Jɛhova mɔ́ ɓɛ́ à ké ɔ xwéɖé-dù nìà ɖé dyɔún wɛ̃ɛ jè cɛ̃́. Xwéɖé-dùà nyɔ ɓè ɖò mɔ̀ ínjà ɓè ɓɛ́ wa ɖáìn “Geɖepɔɔ dyú-gàà” ɓèɛ. (Jɛ́nɛ́sì 6:2; Jóɓò 38:7) Ðɛ́ Baɓoɔ cɛ̃ ɓá ínjà ɓè jè dyíɛ́? Ðɛ́ mɔ̀ kpé ɓɛ́ wa ɓéɖé nyɔ ɓè kɔ̃in nyɛ́? Ké wa séín mɔ̀ Geɖepɔɔ xwéɖé-dùɔ̀ nyɔ ɓèè?

1. Ínjà ɓèɔ̀ mɔ̀ nyɛ́ kɛ́?

Jɛhova mɛ ma ínjà ɓèɔ̀ kĩ́ín hwɛ̀ ɔ mɛ ma ɓóɖó-kpàà. Wa mɔ̀ zùù ɓè ɓɛ́ nyɔ se dyéɛ ɓɛ́ìn kà Geɖepɔɔ nìà kɛ, ké wa cĩ́ ɖé dyɔún. (Híìbúɖúù 1:14) Ínjà méɔ̀ùn ɓè nì ɓó, ké wa ɖò-ɖò séín gã̀ ní. (Wɛ̀ɖɛ̀ɓèɖésĩ̀ɔ̀ 5:11) Wa ‘kpɔ̃ Jɛhovaa gma ɓèɔ̀ dyi, ké wa tò ɖɛ ɓè ɔ cɛ̃ɛ ɖùù gbo.’ (Wɛ́ɖɛ́ 103:20) Ðé ti sùà múɛɛ, Jɛhova ɖoɓo ma ínjà ɓè tiɔ̀ ɖíɛ́ ɓè ɓaɖa, ɓɛ́ wa ké ma cuò-wùɖù ɓè po, kè ɓɛ́ wa ké ma ɔ nyɔ ɓèɔ̀ gbo kpá ɔ kè ɓɛ́ wa ké ma wa póìn. Zɛ̃̀ɛ̀ kɛɛ, ínjà ɓèɔ̀ nàìn Kɛ́ɖɛ́ì ɖeín-sí-nyɔ̀ ɓè ɓɛ́ wa ké nyɔ ɓè mɔ́ Geɖepɔɔ jè cɛ̃́ɛ dyiɛɛ gbo mu.

2. Nyɛ́ mɔ̀ Sétɔ̃̀ kè zùù gbà ɓèɔ̀ kɛ́?

Ínjà ɖíɛ́ ɓè se ma Jɛhova kíɖíí sè. Ínjà kĩ́ín-kĩ́ín ɓɛ́ ɔ po kɛ́ɛ́ kɛɛ mɔ̀ nyɔ wa “ɖáìn Nɔɔ́-nàmàùn mɔɔ Sétɔ̃̀ ɓɛ́ ɔ mɔ̀ nyɔ cáà ɓóɖó-kpà gànáà kɛ.” (Wɛ̀ɖɛ̀ɓèɖésĩ̀ɔ̀ 12:9) Sétɔ̃̀ mɔ́ ɓɛ́ ɔ ké ma nyɔ tɔ̀ɔ̀ wuɖuí kɔ̃̀. Ɔ jèɛɛ, ɔ cá ma Áɖɔ̀ùn kè Íì. Ké ɖeɛɛ, ɔ cá ma ínjà tɔ̀ɔ̀ ɓè, ɓɛ́ wa ké ma ɔ gbo zi ɖé ɔ kɛ́ɛ́-po-poɔ̀ mú. Wa ɖáìn ínjà po kɛ́ɛ́ ɓè nìà wɛɛ zùù gbà ɓè. Jɛhova po ma wa ɓíɖíi nɔ ɓóɖó-kpàà kɔ̃, ké wa mu mú gbɔɔ̀ùn.—Zà Wɛ̀ɖɛ̀ɓèɖésĩ̀ɔ̀ 12:9, 12 wuɖuún.

