CƐ̃́Ɛ́-ÐƐ̀ 16

Ðɛ́ Jízɛ̀ Nyu Ma Ti Ɔ Nì Ma Ɓóɖó-Kpàà Kɔ̃ɛ́?

POƐ KŨ̀À GBO

Ðé nyɔ pàɖà gboɛɛ, Jízɛ̀ mɔ̀ dyú-pɛ̀ɖɛ̀ hwɛ̀ kpéí ɖò mɔɔ kpáá-ɖɛ̀-cɛ̃-nyɔ̀ fɔ̀nɔ̀-hwòɖò ɖò mɔɔ gàa nì mɛ́ɛń ɖò. Kɛɛ, à ɓɛ́ìn ɖɛ pàɖà ɓá ɔ jè dyíɛɛ cɛ̃́ɛ sɔ̀ìn kà ɔ nyu ma ɓóɖó-kpàà kɔ̃ cĩ́ɛ kɛ múù? Ðé cɛ̃́ɛ́-ɖɛ̀ nìà kɛ múɛɛ, à mu ɖɛ kpa ɖɛ ɓè ɓɛ́ Jízɛ̀ nyu ma kɛ ɖíɛ́ ɓè kè kà wa ɓɛ́ìn m̀ gbo kpáa kɛ jè cɛ̃ìn.

1. Ðɛ́ mɔ̀ ma Jízɛ̀ kũ̀à jɛ́ɛ́ɔ̀ kɛ́?

Jízɛ̀ kũ̀à jɛ́ɛ́ɔ̀ mɔ̀ ɓɛ́ ɔ ké ma “bɔ̃̀ nɔ̀mɔ̀ dyíin ɓá Geɖepɔɔ Kã́á-ɓòɖòɔ̀ jè dyíɛɛ cɛ̃.” (Zà Ðúù 4:43 wuɖuún.) Ɔ cɛ̃ ma bɔ̃̀ nɔ̀mɔ̀ dyíin ɖò kà ɓɛ́ Geɖepɔɔ mu Kã́á-ɓòɖò ɖò mɔɔ gɔ̀mànà ɖò ɓɛ́ ɔ mu nyɔùn fũ̀à-fṹá-ɖɛ̀ séín dyi ziìn nyɛɛ dyi dèìn nyɛ. a Ɓó zɔ̃ tã kè fáún-fáún xwíníín nyɛɛ, Jízɛ̀ nyu ma kũ̀à kóɖó-kóɖó, ɓɛ́ ɔ ké ma bɔ̃̀ nɔ̀mɔ̀ dyíin nìà kɛ nyɔ ɓè gbo cɛ̃.—Máfíò 9:35.

2. Xwíníínɔ̀ nyɛ́ kɔ̃̀ jè Jízɛ̀ nyu ma zɛ̃̀ìn-ɖɛ̀ ɓè kɛ́?

Baɓoɔ cɛ̃ “zɛ̃̀ìn-ɖɛ̀ ɓèɔ̀ kè ɖɛ dĩ́ín-dĩ̀ìn ɓèɔ̀ ɔ kè ɖàɓàìn-ɖɛ̀ ɓè ɓɛ́ Geɖepɔɔ nyùìn ma ɖé [Jízɛ̀] mú” kɛɛ jè. (Àpɔ́sò 2:22) Dyììn ɖé Geɖepɔɔ kpéɔ̀ múɛɛ, Jízɛ̀ po ma dìì ɓɔ́í, ké ɔ nyí ma nyɔ táázĩ̀ìn ɓè ɖii-ɖɛ̀, ké ɔ kánáìn ma wɛ́-nyɔ̀ ɓè dyi, ké ɔ zà ma nyɔ ɓè gĩɔ. (Máfíò 8:23-27; 14:15-21; Máà 6:56; Ðúù 7:11-17) Jízɛ̀ɛ̀ zɛ̃̀ìn-ɖɛ̀ ɓèɔ̀ tɛ̀mɛ̀ìn ma wáɖáá kà ɓɛ́ Geɖepɔɔ mɔ̀ nyɔ ɖoɓo ma ɔ kɛ. Wa tɛ̀mɛ̀ìn ɖekè kà ɓɛ́ Jɛhova ɓéɖé kpé, ɓɛ́ ɔ ké à fũ̀à-fṹá-ɖɛ̀ séín ɓèɔ̀ jè dyi ziìn nyɛ.

