Dyi-kpɔ̃ìn-nyɔ̀ ɖìè ɓè dèɛ̀ hwìɖìi kà múà wa ɓéɖé ma ɓó wa dyi-kpɔ̃ìn-wèɔ̀ ɓaɖaa mu ná sèìn kánáá puɛ. Ké ɔ ɓɛ́ìn ná nìɛ̀. Kɛ́ɖɛ́ì ɖeín-sí-nyɔ̀ ɓè ɓɛ́ wa mɔ̀ dyi-kpɔ̃ìn-nyɔ̀ ɓè ɓɛ́ wa ɖà mú hweɖeìn, ké wa ɖà vɔ̃ kóɖó-kóɖó ɓɛ́ wa ké Baɓoɔ náún-po-wùɖù ɓè dyi kpɔ̃ kɛɛ dyuòɛ̀ dyí kà ɔ ɓɛ́ìn ná kpáa kɛ.

1. Ðɛ́ mɔ̀ náún-po-wùɖù ɓɛ́ Baɓoɔ nyí dyú-ɓà ɓè kɛ́?

Jɛhova gã dyú-ɓàɔ̀, ɓɛ́ ɔ ké xwéɖé-dùɔ̀ kɔ̃in nì. (Zà Ìfísĩ̀ɔ̀ 5:23 wuɖuún.) Jɛhova mɔ́ ɓɛ́ ɔ ké ɖɛ ɓè ɓɛ́ wa mu xwéɖé-dùɔ̀ kpáná dyí nyuùn wɛ̃ɛ gbɔ po. Baɓoɔ po nyɔ́nɔ́-ɓà ɓè náún, ké ɔ ɖá: “Ɓè mɛ ɖɛ̀ɓɛ̀ ɓèɛ̀ gmàà ɓèɔ̀ mú.” (Ìfísĩ̀ɔ̀ 5:25) Ðɛ́ mɔ̀ ɔ xwíníín nyɛ́? Nyɔ́nɔ́-ɓà ɓɛ́ ɔ ɓéɖé ɖɛ̀ɓɛ̀ìn-ɖɛ̀ɓɛ̀ìn nyɛɛ kpɔ̃ ɔ gmàà kpeɖeín-nɔ̀mɔ̀-kà ɖé taún kè ɖé nyɔ ɓè hwìɛ̀. Ɔ gmɔ̀ ɔ dyí, ké ɔ vɔ̃ ɓɛ́ ɔ ké ɔ múàùn po, kè ɓɛ́ ɔ ké ɖɛ ɓè ɔ kɔ̃̀ ɔ ké ɓéɖéɛɛ ɔ nyí. (1 Tímétè 5:8) Ðɛ mɔ̀ ɖɛ kpa ɖɛ jɛ́ɛ́ kɛɛ mɔ̀, ɔ kpá ɔ gmàà gbo, ɓɛ́ ɔ ké Jɛhova bũ̀in xwɛ̃́ìn mìɔ. (Máfíò 4:4) Ɔ hwɔìn-kà, ɔ kè ɔ gmàà ɓɛ́ìn ɓaà, ké wa sɔ̃́ɔ̀ ɓɛ́ìn Baɓoɔ wuɖuún zàà. Ɔ jù ké gàaɔ̀ dyi ɔ gmàà jè gbo gmɔ̀ ɖé ɖɛ̀ɓɛ̀ìn-ɖɛ̀ɓɛ̀ìn mú ní, ɔ kè Jɛhova mu gbo-kpɔ̃ìn-kpɔ̃ìn ɓéɖéìn kánáá pu.—Zà 1 Píɖɛ̀ 3:7 wuɖuún.

2. Ðɛ́ mɔ̀ náún-po-wùɖù ɓɛ́ Baɓoɔ nyí Màa ɓè kɛ́?

