M̀ ɖà ɖɛ pàɖà cɛ̃́ ɓá Jɛhova jè dyí ɖé nì Baɓo-cɛ̃́-cɛ̃́ɔ̀ mú. M̀ zĩàìn ɖɛ ɖíɛ́ ɓè gbo dyɛ̀, ɓɛ́ m̀ ké ɖɛ ɓè m̀ ɖàà cɛ̃́ kɛɛ kũ̀à mú nyùìn. Kɛɛ, ɖɛ ɖò nì dyɛ̀ m̀ dyi kpɔ̃uń ɓɛ́ m̀ ké se m̀ mìɔùn xwáɖáún zà ɖé Jɛhova gbo ɓɛ́ m̀ ké níɔ kpá. Cɛ̃́ɛ́-ɖɛ̀ nìà kɛ mu dyí-gbò-ɖɛ̀ ɖíɛ́ ɓè ɓɛ́ wa ɓɛ́ìn nyuɛ, ɓɛ́ m̀ ké se níɔ kpá kɛ kè kà m̀ ɓɛ́ìn wa wɔ̃ ziɛ kɛɛ jè cɛ̃ìn.

1. Ðɛ́ jĩ̀ xwɛ̀ m̀ kɔ̃̀ m̀ ké dyí dyuò hwɛ̀ m̀ ké níɔ kpá kɛ́?

Ɓɛ́ m̀ ké níɔ kpá ní, m̀ kɔ̃̀ m̀ ké “jààɔ̀ dyí dyuò.” (1 Tímétè 2:4) Ɔ se ɖɛ ɓɛ́ m̀ kɔ̃̀ m̀ ké Baɓo dyi-diè-ɖɛ̀ séín gɔ̃̀-jù-wùɖù dyí dyuò hwɛ̀ ɓɛ́ m̀ ké níɔ kpá kɛ. Kɛ́ɖɛ́ì ɖeín-sí-nyɔ̀ ɓè ɓɛ́ wa ɖà níɔ kpá ké ɔ ɖà ti pàɖà zĩ̀ìn nyɛɛ nì ɖɛ cɛ̃́ɛń ke. (Kɔ̀ɖɔ́sĩ̀à 1:9, 10) Kɛɛ, m̀ kɔ̃̀ m̀ ké Baɓoɔ tɛ̀mɛ̀ìn-ɖɛ̀ jɛ́ɛ́ ɓè múin wɔ̃́. Dyí-poìn-kpòòɔ̀ ɛ́ɖɔ̀ ɓèɔ̀ mu m̀ gbo kpáùn, ɓɛ́ m̀ kéɛ dyí dyuò kɛbì m̀ ɖà ɖɛ goun wè dyí dyuò ní.

2. Ðɛ́ mɔ̀ ɖɛ ɖíɛ́ ɓè m̀ kɔ̃̀ m̀ ké nyu hwɛ̀ m̀ ké níɔ kpá kɛ́?

Hwɛ̀ m̀ ké níɔ kpáa ɓɛ́ìn nyɛɛ, m̀ mɛ “táà [nì] kpeɖe gbà ɓèɔ̀ dyi, ɓɛ́ [m̀] ké wa kɔ̃ín pòìn.” (Zà Àpɔ́sò 3:19 wuɖuún.) Ɔ xwíníín mɔ̀, m̀ ɓéɖé ɓɛ́ m̀ ké wììn kpá cá ɓó nàmàùn ɓè m̀ ɖà nyuɛɛ jè, ɓɛ́ m̀ ké Jɛhova ɓaà ɓɛ́ ɔ ké m̀ kɔ̃in zĩ̀ìn. Ké ɖeɛɛ, m̀ kɔ̃̀ m̀ ké kpeɖe gbà ɓè kɔ̃ín pòìn fɔɔ cá, kè ɓɛ́ m̀ kéɛ kɔ̃ jìnììn ɓɛ́ nì cĩ́-cĩ́ɔ̀ ké Geɖepɔɔ hwòɖò dyi dè. Ɓó ɔ kɔ̃in ɖeɛɛ, m̀ kɔ̃̀ m̀ ké dyí-poìn-poìn ɓèɔ̀ mú mu-mu kè Geɖepɔɔ-wùɖùɔ̀ wáɖá-wáɖá ɖé ɖíí ɓèɔ̀ hwìɛ̀ kɛɛ gbɔ dè.

