CƐ̃́Ɛ́-ÐƐ̀ 19

Jɛhova Zàse Ɓè Mɔ̀ Jàà Kɛ́ɖɛ́ì Ðeín-Sí-Nyɔ̀ Ɓèè?

POƐ KŨ̀À GBO

À mɔ̀ Jɛhova Zàse ɓèɛɛ, à poɛ jàà kà ɓɛ́ à mɔ̀ jàà Kɛ́ɖɛ́ì ɖeín-sí-nyɔ̀ ɓèɛ. Xwíníínɔ̀ nyɛ́ kɔ̃̀ jèɛ́? Dyé ɖɛ à jàà-po-ɖɛ̀ ɓèɔ̀ ɓá dyíɛ kè nyɛ́nɛ́ nyuà ké à kòà kɛ ɔ kè ɖɛ̀ɓɛ̀ìn-ɖɛ̀ɓɛ̀ìn ɓɛ́ à ɓéɖé ɓó nyɔ tɔ̀ɔ̀ ɓè bììɛ.

1. Ðɛ́ Jɛhova Zàse ɓèɛ̀ jàà-po-ɖɛ̀ ɓè ɓá dyíɛ́?

Jízɛ̀ cɛ̃ɛ ma, ké ɔ ɖá: “[Geɖepɔɔ] wuɖuɔ̀ mɔ̀ jàà.” (Jɔ̃́ɔ́ 17:17) Jɛhova Zàse ɓèɛ̀ jàà-po-ɖɛ̀ ɓèɔ̀ ɓá Geɖepɔɔ wuɖuɔ̀ dyí kà Jízɛ̀ nì ma kɛ. Dyé kà à nyu ɖɛ nìà kɛ nyuɛ sɔ̀ìn ɖé à ɖɛ-gbɔ-dè-dè múɛ. Ðé zɔ̃ ɓɛ́ìn ma 1870 jùɛ kɛ xwíníín nyɛɛ, Baɓo-cɛ̃́-nyɔ̀ ɓè ɖò dè ma Baɓoɔ múin-gmɔìn-gmɔìn gbɔ kóɖó-kóɖó. Wa jàà-po-ɖɛ̀ ɓèɔ̀ ɓá ma ɖɛ Baɓoɔ cɛ̃ kɛɛ dyí kɛbì jàà-po-ɖɛ̀ ɓèa kè cɔ́cì-tɛ̀mɛ̀ìn-ɖɛ̀ ɓè mɛ se ma gbo muin nyɛ. Púɛɛ, wa ɖú ma Baɓoɔ jàà-wùɖù ɓèa nyɔ tɔ̀ɔ̀ ɓè tɛ̀mɛ̀ìn kpàì. a

2. Xwíníínɔ̀ nyɛ́ kɔ̃̀ jè à ɖáìn à mìɔùn Jɛhova Zàse ɓè kɛ́?

Jɛhova ɖáìn ɔ ɓiè-nyɔ̀ ɓèɔ̀ ɔ zàse ɓè, sepoɛɖe wa cɛ̃ jàà ɓá ɔ jè dyíɛ. (Híìbúɖúù 11:4–12:1) Ɔ hwɔìn-kà, ɖé ti sùà múɛɛ, Geɖepɔɔ cɛ̃ɛ ma ɔ nyɔ ɓèɔ̀ gbo, ké ɔ ɖá: “Ɓè mɔ̀ nì zàse.” (Zà Àzédyà 43:10 wuɖuún.) Wa ɖáìn Jízɛ̀ “Hwòɖò-kɔ̃-dè-zàseɔ̀.” (Wɛ̀ɖɛ̀ɓèɖésĩ̀ɔ̀ 1:5) Ɔ jèɛɛ, ɖé 1931 xwíníín nyɛɛ, à ɖú ma nyɛ́nɛ́ mɔ̀à Jɛhova Zàse kɛɛ dyí. À kpá múàùn ɓɛ́ à ké nyɛ́nɛ́ nìà wɛ ɓéɖéɛ.

3. Xwɛ̀ Jɛhova Zàse ɓè nyu ɖɛ̀ɓɛ̀ìn-ɖɛ̀ɓɛ̀ìn tɛ̀mɛ̀ìn kà Jízɛ̀ nyuɛ ma kà kɛ́?

Jízɛ̀ ɖɛ̀ɓɛ̀ ma ɔ ɖeín-nà-nyɔ̀ ɓèɔ̀ mú mìɔ ké wa nì ma ɖé ɔ gbo kà ɔ kè wa kè wóɖó ma kɛ. (Zà Máà 3:35 wuɖuún.) Kà dyúáɖòɔ̀ kàà, Jɛhova Zàse ɓè kpɔ̃ìn gbo, ké wa mɔ̀ xwéɖé-dù dyúáɖò ɖé ɓóɖó-kpàà dà séín. Xwíníín nìà wɛ kɔ̃̀ jè à ɖáìn ɖàìn ɖíí-gàà kè ɖíí-màà ɓèɛ̀. (Fàɖímɔ̀ 1, 2) Ké à kpɔ̃ gma nìà kɛ dyi ɖekè: “Ɓè mɛ ɖɛ̀ɓɛ̀ ɓèɛ̀ ɖíí Kɛ́ɖɛ́ì ɖeín-sí-nyɔ̀ ɓèɔ̀ mú.” (1 Píɖɛ̀ 2:17) Jɛhova Zàse ɓè tɛ̀mɛ̀ìn ɖɛ̀ɓɛ̀ìn-ɖɛ̀ɓɛ̀ìn nìà kɛ ɖé hwìè pàɖà ɓè mú. Ɔ hwɔìn-kà, ɖé à ɖíí jàà-po-nyɔ̀ ɓè nì ɓóɖó-kpàà dà séín nyɛɛ gbo-kpá-kpá mú ɖé fũ̀à-fṹá-tì ɓè mú.

