Kà wa nyuà kɔ̃in zaìn ɖé cɛ̃́ɛ́-ɖɛ̀ zià kɛ múɛɛ, ɓiè-kpòò séín se Geɖepɔɔ hwìɖìi dè. Kɛɛ, à ɓɛ́ìn à Mɛ-nyɔ̀ɔ̀ ɓièɛ̀ ɖé hwìè ɖò ɓɛ́ ɔ po ɔ múàùn wɛ̃ɛ mú. Ðɛ́ mɔ̀à “ɓiè-ɓiè [mɔɔ ɓiè-kpòò]” ɓɛ́ ɔ dèà Geɖepɔɔ hwìɖìiɛ́? (Jĩ́ìn 1:27) Poìn ɖɛ Baɓoɔ tɛ̀mɛ̀ìn nyɛɛ jè hwìɖìi.

1. Ðɛ́ à ɓiè-ɓièɔ̀ mɛ ɓá dyíɛ́?

À ɓiè-ɓièɔ̀ mɛ ɓá Baɓoɔ dyí. Jízɛ̀ cɛ̃ɛ ma Geɖepɔɔ gbo, ké ɔ ɖá: “Nì wuɖuɔ̀ mɔ̀ jàà.” (Jɔ̃́ɔ́ 17:17) Ɓiè-kpòò ɖíɛ́ ɓè wã̀ìn jàà nìà Geɖepɔɔ Wuɖu mɔ̀à Baɓoɔ kɛ múɛɛ dyéɖé kɔ̃in. Wa po nyɔùn-dyùɛ̀ tɛ̀mɛ̀ìn-ɖɛ̀ ɓè kè fɔ̀nɔ̀-hwòɖò ɓè Baɓoɔ bɛ̃̀ìn. Kɛɛ, Jɛhova hwòɖò se nyɔ ɓè ɓɛ́ wa “ɓɔ́ Geɖepɔɔ gmaɔ̀” kɛɛ múin dèìn. (Zà Máà 7:9 wuɖuún.) Kɛɛ, à mu Jɛhova múàùn poùn ɔ jù ké à dyi Baɓoɔ dyí nɛ́ ké à dyi ɔ náún-po-wùɖù ɓèɔ̀ dyi kpɔ̃ ní.

2. Xwɛ̀ à mɛ nyu Jɛhova ɓièɛ̀ kɛ́?

Sepóɛɖé Jɛhova mɔ̀ à Mɛ-nyɔ̀ jèɛɛ, ɔ kpa ɖɛ ɓɛ́ à ké ɔ dya dè. (Wɛ̀ɖɛ̀ɓèɖésĩ̀ɔ̀ 4:11) Ðɛ nìà kɛ xwíníín mɔ̀, à ɓéɖé ɓɛ́ à ké ɔ mú ɖɛ̀ɓɛ̀ kè ɓɛ́ à ké ɔ ɖòùn ɓiè, ɓɛ́ à ké se kũùn-kpò mɔɔ hwɔìn-ɖɛ̀ sɛ-sɛ séín ɖò kũ̀à mú nyùìn.—Zà Àzédyà 42:8 wuɖuún.

À ɓiè-ɓièɔ̀ ɓéɖé ɓɛ́ ɔ ké “se kɛɛ ɖò ɓéɖé, ɓɛ́ ɔ ké [Jɛhova] hwìɖìi dè.” (Wóɖómà 12:1) Ɔ xwíníín mɔ̀, à kɔ̃̀ à ké ɔ mɔ́ɔ́-ɖɛ̀ nyu ɖé à cĩ́-cĩ́ɔ̀ mú. Ɔ hwɔìn-kà, nyɔ ɓè ɓɛ́ wa ɖɛ̀ɓɛ̀ Jɛhova múɛɛ ɖɛ̀ɓɛ̀ ɔ gma ɓè ɓá dyi kpɔ̃ìn jè dyíɛɛ mú, ké wa sí wa kíɖíí. Ké wa ɓàɖàìn kpeɖe gbà ɓè dyí, ɔ hwɔìn-kà tã̀à ná-ná mɔɔ náá-ɖɛ̀ vɛ̀nɛ̀ kè nɔmɔɔ pàɖà ná-ná. a

