Nàìn ɖe ɖò ɓɛ́ ɔ nì ɔ dyú-gàà ɖò ti dyéɛ̀n ɓó sùkúù mu jèɛɛ jè hwìɖìi. Ɔ dèɖè ɔ ké ɔ po ɔ ɖɔ ɓɛ́ ɔ hwɛ̀ múɛɛ mú nɔ̀mɔ̀ dyíin. Ðɛ nìà kɛ nyu ké ɔ dyɔɔ̀ wóɖó mú, ké ɔ tɛ̀mɛ̀ìn nyɔ tɔ̀ɔ̀ ɓè dyí kà ɔ wóɖóìn-nyɔ̀ ɓèɔ̀ gmɔ̀ ɔ gbo nɔ̀mɔ̀ dyíin nyɛ. Kà dyúáɖòɔ̀ kàà, à ɖɛ̀ɓɛ̀ìn-ɖɛ̀ɓɛ̀ìn Ɓà Jɛhova mɔ́ ɓɛ́ à ké mú hwɛ̀ ɖé kpóɖóún kè ɖé kpeɖe mú. À dyi mú hwɛ̀ ní, à nyu à mìɔùn kpáná dyí ké à dè ɔ dya.

1. Xwɛ̀ à ɓɛ́ìn mú hwɛ̀ɛ̀ ɖé kpóɖóún wɛ̃́?

Jɛhova cɛ̃ɛ à gbo, ké ɔ ɖá: “Ɓè mɛ hwɛ̀ mú.” (1 Píɖɛ̀ 1:16) Ɓɛ́ à ké mú-hwɛ̀-nyɔ̀ ɓè jù ní, à mɛ hwɛ̀ mú ɖé kpóɖóún kè ɖé kpeɖe mú. À ɓɛ́ìn mú hwɛ̀ɛ̀ ɖé kpóɖóún dyììn ɖé dèɖè-dèɖè mú ti séín ɔ kè dyììn ɖé à ɖɔ ɓèɔ̀ wɔɔ̀-wɔɔ̀ kè à ɓíɖí taà ɓè kè hwòtimo ɓè jè gbo-gmɔ̀-gmɔ̀ mú. À ɓɛ́ìn gbo-kpá-sɔ̃̀ tòɛ̀ ɖekè ɓó à kĩ́dɔ̃̀ Hɔ́ɔ̀ɔ̀ gbo gmɔ̀ jè. À dyi mú hwɛ̀ ɖé kpóɖóún ní, à dè Jɛhova dya.—2 Kɔ̀ɖéíntĩ̀ɔ̀ 6:3, 4.

2. Ɓɛ́ à ké mú hwɛ̀ ɖé kpóɖóún ní, kpeɖe ɓèɔ̀ nyɛ́ à mɛ ɓàɖàìn dyíɛ́?

Baɓoɔ ɖá “ɓèà mɛ hwɔ ɓèà mìɔùn mú ɓá ɖɛ séín ɓè mɔ̀à kpóɖó-dyùàɔ̀ kè hwòɖò-dyùàɔ̀ dyíin-nyìnììn-ɖɛ̀ kɛɛ dyí.” (2 Kɔ̀ɖéíntĩ̀ɔ̀ 7:1) Ɔ jèɛɛ, à vɔ̃ ɓɛ́ à ké ɖɛ séín ɖò ɓɛ́ ɔ mu à kpóɖó-dyùàɔ̀ kè à hwòɖò-dyùàɔ̀ dyíin nyìnììn nyɛɛ dyí ɓàɖàìn. À hwìɖìi-poìn-ɖɛ̀ ɓè mɛ dè Jɛhova hwìɖìi. Ɔ jèɛɛ, à vɔ̃ ɓɛ́ à ké ɖɛ ɓè se dyí sɛ́ɖɛ́ìn nyɛɛ jè hwìɖìi zà. (Wɛ́ɖɛ́ 104:34) À vɔ̃ ɖekè ɓɛ́ wuɖu nɔ̀mɔ̀ dyíin ɓè ké à wĩín sɔ̀.—Zà Kɔ̀ɖɔ́sĩ̀à 3:8 wuɖuún.