ÐÉ ÐƐ MÚIN CÁ

Cɛ̃́ ɖɛ pàɖà ɓá Jɛhova Zàse ɓè jè dyí, ké dyé ɖɛ tɔ̀ɔ̀ ɓè ɓɛ́ wa tɛ̀mɛ̀ìn kà ɓɛ́ à mɔ̀ jàà Kɛ́ɖɛ́ì ɖeín-sí-nyɔ̀ ɓèɛ.

Jàà Kɛ́ɖɛ́ì ɖeín-sí-nyɔ̀ ɓèɛ̀ jàà-po-ɖɛ̀ ɓèɔ̀ ɓá Baɓoɔ dyí, ké wa cɛ̃ wa jè nyɔ tɔ̀ɔ̀ ɓè gbo

4. À jàà-po-ɖɛ̀ ɓèɔ̀ ɓá Baɓoɔ dyí

Jɛhova cɛ̃ɛ zɔ̃̀ɔ̀ kà ɓɛ́ Baɓoɔ jàà-wùɖù ɓè mu ma wáɖáá nììn nyɛ. Zà Dànyá 12:4 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Ðɛ́ muà ‘kɔ̃ kpáùn’ ɖé Geɖepɔɔ nyɔ ɓèɔ̀ hwìɛ̀ kà wa muà Baɓoɔ múin gmɔìn nììn teeɛ́?

Cɛ̃́ kà Baɓo-cɛ̃́-nyɔ̀ ɓè ɓɛ́ wa ɖò mɔ̀ ma Caɖé Wɔ́ɖɔ́sò kɛɛ nyu ma Geɖepɔɔ Wuɖuɔ̀ cɛ̃́ɛ kɛɛ jè. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.

VÍÐÒ: Baɓoɔ Jàà-Wùɖù Ɓè Da-Dyé-Dyé Ðe (7:45)

Ðé víɖòɔ̀ múɛɛ, xwɛ̀ Caɖé Wɔ́ɖɔ́sò kè ɔ mùè Baɓo-cɛ̃́-nyɔ̀ ɓèɔ̀ nyu ma Baɓoɔ cɛ̃́ɛ kɛ́?

M̀ dyuòɛ̀ ma dyíì,

kà à ɖà à jàà-po-ɖɛ̀ ɓèɔ̀ ɖíɛ́ ɓè gbo zĩàìn nyɛɛ̀? Xwíníínɔ̀ nyɛ́ kɔ̃̀ jèɛ́? Kà dyóɖóɔ̀ xwáɖáún-wóɖó-wóɖó nyuà ké ce fɔ̀nɔ̀à mɛ́nɛ́-mɛ́nɛ́ kɛɛ, kàà Geɖepɔɔ nyu ké à wɔ̃́ ɔ Wuɖuɔ̀ múin mɛ́nɛ́-mɛ́nɛ́. (Zà Nɔ́ɔ́ 4:18 wuɖuún.) Ɔ jèɛɛ, Baɓoɔ ní zĩàìn gbo dyɛo, kɛɛ à zĩàìn à jàà-po-ɖɛ̀ ɓèɔ̀ gbo ɔ jù ké à ɖɛ-múin-wɔ̃́-wɔ̃́ ɓá Baɓoɔ jè dyíɛɛ dyi kɔ̃ kpá ní.

5. À nyu ɖɛ mɔ̀ à nyɛ́nɛ́ɔ̀ xwíníín nyɛ

Xwíníínɔ̀ nyɛ́ kɔ̃̀ jè à ɖúà Jɛhova Zàse-nyɛ̀nɛ̀ɔ̀ dyíɛ́? Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.

VÍÐÒ: Nyɛ́nɛ́ Ɓɛ́ Ɔ Dè À Mɛ Kɛ (2:40)

Xwíníínɔ̀ nyɛ́ kɔ̃̀ jè Jɛhova Zàse-nyɛ̀nɛ̀ɔ̀ nɔ̀mɔ̀à dyíin nyɛ́?

Xwíníínɔ̀ nyɛ́ kɔ̃̀ jè Jɛhova gãà nyɔ ɓè ɓɛ́ wa kéà ɔ Zàse ɓè jù kɛ́? Wa muɛ tɛ̀mɛ̀ìn kà ɔ mɔ̀ jàà Geɖepɔɔ kɛ, sepoɛɖe nyɔ ɓè ɖà se pàɖà tɔ́mɔ́ ɓá ɔ jè dyí. Dyé se ɓèa sɔ̃́.

