CƐ̃́Ɛ́-ÐƐ̀ 11

Kà M̀ Ɓɛ́ìn Baɓoɔ Kpáná Kɔ̃ún Dyéɛ Kɛ

POƐ KŨ̀À GBO

M̀ ɖà ma kũ̀à vɛ̀nɛ̀ ɖò gbɔ dèɛ̀ mɔ́, ké m̀ poɛ̀n ma hwìɖìi kà ɔ kàmà ma múɛɛ̀? Ɓɛ́ ɔ ké ma xwa fɛ̃́ìn nyɛɛ, m̀ ɓɛ́ìn ma mú geɛ mɛ́nɛ́-mɛ́nɛ́. Ðɛ dyúáɖòɔ̀ ɓɛ́ìn kpáa ɔ dyi Baɓoɔ wuɖuún zà jè gbo dyi ní. M̀ ɓɛ́ìn ɖɛ dyi dièɛ̀ ɓɛ́ m̀ ké nìí, ‘Dɛ̀ ḿ mɛ dèɛ̀n gbɔ kɛ́?’ Ðé cɛ̃́ɛ́-ɖɛ̀ nìà kɛ múɛɛ, à mu ɖɛ fɛ̃́ìn xwa ɓè ɓɛ́ m̀ ɓɛ́ìn nyuɛ, ɓɛ́ wa ké m̀ gbo kpá, ɓɛ́ m̀ ké Baɓoɔ wuɖuún-zà-zà kèɛ̀ cɛ̃́-cɛ̃́ múàùn dyi kpáìn nyɛɛ jè cɛ̃ìn.

1. Xwíníínɔ̀ nyɛ́ kɔ̃̀ jè à mɛ zàà Baɓoɔ wuɖuún wé séín nyɛ́?

Nyɔ ɓɛ́ ɔ zà Baɓoɔ mɔɔ ‘Jɛhova gma ɓèɔ̀’ wuɖuún wé séín nyɛɛ mu múàùn kpáùn ké ɔ nyuu-ɖɛ̀ séín mu mú wóɖóùn. (Zà Wɛ́ɖɛ́ 1:1-3 wuɖuún.) Ðé ɔ gbɔ-dè-dè múɛɛ, vɔ̃ ɓɛ́ m̀ ké Baɓoɔ wuɖuún zà ɓó mínítì gbɛì-gbɛì bìì wé séín. Kà Geɖepɔɔ Wuɖuɔ̀ wuɖuún-zà-zà muà m̀ múin dyuòìn nyɛɛ, kàà nì muɛ nyu-nyu múàùn dyi kpáìn.

2. Ðɛ́ mu m̀ gbo kpáùn, ɓɛ́ m̀ ké Baɓoɔ wuɖuún-zà-zà kpáná kɔ̃ún dyé kɛ́?

Ɓɛ́ à ké Baɓoɔ wuɖuún-zà-zà kpáná kɔ̃ún dyé ní, à kɔ̃̀ à ké mú gbà, ɓɛ́ à ké ɖɛ à zàà wuɖuún wɛ̃ɛ jè hwìɖìi nàìn. À mɛ zàà wuɖuún ɓɛ́ à kéɛ “jè hwìɖìi poìn.” (Jasúé 1:8) Kà nì muà wuɖuún zàùn wɛ̃ɛ, diè m̀ mìɔùn dyi-diè-ɖɛ̀ ɓè nìà kɛ dyi: ‘Ðɛ́ ɖɛ nìà kɛ cɛ̃ ḿ gbo ɓá Jɛhova jè dyíɛ́? Xwɛ̀ ḿ ɓɛ́ìn ɖɛ nìà kɛ kũ̀à mú nyùɛ̀n ɖé ní cĩ́-cĩ́ɔ̀ múɛ́? Xwɛ̀ ḿ ɓɛ́ìn vɔ̀sì ɓè nìà kɛ kũ̀à mú nyùɛ̀n, ɓɛ́ ḿ ké nyɔ tɔ̀ɔ̀ ɓè gbo kpá kɛ́?’

