̀ ɖò nyu ma xwíníín kɔ̃̀ jè à kè nyɔ tɔ̀ɔ̀ ɓè dyí-poìn-poìn kpaà ɖɛ kɛɛ jè cɛ̃ɛ kɛ. Ɔ ɖá: “Ní mu m̀ ɓàìn ɖé vòò-nyɔ̀ ɓèɔ̀ hwìɛ̀.” (Wɛ́ɖɛ́ 26:​12) Kà dyúáɖòɔ̀ kàà Jɛhova Zàse ɓè kpáìn waà dyí-poìn-poìn ɓèɔ̀ múàùn dyi. Ðé ɓóɖó-kpàà dà séín nyɛɛ, wa poìn dyí ɓɛ́ wa ké Geɖepɔɔ ɓàìn, kè ɓɛ́ wa ké ɓeɖe, ɔ kè ɓɛ́ wa ké ɓaà. Ɓó zɔ̃ séín xwíníín nyɛɛ, wa mu dyí-poìn-poìn vɛ̀nɛ̀ ɓè gbo kpa gbɛ̀ì-gbɛ̀ì ɓó ɓiè jè ɖekè.

2. Ðɛ́ nì mu cɛ̃́ìn ɖé à dyí-poìn-poìn ɓèɔ̀ mú kɛ́?

Ðé à dyí-poìn-poìn ɓèɔ̀ múɛɛ, à tɛ̀mɛ̀ìn ɖɛ sɔ̀ìn ɖé Baɓoɔ múɛ, ké à ‘zaìn kɔ̃in nɔ̀mɔ̀ dyíin, ɓɛ́ nyɔ ɓèɔ̀ kéɛ múin wɔ̃́.’ (Zà Níòmádyà 8:8 wuɖuún.) M̀ dyi ɖé mu ní, nì mu Jɛhova kè ɔ kpeɖe nɔ̀mɔ̀ dyíin ɓèɔ̀ jè cɛ̃́ìn. Kà nì muà ɔ ɖɛ̀ɓɛ̀ìn-ɖɛ̀ɓɛ̀ìn ɓó m̀ bììɛɛ jè cɛ̃́ìn nyɛɛ, kàà nì mu ɔ bũ̀in xwɛ̃́ìn. Nì mu kà ɔ ɓɛ́ìn m̀ gbo kpáa ɓɛ́ m̀ ké nì cĩ́-cĩ́ɔ̀ múàùn dyi kpáìn nyɛɛ jè cɛ̃́ìn ɖekè.​—Àzédyà 48:​17, 18.

3. Xwɛ̀ nyɔ ɓè gbo-wùɖù-wùɖù ɖé à dyí-poìn-poìn ɓèɔ̀ múɛɛ ɓɛ́ìn m̀ kpáná dyí nyuɛ kɛ́?

Jɛhova ɖá “à mɛ kɔ̃̀ à muè tɔ̀ɔ̀ ɓè jè gbo, ɓɛ́ à ké gbo kpáìn kpàìn, ɓɛ́ à ké nyɔùn mú ɖɛ̀ɓɛ̀, ɓɛ́ à ké nɔ̀mɔ̀ dyíin nyu. À ní ɖá ɓɛ́ à ké dyí-poìn-poìnɔ̀ mú muɛ ɓɔ́.” (Híìbúɖúù 10:​24, 25) Ðé dyí-poìn-poìn ɓèɔ̀ múɛɛ, nì mu nyɔ ɓè ɓɛ́ wa kɔ̃̀ nyɔ tɔ̀ɔ̀ ɓè jè gbo, ké wa mɔ́ wa ké Geɖepɔɔ jè cɛ̃́ mìɔ kà mɔ̀ùn nìà kɛɛ dyéìn. Nì mu nyɔ-kpéí-po-wùɖù ɓè wa cɛ̃ sɔ̀ìn ɖé Baɓoɔ múɛɛ wɔ̃́ùn. (Zà Wóɖómà 1:​11, 12 wuɖuún.) Nì mu xwíá ɓè kè dyi-kpɔ̃ìn-nyɔ̀ ɓè ɓɛ́ wa nì fũ̀à-fṹá-ɖɛ̀ ɓè mú zĩ̀ɛ̀n, kɛɛ wa kpá múàùn wɛ̃ɛ gbo wùɖùùn ɖekè. Ðɛ ɓè nìà kɛ mɔ̀ xwíníín ɓèɔ̀ ɖíɛ́ ɓè kɔ̃̀ jè Jɛhova mɔ́ ɓɛ́ à kéà dyí poìn ti séín nyɛ̀!

