CƐ̃́Ɛ́-ÐƐ̀ 37

Ðɛ Baɓoɔ Cɛ̃ Ɓá Kũ̀à Kè Wíɖí Jè Dyíɛ

POƐ KŨ̀À GBO

M̀ ɖà hwòɖò dyií gbàìn ɖòò ɓá kũ̀à mɔɔ wíɖí jè dyíì? Ɓɛ́ à ké à cĩ́-cĩ́ɔ̀ jè gbo gmɔ̀, hwɛ̀ à ké Jɛhova ɓiè hwòɖòɛ̀-ɖé-hwɛ̀-kà ɓó kɔ̃in ɖeɛɛ ɓɛ́ìn mú kàmàà. Baɓoɔ tò náún-po-wùɖù ɓè ɓɛ́ wa ɓɛ́ìn à gbo kpáa kɛ.

1. Ðɛ́ Baɓoɔ Cɛ̃ Ɓá Kũ̀à Jè Dyíɛ́?

Geɖepɔɔ mɔ́ ɓɛ́ à ké kũ̀à à nyuɛɛ múàùn dyi kpáìn. Baɓoɔ cɛ̃ɛ, ké ɔ ɖá: “Ðɛ ɖò se nì ɓɛ́ ɔ ké ɖɛ kpa ɓɛ́ ɔ ké ɖɛ nìà kɛ dyí zi. Ðɛɔ̀ mɔ̀, ɓɛ́ nyɔ ɖò . . . ké ɖɛ kɔ̃̀ kũ̀à ɓɛ́ ɔ ɖà nyuɛɛ múà múin kpáìn.” (Ìkíɖísìásì 2:24) Jɛhova nyu kũ̀à kóɖó-kóɖó. À dyi ɔ ɓo bɛ̃̀ìn sí dyììn ɖé kũ̀à-nyu-nyu mú ní, à dè ɔ hwòɖò dyi, ké à nììn hwòɖò dè dyi ɖekè.

Kũ̀à-nyu-nyu kpa ɖɛ. Kɛɛ, à mɛ ɓɔ́ wɔ̃́ɔ ɓɛ́ ɔ ké ɖɛ kpa mìɔ ɓɛ́ ɔ ké Jɛhova ɓiè-ɓiè dyí zi. (Jɔ̃́ɔ́ 6:27) Ɔ cɛ̃ɛ kà ɓɛ́ à dyi ɔ jè po kĩ́ín ní, ɔ mu ɖɛ ɓè à kɔ̃̀ à ké ɓéɖé ɓɛ́ à ké cĩ́ɛɛ à nyíìn nyɛ.

2. Ðɛ́ mɔ̀ wíɖí-dya-gmɔ̀-kà ɓɛ́ ɔ sɛ́ɖɛ́ìn dyíɛ́?

Baɓoɔ cɛ̃ɛ kà ɓɛ́ ‘wíɖí mɔ̀ nyɔ-dyí-gmɔ̀-ɖɛ̀ kɛ’ dyɛo, kɛɛ ɔ po à náún kà ɓɛ́ wíɖí ɖòùn se à múàùn poɛ ɓɛ́ìn nyɛ. (Ìkíɖísìásì 7:12) Ɔ jèɛɛ, Baɓoɔ po à kpéí, ɓɛ́ à ké se wíɖí mú ɖɛ̀ɓɛ̀, kɛɛ à “hwòɖò mɛ dè dyi ɓó ɖɛ [à] ɓéɖé kɛɛ jè.” (Zà Híìbúɖúù 13:5 wuɖuún.) À hwòɖò dyi dyi dè tee ɓó ɖɛ à ɓéɖé kɛɛ jè ní, à mu à mìɔùn buɛ̀n ɖé ɖɛ pàɖà mɔ́-mɔ́ xwaún. À mu kpa se xwíníín ɖò kɔ̃̀ɛɛ kpɔ̃-kpɔ̃ dyí ɓàɖàìn. (Nɔ́ɔ́ 22:7) Ké à mu vɔ̃-ɖɛ̀ vɔ̃-vɔ̃ kè se mɔ̀à bã wàɖà-wàɖà kɛɛ dyí ɓàɖàìn.

