CƐ̃́Ɛ́-ÐƐ̀ 41
Ðɛ́ Baɓoɔ Cɛ̃ Ɓá Gmaɖe Po Jè Dyíɛ́?
Ɔ nyùìn nyɔ pàɖà dɛ̃ ɓɛ́ wa ké gmaɖe po jè cɛ̃. Kɛɛ, Baɓoɔ dyi gmaɖe po jè cɛ̃ ní, ɔ cɛ̃ɛ wáɖáá cá, kɛɛ ɔ cɛ̃ɛ ɖé kpéín-dyé-dyé mú. Ðɛ ɔ cɛ̃ɛ ɓɛ́ìn à kpáná dyí nyuɛ. Ɔ nyu fɔ̀nɔ̀-hwòɖò, sepoɛɖe Baɓoɔ sɔ̀ìn Jɛhova mɔ̀à à Mɛ-nyɔ̀ɔ̀ kɛɛ gbo. Ɔ jèɛɛ, ɔ dyuò ɖɛ mɔ̀ ɖɛ nɔ̀mɔ̀ dyíin ɓó à bììɛɛ dyí. Ɔ cɛ̃ kà à nyuu-ɖɛ̀ ɓè ké ɔ hwòɖò dyi dèɛ̀ nyuɛɛ jè à gbo kè ɖɛ ɓè ɓɛ́ìn à gbo kpáa, ɓɛ́ à ké fɛ̀ɛ̀ múàùn dyi kpáìn ɓó sè-ná-sèɛ̀ tiín nyɛ.
1. Xwɛ̀ Jɛhova nyu gmaɖe po jè dya gmɔ̀ɔ̀ kɛ́?
Gmaɖe-po-po mɔ̀ nyíí-ɖɛ̀ ɖò ɓɛ́ ɔ sɔ̀ìn ɖé Jɛhova gboɛ. Ɔ mɔ́ ɓɛ́ màa kè gàa ɓɛ́ wa kpɔ̃ìn dyiɛɛ kéɛ múàùn dyi kpáìn. Nyíí-ɖɛ̀ nìà kɛ nyuɛ ké dyi-kpɔ̃ìn-nyɔ̀ ɓè wóɖóìn dyú ɓè, ké ɔ nyuɛ ké wa tɛ̀mɛ̀ìn wa ɖɛ̀ɓɛ̀ìn-ɖɛ̀ɓɛ̀ìnɔ̀ ɓó wa mùè ɖò bìì dyí-sɛ́ɖɛ́ìn-kà kè ɖé múà mú. Xwíníín nìà wɛ jèɛɛ, Geɖepɔɔ Wuɖuɔ̀ ɖá: “Nì hwòɖò mɛ dèìn màa ɓɛ́ m̀ ɖà dyi kpɔ̃ɛɛ múin. M̀ mɛ kpá múàùn ɓó ɔ jè.” (Nɔ́ɔ́ 5:18, 19) Jɛhova mɔ́ ɓɛ́ dyi-kpɔ̃ìn-nyɔ̀ ɓè mɔ̀ Kɛ́ɖɛ́ì ɖeín-sí-nyɔ̀ ɓèɛɛ ké waà mùèɔ̀ gboi kpɔ̃, ɓɛ́ wa ɖò ní kɔ̃̀ ɖà gbàɖàùn po fɔɔ.—Zà Híìbúɖúù 13:4 wuɖuún.
2. Ðɛ́ mɔ̀ gbàɖàùn-po-po kɛ́?
Baɓoɔ cɛ̃ɛ à gbo kà ɓɛ́ “gbàɖàùn-po-nyɔ̀ . . . ɖò se pá ɖò ɖé Geɖepɔɔ Kã́á-ɓòɖòɔ̀ kɔ̃ ɓéɖéɛ mu fɔɔ” kɛ. (1 Kɔ̀ɖéíntĩ̀ɔ̀ 6:9, 10) Baɓo céè-nyɔ̀ ɓè céèìn ma Gíɖíì-wùɖù múɛɛ nyùìn ma wuɖu mɔ̀à pòníà kɛɛ kũ̀à mú, ɓɛ́ wa ké gbàɖàùn po jè kɔ̃in zaìn. Wuɖua xwíníín mɔ̀, (1) nyɔ-kpò sɔ̃́ ɓɛ́ wa se dyi kpɔ̃ìn nyɛɛ da-nì-nì a kè (2) gàa kè gàa mɔɔ màa kè màa da-nì-nì ɔ kè (3) nimii mɔ́-mɔ́. À mu Jɛhova hwòɖò dyi dèìn, ké à mu à mìɔùn kpáná dyí nyuùn ɔ jù ké à dyi “gbàɖàùn-po-po dyi táà” ní.—1 Tɛ̀sàɖónìà 4:3, NWT.
