CƐ̃́Ɛ́-ÐƐ̀ 15
Nyɛ́ Mɔ̀ Jízɛ̀ Kɛ́?
Jízɛ̀ mɔ̀ nyɔ ɓè ɓɛ́ nyɔ pàɖà dyuò dyíɛɛ ɖò. Nyɔ pàɖà dyuò Jízɛ̀ nyɛ́nɛ́ dyɛo, kɛɛ wa se ɖɛ pàɖà dyí dyuò ɓá ɔ jè dyí, ké nyɔ ɓáún-ɓáún ɓéɖé fɔ̀nɔ̀-hwòɖò kò-kò ɓè ɓá nyɔ jɛ́ɛ́ Jízɛ̀ jù kɛɛ jè dyí. Ðɛ́ Baɓoɔ cɛ̃ ɓá ɔ jè dyíɛ́?
1. Nyɛ́ mɔ̀ Jízɛ̀ kɛ́?
Jízɛ̀ mɔ̀ kpé-ɓéɖé-zùù, ɓɛ́ ɔ cĩ́ ɖé dyɔún wɛ̃. Jɛhova Geɖepɔɔ mɛ ma ɔ kĩ́ín hwɛ̀ ɔ mɛ ma ɖɛ tɔ̀ɔ̀ séín ɓè. Xwíníín nìà wɛ kɔ̃̀ jè wa ɖáìn ɔ “dyú kĩ́ín-kĩ́ínɔ̀, ké ɔ nì mɛɛ-ɖɛ̀ séín kɔ̃in” nyɛ̀. (Kɔ̀ɖɔ́sĩ̀à 1:15) Baɓoɔ ɖáìn Jízɛ̀ Geɖepɔɔ “dyú-gàà dyúáɖòɔ̀,” sepoɛɖe Jízɛ̀ ɖòùn ɖé Jɛhova mìɔùn mɛ ma. (Jɔ̃́ɔ́ 3:16) Jízɛ̀ kè ɔ Ɓà Jɛhova nyu ma kũ̀à kóɖó-kóɖó dyììn ɖé ɔ Ɓà gbo-kpá-kpá mú, ɓɛ́ wa ké ma ɖɛ tɔ̀ɔ̀ séín mɛ. (Zà Nɔ́ɔ́ 8:30 wuɖuún.) Jízɛ̀ kè Jɛhova kpɔ̃ìn gbo ke kánáá pu. Ɔ mɔ̀ Geɖepɔɔ bìì wùɖù-nyɔ̀ mɔɔ “Wuɖuɔ̀,” ɓɛ́ ɔ cɛ̃ Geɖepɔɔ cuo-wùɖù ɓè kè ɔ náún-po-wùɖù ɓèɛ.—Jɔ̃́ɔ́ 1:14.
2. Xwíníínɔ̀ nyɛ́ kɔ̃̀ jè Jízɛ̀ dyi ma ɓóɖó-kpàà kɔ̃ɛ́?
Ɔ ɓɛ́àìn zɔ̃ 2,000 ziɛ̀n, ké Jɛhova nyùìn ma ɔ zùù hwɛ̀in-hwɛ̀inɔ̀ kũ̀à mú, ké ɔ zà ma Jízɛ̀ fɛ̀ɛ̀ɔ̀ ɖé dyɔún, ké ɔ poɛ ma màa-dyù gmɔ̀ ɖò se toɖo kɔ̃ jè dyuò kɔ̃̀ nyɛ́nɛ́ mɔ̀ ma Meɖé kɛɛ xwíníín. Ðé hwìè nìà kɛ múɛɛ, Jízɛ̀ wóɖó ma kà nyɔùn-dyù nìà kɛ. (Zà Ðúù 1:34, 35 wuɖuún.) Jɛhova ɖoɓo ma Jízɛ̀ ɓóɖó-kpàà kɔ̃, ɓɛ́ ɔ ké Mɛ̀sádyàɔ̀ mɔɔ Kɛ́ɖɛ́ìɔ̀ jù, kè ɓɛ́ ɔ ké nyɔùn póìn. a Baɓo kpáá-ɖɛ̀ séín ɓá Mɛ̀sádyàɔ̀ jè dyíɛɛ kpá ma jàà dyììn ɖé ɔ mú, ké nyɔ ɓè ɓɛ́ìn ma dyí dyuòɛ̀ kà Jízɛ̀ mɔ̀ “Kɛ́ɖɛ́ìɔ̀, [ɔ] mɔ̀ nì-nì Geɖepɔɔ dyú-gààɔ̀” kɛ.—Máfíò 16:16.