3. Xwɛ̀ à ɓɛ́ìn wíɖí kũ̀à mú nyùɛ̀n dyí-sɛ́ɖɛ́ìn-kà kɛ́?

Jɛhova mɔ̀ jĩ́á-jè Geɖepɔɔ, ké à mu ɔ ɓó bɛ̃̀ìn síìn ɔ jù ké ‘ɖɛ se à xwaún dyi ku, ké à dyi ti dyé ɓɛ́ à ké nyɔùn ɖɛ nyí’ ní. (1 Tímétè 6:18) À ɓɛ́ìn à wíɖíɔ̀ kũ̀à mú nyùɛ̀n dyí-sɛ́ɖɛ́ìn-kà dyììn ɖé dyí-poìn-kpòòɔ̀ kè nyɔ tɔ̀ɔ̀ ɓè mɔ́ gbo-kpá-kpá kɛɛ gbo-kpá-sɔ̃̀ nyí-nyí mú, jɛ́ɛ́ kɛɛ à ɖíí jàà-po-nyɔ̀ ɓè. Ðɛ Jɛhova hwòɖò dèìn múin mìɔ kɛɛ se ɖɛ jĩ̀ kà à tò kɛ, kɛɛ xwíníín kɔ̃̀ jè à tòà kɛ. À dyi nyɔùn ɖɛ nyí ɖé hwòɖò-wɔ̃́-wɔ̃́ mú ní, à mu múàùn kpáùn, ké à mu Jɛhova hwòɖò dyi dèìn.—Zà Àpɔ́sò 20:35 wuɖuún.

ÐE ÐƐ MÚIN CÁ

Dyé kpáná ɓè nì kũ̀à dya-gmɔ̀-gmɔ̀ dyí-sɛ́ɖɛ́ìn-kà kè hwòɖò-dyi-dè-dè múɛ.

4. Dè Jɛhova dya ɖé nì kũ̀à-sɔ̃̀ mú

Gbo-kpɔ̃ìn-kpɔ̃ìn nìà à kè Jɛhova pṹa kɛɛ mɛ nyuɛ ɓɛ́ à ké kũ̀à dya gmɔ̀ dyí-sɛ́ɖɛ́ìn-kà. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.

VÍÐÒ: Nyu Kũ̀à Hwòɖòɛ̀-Ðé-Hwɛ̀-Kà Ɓó Jɛhova Bìì (4:39)

Ðé víɖòɔ̀ múɛɛ, ɖɛ́ tó nì hwòɖòɔ̀ dyi ɓá kà Jésĩ̀ìn kpeɖe nyu nìɛ̀ ɖé ɔ kũ̀à-nyùìn-naínɔ̀ kɛɛ jè dyíɛ́?
Ðɛ́ ɔ nyu ma ɓɛ́ ɔ ké kũ̀à dya gmɔ̀ dyí-sɛ́ɖɛ́ìn-kà kɛ́?

Zà Kɔ̀ɖɔ́sĩ̀à 3:23, 24 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Xwíníínɔ̀ nyɛ́ kɔ̃̀ jè kà à nyu kũ̀à dya gmɔ̀ɔ̀ kɛɛ kpaà ɖɛ kɛ́?

Kũ̀à-nyu-nyu kpa ɖɛ. Kɛɛ, à mɛ ɓɔ́ wɔ̃́ɔ ɓɛ́ ɔ ké ɖɛ kpa mìɔ ɓɛ́ ɔ ké Jɛhova ɓiè-ɓiè dyí zi

5. Hwòɖò-dyi-dè-dè nyu à kpáná dyí

Nyɔ pàɖà vɔ̃ ɓɛ́ wa ké wíɖí pàɖà wa ɓɛ́ìn ɓéɖéɛ kɛɛ dyi mɔ́. Kɛɛ, Baɓoɔ nyí à náún-po-wùɖù kà kò ɖò. Zà 1 Tímétè 6:6-8 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Baɓoɔ po à kpéí ɓɛ́ à ké ɖɛ́ nyu kɛ́?

Kɛbì à mɛ se ɖɛ pàɖà ɓéɖéɛɛ, à ɓɛ́ìn múàùn kpáa. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.

VÍÐÒ: “Ɓè Hwòɖò Mɛ Dè Dyi Ɓó Ðɛ Ɓè Ɓéɖé Kɛɛ Jè” (3:20)

Xwéɖé-dù ɓè nìà kɛɛ se wíɖí pàɖà ɓéɖé dyɛo, kɛɛ ɖɛ́ po wa múàùn wɛ̃́?

Kɛɛ, ɔ jù ké à dyiɛ goun ɓéɖé ké à dyiɛ pàɖà mɔ́ ní ɖé? Jízɛ̀ po ma nɔ́ɔ́ ɖò ɓá ɖɛ nìà kɛ jè dyí. Zà Ðúù 12:15-21 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Ðɛ́ m̀ ɖà cɛ̃́ sɔ̀ìn ɖé Jízɛ̀ɛ̀ nɔ́ɔ́ɔ̀ múɛ́?—Dyé vɔ̀sì 15.