Geɖepɔɔ Wuɖuɔ̀ cɛ̃ɛ kà ɓɛ́ màaɔ̀ “mɛ dyé [ɔ] dyú-ɓà kpéín” nyɛ. (Ìfísĩ̀ɔ̀ 5:33) Xwɛ̀ ɔ ɓɛ́ìn náa nyuɛ kɛ́? Ɔ ɓɛ́ìn ɔ dyú-ɓàɔ̀ kpeɖe nɔ̀mɔ̀ dyíin ɓèɔ̀ kè ɔ dúún-ku-ku ɓó ɔ kè dyú ɓèɔ̀ gbo gmɔ̀ jèɛɛ jè hwìɖìi poɛ̀n. Ké ɖeɛɛ, ɔ ɓɛ́ìn kpéín-dyé-dyé tɛ̀mɛ̀ìn dyììn ɖé ɖɛ ɓè ɓɛ́ ɔ dyú-ɓàɔ̀ po gbɔɛɛ sɔ̃-xwíɖíi-dè-dè mú, ɔ kè dyììn ɖé ɔ gbo-wùɖù-wùɖù mú nɔ̀mɔ̀ dyíin, kè ɓɛ́ ɔ ké se ɔ cã̀-cã̀ cɛ̃ kɛbì ɔ mɛ se jàà-po-nyɔ̀ kɛ.

3. Xwɛ̀ dyi-kpɔ̃ìn-nyɔ̀ ɓè ɓɛ́ìn waà dyi-kpɔ̃ìn-kpɔ̃ìnɔ̀ dyi kùɛ̀n nyɛ́?

Baɓoɔ cɛ̃ɛ ɓá dyi-kpɔ̃ìn-nyɔ̀ ɓè jè dyí, ké ɔ ɖá wa sɔ̃́ɔ̀ mu xwaún kpáìn, “ɓɛ́ wa ké nyɔ dyúáɖò jù.” (Máfíò 19:5) Ɔ xwíníín mɔ̀, wa mɛ vɔ̃ ɖɛ séín ɖò muɛ nyuùn ɓɛ́ wa ké xwaún sɔìn nyɛɛ gbo. Wa nyuɛ náa dyììn ɖé wa sɔ̃́ɔ̀ da-hwèɖè-hwèɖè mú kè ɖɛ ɓè kpɔ̃ wa hwòɖò kè kà wa hwòɖò nyu nìɛ̀ kɛɛ wa mùè ɖò gbo-cɛ̃-cɛ̃ mú ɖé ɖɛ̀ɓɛ̀ìn-ɖɛ̀ɓɛ̀ìn mú. Wa ní wɔ̃́ ɓɛ́ ɖɛ ɖò mɔɔ nyɔ ɖò ké ɖɛ kpa mìɔ ɖé wa gbo ɓɛ́ ɔ ké wa mùè ɖò dyí zi ɔ sèìn dyɛ Jɛhova. Wa màìn wa mìɔùn mú kóɖó-kóɖó cá, ɓɛ́ wa ní kɔ̃̀ ɖà nyɔ kà kò ɖò gbo ɓaɖaìn fɔɔ.

 ÐE ÐƐ MÚIN CÁ

4. Ðyú-ɓà ɓè—ɓè ɖɛ̀ɓɛ̀ ɓèɛ̀ gmàà ɓè mú ɓɛ́ ɓè ké wa jè gbo kɔ̃̀

5. Màa ɓè—ɓè ɖɛ̀ɓɛ̀ ɓèɛ̀ dyú-ɓà ɓè mú, ɓɛ́ ɓè ké wa kpéín dyé

Baɓoɔ po màa ɓè kpéí, ɓɛ́ wa ké waà dyú-ɓà ɓè kpéín dyé kɛbì wa mɛ mɔ̀ Jɛhova ɓiè-nyɔ̀ mɔɔ wa se ɔ ɓiè-nyɔ̀ kɛ. Zà 1 Píɖɛ̀ 3:1, 2 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• Ɔ jù ké m̀ dyi dyú-ɓà ɓɛ́ ɔ se jàà-po-nyɔ̀ kɛ ɓéɖé ní, ɔ nì wáɖáá kà nì muɛ mɔ́ùn ɓɛ́ ɔ ké Jɛhova ɓièɛ. Nì hwòɖò ɖá ɖɛ́ mu ɔ gbo kpáùn jɛ́ɛ́ cá kɛ́—ɔ Geɖepɔɔ-wùɖù gbo wáɖá-wáɖá teeè mɔɔ kpeɖe nɔ̀mɔ̀ dyíin tɛ̀mɛ̀ìn-tɛ̀mɛ̀ìnǹ kè ɔ kpéín-dyé-dyéè? Xwíníínɔ̀ nyɛ́ kɔ̃̀ jèɛ́?

