Jízɛ̀ tɛ̀mɛ̀ìn ma ɔ ɖeín-sí-nyɔ̀ ɓèɔ̀ ɓɛ́ wa ké “ɓóɖó-kpàà nyɔ ɓèɔ̀ hwìɛ̀ sɔ̀.” (Jɔ̃́ɔ́ 15:19) Ɔ xwíníín mɔ̀ ɓɛ́ wa ké se ɓóɖó-kpàà gɔ̀mànà kè to jè sɔ̃ún po. Jàà kɛɛ, gɔ̀mànà jè sɔ̃ún-zà-zà se ná xwa fɛ̃́ìn ti séín. Wa ɓɛ́ìn à dyɔ́ ɓaɖaa ɓó ɔ náa nyu jè. Xwɛ̀ à ɓɛ́ìn gɔ̀mànà jè sɔ̃ún zàà ɓɛ́ à ké Jɛhova Geɖepɔɔ jè gboi kpɔ̃ teeɛ́?

1. Xwɛ̀ jàà Kɛ́ɖɛ́ì ɖeín-sí-nyɔ̀ ɓè nyu nyɔùn gɔ̃̀mànà ɓè dya gmɔ̀ɔ̀ kɛ́?

Kɛ́ɖɛ́ì ɖeín-sí-nyɔ̀ ɓè dyé gɔ̀mànà kpéín. À nyu ɖɛ Jízɛ̀ cɛ̃ maa, ké à “nyí ɖɛ Síízɛ̀ kɔ̃̀ kɛɛ Síízɛ̀”—ɔ xwíníín mɔ̀, à kpɔ̃ ɓóɖóɔ̀ gma ɓè dyi, hwɔìn kà ɔ nyɔ ɓè ɓáà tácì pɛ́ɛ̀ jè dyíɛ. (Máà 12:17) Baɓoɔ tɛ̀mɛ̀ìn kà nyɔùn gɔ̃̀mànà ɓè nì nyɔ nàìn, sepoɛɖe Jɛhova wɔ̃́ìn gbo jè. (Wóɖómà 13:1) Ɔ jèɛɛ, à dyuòɛ̀ dyí kà ɓɛ́ nyɔùn gɔ̃̀mànà ɓè ɓéɖé kpé wè puɛ. À gmɔ̀ìn ɖé Geɖepɔɔ kè ɔ dyɔún Kã̀à-ɓòɖòɔ̀ gbo, ɓɛ́ wa ké nyɔùn-dyùɛ̀ fũ̀à-fṹá-ɖɛ̀ ɓè dyi zĩ̀ìn.

2. Xwɛ̀ à ɓɛ́ìn tɛ̀mɛ̀ìn kà à sɔ̃ se gɔ̀mànà jè hwìɛ̀ nì kɛ́?

À ní po gɔ̀mànà jè sɔ̃ún kà Jízɛ̀ nyuɛ ma kà kɛ. Ti nyɔ ɓèɔ̀ dyé ma Jízɛ̀ɛ̀ zɛ̃̀ìn-ɖɛ̀ ɓèɔ̀ dyúáɖò, ké wa mɔ́ ɓɛ́ wa ké ma ɔ kã́á mú nyu dà ɓóɖó-kpàà kɔ̃ɛɛ, ɔ seɛ gbo wɔ̃́ìn fɔɔ. (Jɔ̃́ɔ́ 6:15) Xwíníínɔ̀ nyɛ́ kɔ̃̀ jèɛ́? Sepoɛɖe ɖɛ ɔ cɛ̃ ma sɔ̀ìn ɓóɛ gboɛ, ɔ ɖá, “ní Kã́á-ɓòɖòɔ̀ se ɓóɖó-kpà nìà kɛ dyí ɓá.” (Jɔ̃́ɔ́ 18:36) Kà à mɔ̀à Jízɛ̀ɛ̀ ɖeín-sí-nyɔ̀ ɓèɛɛ, à tɛ̀mɛ̀ìn ɖé hwìè kò-kò ɓè mú kà à ní po gɔ̀mànà jè sɔ̃ún wɛ̃. Ɔ hwɔìn kà, à ní vɔ̃ to. (Zà Mákà 4:3 wuɖuún.) À dyé ɓóɖóɔ̀ hwɔìn-ɖɛ̀ ɓè—hwɔìn kà kɔ́-ɖɔ̀ ɓèa kpéín—kɛɛ à ní ɓiè wa dyììn ɖé wa dyúa-zà-zà mú. (1 Jɔ̃́ɔ́ 5:21) Ké à ní zi gbèè-kpòò ɖò mɔɔ ɔ nàìn-nyɔ̀ ɖò gbo. Dyììn ɖé hwìè ɓè nìà kɛ kè wa tɔ̀ɔ̀ ɓè múɛɛ, à tɛ̀mɛ̀ìn kà à kpɔ̃ Geɖepɔɔ gɔ̀mànà mɔ̀à ɔ Kã́á-ɓòɖòɔ̀ kɛɛ jè gboi gàná cá kɛ.

 ÐE ÐƐ MÚIN CÁ

3. Jàà Kɛ́ɖɛ́ì ɖeín-sí-nyɔ̀ ɓè ní po gɔ̀mànà jè sɔ̃ún

Jízɛ̀ kè ɔ ɖeín-sí-nyɔ̀ ɓèɔ̀ dè ma ɓo-bɛ̃̀ nɔ̀mɔ̀ dyíin ɓó à bìì. Zà Wóɖómà 13:1, 5-7 kè 1 Píɖɛ̀ 2:13, 14 wuɖuún. Nìí, po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.