 ÐE ÐƐ MÚIN CÁ

4. Jɛhova Zàse ɓèɛ̀ dyí-poìn-poìn ɓèɔ̀

Ðé Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛ tiín nyɛɛ, wa poìn ma dyí ti séín, ɓɛ́ wa ké ma Jɛhova ɓiè. (Wóɖómà 16:​3-5) Zà Kɔ̀ɖɔ́sĩ̀à 3:​16 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwɛ̀ Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛɛ nyu ma Jɛhova ɓièɛ̀ kɛ́?

1. À dyí-poìn-poìn ɓèɔ̀ ɓéɖé wáɖáá-wùɖù ɓè kè dyí-tɛ̀mɛ̀ìn-ɖɛ̀ ɓè ɔ kè víɖò ɓè. Dyí-poìn-poìn ɓèɔ̀ dè gbɔ ké wa hwɛ̀ gbɔ ɖé wɛ́ɖɛ́ kè ɓaà-ɓaà mú

2. Ðé dyí-poìn-poìnɔ̀ wáká ɖò tiín nyɛɛ, wa ɓéɖé ɖɛi-diè-diè kè gɔ̃̀-jù-wùɖù tò-tò

3.   Nyɔ séín ɓɛ́ìn ɖé muɛ​—xwéɖé-dù ɓè kè xwíá ɓè kè nyɔ sùà ɓè ɔ kè dyú ɓè

4. Wíɖí-kpɔ̃-kpɔ̃ ɖò se ɖé dyí-poìn-poìn ɓèɔ̀ mú nì. Jɛhova Zàse ɓèɔ̀ ní kpɔ̃ pɛ́nɛ̀

5. Dyí-poìn-poìn ɓèɔ̀ mú mu-mu mɔ́ dúún-ku-ku

• Xwíníínɔ̀ nyɛ́ kɔ̃̀ jè à mɛ muà dyí-poìn-poìn ɓèɔ̀ mú ti séín nyɛ́?

 SṸÌN-XWÍNÍÍN

Dyí-poìn-poìn ɓèɔ̀ mú mu-mu mu m̀ gbo kpáùn, ɓɛ́ m̀ ké ɖɛ pàɖà cɛ̃́ ɓá Jɛhova jè dyí, kè ɓɛ́ m̀ ké gbo-kpɔ̃ìn-kpɔ̃ìn nì m̀ kè ɔ kè pṹa kɛɛ dyi kùìn, ɔ kè ɓɛ́ m̀ ké ɔ ɓiè ɖé nyɔ tɔ̀ɔ̀ ɓè hwìɛ̀.

Ðɛ-kɔ̃in-kpa-kpa

• Xwíníínɔ̀ nyɛ́ kɔ̃̀ jè Jɛhova poà à kpéí, ɓɛ́ à kéà dyí poìn nyɛ́?

• Ðɛ́ nì mu cɛ̃́ìn ɖé Jɛhova Zàse ɓèɛ̀ dyí-poìn-poìn ɓèɔ̀ mú kɛ́?

• Xwɛ̀ kà kò ɖò nì hwòɖò ɖá m̀ ɓɛ́ìn dyí-poìn-poìn ɓèɔ̀ mú mu-mu kpáná kɔ̃ún dyéɛ kɛ́?