ÐE ÐƐ MÚIN CÁ
Cɛ̃́ kà m̀ ɓɛ́ìn gbàɖàùn-po-po dyí ɓàɖàìn nyɛ, kè kà nì kpeɖe ɓèɔ̀ mú-hwɛ̀-hwɛ̀ tee mu m̀ kpáná dyí nyuùn wɛ̃ɛ jè.
3. Fɛ̃̀ìn gbàɖàùn-po-po dyi
Hwòɖò-kɔ̃-dè-gàà mɔ̀ ma kà Jòsé kɛɛ vɔ̃ ma kóɖó-kóɖó, ɓɛ́ ɔ kpeɖe ké ma mú hwɛ̀. Zà Jɛ́nɛ́sì 39:1-12 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
-
Ðɛ́ nyu ké Jòsé fɛ̃̀ìn ma kɛ́?—Dyé vɔ̀sì 9.
-
Nì hwòɖò ɖá Jòsé po ma ɖɛ mɔ̀ ɖɛ sɛ́ɖɛ́ìn dyíɛ gbɔɔ̀? Xwíníínɔ̀ nyɛ́ kɔ̃̀ jèɛ́?
Xwɛ̀ nyɔ gmɔ̀ ɓè ɓɛ́ìn Jòsé ɓo-bɛ̃̀ìn síɛ, ɓɛ́ wa ké gbàɖàùn-po-po dyi fɛ̃̀ìn zɛ̃̀ɛ̀ kɛ́? Po VÍÐÒƆ̀ kũ̀à gbo.
Jɛhova mɔ́ ɓɛ́ à séín ké gbàɖàùn-po-po kɔ̃ín pòìn. Zà 1 Kɔ̀ɖéíntĩ̀ɔ̀ 6:18 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
-
Ðɛ́ mɔ̀ ɖɛ ɓè ɓɛ́ wa ɓɛ́ìn nyuɛ ɓɛ́ nyɔ ɖò ké gbàɖàùn po kɛ́?
-
Xwɛ̀ m̀ ɓɛ́ìn gbàɖàùn-po-po dyi fɛ̃̀ìn nyɛ́?
4. M̀ ɓɛ́ìn mú-dɔ̃̀-dɔ̃̀ gbo vɔ̃ɔ
Ðɛ́ ɓɛ́ìn nyuɛ ɓɛ́ nyɔ-mú-dɔ̃̀-ɖɛ̀ mɔ̀à gbàɖàùn-po-po kɛɛ gbo-vɔ̃-vɔ̃ ké mú kàmà kɛ́? Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.
-
Ti ɖíí-gàà nìà víɖòɔ̀ múɛɛ dyéɛ ma kà ɔ hwìɖìi-poìn-ɖɛ̀ ɓè kè ɔ nyuu-ɖɛ̀ ɓè ɓɛ́ìn ma gbàɖàùn-po-po gbo wóɖóɛ kɛɛ, ɖɛ́ ɔ nyu ma kɛ́?
Ɔ kàmà mú tiɔ̀ ɖíɛ́ ɓè ɓaɖa ɓɛ́ Kɛ́ɖɛ́ì ɖeín-sí-nyɔ̀ ɓè mɔ̀ hwòɖò-kɔ̃-dè-nyɔ̀ ɓèɛɛ kéɛ nyu ɓɛ́ waà hwìɖìi-poìn-ɖɛ̀ ɓè ké mú hwɛ̀. Xwɛ̀ m̀ ɓɛ́ìn ɖɛ ɓè se dyí sɛ́ɖɛ́ìn nyɛɛ jè hwìɖìi-poìn-poìn tee dyí ɓàɖàìn nyɛ́? Zà Fèɖópĩ̀ɔ̀ 4:8 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
-
Ðɛ́ mɔ̀ ɖɛ ɓè à mɛ poìn jè hwìɖìiɛ́?
