À séín ɓéɖé ɖɛ ɓè à ké jè gbɔ poɛ. Ðɛ ɓèa pàɖà ɓɛ́ìn dyíin nɔ̀mɔ̀ mɔɔ wa ɓɛ́ìn dyíin nyìnìɛ̀n ɓó à bìì, ké wa ɓɛ́ìn gbo-kpɔ̃ìn-kpɔ̃ìn nìà à kè Jɛhova pṹa kɛɛ dyi kùɛ̀n mɔɔ wa ɓɛ́ìn mú gbɔɔ̀. Ɔ hwɔìn kà, à kɔ̃̀ à ké dɛ̀ à ké cĩ́ɛ kè kà à ké wíɖí dyéɛ nyuɛ mɔɔ kɛbì à mu nyɔ́nɔ́ mɔɔ dyú-ɓà dyi kpɔ̃ùn níɛɛ jè gbɔ po dyɛ̀. À dyi ɖɛ ɓè jè gbɔ po nɔ̀mɔ̀ dyíin ní, à ɓɛ́ìn múà ɓéɖéɛ ɖé à cĩ́-cĩ́ɔ̀ mú, ké à ɓɛ́ìn Jɛhova hwòɖò dyi dèɛ̀.

1. Xwɛ̀ m̀ ɓɛ́ìn Baɓoɔ kũ̀à mú nyùɛ̀n ɓɛ́ ɔ ké m̀ gbo kpá ɓɛ́ m̀ ké ɖɛ ɓè gbɔ po nɔ̀mɔ̀ dyíin nyɛ́?

Hwɛ̀ m̀ ké ɖɛ ɖò gbɔ po ní, zɔ̀ìn Jɛhova gbo-kpá-sɔ̃̀, ké gmɔìn Baɓoɔ múin, ɓɛ́ m̀ ké kà Jɛhova nyu ɖɛɔ̀ dya gmɔ̀ɔ̀ kɛɛ dyé. (Zà Nɔ́ɔ́ 2:3-6 wuɖuún.) Tiɔ̀ ɖíɛ́ ɓè ɓaɖaín, Jɛhova cɛ̃ ɖɛɔ̀ jè wáɖáá. Ɔ dyi ná nììn, ɖɛ mɔ̀ ɖɛ nɔ̀mɔ̀ dyíin m̀ ɓɛ́ìn gbɔ poɛ kɛɛ mɔ̀ ɖɛ ɔ cɛ̃à kɛɛ nyu-nyu.

Kɛɛ, ɔ jù ké Baɓoɔ se ɖɛ jɛ́ɛ́ ɖò m̀ ké nyuɛɛ jè cɛ̃ ní ɖé? Jɛhova mu ‘hwìè m̀ ké kpa kɛɛ m̀ da zàìn.’ (Àzédyà 48:17) Xwɛ̀ kɛ́? Hwìè-da-zàìn-wùɖù ɓè ɓɛ́ìn ɓó nìɛ̀ ɓɛ́ wa ɓɛ́ìn m̀ hwìè da zàìn nyɛ. Baɓoɔ hwìè-da-zàìn-wùɖù ɓè mɔ̀ jàà-wùɖù ɓè ɓɛ́ wa tɛ̀mɛ̀ìn Geɖepɔɔ hwìɖìi-poìn-ɖɛ̀ ɓè kè kà ɔ hwòɖò nyu nìɛ̀ kɛ. Tiɔ̀ ɖíɛ́ ɓè ɓaɖaín, à cɛ̃́ kà Geɖepɔɔ hwòɖò nyu nìɛ̀ ɓá ɖɛ ɖò jè dyíɛ ɔ jù ké à dyi ɖɛ ɖò wuɖuún zà ɖé Baɓoɔ mú ní. À dyi kà Jɛhova hwòɖò nyu nìɛ̀ kɛɛ jè múin wɔ̃́ ní, à ɓɛ́ìn ɖɛ ɓè ɓɛ́ wa dè ɔ hwòɖò dyiɛɛ gbɔ poɛ.

2. Ðɛ́ ɓè m̀ mɛ poìn jè hwìɖìi hwɛ̀ ɓɛ́ m̀ ké ɖɛ ɖò gbɔ po kɛ́?