3. Xwɛ̀ Sétɔ̃̀ kè zùù gbà ɓèɔ̀ vɔ̃ ɓɛ́ wa ké à cá kɛ́?

Sétɔ̃̀ kè zùù gbà ɓèɔ̀ cá nyɔ pàɖà ɓè dyììn ɖé hwĩɔ̀-nyu-nyu mú. Hwĩɔ̀-nyu-nyu mɔ̀ ɓɛ́ nyɔ ɖò ké vɔ̃ ɓɛ́ ɔ ké gĩɔ-nyɔ̀ mɔɔ zùù gbà ɓè gbo wùɖùɛ. Ɔ hwɔìn-kà, nyɔ ɖíɛ́ ɓè mu dú-xwíníín-ɖɛ̀ ɓéɖé-nyɔ̀ ɓè kè gĩɔ-nyɔ̀-gbo-wùɖù-nyɔ̀ ɓè kè gbɔ̀ɔ̀-cɛ̃-nyɔ̀ ɓè ɔ kè hwĩɔ̀-nyu-nyɔ̀ ɓè gbo. Nyɔ tɔ̀ɔ̀ ɓè ɖú kũùn kò-kò ɓè ɓɛ́ wa ɓá hwĩɔ̀-nyu-nyu dyíɛɛ dyí. Wa cá nyɔ ɓè ɓɛ́ wa kéɛ jàà po kà ɓɛ́ wa ɓɛ́ìn nyɔ ɓè ɖàà mɛ́ɛ gbo wùɖùɛ̀ kɛ. Kɛɛ, Jɛhova po à náún, ké ɔ ɖá: “Nyɔ ɖò ní ɖá ɓɛ́ ɔ ké wɔún mu, mɔɔ ɔ ké gĩɔ-nyɔ̀ gbo wùɖù.” (Ðìvéɖékɔ̀ 19:31) Ɔ nyí à náá-wùɖù nìà kɛ, ɓɛ́ ɔ ké à dyí gmɔ̀ ɖé Sétɔ̃̀ kè zùù gbà ɓèɔ̀ xwaún. Wa mɔ̀ Geɖepɔɔ mú-nyɛ́-nyɔ̀ ɓè, ké wa mɔ́ wa ké à ɖɛ gbà bũ nyu.

 ÐE ÐƐ MÚIN CÁ

6. Ðu Sétɔ̃̀ kè zùù gbà ɓèɔ̀ toún

Zùù gbà ɓèɔ̀ wuɖuí-kɔ̃̀-nyɔ̀ mɔ̀ Sétɔ̃̀. Kɛɛ, ínjà hwɛìn-hwɛìn ɓèɔ̀ nàìn-nyɔ̀ mɔ̀ Makɔ́ mɔ̀à Jízɛ̀ɛ̀ nyɛ́nɛ́ ɓèɔ̀ ɖòɛ̀. Kpé jĩ̀ xwɛ̀ Makɔ́ ɓéɖé kɛ́? Zà Wɛ̀ɖɛ̀ɓèɖésĩ̀ɔ̀ 12:7-9 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• Nyɛ́ ɓéɖé kpé mìɔ kɛ́? Makɔ́ kè ɔ ínjà ɓèɔ̀ɔ̀ mɔɔ Sétɔ̃̀ kè zùù gbà ɓèɔ̀ɔ̀?

• Nì hwòɖò ɖá Jízɛ̀ɛ̀ ɖeín-sí-nyɔ̀ ɓèɔ̀ kɔ̃̀ wa ké Sétɔ̃̀ kè zùù gbà ɓèɔ̀ dyi fɛ̃̀ìnǹ?

M̀ ɓɛ́ìn Sétɔ̃̀ kè zùù gbà ɓèɔ̀ toún ɖuɛ. Zà Jĩ́ìn 4:7 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwɛ̀ m̀ ɓɛ́ìn m̀ mìɔùn dyí gmɔ̀ ɖé Sétɔ̃̀ kè zùù gbà ɓèɔ̀ xwaún wɛ̃́?

 SṸÌN-XWÍNÍÍN

Ínjà hwɛìn-hwɛìn ɓè kpá à gbo. Sétɔ̃̀ kè zùù gbà ɓèɔ̀ mɔ̀ Jɛhova mú-nyɛ́-nyɔ̀ ɓè, ké wa nyùìn hwĩɔ̀ kũ̀à mú, ɓɛ́ wa ké nyɔ ɓè cá.

Ðɛ-kɔ̃in-kpa-kpa

• Xwɛ̀ Jɛhovaa ínjà ɓèɔ̀ nì nyɔ ɓè gbo kpáuń, ɓɛ́ wa ké ɔ jè cɛ̃́ kɛ́?

• Sétɔ̃̀ kè zùù gbà ɓèɔ̀ mɔ̀ nyɛ́ kɛ́?

• Xwíníínɔ̀ nyɛ́ kɔ̃̀ jè m̀ mɔ́ m̀ kéà hwĩɔ̀ nyu jè kɔ̃ín pòìn nyɛ́?