-
Xwɛ̀ Baɓoɔ wuɖuún-zà-zà kè Jɛhova bìì kũ̀à-nyu-nyu tee ɓɛ́ìn à gbo kpáa ɓɛ́ à ké nàmàùn-nyu-nyu gbo vɔ̃ kɛ́?
5. Jɛhovaa gma ɓèɔ̀ nyu à kpáná dyí
Jɛhova dyuò ɖɛ mɔ̀ ɖɛ nɔ̀mɔ̀ dyíin ɓó à bììɛɛ dyí. Ɔ cɛ̃ kà à kpeɖe ké mú hwɛ̀ɛ̀ nyu teeɛ kè kpáná ɓè sɔ̀ìn ɖé ɔ náa nyu-nyu múɛɛ jè à gbo. Zà Nɔ́ɔ́ 7:7-27 wuɖuún mɔɔ po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.
-
Xwɛ̀ gàa-dyù gmɔ̀ɔ̀ nyu ma nyɔ-mú-dɔ̃̀-ɖɛ̀ ɖò mú wáɖáìn nyɛ́?—Dyé Nɔ́ɔ́ 7:8, 9.
-
Kà Nɔ́ɔ́ 7:23, 26 nyuà cɛ̃ɛ kɛɛ, ɖɛ nyìnììn dyíin ɓè ɓɛ́ìn gbàɖàùn-po-po gbo wóɖóɛ. Ɔ jù ké à kpeɖe dyi mú hwɛ̀ tee ní, ɖɛ́ mɔ̀ fũ̀à-fṹá-ɖɛ̀ ɓè à ɓɛ́ìn dyí ɓàɖàìn nyɛ́?
-
Xwɛ̀ à kpeɖe mú-hwɛ̀-hwɛ̀ ɓɛ́ìn à gbo kpáa ɓɛ́ à ké fɛ̀ɛ̀ múàùn dyi kpáìn ɓó sè-ná-sèɛ̀ tiín nyɛ́?
Nyɔ ɖíɛ́ ɓè hwòɖò ɖá ɖɛ Baɓoɔ cɛ̃à ɓá gàa kè ɔ mùè-gàà mɔɔ màa kè ɔ mùè-màà da-nì-nì jè dyíɛɛ se ɖɛ̀ɓɛ̀ìn-ɖɛ̀ɓɛ̀ìn. Kɛɛ, Jɛhova mɔ̀à ɖɛ̀ɓɛ̀ìn-ɖɛ̀ɓɛ̀ìn Geɖepɔɔ kɛɛ mɔ́ ɓɛ́ nyɔùn séín ké fɛ̀ɛ̀ múàùn dyi kpáìn ɓó sè-ná-sèɛ̀ tiín. Ɓɛ́ à ké fɛ̀ɛ̀ nìà wɛ ɓéɖé ní, à ɓéɖé ɓɛ́ à ké ɔ gma ɓèɔ̀ dyi kpɔ̃. Zà 1 Kɔ̀ɖéíntĩ̀ɔ̀ 6:9-11 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
-
Ðé Geɖepɔɔ dyéɖéín nyɛɛ, gàa kè gàa mɔɔ màa kè màa da-nì-tò ɖòùn mɔ̀ ɖɛ gbàà?
À séín kɔ̃̀ à ké ɖɛ ɓè gbo zĩàìn ɓɛ́ à ké Geɖepɔɔ hwòɖò dyi dè. Ɔ náa nyu-nyu nyu nyɔ kpáná dyíì? Zà Wɛ́ɖɛ́ 19:8, 11 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
-
Nì hwòɖò ɖá Jɛhovaa gma ɓè ɓá à kpeɖe jè dyíɛɛ nyu fɔ̀nɔ̀-hwòɖòò? Xwíníínɔ̀ nyɛ́ kɔ̃̀ jè ɔ nìà ná mɔɔ ɔ seà ná nì kɛ́?
Jɛhova ɖà nyɔ pàɖà gbo kpá ɓɛ́ wa ké ɔ gma ɓè ɓá à kpeɖe jè dyíɛɛ dyi kpɔ̃. Ɔ ɓɛ́ìn mɔ̀ùn gbo kpáa ɖekè
NYƆ ÐÍƐ́ ƁÈ ÐÁ: “Gmaɖe-po-po nɔ̀mɔ̀ dyíin ɓó nyɔ-kpò sɔ̃́ séín ɖò pṹa, ɔ jù ké wa dyi mú ɖɛɓɛìn ní.”