Ɓiè-kpòò ɖíɛ́ ɓè tɛ̀mɛ̀ìn wa nyɔ ɓèɔ̀ kà ɓɛ́ Geɖepɔɔ mɔ́ ɓɛ́ wa ké hwɔìn-ɖɛ̀ ɓè kũ̀à mú nyùìn ɖé waà ɓiè-ɓièɔ̀ múɛ. Kɛɛ, zà Ðìvéɖékɔ̀ 26:1 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Ðɛ́ mɔ̀ jààɔ̀ kɛ́? Xwɛ̀ Jɛhova hwòɖò nyu nìɛ̀ ɓá kũùn-kpò ɓè jè dyíɛ́?

Cɔ́cì-nàìn-nyɔ̀ ɖíɛ́ ɓè tɛ̀mɛ̀ìn kà ɓɛ́ Jízɛ̀ mɔ̀ Geɖepɔɔ kɛ. Kɛɛ, zà Jɔ̃́ɔ́ 20:17 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Ðɛ́ mɔ̀ jààɔ̀ kɛ́? Geɖepɔɔ kè Jízɛ̀ mɔ̀ nyɔ dyúáɖòɔ̀ɔ̀?
Xwɛ̀ nì hwòɖòɔ̀ nyu nìɛ̀ ɓɛ́ m̀ kéɛ dyí dyuò kà Jɛhova ɖà ɔ Zàse ɓèɔ̀ ɖoɓo, ɓɛ́ wa ké jàà ɓá ɔ kè ɔ Dyú-gàà jè dyíɛɛ cɛ̃ kɛ́?

6. À ɖɛɓɛìn ɖɛ̀ɓɛ̀ìn mú

Baɓoɔ poìn jàà Kɛ́ɖɛ́ì ɖeín-sí-nyɔ̀ ɓè kpóɖó-dyùàɔ̀ wáká kò-kò ɓè dyí. Zà 1 Kɔ̀ɖéíntĩ̀ɔ̀ 12:25, 26 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Ðɛ́ jàà Kɛ́ɖɛ́ì ɖeín-sí-nyɔ̀ ɓè mɛ nyu ɔ jù ké Kɛ́ɖɛ́ì ɖeín-sí-nyɔ̀ tɔ̀ɔ̀ ɓè dyi gà dyéɛń nììn nyɛ́?
Ðɛ́ m̀ ɖà dyéɖé gbo dè ɓá ɖɛ̀ɓɛ̀ìn-ɖɛ̀ɓɛ̀ìn nìà Jɛhova Zàse ɓè hwìɛ̀ kɛɛ jè dyíɛ́?

Ɔ jù ké Jɛhova Zàse ɓè dyi gà dyéɛń nì ɖé ɓóɖó-kpàà wáká ɖò kɔ̃ ní, Jɛhova Zàse ɓè nì ɓóɖó-kpàà dà séín nyɛɛ vɔ̃ ɓɛ́ wa ké gbo-kpá-sɔ̃̀ tò wàɖà. Ɓɛ́ m̀ ké ɔ hwɔìn-ɖɛ̀ ɖò dyé ní, po VÍÐÒƆ̀ kũ̀à gbo. Nìí, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.

VÍÐÒ: Hétì Kùìn Dìì Vɛ̀nɛ̀ Mɔ̀à Máfíò Kɛɛ Hwòɖò (5:29)

Xwɛ̀ Jɛhova Zàse ɓèɛ̀ gbo-kpá-sɔ̃̀ tò-tòɔ̀ tɛ̀mɛ̀ìn ɖɛ̀ɓɛ̀ìn-ɖɛ̀ɓɛ̀ìn nyɛ́?

Jàà Kɛ́ɖɛ́ì ɖeín-sí-nyɔ̀ ɓè tɛ̀mɛ̀ìn ɖɛ̀ɓɛ̀ìn-ɖɛ̀ɓɛ̀ìn nyɔ ɓè dyí ɖé fũ̀à-fṹá-tì ɓè mú

NYƆ ÐÍƐ́ ƁÈ ÐÁ: “Jɛhova Zàse ɓè mɔ̀ ɓiè-kpòò ɖìè ɖò pu.”

Sɔ̀ìn tiɔ̀ nyɛ́ kɔ̃̀ gbo ɓɛ́ Jɛhova ɖúó ɔ ɓiè-nyɔ̀ ɓèɔ̀ zàse ɖáìn dyíɛ́?

SṸÌN-XWÍNÍÍN

Jɛhova Zàse ɓè mɔ̀ jàà Kɛ́ɖɛ́ì ɖeín-sí-nyɔ̀ ɓè. À mɔ̀ xwéɖé-dù dyúáɖò ɖé ɓóɖó-kpàà dà séín. À mɔ̀ ɓiè-nyɔ̀ ɓè ɓɛ́ à jàà-po-ɖɛ̀ ɓè ɓá Baɓoɔ dyí, ké à cɛ̃ jàà ɓá Jɛhova jè dyíɛ.