Zà Nɔ́ɔ́ 10:22 kè 1 Tímétè 6:10 wuɖuún, ɓɛ́ m̀ ké wa sɔ̃́ɔ dyí poìn. Nìí, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Nì hwòɖò ɖá ɖɛ́ mɔ̀ ɖɛ kpa ɖɛ mìɔ kɛ́? M̀ kè Jɛhova gbo-kpɔ̃ìn-kpɔ̃ìnǹ mɔɔ wíɖí pàɖà ɓéɖé-ɓéɖéè? Xwíníínɔ̀ nyɛ́ kɔ̃̀ jèɛ́?
Ðɛ́ mɔ̀ fũ̀à-fṹá-ɖɛ̀ ɓè ɓɛ́ wa sɔ̀ìn wíɖí pàɖà mɔ́-mɔ́ múɛ́?

6. Jɛhova mu à jè gbo gmɔ̀ùn

Fũ̀à-fṹá-ɖɛ̀ ɓè ɓɛ́ wa ɓá kũ̀à kè wíɖí jè dyíɛɛ ɓɛ́ìn à Jɛhova hwòɖò-kɔ̃-dè-dè mú dɔ̃̀ɔ̀. Po VÍÐÒƆ̀ kũ̀à gbo, ɓɛ́ m̀ ké kà à ɓɛ́ìn mú-dɔ̃̀-dɔ̃̀ nì kà kɛ kpɔ̃ɔ nyuɛ kɛɛ dyé, nìí, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.

VÍÐÒ: Jɛhova Mu À Gbo Gmɔ̀ùn (6:21)

Ðé víɖòɔ̀ múɛɛ, ɖɛ́ mɔ̀ fũ̀à-fṹá-ɖɛ̀ ɓè ɓɛ́ ɖíí-gààɔ̀ dyé ma dyíɛ́?
Ðɛ́ ɔ nyu ma ɓɛ́ ɔ ké ma fũ̀à-fṹá-ɖɛ̀ ɓèɔ̀ wɔ̃ zi kɛ́?

Zà Máfíò 6:25-34 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Ðɛ́ Jɛhova ɖá ɔ mu nyɔ ɓè ɓɛ́ wa po ɔ jè kĩ́ín nyɛɛ bìì nyuùn wɛ̃́?

NYƆ ÐÍƐ́ ƁÈ ÐÁ: “Ḿ ɓéɖé ḿ ké kũ̀à nyu kóɖó-kóɖó ɓɛ́ ḿ ké ní xwéɖé-dùɔ̀ gbo gmɔ̀. Ḿ se dyí-poìn-poìn ɓèɔ̀ mú muɛ ɓɛ́ìn wíkì séín.”

Baɓo vɔ̀sìɔ̀ nyɛ́ nyuɛ ké m̀ dyuòɛ̀ dyí jɛ́ɛ́ kà ɓɛ́ Jɛhova ɓiè jè po-po kĩ́ín mɔ̀ ɖɛ zi ɖɛ kpauń ɖò ɓɛ́ m̀ ɓɛ́ìn gbɔ poɛ kɛ́?

SṸÌN-XWÍNÍÍN

Kũ̀à-nyu-nyu kè wíɖí mɔ̀ ɖɛ kpa ɖɛ, kɛɛ wa mɛ ɓɔ́ɔ nyuɛ ɓɛ́ à ké hwìì sɔ̀ìn ɖé Jɛhova ɓiè-ɓiè mú.

Ðɛ-kɔ̃in-kpa-kpa

Ðɛ́ ɓɛ́ìn m̀ gbo kpáa ɓɛ́ m̀ ké kũ̀à dya gmɔ̀ dyí-sɛ́ɖɛ́ìn-kà teeɛ́?
Xwɛ̀ hwòɖò-dyi-dè-dè nyu m̀ kpáná dyíɛ́?
Xwɛ̀ m̀ ɓɛ́ìn tɛ̀mɛ̀ìn kà m̀ dè Jɛhova wuɖuɔ̀ hwòɖò kɔ̃ kà ɔ mu ɔ nyɔ ɓèɔ̀ gbo gmɔ̀ùn wɛ̃́?

Cɛ̃́ɛ́-ɖɛ̀ɔ̀ hwɛ̀ gbɔ ɓó

Dyí-sɔ́-ɖɛ̀

Poɛ̀n hwìɖìi ɓɛ́ m̀ kéɛ dyé kɛbì nì kũ̀àɔ̀ ɖàa nyu ɓɛ́ m̀ ké dyí-poìn-poìn ɓèɔ̀ xwa bĩ ɖé dɛ̀nɛ̀ gbɛ̀i-gbɛ̀i ɓè ɖàa ziɛɛ xwíníín ní. Ɔ dyi ná nììn, po ɖɛ páún ɓɛ́ m̀ ké fũ̀à-fṹáɔ̀ wɔ̃ zi.

Ðɛ tɔ̀ɔ̀ ɓè:

Your other goal