3. Xwíníínɔ̀ nyɛ́ kɔ̃̀ jè m̀ mɛ ɓɔ́à gbo wɔ̃́ìn ɓɛ́ fã̀à-peɖe-peɖe kéà m̀ dyi kpɔ̃ kɛ́?

Nyɔ ɖíɛ́ ɓè peɖe fã̀à kà wa se ɖɛ kɔ̃̀ wuɖu wa ɖià ɖé Jɛhova gboɛɛ nyuɛ ɓɛ́ìn muɛ. Ɔ mɔ̀ jàà kà ɓɛ́ nì mu ɖɛ xwa bĩìn tiɔ̀ ɖíɛ́ ɓè ɓaɖa kà ɔ nyu ma gàa kè màa ɓè ɓɛ́ wa mɔ̀ ma hwòɖò-kɔ̃-dè-nyɔ̀ ɓè ɓɛ́ Baɓoɔ cɛ̃ wa jè kɛɛ gbo kpáa kɛ. Kɛɛ, Jɛhova seɛ hwìɖìi dè ɓɛ́ ɔ ɓiè-nyɔ̀ ɓè ké se kɛɛ ɖò ɓéɖé fɔɔ. (Zà Wɛ́ɖɛ́ 103:13, 14 wuɖuún.) Ɔ dè ɔ hwòɖò dyi ɔ jù ké m̀ dyi vɔ̃ ɓɛ́ m̀ ké ɖɛ mɔ̀ ɖɛ sɛ́ɖɛ́ìn dyíɛɛ nyu ní. Jàà kɛɛ, Jɛhova cɛ̃ɛ à gbo wáɖáá kà ɓɛ́ ɖɛ ɖò “se à Geɖepɔɔ ɖɛ̀ɓɛ̀ìn-ɖɛ̀ɓɛ̀ìn . . . gbo zàà ɓɛ́ìn gàná cáa.”—Zà Wóɖómà 8:38, 39 wuɖuún.

 ÐE ÐƐ MÚIN CÁ

4. Dyuò Jɛhova dyí nɔ̀mɔ̀ dyíin

5. Zi dyí-gbò-ɖɛ̀ ɓè ɓɛ́ìn nyuɛ ɓɛ́ m̀ ké se níɔ kpá kɛɛ wɔ̃

 6. Dè Jɛhova hwòɖò kɔ̃

7. Ɓéɖé zùo-po-hwòɖò ɓó Jɛhova ɖɛ̀ɓɛ̀ìn-ɖɛ̀ɓɛ̀ìnɔ̀ jè

 SṸÌN-XWÍNÍÍN

Dyììn ɖé Jɛhova gbo-kpá-sɔ̃̀ múɛɛ, m̀ ɓɛ́ìn dyí-gbò-ɖɛ̀ ɓè ɓɛ́ wa ɓɛ́ìn nyuɛ ɓɛ́ m̀ ké se níɔ kpá kɛɛ wɔ̃ ziɛ.

Ðɛ-kɔ̃in-kpa-kpa

• Ðɛ́ jĩ̀ xwɛ̀ m̀ kɔ̃̀ m̀ ké dyí dyuò ɖé Baɓoɔ mú hwɛ̀ m̀ ké níɔ kpá kɛ́?

• Ðɛ́ ɓè m̀ kɔ̃̀ m̀ ké gbo zĩàìn hwɛ̀ m̀ ké níɔ kpáa ɓɛ́ìn nyɛ́?

• Xwíníínɔ̀ nyɛ́ kɔ̃̀ jè m̀ mɛ ɓɔ́à gbo wɔ̃́ìn ɓɛ́ fã̀à ké m̀ dyi kpɔ̃ kɛ́?