Gĩɔ dyà vĩ̀-vĩ̀ kè wìì. Ðɛa kɔ̃̀ jè ɖé Baɓoɔ ɖáìn gĩɔ mú-nyɛ́-nyɔ̀ kɛ̀. (1 Kɔ̀ɖéíntĩ̀ɔ̀ 15:26) Ðé Cɛ̃́ɛ́-ɖɛ̀ 27 múɛɛ, à cɛ̃́ɛ kà ɓɛ́ Jɛhova mu mú-nyɛ́-nyɔ̀ nìà wɛ toún ɖuùn wɛ̃. Kɛɛ, ɖɛ́ mu nyɔ ɓè ɓɛ́ wa ɖàà mɛ́ɛ gbo kpáùn wɛ̃́? Ðé cɛ̃́ɛ́-ɖɛ̀ nìà kɛ múɛɛ, nì mu ɖɛ pàɖà ɓá Jɛhova nyɛ́nɛ́ín-ɖáìn-ɖɛ̀ kpa ɖɛ ɓèɔ̀ ɖò jè dyíɛɛ cɛ̃́ìn ɖe—ɔ mu nyɔ béɔ̀ùn ɓáún-ɓáún ɖe dyàùn, ɓɛ́ wa ké fɛ̀ɛ̀ múàùn dyi kpáìn ɓó sè-ná-sèɛ̀ tiín. Ɔ mu wa gĩɔ zàùn! Ðɛa ɓɛ́ìn kpáa jàà cáà? Wa mu gĩɔ wóɖóùn, ɓɛ́ wa ké ɖé dyɔún mɔɔ ɓóɖó-kpàà kɔ̃ cĩ́ì?

1. Ðɛ́ Jɛhova mɔ́ ɔ ké à ɖɛ̀ɓɛ̀-nyɔ̀ ɓè ɖàà mɛ́ɛ bìì nyuɛ́?

Jɛhova nìɛ̀ mɔ́uń xwéé, ɓɛ́ ɔ ké nyɔ ɓè ɖàà mɛ́ɛ gĩɔ zà. Gàa ɖò ɓɛ́ wa ɖáìn Jóɓò ɓɛ́ ɔ ɓéɖé ma hwìɖìì-taɓa-taɓa kɛɛ dèɛ̀ ma hwòɖò kɔ̃ kà ɔ dyi ma mɛ́ín ɔ jè se ma Geɖepɔɔ hwìɖìi sɔ̀ɔ̀ mu fɔɔ kɛ. Ɔ cɛ̃ɛ ma Geɖepɔɔ gbo, ké ɔ ɖá: “Nì mu ḿ ɖáùn, ké ní mu m̀ gɔ̃̀ jùùn [sɔ̀ìn ɖé xwɛ́-gmàà mú].”—Zà Jóɓò 14:13-15 wuɖuún.

2. Xwɛ̀ à nyuɛ dyí dyuòɛ̀ kà nyɔ ɓè ɖàà mɛ́ɛ ɓɛ́ìn gĩɔ wóɖóɛ kɛ́?

Ti Jízɛ̀ nì ma dà ɓóɖó-kpàà kɔ̃ɛɛ, Geɖepɔɔ nyí ma ɔ kpé, ɓɛ́ ɔ ké ma nyɔ ɓè gĩɔ zà. Jízɛ̀ zà ma màa-dyù gbɔ́ɔ́ ɖò mɔ ma zɔ̃ 12 kɛ kè jɔ̀ɔ̀-màà ɖòɛ̀ dyú-gàà gĩɔ. (Máà 5:41, 42; Ðúù 7:12-15) Jízɛ̀ ɓàto Ðázɛ̀ɖɛ̀ mɛ́ ma. Ðázɛ̀ɖɛ̀ mɛ́ ma, ké wa zàà ma dyóɖóún ké ɔ zĩ̀ìn ma wé hĩinyɛ dyɛo, kɛɛ Jízɛ̀ zà ma ɔ gĩɔ. Ti Jízɛ̀ ɖà ma Geɖepɔɔ ɓaà hwɔɛɛ, ɔ gmɔ̀ìn ma ɖé xwɛ́-ɓìɔ̀ gbo, ké ɔ cɛ̃ɛ ma ɖé wuɖu zoo mú, ké ɔ ɖá: “Ðázɛ̀ɖɛ̀, dyi sí!” Púɛɛ, “nyɔ ɖà ma kà mɛ́ɛ sí ma!” (Jɔ̃́ɔ́ 11:43, 44) Nàìn kà Ðázɛ̀ɖɛ̀ɛ̀ gbo-xwíníín-nyɔ̀ ɓèɔ̀ kè ɔ ɓàto ɓè hwòɖò nyu ma nìɛ̀ kɛɛ jè hwìɖìi!

3. Ðɛ́ mɔ̀ hwòɖò-kɔ̃-dè-ɖɛ̀ ɓɛ́ ɔ nì ɓó nì ɖɛ̀ɓɛ̀-nyɔ̀ ɓè ɖàà mɛ́ɛ bììɛ́?