3. Xwɛ̀ m̀ ɓɛ́ìn ti dyi mɔ́ɔ, ɓɛ́ m̀ ké Baɓoɔ wuɖuún zà kɛ́?

Ɔ kàmà mú ɓɛ́ m̀ ké ti dyi mɔ́ ɓó Baɓoɔ wuɖuún zà jèè? Ɔ kpá à pàɖà gbo. Vɔ̃ ɓɛ́ m̀ ké ‘ti m̀ ɓéɖéà kɛɛ kũ̀à mú nyùìn nɔ̀mɔ̀ dyíin.’ (Ìfísĩ̀ɔ̀ 5:16) M̀ ɓɛ́ìn náa nyuɛ dyììn ɖé ti jɛ́ɛ́ ɖò wáká po-po mú, ɓɛ́ m̀ ké Baɓoɔ wuɖuún zà wé séín. Nyɔ ɖíɛ́ ɓè mɔ́ ti dyi gànà-kṹún, ɓɛ́ wa ké Baɓoɔ wuɖuún zà. Nyɔ tɔ̀ɔ̀ ɓè mɔ̀ùn gãa, ɓɛ́ wa ké Baɓoɔ wuɖuún zà dyóɖóaún-kà ɓó wa fɔ̀-tììn. Ké nyɔ tɔ̀ɔ̀ ɓè mɔ̀ùn zà Baɓoɔ wuɖuún hwìo-kà hwɛ̀ wa pɛ̃́ dyi. Tiɔ̀ nyɛ́ mu dyíin nɔ̀mɔ̀ùn ɓó mɔ̀ùn bììɛ́?

ÐE ÐƐ MÚIN CÁ

Cɛ̃́ ɖɛ m̀ ɓɛ́ìn nyuɛ ɓɛ́ nì Baɓo-wuɖuún-zà-zàɔ̀ ké múà-ɖɛ̀ jùɛ. Dyé kà m̀ ɓɛ́ìn ti dyéɛ nyuɛ nɔ̀mɔ̀ dyíin, ɓɛ́ m̀ ké nì Baɓo-cɛ̃́-cɛ̃́ɔ̀ kpáná kɔ̃ún dyéɛ.

Kà à ɓɛ́àìn cɛ̃́ɛ ɓɛ́ à kéà ɖii-ɖɛ̀ kò kò ɓè ɖi-ɖi mú ɖɛ̀ɓɛ̀ kɛɛ, kàà à ɓɛ́ìn cɛ̃́ɛ ɓɛ́ à ké Baɓoɔ wuɖuún-zà-zà múàùn dyi kpáìn

4. Cɛ̃́ kà m̀ ké Baɓo-wuɖuún-zà-zà múàùn dyi kpáìn nyɛ

Ɔ se dyɛ̀ xwa fɛ̃́ìn, ɓɛ́ m̀ ké Baɓoɔ wuɖuún-zà-zà gbɔ dè. Kɛɛ, à ɓɛ́ìn nyuɛ ɓɛ́ ɔ tó ké à nyu kà nyɔ ɖò ɓɛ́àìn nyuɛ, ɓɛ́ ɔ kéà ɖii-ɖɛ̀ ɖìè ɖò mú ɖɛ̀ɓɛ̀ kɛ. Zà 1 Píɖɛ̀ 2:2 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Nì hwòɖò ɖá m̀ dyi Baɓoɔ wuɖuún zà wé séín ní, nì muɛ múàùn dyi kpáìn, ɓɛ́ m̀ kéɛ nyuɛ mɔ́ɔɔ̀?

Po VÍÐÒƆ̀ kũ̀à gbo ɓɛ́ m̀ ké kà nyɔ ɖíɛ́ ɓè nyu ma Baɓoɔ wuɖuún-zà-zà múàùn dyi kpáìn nyɛɛ dyé. Nìí, ɓè dèìn dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in.

