Nyɔ séín mɔ́ ɓàto ɓè ɓɛ́ wa mɔ̀ jàà-nyɔ̀ kɛ. Jɛhova mɔ́ ɓɛ́ ɔ ɓàto ɓè ké jàà nyu ɖekè. Kɛɛ, ɔ se xwa fɛ̃́ìn ɖé ɓóɖó-kpà kɔ̃̀ kɔ̃ ɓɛ́ nyɔ pàɖà ɓè ní nyu jàà kɛɛ kɔ̃. Ðɛ́ mɔ̀ kpáná ɓè ɓɛ́ wa sɔ̀ìn ɖé jàà-nyu-nyu ɖé ɖɛ séín múɛɛ mú kɛ́?

1. Ðɛ́ mɔ̀ xwíníín zi ɖɛ kpáuń mìɔ kɔ̃̀ jè à mɛ nyuà jàà kɛ́?

À dyi nyɔ tɔ̀ɔ̀ ɓè jàà gbo nyu ní, à tɛ̀mɛ̀ìn kà à ɖɛ̀ɓɛ̀ Jɛhova mú, ké à dyé ɔ kpéín nyɛ. Poɛ̀n jè hwìɖìi: Jɛhova dyuò ɖɛ séín à poìn hwìɖìi kè ɖɛ séín à nyuɛɛ dyí. (Híìbúɖúù 4:13) À dyi jàà nyu ní, ɔ dyéɛ ké ɔ kpáìn múàùn dyi. Ɔ Wuɖuɔ̀ ɖá: “Nyɔ . . . ɓè kɔ̃̀ nyuu-ɖɛ̀ sɔ̀ìn kà hwììɛɛ jè nyàìn [Jɛhova] dyi, kɛɛ ɔ hwòɖò dèìn dyí-sɛ́ɖɛ́ìn-nyɔ̀ ɓèɔ̀ múin.”—Nɔ́ɔ́ 3:32.

2. Ðɛ́ mɔ̀ hwìè ɖíɛ́ ɓè kɔ̃̀ mú ɓɛ́ à ɓɛ́ìn jàà nyuɛ ɖé à cĩ́-cĩ́ɔ̀ mú wé séín nyɛ́?

Ðɛ Jɛhova mɔ́ ɓɛ́ à ké nyuɛɛ mɔ̀, à mɛ “cɛ̃ìn cɛ̃̀ìn jàà gbo.” (Zɛ́kɔ̀wáɖádyà 8:16, 17) Ðɛ́ mɔ̀ ɔ xwíníín nyɛ́? Kɛbì à mɛ nì à gbò-xwíníín-nyɔ̀ ɓè mɔɔ à mùè kũ̀à-nyu-nyɔ̀ ɓè mɔɔ à ɖíí Kɛ́ɖɛ́ì ɖeín-sí-nyɔ̀ mɔɔ gɔ̀mànà-nyɔ̀ ɖò gbo wùɖùɛ̀n nyɛɛ, à mɛ ɓɔ́ se tɔ́mɔ́ɔ̀, mɔɔ à mɛ ɓɔ́ wa cáa. Nyɔ ɓè mɔ̀ jàà-nyu-nyɔ̀ ɓèɛɛ ní dyíɖí nyɔ tɔ̀ɔ̀ ɓè gbo, mɔɔ wa ní nyu wa gbá-gbá mú. (Zà Nɔ́ɔ́ 24:28 kè Ìfísĩ̀ɔ̀ 4:28 wuɖuún.) Ké wa pɛ́ɛ̀ tácì séín wa ɓéɖé wa ké pɛ́ɛ̀ kɛ. (Wóɖómà 13:5-7) Ðé hwìè ɓè nìà kɛ kè hwìè tɔ̀ɔ̀ ɓè múɛɛ, à mɔ́ ɓɛ́ à ké “ɖɛ́ mɔ̀ ɖɛ sɛ́ɖɛ́ìn dyí kɛɛ nyu ti séín.”—Híìbúɖúù 13:18.