3. Ðɛ́ à ɓɛ́ìn cɛ̃́ɛ sɔ̀ìn kà Jízɛ̀ nyu ma cĩ́ɛ kɛɛ múɛ́?

Jízɛ̀ nyu ma Geɖepɔɔ wuɖu ɖé ɖɛ séín mú. (Zà Jɔ̃́ɔ́ 8:29 wuɖuún.) Nyɔ ɓè vɔ̃ ma Jízɛ̀ gbo dyɛo, kɛɛ ɔ nyu ma ɖɛ ɔ Ɓà cɛ̃ ma ɔ gboɛ tee ké ɔ dyɛ̀ìn ma ɔ gĩɔ. Ɔ tɛ̀mɛ̀ìn ma kà ɓɛ́ nyɔùn ɓɛ́ìn Geɖepɔɔ ɓièɛ̀ kɛbì wa mɛ nì tì-kàmàùn-kàmàùn múɛ. Ɔ mɔ̀ ‘dyí-tɛ̀mɛ̀ìn-ɖɛ̀ ɓɛ́ ɔ sè à gbo, ɓɛ́ à ké ɖɛ ɔ nyu ma kà kɛɛ ɖò nyuɛ.’—1 Píɖɛ̀ 2:21.

ÐE ÐƐ MÚIN CÁ

Dyé kà Jízɛ̀ nyu ma bɔ̃̀ nɔ̀mɔ̀ dyíinɔ̀ nyɔ ɓè gbo cɛ̃ɛ kè kà ɔ nyu ma zɛ̃̀ìn-ɖɛ̀ ɓè nyuɛ kɛ.

4. Jízɛ̀ cɛ̃ ma bɔ̃̀ nɔ̀mɔ̀ dyíin nyɔ ɓè gbo

Jízɛ̀ nà ma máa hɔ̃dɛ̀ɖɛ̀ ɓè ɖé púu-púu hwìè ɓè xwíníín, ɓɛ́ ɔ ké ma bɔ̃̀ nɔ̀mɔ̀ dyíinɔ̀ nyɔ pàɖà gbo cɛ̃ɛ ɓɛ́ìn. Zà Ðúù 8:1 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Jízɛ̀ wùɖù ma nyɔ ɓè poìn ma dyí ɓɛ́ wa ké ma ɔ ɖùù gbo tòɛɛ ɖòùn gboò?
Ðɛ́ Jízɛ̀ nyu ma, ɓɛ́ ɔ ké ma nyɔ ɓè dyéɛ́?

Geɖepɔɔ cɛ̃ɛ ma kà ɓɛ́ Mɛ̀sádyàɔ̀ mu ma bɔ̃̀ nɔ̀mɔ̀ dyíin nyɔ ɓè gbo cɛ̃ìn nyɛ. Zà Àzédyà 61:1, 2 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Xwɛ̀ kpáá-ɖɛ̀ nìà kɛ nyu ma jàà kpáa dyììn ɖé Jízɛ̀ múɛ́?
Nì hwòɖò ɖá nyɔ ɓè nì zɛ̃̀ɛ̀ kɛɛ kɔ̃̀ wa ké bɔ̃̀ nɔ̀mɔ̀ dyíin nìà kɛ wɔ̃́ɔ̀?

5. Jízɛ̀ tɛ̀mɛ̀ìn ma jàà kpa ɖɛ ɓè

Ɓó bɔ̃̀ nɔ̀mɔ̀ dyíin ɓá Gèɖèpɔ́ɔ̀ Kã́á-ɓòɖòɔ̀ jè dyíɛ jè cɛ̃-cɛ̃ kɔ̃in nyɛɛ, Jízɛ̀ tɛ̀mɛ̀ìn ma cɛ̃́ɛ́-ɖɛ̀ kpa ɖɛ ɓè. Dyé wa gbɛ̀ì-gbɛ̀ì ɓè sɔ̀ìn wuɖu ɓè ɔ cɛ̃ ma ɖé Ɔ́ɖè-tòɖòɔ̀ dyaa múɛ. Zà Máfíò 6:14, 34 kè 7:12 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Ðɛ́ mɔ̀ náún-po-wùɖù kpa ɖɛ ɓè ɓɛ́ Jízɛ̀ tò ma ɖé vɔ̀sì ɓè nìà kɛ múɛ́?
Nì hwòɖò ɖá náún-po-wùɖù ɓè nìà kɛ kpa ɖɛ keè?