• Xwíníínɔ̀ nyɛ́ kɔ̃̀ jè à mɛ dyéà nyɔùn gɔ̃̀mànà ɓè kpéín nyɛ́?

• Ðɛ́ mɔ̀ hwìè ɖíɛ́ ɓè kɔ̃̀ mú à ɓɛ́ìn tɛ̀mɛ̀ìn kà à dyé wa kpéín nyɛ́?

Ɓó to-vɔ̃-tì ɓè ɓaɖaín, ɓóɖó-dù ɖíɛ́ ɓè ɓɛ́ìn cɛ̃ɛ kà wa se nyɔ ɖò gbo ziɛ, kɛɛ wa kpá wáká sɔ̃́ɔ̀ gbo ɖé toɔ̀ mú. Ðɛ́ mɔ̀ gɔ̀mànà jè sɔ̃ún-zà-zà jàà-kà kɛ́? Zà Jɔ̃́ɔ́ 17:16 wuɖuún. Nìí, po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.

• Ðɛ́ mɔ̀ gɔ̀mànà jè sɔ̃ún-zà-zà xwíníín nyɛ́?

Ɔ jù ké gɔ̀mànà ɖò dyi mɔ́ ɓɛ́ m̀ ké ɖɛ ɖò ɓɛ́ ɔ kè Geɖepɔɔ gmaɔ̀ se gbo muìn nyɛɛ nyu ní ɖé? Zà Àpɔ́sò 5:28, 29 wuɖuún. Nìí, po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.

• Ɔ jù ké nyɔùn-dyùɛ̀ gma kè Geɖepɔɔ gmaɔ̀ se gbo muìn ní, nyɛ́ kɔ̃̀ gma à mɛ kpɔ̃ dyiɛ́?

• M̀ ɓɛ́ìn ɖɛ ɖò kɔ̃̀ mú ɓɛ́ Kɛ́ɖɛ́i ɖeín-sí-nyɔ̀ ɓè se nyɔùn gɔ̃̀mànà ɖò wuɖu nyuɛ muɛɛ jè hwìɖìi poɛ̀nǹ?

 4. Zà gɔ̀mànà jè sɔ̃ún ɖé nì hwìɖìi-poìn-ɖɛ̀ kè nyuu-ɖɛ̀ ɓè mú

Zà 1 Jɔ̃́ɔ́ 5:21 wuɖuún. Nìí, po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.

• Ðé víɖòɔ̀ múɛɛ, xwíníínɔ̀ nyɛ́ jè Ayenge poɛ ma gbɔ ɓɛ́ ɔ ké se ma gbèè-kpòò ɖò mú kpá mɔɔ xwai-nyu-ɖɛ̀ ɓè ɓá ɓóɖó mú ɖɛ̀ɓɛ̀ jè dyí, hwɔìn kà kɔ́-ɖɔ̀ dyúa-zà-zà kɛɛ ɖò hwìɛ̀ kpá kɛ́?

• Nì hwòɖò ɖá ɔ po ma ɖɛ gbɔ hwòɖò-fɔ̀nɔ̀-kàà?

Ðɛ́ mɔ̀ ɖɛ tɔ̀ɔ̀ ɓè ɓɛ́ wa ɓɛ́ìn mú-dɔ̃̀-dɔ̃̀ jùɛ ɓá à gɔ̀mànà jè sɔ̃ún zà jè dyíɛ́? Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn.

• Xwɛ̀ à ɓɛ́ìn gɔ̀mànà jè sɔ̃ún zàà ɔ jù ké ɔ dyi péé nyu jè gbo dyi ɓó ɓóɖó kè ɓóɖó ɖò pṹa níɛ́?

• Xwɛ̀ à ɓɛ́ìn gɔ̀mànà jè sɔ̃ún zàà ɔ jù ké à dyi gbèè-po-nyɔ̀ ɓèɛ̀ gbɔ-po-ɖɛ̀ ɓè gà kɔ̃ún dyé jɛ́ɛ́ níɛ́?

• Ðɛ́ bɔ̃̀-po-nyɔ̀ ɓè mɔɔ nyɔ ɓè à kè wa kè naìn múɛɛ ɓɛ́ìn nyuɛ ɓá à gɔ̀mànà jè sɔ̃ún zà jè dyíɛ́?

 SṸÌN-XWÍNÍÍN

Kɛ́ɖɛ́ì ɖeín-sí-nyɔ̀ ɓè ku dúún kóɖó-kóɖó, ɓɛ́ wa ké se gɔ̀mànà jè sɔ̃ún po ɖé waà hwìɖìi-poìn-ɖɛ̀ kè wa wĩín-wùɖù ɔ kè waà nyuu-ɖɛ̀ ɓè mú.

Ðɛ-kɔ̃in-kpa-kpa

• Ðɛ́ à ɓéɖé ɓɛ́ à ké nyu ɓó nyɔùn gɔ̃̀mànà ɓè bììɛ́?

• Xwíníínɔ̀ nyɛ́ kɔ̃̀ jè à ní poà gɔ̀mànà jè sɔ̃ún wɛ̃́?

• Ðɛ́ mɔ̀ ɖɛ ɓè ɓɛ́ wa ɓɛ́ìn à gɔ̀mànà jè sɔ̃ún-zà-zà mú dɔ̃̀ɔ̀ kɛ́?