VÍÐÒ: Nyɔ Gmɔ̀ Ɓè Cɛ̃́ Geɖepɔɔ Wuɖuɔ̀ Mú-Ðɛ̀ɓɛ̀-Ðɛ̀ɓɛ̀ (5:33)

Ðé víɖòɔ̀ múɛɛ, ɖɛ́ mɔ̀ fũ̀à-fṹá-ɖɛ̀ ɓè ɓɛ́ nyɔ gmɔ̀ ɓèɔ̀ zi ma wɔ̃ kɛ́?
Ðɛ́ kpá ma wa gbo, ɓɛ́ wa ké Baɓoɔ wuɖuún-zà-zà kíɖíí nɛ́ kɛ́?
Ðɛ́ wa nyu ma ɓɛ́ wa Baɓo-wuɖuún-zà-zàɔ̀ ké ma múà-ɖɛ̀ jù cá kɛ́?

Fɔ̀nɔ̀-hwòɖò ɓè ɓɛ́ìn m̀ gbo kpáa, ɓɛ́ m̀ ké ɖɛ gbɔ dè kɛ:

Gã Baɓo ɓɛ́ ɔ sɛ́ɖɛ́ìn dyí, ké ɔ se múin wɔ̃́ɔ kàmà kɛ. Dɔ̃̀ New World Translation Baɓoɔ mú ɔ jù ké ɔ dyi nì ɓíɖí-wùɖùɔ̀ mú nììn.
Zà wáká ɓè nɔ̀mɔ̀ m̀ hwìɖìi mìɔ kɛɛ wuɖuún kĩ́ín. M̀ dyi fɔ̀nɔ̀-hwòɖò mɔ́ín, dyé ɖɛ-páún-po-cèè-ɖɛ̀ mɔ̀à “Dè Baɓoɔ Wuɖuún-Zà-Zà Gbɔ” kɛ.
Tã́ ɖɛ ɓè m̀ zàà wuɖuún wɛ̃ɛ ɓíɖíi. Nyùìn ɖɛ-tɛ̀mɛ̀ìn-mɛ̀ɛ̀-ɖɛ̀ mɔ̀à “Tã́ Nì Baɓo-Wuɖuún-Zà-Zàɔ̀ Ɓíɖíi” nìà céè-ɖɛ̀ nìà kɛ múɛɛ kũ̀à mú.
Nyùìn JW Library^®app kũ̀à mú. M̀ ɓɛ́ìn kũ̀à mú nyùɛ̀n, ɓɛ́ m̀ ké Baɓoɔ wuɖuún zà mɔɔ ɔ wuɖuún-zà-zà ɖùù gbo tò ɖé dà séín ɖò ɓó gàɖàfò-ɖúú mɔɔ nɛɛ-kpà tɔ̀ɔ̀ ɓè kɔ̃.
Nyùìn po-kɔ̃ ɓè nìà New World Translation Baɓoɔ̀ múɛɛ kũ̀à mú. Wa ɓéɖé ɓóɖó-mɛ-dèìn-cèè-ɖɛ̀ ɓè kè ɖɛ-tɛ̀mɛ̀ìn-mɛ̀ɛ̀-ɖɛ̀ ɔ kè wuɖu ɓèɔ̀ xwíníín-mú-zà-zà, ɓɛ́ wa ɓɛ́ìn nyuɛ ɓɛ́ nì Baɓo-wuɖuún-zà-zàɔ̀ ké múà-ɖɛ̀ jùɛ.

5. Dyé ti ɓó nì Baɓo-cɛ̃́-cɛ̃́ɔ̀ jè

Zà Wɛ́ɖɛ́ 119:34 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Xwíníínɔ̀ nyɛ́ kɔ̃̀ jè ɔ nɔ̀mɔ̀à dyíin, ɓɛ́ m̀ ké ɓaà hwɛ̀ m̀ kéà Baɓoɔ wuɖuún zà mɔɔ hwɛ̀ m̀ kéà ti dyé ɓó nì Baɓo-cɛ̃́-cɛ̃́ɔ̀ jè kɛ́?