3. Ðɛ́ mɔ̀ kpáná ɓè ɓɛ́ wa sɔ̀ìn ɖé jàà-nyu-nyu múɛ́?

À dyi jàà-nyu-nyɔ̀ ɓè jù ti séín ní, nyɔ tɔ̀ɔ̀ ɓè mu à hwòɖò kɔ̃ dèìn. À mu nyɔ tɔ̀ɔ̀ ɓè gbo kpáùn, ɓɛ́ wa ké gìɖìì ɓéɖé ɖé dyí-poìn-kpòòɔ̀ mú kà ɔ nìà ɖé xwéɖé-dù ɓéɖé ɖɛ̀ɓɛ̀ìn-ɖɛ̀ɓɛ̀ìn ɖò múɛ. À hwòɖò-xwíníín-hwòɖò-dyùàɔ̀ se à ɓaɖaá mu. À jàà-nyu-nyuɔ̀ ɓɛ́ìn nyuɛ ɖekè “ɓɛ́ nyɔùn ké ɖɛ nɔ̀mɔ̀ dyíin ɓá tɛ̀mɛ̀ìn-ɖɛ̀ ɓɛ́ ɔ ɓá Geɖepɔɔ mɔ̀à à póìn-nyɔ̀ɔ̀ kɛ dyíɛɛ jè cɛ̃,” ɓɛ́ ɔ kéɛ nyu ɓɛ́ nyɔ ɓè nì ɖé píéɛɛ ké jààɔ̀ mú dyi.—Tátɔ̀ 2:10.

 ÐE ÐƐ MÚIN CÁ

5. Nyu jàà ti séín

 6. Jàà-nyu-nyu nyu à kpáná dyí

Jàà-nyu-nyu ɓɛ́ìn fũ̀à-fṹá ɖíɛ́ ɓè dyàà. Kɛɛ ɖé dyúa kɛɛ, ɔ mɔ̀ ɖɛ nɔ̀mɔ̀ dyíin m̀ ɓɛ́ìn nyuɛ kɛ. Zà Wɛ́ɖɛ́ 34:12-16 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwɛ̀ jàà-nyu-nyu nyu nì cĩ́-cĩ́ɔ̀ dyíin nɔ̀mɔ̀ìn nyɛ́?

1. Dyú-ɓà ɓè kè màa ɓè ɓɛ́ wa nyu jàà kɛɛ kùìn waà dyi-kpɔ̃ìn-kpɔ̃ìnɔ̀ dyi

2. Kũ̀à-nyu-nyɔ̀ ɓè ɓɛ́ wa nyu jàà kɛɛ nyuɛ ké waà kɔ̃in-nì-nyɔ̀ ɓè dè wa hwòɖò kɔ̃

3. Ɓóɖó-dyù ɓè ɓɛ́ wa nyu jàà kɛɛ ɓéɖé nyɛ́nɛ́ín nyɛ̀nɛ̀ ɖé gɔ̀mànà-nyɔ̀ vɛ̀nɛ̀ ɓè gbo

 SṸÌN-XWÍNÍÍN

Jɛhova mɔ́ ɓɛ́ ɔ ɓàto ɓè ké jàà nyu ɖé ɖɛ séín wa cɛ̃ kè ɖɛ séín wa nyuɛɛ mú.

Ðɛ-kɔ̃in-kpa-kpa

• Ðɛ́ mɔ̀ hwìè ɖíɛ́ ɓè kɔ̃̀ mú ɓɛ́ à ɓɛ́ìn jàà nyuɛ kɛ́?

• Xwíníínɔ̀ nyɛ́ kɔ̃̀ jè ɔ seà fɔ̀nɔ̀-hwòɖò nyu ɓɛ́ à kéɛ hwìɖìi poìn kà à ɓɛ́ìn jàà vìèɛ̀ kɛ́?

• Xwíníínɔ̀ nyɛ́ kɔ̃̀ jè m̀ mɔ́ ɓɛ́ m̀ kéà jàà nyu ti séín nyɛ́?