6. Jízɛ̀ nyu ma zɛ̃̀ìn-ɖɛ̀ ɓè

Jɛhova nyí ma Jízɛ̀ kpé, ɓɛ́ ɔ ké ma zɛ̃̀ìn-ɖɛ̀ pàɖà ɓè nyu. Ɓɛ́ m̀ ké ɔ hwɔìn-ɖɛ̀ ɖò dyé ní, zà Máà 5:25-34 wuɖuún mɔɔ po VÍÐÒƆ̀ kũ̀à gbo. Nìí, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.

VÍÐÒ: Màa Wɛ́-Wɛ́ Ðò Káná Ma Dyi (5:10)

Ðé víɖòɔ̀ múɛɛ, ɖɛ́ màa wɛ́ ma kà kɛɛ po ma jàà kɛ́?
Ðɛ́ tó nì hwòɖòɔ̀ dyi ɓá zɛ̃̀ìn-ɖɛ̀ nìà kɛ jè dyíɛ́?

Zà Jɔ̃́ɔ́ 5:36 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Ðɛ́ mɔ̀ “zàse” ɓɛ́ Jízɛ̀ɛ̀ zɛ̃̀ìn-ɖɛ̀ ɓèɔ̀ nyu mɔɔ tɛ̀mɛ̀ìn ɓá ɔ jè dyíɛ́?

M̀ dyuòɛ̀ ma dyíì,

kà ɖɛ ɓè à dyuòà dyí ɓá Jízɛ̀ jè dyíɛɛ pàɖà sɔ̀ìn ɖé céè-ɖɛ̀ kpò hĩinyɛ ɓè mɔ̀à—Máfíò kè Máà kè Ðúù ɔ kè Jɔ̃́ɔ́ kɛ múɛɛ̀? Céè-ɖɛ̀ kpò hĩinyɛ ɓèɔ̀ céè-nyɔ̀ ɖò-ɖò ɓè nɛ́ìn ma ɖɛ kò-kò ɓè jìì kɔ̃ ɓá Jízɛ̀ jè dyí. Ðɛ ɓè nìà kɛ séín muìn gbo, ɓɛ́ wa ké kà Jízɛ̀ cĩ́-cĩ́ nyu ma nìɛ̀ kɛɛ tɛ̀mɛ̀ìn nɔ̀mɔ̀ dyíin.

MÁFÍÒ

céè ma ɔ céè-ɖɛ̀ɔ̀ kĩ́ín. Ɔ nɛ́ìn Jízɛ̀ɛ̀ tɛ̀mɛ̀ìn-ɖɛ̀ ɓèɔ̀ jìì kɔ̃, jɛ́ɛ́ kɛɛ ɖɛ Jízɛ̀ tɛ̀mɛ̀ìn ma ɓá Geɖepɔɔ Kã́á-ɓòɖòɔ̀ jè dyíɛ.
MÁÀ

céè ma céè-ɖɛ̀ xwã́ ɓoún ɖé céè-ɖɛ̀ ɓèa hwìɛ̀. Ɔ cɛ̃ hwòɖò-dyi-dè-ɖɛ̀ pàɖà ɓè kpá ma kɛɛ jè.
ÐÚÙ

nɛ́ìn ɓaà jè kè kà Jízɛ̀ nyu ma màa ɓè kpɔ̃ɔ kɛɛ jè jìì kɔ̃.
JƆ̃́Ɔ́

tɛ̀mɛ̀ìn Jízɛ̀ɛ̀ kpeɖe ɓèɔ̀ dyììn ɖé ɖɛ ɓè Jízɛ̀ cɛ̃ ma ɔ ɓàto xwɛ̃́ìn bũ̀in ɓè kè nyɔ tɔ̀ɔ̀ ɓè gboɛɛ jè cɛ̃-cɛ̃ mú.