Xwɛ̀ m̀ ɓɛ́ìn Baɓo-cɛ̃́-cɛ̃́ ɖò ɖò séín kpáná kɔ̃ún dyéɛ kɛ́? Kà nì muà cɛ̃́ɛ́-ɖɛ̀ ɖò ti dyéìn ɖé céè-ɖɛ̀ nìà kɛ múɛɛ, dɔ̃̀ ɖɛ ɓè nìà kɛ mú:

Zà cɛ̃́ɛ́-ɖɛ̀ɔ̀ wuɖu-kpà kĩ́ín-kĩ́ín ɓèɔ̀ wuɖuún.
Zà Baɓo vɔ̀sì ɓèɔ̀ wuɖuún ké vɔ̃ ɓɛ́ m̀ ké kà wa nyu cɛ̃́ɛ́-ɖɛ̀ɔ̀ dyí ɓáa kɛɛ múin wɔ̃́.
Po wuɖu jɛ́ɛ́ ɓè ɓɛ́ wa jù dyi-diè-ɖɛ̀ɔ̀ gɔ̃̀ kɛɛ bɛ̃̀ kɔ̃; ɖɛ nìà kɛ mu m̀ gbo kpáùn, ɓɛ́ m̀ kè nì ɖɛ̀-tɛ̀mɛ̀ìn-nyɔ̀ɔ̀ ké cɛ̃́ɛ́-ɖɛ̀ɔ̀ dɔ́ɔ́ kɔ̃in dèìn.

M̀ dyuòɛ̀ ma dyíì,

kà Jɛhova Zàse ɓè ɖà Baɓo kò kò pàɖà ɓè kũ̀à mú nyùìn nyɛɛ̀? Kɛɛ, à ɖɛ̀ɓɛ̀ New World Translation of the Holy Scriptures Baɓoɔ mú sepoɛɖe ɔ sɛ́ɖɛ́ìn dyí ké ɔ nì wáɖáá ké Geɖepɔɔ nyɛ́nɛ́ɔ̀ céè ɖé ɔ mú.—Dyé Ðúú-kɔ̃-cèè-ɖɛ̀ nìà kɛ “Jɛhova Zàse Ɓè Ɓéɖé Wa Mìɔùn Nììn Baɓo?”

NYƆ ÐÍƐ́ ƁÈ ÐÁ: “Baɓoɔ cɛ̃́-cɛ̃́ mɔ̀ kũ̀à pàɖà. Ḿ se ɔ ti nììn mɔɔ gana nììn ɓéɖé.”

Xwɛ̀ nì hwòɖò ɖáà?

SṸÌN-XWÍNÍÍN

Ɓɛ́ m̀ ké Baɓoɔ kpáná kɔ̃ún dyé ní, po ti wáká ɓɛ́ m̀ kéɛ wuɖuún zà, kè ɓɛ́ m̀ ké ɓaà ɓó ɖɛ m̀ zàà wuɖuún wɛ̃ɛ múin wɔ̃́ jè, ɔ kè ɓɛ́ m̀ ké ti dyé ɓó nì Baɓo-cɛ̃́-cɛ̃́ɔ̀ jè.

Ðɛ-kɔ̃in-kpa-kpa

Ðɛ́ mu m̀ gbo kpáùn, ɓɛ́ m̀ ké Baɓoɔ kpáná kɔ̃ún dyé kɛ́?
Tiɔ̀ nyɛ́ m̀ ɓɛ́ìn wáká poɛ ɓɛ́ m̀ ké Baɓoɔ wuɖuún zà, kè ɓɛ́ m̀ ké ɔ cɛ̃́ kɛ́?
Xwíníínɔ̀ nyɛ́ kɔ̃̀ jè ɔ kpaà ɖɛ, ɓɛ́ m̀ kéà ti dyé ɓó nì Baɓo-cɛ̃́-cɛ̃́ɔ̀ jè ti séín nyɛ́?

Cɛ̃́ɛ́-ɖɛ̀ɔ̀ hwɛ̀ gbɔ ɓó:

Goal

Dyé ti ɓó ɖɛ-cɛ̃́-cɛ̃́ɔ̀ nyɔ kɔà ɓó dyíɛɛ jè dyììn ɖé fɔ̀nɔ̀-hwòɖò ɓè nìà cɛ̃́ɛ́-ɖɛ̀ nìà kɛ múɛɛ kũ̀à mú nyùìn nyùìn mú.

Ðɛ tɔ̀ɔ̀ ɓè:

Ðɛ tɔ̀ɔ̀ ɓè