3. Dɛ̀ Jízɛ̀ nì kàùn wɛ̃́?
Ti Jízɛ̀ɛ̀ nyɔùn fɛ̀ɛ̀ɔ̀ ɖà ma mánáín hwɛ̀ kɛɛ, ɔ wóɖó ma gĩɔ, ké ɔ jù ma zùù, ké ɔ mu ma ɖé dyɔún ɖe. Ðéɛɛ, “Geɖepɔɔ ɖà ɔ dyií ɖú, ké ɔ ɖà ɔ ɖéé ɖé dyií kpa.” (Fèɖópĩ̀ɔ̀ 2:9) Kàùn wɛ̃ɛ, Jízɛ̀ mɔ̀à ínjà ɓéɖé kpé ɖò cá. Jɛhova ɖòùn mɔ̀ nyɔ ɓéɖé kpé ké ɔ zi Jízɛ̀ dyí.
ÐE ÐƐ MÚIN CÁ
Cɛ̃́ ɖɛ pàɖà ɓá nyɔ Jízɛ̀ jù jɛ́ɛ́ kɛɛ jè dyí kè xwíníín kɔ̃̀ jè ɔ jè cɛ̃́-cɛ̃́ kpaà ɖɛ mìɔ kɛ.
4. Jízɛ̀ se Kpé-séín-ɓéɖé Geɖepɔɔ
Baɓoɔ tɛ̀mɛ̀ìn kà Jízɛ̀ mɔ̀ kpé-ɓéɖé-zùù ɖé dyɔún wɛ̃ dyɛo, kɛɛ ɔ nyu ɔ Ɓà Jɛhova Geɖepɔɔ wuɖu. Xwíníínɔ̀ nyɛ́ kɔ̃̀ jè à ɖáà ná kɛ́? Po VÍÐÒƆ̀ kũ̀à gbo ɓɛ́ m̀ ké ɖɛ Baɓoɔ tɛ̀mɛ̀ìn ɓá kà Jízɛ̀ nyu kòɛ̀ ɓó kpé-séín-ɓéɖé Geɖepɔɔ gboɛ jè dyíɛɛ dyé.
Baɓo vɔ̀sì ɓè nìà dà kɛɛ ɓɛ́ìn à gbo kpáa, ɓɛ́ à ké gbo-kpɔ̃ìn-kpɔ̃ìn nì Jɛhova kè Jízɛ̀ pṹa kɛɛ jè múin wɔ̃́. Zà vɔ̀sì ɖò-ɖò ɓèɔ̀ wuɖuún, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.
Zà Ðúù 1:30-32 wuɖuún.
-
Xwɛ̀ ínjàɔ̀ nyu ma gbo-kpɔ̃ìn-kpɔ̃ìn nìà Jízɛ̀ kè Jɛhova Geɖepɔɔ mɔ̀à “Ðɛɓíɔ́” kɛ pṹa kɛɛ mɛ dèɛ̀ kɛ́?
Zà Máfíò 3:16, 17 wuɖuún.
-
Ɓó Jízɛ̀ níɔ-kpá-tììn nyɛɛ, xwɛ̀ wuɖu sɔ̀ìn ma ɖé dyɔún wɛ̃ɛ ɖá ma kɛ́?
-
Nì hwòɖò ɖá ɔ mɔ̀ ma nyɛ́ wuɖuɛ́?
Zà Jɔ̃́ɔ́ 14:28 wuɖuún.