3. Xwíníínɔ̀ nyɛ́ kɔ̃̀ jè à mɛ ɓièà Jɛhova ɖé à ɖíí jàà-po-nyɔ̀ ɓè hwìɛ̀ kɛ́?

Dyí-poìn-poìn ɓè à ɓéɖéà wíkì séín nyɛɛ nyuɛ ké à ‘ɓàìn Jɛhova . . . ɖé vòò-nyɔ̀ ɓèɔ̀ hwìɛ̀.’ (Wɛ́ɖɛ́ 111:1, 2) Hwìè ɖò kɔ̃̀ mú à nyuɛ náá kɛɛ mɔ̀ dyììn ɖé Geɖepɔɔ gbo ɓèɖèìn-ɓèɖèìn mú. (Zà Wɛ́ɖɛ́ 104:33 wuɖuún.) Jɛhova ɖá à mɛ mu dyí-poìn-poìn ɓèɔ̀ mú, sepoɛɖe ɔ ɖɛ̀ɓɛ̀ à mú, ké ɔ dyuòɛ̀ dyí kà wa mu à gbo kpáùn, ɓɛ́ à ké fɛ̀ɛ̀ múàùn dyi kpáìn ɓó sè-ná-sèɛ̀ tiín nyɛ. À dyi dyí poìn ɓó nyɔ mùè ɖò kpéí po jè ní, à nyu à mìɔùn kpáná dyí.

 ÐE ÐƐ MÚIN CÁ

4. À mɛ ɓɔ́ hwɔìn-ɖɛ̀ sɛ-sɛ ɓè kũ̀à mú nyùɛ̀n ɖé à ɓiè-ɓièɔ̀ mú

5. Jɛhova ɖòùn ɓiè-ɓiè póìn à ɖé fɔ̀nɔ̀-hwòɖò ɓè se jàà kɛɛ xwaún

 6. À ɓiè Geɖepɔɔ ɖé dyí-poìn-poìn ɓèɔ̀ mú

À ɓàìn Jɛhova, ké à poìn pòìn kpéí dyììn ɖé ɓeɖe-ɓeɖe kè gɔ̃̀-jù-wùɖù ɓè tò-tò mú ɖé dyí-poìn-poìn ɓèɔ̀ mú. Zà Wɛ́ɖɛ́ 22:22 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• M̀ ɖà gɔ̃̀-jù-wùɖù ɓè wɔ̃́-wɔ̃́ múàùn dyi kpáìn ɖé dyí-poìn-poìn ɓèɔ̀ múù?

• Nì muɛ mɔ́ùn ɓɛ́ m̀ ké ti dyé ɓɛ́ m̀ ké gɔ̃̀-jù-wùɖù ɖò tòò?

7. Ɔ dè Jɛhova hwòɖò dyi ɔ jù ké à dyi ɖɛ à cɛ̃́ kɛɛ nyɔ tɔ̀ɔ̀ ɓè gbo cɛ̃ ní

Hwìè pàɖà ɓè nì ɓó kɔ̃̀ mú ɓɛ́ à ɓɛ́ìn Baɓoɔ jàà-wùɖù ɓè nyɔ tɔ̀ɔ̀ ɓè dyí tɛ̀mɛ̀ìn nyɛ. Zà Wɛ́ɖɛ́ 9:1 kè 34:1 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Ðɛ́ m̀ ɖà cɛ̃́ ɖé Baɓoɔ mú ɓɛ́ nì mu jè cɛ̃ɛ mɔ́ùn ɖé nyɔ kà kò ɖò gbo kɛ́?

 SṸÌN-XWÍNÍÍN

À mu à Mɛ-nyɔ̀ɔ̀ hwòɖò dyi dèìn ɔ jù ké à dyi ɔ ɖòùn ɓiè, ké à dyi ɔ ɓàìn ɖé dyí-poìn-poìn ɓèɔ̀ mú, ké à dyi ɖɛ ɓè à cɛ̃́ kɛɛ nyɔ tɔ̀ɔ̀ ɓè gbo cɛ̃ ní.

Ðɛ-kɔ̃in-kpa-kpa

• Xwɛ̀ à ɓɛ́ìn cɛ̃́ɛ ɓɛ́ à ké Geɖepɔɔ ɓiè jàà-kà kɛ́?

• Xwíníínɔ̀ nyɛ́ kɔ̃̀ jè à mɛ ɓièà Jɛhova ɖòùn wɛ̃́?

• Xwíníínɔ̀ nyɛ́ kɔ̃̀ jè à mɛ ɓièà Geɖepɔɔ ɖé nyɔ tɔ̀ɔ̀ ɓè mɔ́à ɔ hwòɖò dyi dèɛ̀ dyiɛɛ hwìɛ̀ kɛ́?