Ðɛ́ kà kò ɖò ɓɛ́ìn nyuɛ ɓɛ́ à ké se mú hwɛ̀ ɖé kpóɖóún kè ɖé kpeɖe múɛ́? Ðɛ ɖíɛ́ ɓè ɓɛ́ìn kpóɖó-dyùàɔ̀ zɛ̀nɛ̀ poɛ. Ɔ jèɛɛ, à mɛ ɓàɖàìn ɖɛ ɓè hwɔìn kà, tã̀à ná-ná mɔɔ tã̀-ɓóɖó ɖi-ɖi ɔ kè kũùn kũ̀à-mú-nyùìn-nyùìn se-dyí-sɛ́ɖɛ́ìn-kà kɛɛ dyí. À dyi ɖɛ ɓè nìà kɛ nyu ní, à dyɔɔ̀ mu mú wóɖóùn, ké à muɛ tɛ̀mɛ̀ìn kà à dyé nyíí-ɖɛ̀ mɔ̀à fɛ̀ɛ̀ kɛɛ kpéín nyɛ. À vɔ̃ ɖekè ɓɛ́ à ké mú hwɛ̀ ɖé kpeɖe mú dyììn ɖé xwai-nyu-ɖɛ̀ ɓè mɔ̀ nyɔ-mìɔùn-pééín-nyùìn-nyùìn kè maà kè gaà fɔ̀nɔ̀ gbɔ dyi-dyé-dyé gbo-vɔ̃-vɔ̃ mú. (Wɛ́ɖɛ́ 119:37; Ìfísĩ̀ɔ̀ 5:5) Ɔ ɓɛ́ìn mú kàmàà ɓɛ́ nyɔ ké kpeɖe ɓè nìà kɛ wɔ̃ zi, kɛɛ Jɛhova ɓɛ́ìn à gbo kpáa ɓɛ́ à ké wa wɔ̃ zi.—Zà Àzédyà 41:13 wuɖuún.

 ÐE ÐƐ MÚIN CÁ

3. Mú-hwɛ̀-hwɛ̀ ɖé kpóɖóún dè Jɛhova dya

À ɓɛ́ìn kà Jɛhova nyu mú hwɛ̀ jè dya gmɔ̀ɔ̀ kɛɛ dyí dyuòɛ̀ dyììn ɖé gma ɓè ɔ nyí ma Éézùɖùɛ̀-nyɔ̀ ɓèɔ̀ kɛɛ jè cɛ̃́-cɛ̃́ mú. Zà Ɛ́séɖɔ̀ 19:10 kè 30:17-19 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• Ðɛ́ vɔ̀sì ɓè nìà kɛ tɛ̀mɛ̀ìn ɓá kà Jɛhova nyu mú-hwɛ̀-hwɛ̀ ɖé kpóɖóún wɛ̃ dya gmɔ̀ɔ̀ kɛɛ jè dyíɛ́?

• Ðɛ́ mɔ̀ kpeɖe nɔ̀mɔ̀ dyíin ɓè ɓɛ́ wa ɓɛ́ìn m̀ gbo kpáa ɓɛ́ m̀ ké mú hwɛ̀ ɖé kpóɖóún teeɛ́?

Ɓɛ́ m̀ ké mú hwɛ̀ ɖé kpóɖóún wɛ̃ɛ ɖú ti kè dúún-ku-ku dyí. Kɛɛ, à ɓɛ́ìn nyuɛ kɛbì à mɛ tã́ìn dà séín ɖò mɔɔ à mɛ se wíɖí pàɖà ɓéɖéɛ. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛ dɔ́ɔ́ kɔ̃in dèìn.

• Xwɛ̀ à kɔ̃̀ɔ̀-ɖɛ̀ ɓè jè gbo kɔ̃̀-kɔ̃̀ kè wa páún-po-po nyu à Geɖepɔɔ-wùɖù-wáɖá-kũ̀àɔ̀ dya dèɛ̀ kɛ́?

4. Táà kpeɖe gbà ɓè dyi

Ɔ jù ké m̀ dyi tã̀à ná mɔɔ kũùn ɓè kũ̀à mú nyùìn se-dyí-sɛ́ɖɛ́ìn-kà ní, nìí, m̀ ɓɛ́ìn dyí dyuòɛ̀ kà ɔ kàmà mú ɓɛ́ nyɔ ké kpeɖe gbà dyi táà kɛ. Ðɛ́ ɓɛ́ìn m̀ gbo kpáa kɛ́? Poìn ɖɛ ɓɛ́ kpeɖe ɓèa nyu m̀ bũ̀ɛɛ jè hwìɖìi. Zà Máfíò 22:37-39 wuɖuún, ɓɛ́ ɓè ké ɖɛ ɓèɛ̀ dɔ́ɔ́ kɔ̃in dèìn. Wa mɔ̀, ɖɛ tã̀à mɔɔ kũùn kũ̀à-mú-nyùìn-nyùìn se-dyí-sɛ́ɖɛ́ìn-kà kɛɛ nyu . . . 

• gbo-kpɔ̃ìn-kpɔ̃ìn nì nyɔ ɖò kè Jɛhova pṹa kɛɛ bũ̀ɛ.