Dyú-ɓà ɓè kè waà gmàà ɓè ɓɛ́ìn gbo kpɔ̃ìn, ɓɛ́ wa ké ɖɛ nɔ̀mɔ̀ dyíin ɓè gbɔ po. Kɛɛ, tiɔ̀ ɖíɛ́ ɓè ɓaɖaín, màa ɖò ɓɛ́ìn fɔ̀nɔ̀-hwòɖò kà kò ɖò ɓéɖéɛ ɓɛ́ ɔ kò ɓó ɔ dyú-ɓà nììnɔ̀ gboɛ. Ɔ ɓɛ́ìn ɖɛ mɔ̀ ɔ hwìɖìi-poìn-ɖɛ̀ kɛɛ cɛ̃ɛ ɖé wuɖu ɓɛ̀ɖɛ̀ɛ̀-ɓɛ̀ɖɛ̀ɛ̀ kè  kpéín-dyé-dyé mú, kɛɛ ɔ ɓéɖé ɓɛ́ ɔ kéɛ dyí dyuò kà Jɛhova ɖà gàaɔ̀ kpé nyí, ɓɛ́ ɔ ké ɖɛ mɔ̀ ɖɛ nɔ̀mɔ̀ dyíin ɓó xwéɖé-dùɔ̀ bììɛɛ gbɔ poɛ. Ɔ vɔ̃ kóɖó-kóɖó ɓɛ́ ɔ ké ɖɛ ɓɛ́ gàaɔ̀ mu gbɔ poùn wɛ̃ɛ sɔ̃ xwíɖíi dè. Dyììn ɖé ɔ náa nyu-nyu múɛɛ, ɔ kpá xwéɖé-dù gànáà gbo, ɓɛ́ ɔ ké múàùn nì. Zà 1 Píɖɛ̀ 3:3-5 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwɛ̀ Jɛhova hwòɖò nyu nìɛ̀ ɔ jù ké màa ɖò dyi ɔ dyú-ɓà kpéín dyé níɛ́?

6. Ɓè ɓɛ́ìn fũ̀à-fṹá-ɖɛ̀ ɓè wɔ̃ ziɛ ɖé ɓè dyi-kpɔ̃ìn-kpɔ̃ìnɔ̀ mú

 SṸÌN-XWÍNÍÍN

Nyɔ́nɔ́-ɓà ɖò kè ɔ gmàà ɓɛ́ìn múàùn kpáa ɔ jù ké wa dyi mú ɖɛɓɛìn, ké wa dyi wa mùè ɖò kpéín dyé, ké wa dyi Baɓoɔ náún-po-wùɖù ɓè dyi kpɔ̃ ní.

Ðɛ-kɔ̃in-kpa-kpa

• Ðɛ́ nyɔ́nɔ́-ɓà ɖò ɓɛ́ìn nyuɛ ɓɛ́ dyi-kpɔ̃ìn-kpɔ̃ìnɔ̀ ké múàùn nì kɛ́?

• Ðɛ́ màa ɖò ɓɛ́ìn nyuɛ ɓɛ́ dyi-kpɔ̃ìn-kpɔ̃ìnɔ̀ ké múàùn nì kɛ́?

• Ɔ jù ké m̀ dyi dyi-kpɔ̃ìn-nyɔ̀ jùìn, Baɓoɔ hwìè-da-zàìn-wùɖù ɓèɔ̀ nyɛ́ ɓɛ́ìn m̀ gbo kpáa ɓɛ́ nì dyi-kpɔ̃ìn-kpɔ̃ìnɔ̀ ké dyi kuɛ́?