Baɓoɔ cɛ̃ɛ kà ɓɛ́ “[nyɔ ɓè] . . . mu gĩɔ wóɖóùn wɛ̃.” (Àpɔ́sò 24:15) Nyɔ ɓè ɓɛ́ Jízɛ̀ zà ma gĩɔ kɛɛ séè ma dyɔún mu. (Jɔ̃́ɔ́ 3:13) Wa kpá ma múàùn ɓɛ́ wa ké ma gĩɔ wóɖó dà ɓóɖó-kpàà kɔ̃. Kà dyúáɖòɔ̀ kàà Jízɛ̀ mu nyɔ béɔ̀ùn ɓáún-ɓáún gĩɔ zàùn, ɓɛ́ wa ké fɛ̀ɛ̀ múàùn dyi kpáìn ɓó sè-ná-sèɛ̀ tiín ɖé páɖédà mú dà ɓóɖó-kpàà kɔ̃. Ɔ ɖá, “nyɔùn séín ɓè ɖàà mɛ́, ké wa ɖà ma wa dyóɖóún zàa”—kɛbì nyɔ ɖò mɛ seɛ ma dyí dyuò kà wa nì ma cĩ́ɛń, ké wa jè nì Geɖepɔɔ hwìɖìiɛɛ—mu gĩɔ wóɖóùn.—Jɔ̃́ɔ́ 5:28, 29.

 ÐE ÐƐ MÚIN CÁ

4. Jízɛ̀ tɛ̀mɛ̀ìn ma kà ɔ ɓɛ́ìn nyɔ ɓè ɖàà mɛ́ɛ gĩɔ zàà kɛ

Cɛ̃́ ɖɛ pàɖà ɓá ɖɛ Jízɛ̀ nyu ma ɓó ɔ ɓàto Ðázɛ̀ɖɛ̀ bììɛɛ jè dyí. Zà Jɔ̃́ɔ́ 11:14, 38-44 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• Xwɛ̀ à nyuɛ dyí dyuòɛ̀ kà Ðázɛ̀ɖɛ̀ mɛ́ ma jàà kɛ́?—Dyé vɔ́sì 39.

• Ɔ jù ké Ðázɛ̀ɖɛ̀ dyi ma ɖé dyɔún mu ní, nì hwòɖò ɖá Jízɛ̀ muɛ ma gĩɔ zàùn dà ɓóɖó-kpàà kɔ̃ɔ̀?

Po VÍÐÒƆ̀ kũ̀à gbo.

5. Nyɔ ɓáún-ɓáún mu gĩɔ wóɖóùn!

Zà Wɛ́ɖɛ́ 37:29 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Dɛ̀ nyɔ béɔ̀ùn ɓè muà gĩɔ wóɖóùn wɛ̃ɛ mu cĩ́ìn nyɛ́?

Jízɛ̀ mu nyɔ ɓáún-ɓáún ɓè gĩɔ zàùn ké ɔ se nyɔ ɓè ɓiè ma Jɛhova kɛɛ ɖòùn. Zà Àpɔ́sò 24:15 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Nyɛ́ nì mu mɔ́ùn ɓɛ́ ɔ ké gĩɔ wóɖó kɛ́?

• Xwɛ̀ gĩɔ-wóɖó-wóɖóɔ̀ hwòɖò-kɔ̃-dè-dè nyu ma Feɖésétéɛ̀ wóɖóìn-nyɔ̀ ɓèɔ̀ kpéí poɛ kɛ́?

 SṸÌN-XWÍNÍÍN

Baɓoɔ cɛ̃ɛ kà ɓɛ́ nyɔ béɔ̀ùn ɓè ɖàà mɛ́ɛ mu gĩɔ wóɖóùn wɛ̃. Jɛhova mɔ́ ɓɛ́ wa ké cĩ́ ɖe, ké ɔ ɖà Jízɛ̀ kpé nyí, ɓɛ́ ɔ ké wa gĩɔ zà.

Ðɛ-kɔ̃in-kpa-kpa

• Xwɛ̀ Jɛhova kè Jízɛ̀ hwòɖò nyu nìɛ̀ ɓá nyɔ ɓè ɖàà mɛ́ɛ gĩɔ zà jè dyíɛ́?

• Dɛ̀ nyɔ béɔ̀ùn ɓè muà gĩɔ wóɖóùn wɛ̃ɛ mu cĩ́ìn nyɛ́—ɖé dyɔún mɔɔ ɓóɖó-kpàà kɔ̃ɔ̀? Xwíníínɔ̀ nyɛ́ kɔ̃̀ jè m̀ ɖáà ná kɛ́?

• Ðɛ́ nyuɛ ké m̀ poà jàà kà nì ɖɛ̀ɓɛ̀-nyɔ̀ ɓè mu cĩ́ìn ɖe kɛ́?