• nyɔ ɖòɛ̀ xwéɖé-dù kè nyɔ tɔ̀ɔ̀ ɓè nì ɔ ɖeiɛ bũ̀ɛ.

Sɔ́ ɖɛ dyí, ɓɛ́ m̀ ké kpeɖe gbà dyi táà. a Po VÍÐÒƆ kũ̀à gbo.

Zà Fèɖópĩ̀ɔ̀ 4:13 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwɛ̀ ɓaà-ɓaà ti séín kè Baɓoɔ cɛ̃́-cɛ̃́ ɔ kè dyí-poìn-poìn ɓèɔ̀ mú mu-mu ɓɛ́ìn nyɔ ɖò kpé nyíɛ, ɓɛ́ ɔ ké kpeɖe gbà ɖò dyi táà kɛ́?

 5. Vɔ̃ hwìɖìi-poìn-ɖɛ̀ ɓè kè kpeɖe ɓè se mú hwɛ̀ kɛɛ gbo

Zà Kɔ̀ɖɔ́sĩ̀à 3:5 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• Xwɛ̀ à nyuɛ dyí dyuòɛ̀ kà gàa kè màa fɔ̀nɔ̀ gbɔ dyi-dyé-dyé kè gmaɖe-dɔ̀ɔ̀ dè-dè ɔ kè nyɔ-mìɔùn-pééín-nyùìn-nyùìn mɔ̀ se-mú-hwɛ̀-kpèɖè ɓè ɖé Jɛhova dyéɖéín nyɛ́?

• Nì hwòɖò ɖá ɔ nyu fɔ̀nɔ̀-hwòɖò ɓɛ́ Jɛhova kéɛ hwìɖìi dè kà à kpeɖe mɛ hwɛ̀ múɛɛ̀? Xwíníínɔ̀ nyɛ́ kɔ̃̀ jèɛ́?

Cɛ̃́ kà nyɔ ɓɛ́ìn hwìɖìi-poìn-ɖɛ̀ ɓè se mú hwɛ̀ kɛ gbo vɔ̃ɔ kɛɛ jè. Po VÍÐÒƆ̀ kũ̀à gbo.

Jízɛ̀ nyùìn ma ɖɛ-dyí-poìn-poìn ɖò kũ̀à mú, ɓɛ́ ɔ kéɛ ma tɛ̀mɛ̀ìn kà à kɔ̃̀ à kéɛ kɔ̃ jìnììn ɓɛ́ à kpeɖe ké mú hwɛ̀ teeɛ. Zà Máfíò 5:29, 30 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Jízɛ̀ seɛ ma cɛ̃iń nì kà à mɛ puà à mìɔùn bũ̀in nyɛ, kɛɛ ɔ tɛ̀mɛ̀ìn ma kà à kɔ̃̀ à ké ɖɛ ɖò nyuɛ. Ðɛ́ jɛ́ɛ́ ɖò ɓɛ́ nyɔ ɖò ɓɛ́ìn nyuɛ ɓɛ́ ɔ ké hwìɖìi-poìn-ɖɛ̀ ɓè se mú hwɛ̀ kɛɛ dyí ɓàɖàìn nyɛ́? b

M̀ dyi vɔ̃uń nì ɓɛ́ m̀ ké hwìɖìi-poìn-ɖɛ̀ ɓè se mú hwɛ̀ kɛɛ wɔ̃ zi ní, Jɛhova kpáìn nì dúún-ku-kuɔ̀ múàùn dyi. Zà Wɛ́ɖɛ́ 103:13, 14 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Ɔ jù ké m̀ dyi se-mú-hwɛ̀-kpèɖè ɓè gbo vɔ̃uń nììn, xwɛ̀ vɔ̀sì nìà kɛ nyu m̀ kpéí poɛ ɓɛ́ m̀ ké se sa kɛ́?

 SṸÌN-XWÍNÍÍN

À dè Jɛhova hwòɖò dyi dyììn ɖé à kpóɖó-dyùàɔ̀ kè à hwòɖò-dyùàɔ̀ ɔ kè à kpeɖe ɓèɔ̀ mú-hwɔ-hwɔ mú tee.

Ðɛ-kɔ̃in-kpa-kpa

• Xwíníínɔ̀ nyɛ́ kɔ̃̀ jè ɔ kpaà ɖɛ mìɔ ɓɛ́ nyɔ kéà mú hwɛ̀ kɛ́?

• Xwɛ̀ m̀ ɓɛ́ìn mú hwɛ̀ɛ̀ ɖé kpóɖóún wɛ̃́?

• Xwɛ̀ m̀ ɓɛ́ìn nì hwìɖìi-poìn-ɖɛ̀ ɓè kè nì kpeɖe ɓèɔ̀ mú hwɔɔ teeɛ́?