-
Nyɛ́ po ɔ mùè ɖò ɖe, ké ɔ ɓéɖé kpé pàɖà kɛ́? Ɓàɔ̀ mɔɔ dyúɔ̀ɔ̀?
-
Ðɛ́ Jízɛ̀ kpàìn ma hwòɖò ɓɛ́ ɔ dyi ma Jɛhova ɔ Ɓà ɖáìn nyɛ́?
Zà Jɔ̃́ɔ́ 12:49 wuɖuún.
-
Jízɛ̀ poɛ̀n hwìɖìi kà ɔ kè ɔ Ɓà mɔ̀ nyɔ dyúáɖòɔ̀ kɛɛ̀? Xwɛ̀ mɔ̀ùn ɖáà?
5. Ðɛ tɛ̀mɛ̀ìn ma kà Jízɛ̀ mɔ̀ ma Mɛ̀sádyàɔ̀ kɛ
Baɓoɔ ɓéɖé kpáá-ɖɛ̀ pàɖà ɓè ɓɛ́ wa ɓɛ́ìn nyɔ ɓè gbo kpáa, ɓɛ́ wa ké Mɛ̀sádyàɔ̀ dyí dyuò kɛ —nyɔ ɓɛ́ Geɖepɔɔ gãà ɓɛ́ ɔ kéà nyɔùn-dyù póìn nyɛ. Po VÍÐÒƆ̀ kũ̀à gbo, ɓɛ́ ɓè ké kpáá-ɖɛ̀ ɓè ɓɛ́ wa kpá ma jàà dyììn ɖé Jízɛ̀ mú ti ɔ dyi ma nɔ ɓóɖó-kpàà kɔ̃ɛɛ ɖíɛ́ ɓè jè-kɔ̃in-zaìn-zaìn xwã́ ɓoún ɖò dyé.
Zà vɔ̀sì ɓè nìà kɛ wuɖuún, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn:
Zà Mákà 5:2 wuɖuún, ɓɛ́ m̀ ké dɛ̀ Mɛ̀sádyàɔ̀ mu ma wóɖóìn nyɛɛ jè cɛ̃́. b
-
Jízɛ̀ wóɖó-wóɖóɔ̀ nyuɛ ké kpáá-ɖɛ̀ nìà kɛ kpá ma jàà?—Máfíò 2:1.
Zà Wɛ́ɖɛ́ 34:20 kè Zɛ́kɔ̀wáɖádyà 12:10 wuɖuún, ɓɛ́ m̀ ké ɖɛ ɓè Baɓoɔ cɛ̃ ma ɓá Mɛ̀sádyàɔ̀ mɛ́ jè dyíɛɛ pàɖà cɛ̃́.
-
Kpáá-ɖɛ̀ ɓè nìà kɛ kpá ma jàà?—Jɔ̃́ɔ́ 19:33-37.
-
Nì hwòɖò ɖá Jízɛ̀ mɔ̀ nyɔ nyuɛ ma ké ɖɛ ɓè nìà kɛ kpá ma jàà?
-
Ðɛ́ ɖɛ nìà kɛ tɛ̀mɛ̀ìn m̀ dyí ɓá Jízɛ̀ jè dyíɛ́?
6. À dyé kpáná sɔ̀ìn ɖé Jízɛ̀ jè cɛ̃́-cɛ̃́ mú
Baɓoɔ nɛ́ìn Jízɛ̀ jè cɛ̃́-cɛ̃́ kè ɔ kpéɔ̀ ɖɛ kpa jè jìì kɔ̃. Zà Jɔ̃́ɔ́ 14:6 kè 17:3 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
-
Xwíníínɔ̀ nyɛ́ kɔ̃̀ jè ɔ kpaà ɖɛ, ɓɛ́ nyɔ kéà Jízɛ̀ jè cɛ̃́ kɛ́?