-
Ðɛ́ nì mu cɛ̃ìn nyɛ́?
SṸÌN-XWÍNÍÍN
Gmaɖe-po-po mɔ̀ nyíí-ɖɛ̀ sɔ̀ìn ɖé Jɛhova gbo ɓɛ́ gàa kè ɔ gmàà ké múàùn dyi kpáìn nyɛ.
Ðɛ-kɔ̃in-kpa-kpa
-
Ðɛ́ kè ɖɛ́ ɓè mɔ̀ gbàɖàùn-po-po kɛ́?
-
Ðɛ́ ɓɛ́ìn à gbo kpáa ɓɛ́ à ké gbàɖàùn-po-po dyí ɓàɖàìn nyɛ́?
-
Xwɛ̀ à nyu kpáná dyéɛ ɔ jù ké à dyi Jɛhovaa gma ɓè ɓá à kpeɖe jè dyíɛɛ dyi kpɔ̃ níɛ́?
CƐ̃́ ÐƐ PÀÐÀ
Cɛ̃́ xwíníín kɔ̃̀ jè ɔ kpaà ɖɛ ɖé Geɖepɔɔ gbo ɓɛ́ gàa kè màa ɓɛ́ wa mɔ́à mú nìɛ̀n dyíɛɛ ɓéɖé ɓɛ́ wa kéà dyi kpɔ̃in nyɛ.
“Ðɛ́ Baɓoɔ Cɛ̃ Ɓá Màa Kè Gàa Ɓɛ́ Wa Se Dyi Kpɔ̃in Nyɛɛ Mú Nììn Jè Dyíɛ́?” (Ðúú-kɔ̃-cèè-ɖɛ̀)
Cɛ̃́ xwíníín kɔ̃̀ jè Baɓoɔ gma ɓè ɓáà gàa kè gàà mɔɔ màa kè màa da nì jè dyíɛɛ seà nyɔ ɓè nyuà náa kɛɛ mú-nyɛ́-nyɛ́ sɔ̃ xwíɖíi dè kɛ.
“Gàa Kè Gàa Mɔɔ Màa Kè Màa Da-Nì-Nì Mɔ̀ Ðɛ Gbàà?” (Ðúú-kɔ̃-cèè-ɖɛ̀)
Cɛ̃́ kà Geɖepɔɔ gma ɓè ɓáà gbàɖàùn-po-kpèɖè ɓè dyíɛɛ nyu à dyí gmɔ̀ɔ̀ kɛɛ jè.
“Màa-Ðɛ̀ Mɔɔ Gàa-Ðɛ̀ Nyá-Nyá Mɔ̀ Gmaɖe-Po-Po Cáà?” (Ðúú-kɔ̃-cèè-ɖɛ̀)
Ðé cɛ̃́ɛ́-ɖɛ̀ mɔ̀à “Wa Kpɔ̃ Ma Ḿ Kpéín-Dyé-Kà” kɛ múɛɛ, dyé ɖɛ nyu ké gàa ɖò ɓɛ́ ɔ kè ɔ mùè gàà nììn ma múɛɛ zĩàìn ma ɔ cĩ́-kàɔ̀ gbo ɓɛ́ ɔ ké Geɖepɔɔ hwòɖò dyi dèɛ.
“Baɓoɔ Zĩàìn Cĩ́-Kà Gbo” (Dyí-Gmɔ̀ìn-Gbò-Cèè-Ðɛ̀ɔ̀, Zágìɖìɔ̀ 1, 2011)
a Kpeɖe nyìnììn dyíin ɓè nìà kɛ ɓá nyuu-ɖɛ̀ kò-kò ɓè dyí. Ɔ hwɔìn kà, gmaɖe-po-po kè màa-ɖɛ̀ mɔɔ gàa-ɖɛ̀ nyá-nyá kè nyɔ-gbɔún-mɔ́ìn-mɔ́ìn ɔ kè nyɔ ɖò nììn gàa-ɖɛ̀ mɔɔ màa-ɖɛ̀ pééín-nyùìn-nyùìn gmaɖe-po-kà.