Baɓoɔ ɖá: “Hwòɖò-fɔ̀nɔ̀-nyɔ̀ gmɔ̀ ɔ nà-ɓò dyí.” (Nɔ́ɔ́ 14:15) Ɔ xwíníín mɔ̀, hwɛ̀ à ké ɖɛ ɖò gbɔ po ní, à mɛ ɖú ti dyí ɓɛ́ à ké ɖɛ ɓè à ké gãa jè hwìɖìi poìn. Kà nì muà ɖɛ ɖò-ɖò ɓèɔ̀ jè hwìɖìi poìn nyɛɛ, diè m̀ mìɔùn dyi: ‘Baɓo hwìè-da-zàìn-wùɖùɔ̀ nyɛ́ ɔ ɓá dyíɛ́? Ðɛ ɓèɛ̀ nyɛ́ muɛ nyuùn ɓɛ́ ḿ ké gìɖìì ɓéɖéɛ́? Ðɛ́ ní gbɔ-po-ɖɛ̀ɔ̀ mu nyɔ tɔ̀ɔ̀ ɓè bũ̀ nyuùn wɛ̃́? Ɓó wa séín kɔ̃in nyɛɛ, ɔ mu Jɛhova múàùn poùnǹ?’—Dìtɔ̀wáɖánámɛ̀ 32:29.

Jɛhova ɓéɖé kpé ɓɛ́ ɔ ké ɖɛ mɔ̀ ɖɛ nɔ̀mɔ̀ dyíin kè ɖɛ gbà kɛɛ jè à gbo cɛ̃. À dyi ɔ gma ɓèɔ̀ kè ɔ hwìè-da-zàìn-wùɖù ɓèɔ̀ dyí dyuò, ké à dyiɛ kɔ̃ jìnììn ɓɛ́ à ké wa kíɖíí sí ní, nìí, à mu à hwòɖò-xwíníín-hwòɖò-dyùàɔ̀ ɖɛ tɛ̀mɛ̀ìn nì. À hwòɖò-xwíníín-hwòɖò-dyùàɔ̀ mɔ̀ kà à hwòɖò nyu nìɛ̀ ɓá ɖɛ mɔ̀ ɖɛ sɛ́ɖɛ́ìn dyí kè ɖɛ gbà kɛɛ jè dyíɛ. (Wóɖómà 2:14, 15) Hwòɖò-xwíníín-hwòɖò-dyùà ɓɛ́ ɔ sɛ́ɖɛ́ìn dyíɛɛ mu à gbo kpáùn, ɓɛ́ à ké ɖɛ ɓè gbɔ po nɔ̀mɔ̀ dyíin.

 ÐE ÐƐ MÚIN CÁ

3. Wɔ̃́ ɓɛ́ Baɓoɔ ké m̀ hwìè da zàìn

4. Tɛ̀mɛ̀ìn nì hwòɖò-xwíníín-hwòɖò-dyùàɔ̀ ɖɛ, ɓɛ́ m̀ ké ɖɛ ɓè gbɔ po nɔ̀mɔ̀ dyíin

 SṸÌN-XWÍNÍÍN

À dyi kà Jɛhova hwòɖò nyu nìɛ̀ ɓá ɖɛ ɖò jè dyí, ɔ kè kɛbì à nyuu-ɖɛ̀ ɓè mu nyɔ tɔ̀ɔ̀ ɓè gbo kpáùn mɔɔ wa ɖɛ gbà bũ̀ nyuùn níɛ jè hwìɖìi poìn ní, nìí, à mu ɖɛ ɓè gbɔ poùn nɔ̀mɔ̀ dyíin.

Ðɛ-kɔ̃in-kpa-kpa

• Xwɛ̀ m̀ ɓɛ́ìn ɖɛ ɓè ɓɛ́ wa dè Jɛhova hwìɖìiɛɛ gbɔ poɛ kɛ́?

• Xwɛ̀ m̀ ɓɛ́ìn nì hwòɖò-xwíníín-hwòɖò-dyùàɔ̀ ɖɛ tɛ̀mɛ̀ìn nyɛ́?

• Xwɛ̀ m̀ ɓɛ́ìn tɛ̀mɛ̀ìn kà m̀ dyé nyɔ tɔ̀ɔ̀ ɓè nììn hwòɖò-xwíníín-hwòɖò-dyùàɔ̀ kpéín nyɛ́?