Jízɛ̀ kaà ma hwìèɔ̀, ɓɛ́ à ké Geɖepɔɔ ɓàto jù. Ɔ tɛ̀mɛ̀ìn ma jàà ɓá Jɛhova jè dyíɛ, ké dyììn ɖé ɔ múɛɛ, à ɓɛ́ìn sè-ná-sèɛ̀ fɛ̀ɛ̀ ɓéɖéɛ
NYƆ ÐÍƐ́ ƁÈ ÐÁ: “Jɛhova Zàse ɓè se Jízɛ̀ jè jàà po.”
-
Xwɛ̀ nì muɛ gɔ̃̀ jùùn wɛ̃́?
SṸÌN-XWÍNÍÍN
Jízɛ̀ mɔ̀ kpé-ɓéɖé-zùù. Ɔ mɔ̀ Geɖepɔɔ Dyú-gààɔ̀ kè Mɛ̀sádyàɔ̀.
Ðɛ-kɔ̃in-kpa-kpa
-
Xwíníínɔ̀ nyɛ́ kɔ̃̀ jè wa ɖáìn Jízɛ̀ “dyú kĩ́ín-kĩ́ínɔ̀” kɛ́?
-
Hwɛ̀ ɓɛ́ Jízɛ̀ ké ma ɓóɖó-kpàà kɔ̃ dyiɛɛ, ɖɛ́ ɔ nì ma nyuɛń nyɛ́?
-
Xwɛ̀ à nyuɛ dyí dyuòɛ̀ kà Jízɛ̀ mɔ̀ Mɛ̀sádyàɔ̀ kɛ́?
CƐ̃́ ÐƐ PÀÐÀ
Cɛ̃́ ɖɛ pàɖà ɓá kà à nyuɛ dyí dyuòɛ̀ kà Jízɛ̀ mɔ̀ Mɛ̀sádyàɔ̀ kɛɛ jè dyí.
“Kpáá-Ðɛ̀ Ɓè Ɓá Mɛ̀sádyàɔ̀ Jè Dyíɛɛ Tɛ̀mɛ̀ìn Kà Ɓɛ́ Jízɛ̀ Mɔ̀ Mɛ̀sádyàɔ̀ kɛɛ̀?” (Ðúú-kɔ̃-cèè-ɖɛ̀)
Dyéɛ kɛbì Baɓoɔ tɛ̀mɛ̀ìn kà Geɖepɔɔ wóɖóìn ma Jízɛ̀ kà dyúáɖò kà nyɔùn-dyù wóɖóàìn dyú ɓèɛ.
“Xwíníínɔ̀ Nyɛ́ Kɔ̃̀ Jè Wa Ðáìn Jízɛ̀ Geɖepɔɔ Dyú-Gààɔ̀ Kɛ́?” (Ðúú-kɔ̃-cèè-ɖɛ̀)
Dyé xwíníín kɔ̃̀ jè Geɖepɔɔ-peɖeìn-mú-tã seà Baɓoɔ tɛ̀mɛ̀ìn-ɖɛ̀ kɛ.
“Jízɛ̀ Mɔ̀ Geɖepɔɔ?” (Dyí-Gmɔ̀ìn-Gbò-Cèè-Ðɛ̀ɔ̀, Zágìɖìɔ̀ 1, 2009)
Zà kà màa ɖòɛ̀ cĩ́-cĩ́ nyu ma gbo zĩàìn ti ɔ gmɔ̀ìn ma ɖɛ Baɓoɔ tɛ̀mɛ̀ìn ɓá Jízɛ̀ jè dyíɛ múin nyɛɛ wuɖuún.
a Cɛ̃́ɛ́-ɖɛ̀ 26 kè 27 mu xwíníín kɔ̃̀ jè nyɔùn kɔ̃̀ wa kéà póɛ kè kà Jízɛ̀ nyu à póɛ̀n nyɛɛ jè cɛ̃ìn.
b Dyé mánáín-hwɛ̀ìn-wùɖù 2 ɓó kpáá-ɖɛ̀ ɖò ɓɛ́ ɔ cɛ̃ ti jɛ́ɛ́ Jízɛ̀ mu ma xwáɖáún wóɖóùn wɛ̃ɛ jèɛ.
